Yowaana 16
16
1“Mbabooleere ebyo byoosi, hu muhaye ohuwaamo omwooyo. 2Bachia ohubeerusaanga mu Sinagoogi; bwadyeeri, esiha sichia ohwoola, buli obeeta abaaseenge ati ali ohuhalaabanira Nasaae. 3Ebyo bachia ohubiholaanga olwohuba haba sibamanyire Laata, kata syesi haba sibaamanyire daawe. 4Nae ebyo mbabooleere, hu bulaanu esiha syabyo nisyahoole, munyale ohwiichulisa muti ndamala ohubibaboolera.
Omulimo kwa Mwooyo Mwoolerefu
“Bino haba sindababooleraho muhuchaaka, olwohuba ndali siisiiri naang'we. 5Nae bulaanu ndi ohuchia eyiri oyo owaanduma; nae abulao mulala hweeng'we owuundeebaho ati, ‘Ochia yeena?’ 6Nae olwohuba mbabooleere ebiindu bino, emyooyo kyeeng'we kichuulemo esibeera. 7Kata katyo ese mbaboolere obwadyeeri buno; sihoonya eng'we ese ohuwaao, olwohuba nitawaao, Omukeraki haba siyaheechie yi muli daawe. Nae nimbwaao, njia ohubamutumira. 8Mani niyaheeche, yahoolobye#16:8 yahoolobye: Oba ‘yahateng'eng'ase.’ esyaalo hulw'ebyonoono, neende hulw'obuluungifu, neende hulw'ohuheengerwa omusaango. 9Ohweema hulw'ebyonoono, olwohuba haba sibafukiiriramo daawe; 10ohweema hu buluungifu, olwohuba ndi ohuchia eyiri Laata, mani haba simuchia ohuumbonaho haandi; 11ohweema hu heenga y'emisaango, olwohuba omutuki w'esyaalo sino, yamala hale ohuheengerwa omusaango.
12“Ese siisiiri neende ebiindu biingi muno eby'ohubaboolera, nae eng'we haba simunyala ohubyesimiirisira bulaanu buti daawe. 13Nae Mwooyo ow'obwadyeeri oyo niyaheechie, achia ohuboosa hu bwadyeeri bwoosi koti lu bwaaka; olwohuba oyo haba s'achia ohulomaloma hulw'obunyala bwae omweene, nae buli sy'acha ohuwuliraanga nisyo sy'acha ohubabooleraanga. Haandi yahababoolereenge ebiindu byahakweeo. 14Oyo achia ohuunjisamo oluyaali, olwohuba yahabukuleenge hu byaange, mani ababoolera. 15Ebyo byoosi bi Laata ali nabyo byaange nibyo; sakira mboolere endi, yahabukuleenge hu byaange mani ababoolera.
Engisa neende esangaalo
16“Mu siha sidiidi haba simuchia ohuumboneraho elalira; haandi mu siha sidiidi, haandi muchia ohuumbona.” 17Abeeki bae baandi bachaaka ohuboolanira abeene-na-beene bati, “Siina esyo sy'atuboolera ati, ‘Mu siha sidiidi haba simuchia ohuumboneraho elalira, haandi ati, mu siha sidiidi, haandi muchia ohuumbona’; haandi ati, ‘Ndi ohuchia eyiri Laata’?” 18Mani nibateebana bati, “Yeekesa siina syeene n'aboola ati, ‘Mu siha sidiidi’? Efwe haba sihumanyire syali ohweekesa daawe.” 19Yesu yamanya ati bali nibadaha ohumuteeba; mani n'ababoolera ati, “Sino nisyo si muli ohuteebanaangaho abeene-na-beene, si mboolere endi, ‘Mu siha sidiidi haba simuchia ohuumboneraho elalira, haandi mu siha sidiidi muchia ohuumbona’? 20Mbaboolera obwadyeeri bweene endi, eng'we muchia ohulira haandi muchereenjese, nae esyaalo sichia ohusangaala; eng'we muchia ohuba mu sibeera, nae esibeera syeeng'we sichia ohweehola esangaalo. 21Omuhasi n'alumwa naali aambi ohwiibula, aba neende obuchuuni muno, olwohuba esiha syae siba simalire ohwoola; nae n'amala ohweehoonya, yeebiriraanga obuchuuni obwo, hulw'esangaalo mbwe omuundu aba yebuulwe mu syaalo muno. 22Mani sakira eng'we muli neende esibeera esiha sino, nae ndahababone haandi mani emyooyo kyeeng'we kisangaale, abuleo omuundu yeesi onyala ohubatusaho esangaalo lyeeng'we elyo. 23Hu ludaalo olwo simwahabeeho neende esiindu syoosi si musaba. Mbaboolera obwadyeeri bweene endi, Laata achia ohubaberesa buli siindu si mwahasabe mu liita lyaange. 24Ohwoola buti mutaasabaho esiindu syoosi mu liita lyaange. Musabe, mani muchia ohunyoola, hu sangaalo lyeeng'we linyale ohuba eliichufu.
Ohuyiingira esyaalo
25“Ebyo mbabooleere mu ngaado. Nae esiha sichia ohwoola, haye ohulomalomaanga naang'we mu ngaado, ohutusaho mbaboolere tiiri ebidiira hu Laata. 26Hu ludaalo olwo, muchia ohusaba mu liita lyaange. Nae haba si ndi ohubabooleraanga endi njia ohubasabira eyiri Laata daawe. 27Laata mweene yabaheera, olwohuba eng'we mwesi mwaaheera, haandi mufukiirira muti ndatula eyiri Laata. 28Ndatula eyiri Laata, mani ninjicha hu syaalo. Bulaanu ndeha esyaalo, ndi ohuchia eyiri Laata.”
29Abeeki bae mani nibamuboolera bati, “Bulaanu mbao oli ohulomaloma tiiri, ataali mu ngaado daawe! 30Bulaanu humanyire huti omanyire ebiindu byoosi, haandi huti abulao omuundu yeesi ohoyere ohuhuteebaho esiindu syoosi daawe. Sakira bulaanu hufukiirira huti watula eyiri Nasaae.” 31Yesu yabakobolamo n'abateeba ati, “Bulaanu mufukiirira? 32Mani esiha siri aambi ohwoola, haandi simalire ohwoola, musalaane, buli muundu akobole engo wae, muundehe syeeng'ene; nae haba si ndi syeeng'ene daawe, olwohuba Laata ali naange. 33Mbabooleere ebyo, hu munyale ohuba neende omuleembe ohuumbitiramo. Hu syaalo huno muchia ohuba neende ebidinyu; nae mugume, ese malire ohuyiingira esyaalo.”
Trenutno odabrano:
Yowaana 16: SAMIA
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
©Bible Society of Kenya, 2019
©Bible Society of Uganda, 2019