IOANE, 10
10
O LE MATAUPU X.
O Iesu le leoleo mamoe lelei.
1E moni, e moni, ou te fai atu ia te outou, o le le ui atu i le faitotoa i totonu o le lotoā mamoe, a e alu ae i ai i se tasi mea, o le gaoi lea ma le fao mea. 2A o lē ui atu i le faitotoa, o le leoleo mamoe lava lea. 3E to mai ia te ia le puipui e le leoleo faitotoa: e faalogo foi mamoe i lona leo: e valaau e ia i ana lava mamoe i o latou igoa; na te ta‘ita‘i atu foi ia te i latou. 4Pe a tuuina atu e ia ana lava mamoe, e muamua atu ia i ai; ona mulimuli atu ai lea o mamoe ia te ia, anā ua latou iloa lona leo. 5A e le mulimuli atu i latou i se tagata ese, a e sosola ese ia te ia; auā latou te le iloa leo o tagata ese. 6Ua fetalai atu Iesu ia te i latou lena faataoto, a e lei lagona e i latou mea ua ia fetalai atu ai ia te i latou. 7Ona toe fetalai atu lea o Iesu ia te i latou, E moni, e moni, ou te fai atu ia te outou, o a‘u ne‘i o le faitotoa o mamoe. 8O i latou uma e na muamua ia te au, o gaoi i latou ma fao mea; a e lei faalogo mamoe ia te i latou. 9O a‘u nei o le faitotoa; afai e ui mai se tasi ia te au, e faaolaina ia, e alu atu ma ulu fafo, e maua foi e ia le mea e ‘ai. 10O le gaoi, e leai se tasi mea e sau ai na ona ai gaoi, ma fasi, ma faaumatia: ua ou sau ina ia latou maua le ola, ia maua atili ai lava. 11O a‘u le leoleo mamoe lelei; e tuu atu e le leoleo mamoe lelei o lona ola e sui a‘i mamoe. 12A o le auauna, e le o le leoleo foi o ia, e le ana le lafu mamoe; ua vaai atu ia i le luko ua sau, ona lafoai lea e ia o mamoe, a e sola; ona puea lea o mamoe e le luko, ma faasalalauina. 13E sola le auauna, auā o le auauna lava ia, e le manatu foi o ia i mamoe. 14O a‘u nei o le leoleo mamoe lelei; ua ou iloa a‘u mamoe, ua iloa foi a‘u e a‘u mamoe; 15pei ona silafia a‘u e le Tamā ma ou iloa le Tamā. Ou te tuuina atu foi lo‘u ola e sui a‘i mamoe. 16Ua ia te au foi isi mamoe e le o i lenei lotoā; e tatau ona ou ta‘ita‘iina mai o i latou foi, e faalogo foi i latou i lo‘u leo; ona tasi ai lea o le lafu mamoe, ma le leoleo mamoe e toatasi. 17O le mea lea e alofa mai ai le Tamā ia te au, auā ou te tuuina atu lo‘u ola, ina ia ou toe au mai ai. 18E leai se tasi na te aveeseina ia te au, a e peitai a‘u, ou te tuuina atu e a‘u lava. O ia te au le pule e tuuina atu, o ia te au foi le pule e toe au mai ai; ua ou maua lena poloaiga mai lo‘u Tamā. 19Ona toe vaeluaina lea o Iutaia i ia upu. 20Ua faapea ane nisi o i latou e toatele, Ua ia te ia le temoni, o le vale foi o ia; pe se a le mea tou te faalogologo ai ia te ia? 21A ua faapea ane nisi, E le ni upu ia a se tagata ua uluitinoina; e mafai ea e se temoni ona ia faapupulaina mata o tauaso?
22Ua fai i Ierusalema le tausamiga o le faaulufalega, o ona po foi o le tausaga maalili. 23Ua femaliuai Iesu i le malumalu i le faapaologa o Solomona. 24Ona vagavagai lea o Iutaia ia te ia, ua latou faapea mai ia te ia, A faaletonu o matou manatu ia te oe seia afea? Afai o oe o le Keriso, ia matuā ta‘utino mai ia te i matou. 25Ua tali atu Iesu ia te i latou, Ua uma ona ou ta‘u atu ia te outou, a ua outou le talitonu mai lava. O galuega ou te faia i le suafa o lo‘u Tamā, e molimau mai ia ia te au. 26A ua outou le talitonu mai lava outou; auā e le ni a‘u mamoe outou, pei ona a‘u fai atu ia te outou. 27O a‘u mamoe e faalogo mai i latou i lo‘u leo, ua ou iloa foi i latou, ua latou mulimuli mai foi ia te au; 28ou te avatu foi le ola e faavavau ia te i latou; latou te le fano lava e oo i le faavavau, e le mafai lava e se tasi ona fao ia te i latou ai lo‘u lima. 29O lo‘u Tamā o le na foaiina mai i latou ia te au, e sili o ia i nisi uma lava; e le mafai e se tasi ona faoa i latou i le lima o lo‘u Tamā. 30O a‘u nei ma le Tamā, e tasi lava i maua.
31Ona toe fetagofi lea o Iutaia i maa, e fetogi ia te ia. 32Ona faapea atu lea o Iesu ia te i latou, E tele galuega lelei ua ou faaalia ia te outou mai lo‘u Tamā; o se fea ea o ia galuega tou te fetogi mai ai ia te au. 33Ua tali mai Iutaia ia te ia, ua faapea mai, E le se galuega lelei matou te fetogi ai oe, a o le upu leaga; auā o oe o le tagata, a ua e fai oe ma Atua. 34Ua tali atu Iesu ia te i latou, E lei tusia ea i la outou tulafono, Na ou fai atu O atua outou? 35Afai na ta‘ua e ia o atua i latou e ua i ai le afioga a le Atua, e le mafai foi ona faaleaogaina le Tusi; 36tou te faapea ea i le ua faapaiaina ma auina mai e le Tamā i le lalolagi, Ua e upu leaga, auā ua ou fai atu, O a‘u nei o le Atalii o le Atua? 37Afai ou te le faia galuega a lo‘u Tamā, aua tou te talitonu mai ia te au. 38A e afai ou te faia, e ui lava ina outou le talitonu mai ia te au, ia outou talitonu i galuega; ina ia iloa e outou, ma ia talitonu, o i totonu ia te au le Tamā, o a‘u foi o i totonu ia te ia. 39Ona toe fia pue lea o i latou ia te ia; a ua maliu ese o ia i o latou lima.
40Ua toe maliu ane o ia i tala atu o Ioritana, i le mea na uluai papatiso ai e Ioane; ua nofo foi o ia i lea mea. 41Ona o mai lea ia te ia o tagata e toatele, ua faapea foi i latou, E leai lava se faailoga na faia e Ioane; a o mea uma na fai mai ai e Ioane ia te ia nei, e moni ia. 42E toatele foi e na talitonu ia te ia i lea mea.
Trenutno odabrano:
IOANE, 10: SOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Samoan Edited Old Version © Bible Society of the South Pacific, 2017.