IOANE, 20
20
O LE MATAUPU XX.
O le toe soifua mai o Iesu.
1O le uluai aso o le vaisapati, ile taeao, a o pouliuli lava, ua alu ane ai Maria le Makatala i le tuugamau; ua vaai atu i le maa ua aveeseina i le tuugamau. 2Ona momo‘e lea o ia, ua alu ia Simona Peteru ma le tasi soo sa alofaina e Iesu, ua fai atu ia te i laua, Ua latou aveeseina le Alii i le tuugamau; matou te le iloa foi le mea ua latou tuuina ai o ia. 3Ona o atu lea o Peteru ma le tasi soo, ua la o atu i le tuugamau. 4Ua taufetuli i laua uma; a o le tasi soo, ua momo‘e atu ua muamua ia Peteru, ua muai oo i le tuugamau. 5Ua punou o ia, ona iloa ai lea o ie na tanuma‘i ua tuu; a e lei ulu atu ai o ia. 6Ona oo atu lea o Simona Peteru, sa mulimuli atu ia te ia, ua ulu atu ia i totonu i le tuugamau, ua vaai atu i ie na tanuma‘i ua tuu, 7ma le solosolo sa i lona ao, e lei tuu faatasi ma ie na tanuma‘i, a ua tuu ese, ma taataai i le tasi mea. 8Ona ulu atu lea o le tasi soo na muai oo i le tuugamau, ua vaai atu, ona talitonu lea o ia. 9Auā o ona po ia e lei iloa ai e i latou le Tusi, ia toe tu o ia nai e ua oti e tatau ai. 10Ona toe ō lea o ia soo i o laua aiga; 11a o Maria, ua tu o ia i fafo e lata ane i le tuugamau, ua tagi ai. Ua tagi o ia ma punou i le tuugamau, 12ona iloa atu lea e ia o agelu e toalua ua oofu i ofu sisina, ua nonofo i le mea na tuu ai le tino o Iesu; o le tasi e i ulu, o le tasi e i vae. 13Ua la fai mai ia te ia, Funa e, se a le mea e te tagi ai? Ua faapea atu ia ia te i laua, Auā ua latou ave ese lo‘u Alii, ou te lei iloa foi le mea ua latou tuuina ai o ia. 14Ua ia fai atu na upu, ona fāliu lea i tua; ona iloa atu lea e ia o Iesu ua tu mai; a e lei iloa e ia o Iesu lava lea. 15Ua fetalai atu Iesu iia te ia, Funa e, se a le mea e te tagi ai? O ai ea e te sailia? A o le fafine, fa te ia o le leoleo ia o le fanua, ua fai mai ia te ia, Le Alii e, afai ua e ave ese ia te ia, ta‘u mai ia ia te au po o fea le mea ua e tuuina ai o ia; ona ou aveeseina lea o ia. 16Ua fetalai atu Iesu ia te ia, Maria e. Ona fāliu lea o ia, ua fai mai ia te ia, Raponi e, (o lona uiga, Le a‘oa‘o e). 17Ua fetalai atu Iesu ia te ia, Aua e te tago mai ia te au, auā ou te lei alu ae lava i lo‘u Tamā; a ia e alu i o‘u uso, ma fai atu ia i latou, Ou te alu ae i lo‘u Tamā ma lo outou Tamā, fo o lo‘u Atua ma lo outou Atua. 18Ua alu atu Maria le Makatala, na faailoa atu i le au soo, ua iloa ia e le Alii, na fetalai mai foi e ia o ia mea ia te ia.
19Ua oo i le afiafi, o le uluai aso lea o le vaisapati, ua punitia faitotoa o le mea na potopoto ai le au soo, ona o le fefe ia Iutaia; ua maliu atu Iesu, ua tu i totonu; ona fetalai atu lea o ia ia te i latou, Ia outou manuia. 20Ua ia fetalai atu lea mea, ona faaali atu lea ia te i latou o ona lima ma lona itu. Ona olioli ai lea o le au soo ina ua latou vaai atu i le Alii. 21Ona toe fetalai atu lea o Iesu ia te i latou, Ia outou manuia. Faapei ona auina mai o a‘u e le Tamā, e faapea foi ona ou aauina atu outou. 22Ua ia fetalai atu lea mea, ona mānava atu lea o ia, ma faapea atu ia te i latou, Ia outou talia le Agaga Paia. 23O i latou uma lava tou te faamagaloina ai a latou agasala, e faamagaloina ia ia i latou; o i latou uma lava tou te tuu pea i ai a latou agasala, e tuu pea lava ia.
24A o Toma o le tasi o le toasefulu ma le toalua, ua igoa ia Titumo, e lei i ai o ia ma i latou ina ua maliu atu Iesu. 25Ona fai atu lea o le au soo uma ia te ia, Ua matou iloa atu le Alii. A ua fai mai o ia ia te i latou, Afai ou te le vaai atu i ona lima, i mea na tutu‘i ai fao, ma tuu lo‘u tamatamai lima i mea na tutu‘i ai fao, ma tuu lo‘u lima i lona itu, ou te le talia lava. 26Ua mavae aso e valu, ua toe faatasi ona soo i le fale, ua faatasi ai foi i latou ma Toma; ua maliu atu Iesu, a o pupuni faitotoa, ua tu foi o ia i totonu, ma fetalai atu, Ia outou manuia. 27Ona fetalai atu lea o ia ia Toma, Au mai ia lou tamatamai lima iinei, vaai mai foi i o‘u lima; au mai ia foi lou lima, ma tuu mai i lo‘u itu; aua foi e te masalo vale, a ia e talitonu. 28Ona tali mai lea o Toma, ua faapea mai ia te ia, Lo‘u Alii e, ma lo‘u Atua e. 29Ua fetalai atu Iesu ia te ia, Toma e, ua e talitonu, auā ua e vaai mai ia te au. Amuia o e le vaai mai, a e talitonu mai pea.
30O isi foi faailoga e tele na faia e Iesu i luma o ona soo, e lei tusia i lenei tusi. 31A ua tusia ia mea, ina ia talitonu ai outou, o Iesu o le Keriso lava ia, o le Alo o le Atua; ina ia maua ai foi le ola i lona suafa e outou o e talitonu.
Trenutno odabrano:
IOANE, 20: SOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Samoan Edited Old Version © Bible Society of the South Pacific, 2017.