Yohane 16
16
1“Mfi nasosa kuli mwebo ukuti mwifuma muchichetekelo. 2Bakumufutwila kunse yamananda yakulombelamo Lesa. Mwandi inshita ikoyisa iyakuti abantu bakamwipaya nokulanguluka ukuti emo bakobombela Lesa imilimo iiweme. 3Abantu bakuchita mfi kuli mwebo pantu tabayishibapo Bata nangu nebo. 4Nomba mfi namweba nebo ukuti ulo yakwisa inshita yabo iyakufichita mfi, mwakwibukisha ifyo mwebele.
Umulimo wa Mupashi Wabuta
“Nshamwebelepo mfi fintu pakutatika pakuti nali pamo namwe. 5Nomba nkoya kuli uyo uwantumine, elo tapali nangu umo uwaku mwebo uukomfumba ati, ‘Nikwisa mukoya?’ 6Nipamulandu wakuti namweba mwebo amashiwi nga echo imitima yenu yayiwulamo nechikonko. 7Nachine nkomweba ati, kuli mwebo chiweme ukuti mfumepo mpano, pakuba nga nshifuminepo, Umwafwilishi tayise kuli mwebo. Nomba nga naya, nakumutuma kuli mwe. 8Ulo akwisa, akoyisa kushinina ichalo nabantu mukubifya kwabo, ubulungami namukupingula kwaku Lesa. 9Akubashinina pamulandu wabubi, pakuti tabachetekelepo muli nebo. 10Akubashinina pamulandu wabulungami, pantu nkoya kuli Bata, elo tamwayise kumbonapo nakambi iyowo. 11Akubashinina pamulandu wabupingushi, pantu Satana, imfumu yabantu ababi abamuchalo, alipingulwa kale.
12“Ndi nafyo ifintu ifinji ifyakusosa kuli mwe, kuntu tekuti mufyumfwikishepo iyowo. 13Nomba ulo wakwisa Umupashi Wabuta, akwisa kufisulula ukwebesha konse ukwaku Lesa. Akwisa kumulangilila ukwebesha konse. Takoyisa kuyisosela ifyamwine enka. Akwisa kusosa pafintu aumfwa, nokumweba pafintu ifyakwisa kuntanshi. 14Akwisa kumpela ubuleme, pakuti ifyo akwisa fyakufuma kuli nebo. 15Ifintu fyonse ifyo Bata bali nafyo fyanji. Echo nsosele ati akesa bula ifyo nasosa nokumulondolwela.
Ichikonko chakwaluka ukusekelela
16“Pakanshita kanini tamwayise kumbonapo, nakambi akapitapo akanshita kanini mwakwisa kumbona.”
17Bambi abakusambila bakwe balifumbashenye bati, “Mba nchi chikoyalula ndo? Akotweba ati, ‘Pakanshita kanini tatwakamubonepo nakambi akapitapo akanshita kanini twakwisa kumubona.’ Elo akososa ati, ‘Nipamulandu wakuti nkoya kuli Bata?’” 18Basoshenye bati, “Ngechi ichakanshita kanini chikoyalule ndo? Tatukochishibapo icho akososa.”
19Yesu alishibile ukuti bafwayile ukumufumba. Elo asosele kuli bo ati, “Nasosele ati, ‘Pakanshita kanini tamwayise kumbonapo, nakambi akapitapo akanshita kanini mwakwisa kumbona.’ Napo nchi echo mukofumbashanyapo? 20Nachine nkomweba ati, mwakulila imisowa, kuntu ichalo chikoyisa kusekelela. Mwebo mwakwisa kuba nechikonko, kuntu ichikonko chenu chakwaluka ukusekelela. 21Ulo umwanakashi alimupepi nokupapa, alalanguluka pakuti inshita yakwe iyakupola yapalamina. Nomba ulo apapa, takoyibukishapo nakambi ukuchula kwakwe, pakuba alasekelela ukuti umwana afyalwa muchalo. 22Emfilya chili kuli mwe. Nomba muli nechikonko, kuntu nakwisa kumubona nakambi. Elo imitima yenu yakwisa kwiula nokusekelela. Echo ukusekelela kwenu tapapo nangu umo uukoyisa kukufumyako kuli mwe.
23“Muli nkalya kasuba tamwayise kumfumba akantu iyowo. Nachine nkomweba ati, nga mwakufumba akantu kuli Bata mwishina lyanji, bakumupela. 24Inshita yapitapo tamwafumbilepo kantu mwishina lyanji. Fumbeni, elo mwakupokelela ukuti ukusekelela kwenu kube ukwafikapo.
Yesu achimfya ububi bwachalo
25“Nomba nkososa namwebo mfi fintu mufyelusho, kuntu inshita ikoyisa iyo tanshayise kusosapo nakambi munshila nji. Nakwisa kumulondolwela ifyaku Bata pamenso-kutuba. 26Ulo nkalya kasuba kakwisa, mwakwisa kufumba mwishina lyanji, nshikoeba ukuti nakwisa kumulombela kuli Bata 27pantu Bata benka balimutemwa. Balimutemwa pakuti mwalintemwa nokunchetekela ukuti nafumine kuli Bo. 28Nafumine kuli Bata, elo nalishile muchalo. Epo nkosha ichalo nokubwelela kuli Bata.”
29Abakusambila bakwe basosele ati, “Boneni nomba mukososa pamenso-kutuba, kuntu temufyelushopo iyowo! 30Nomba twayishiba ukuti mwalishiba fyonse, tachikofwayikwapo ukuti umuntu amufumbepo. Echo twasumina ukuti mwafumine kuli Lesa.”
31Yesu alibasukile ati, “Kanshi nomba mukochetekela? 32Inshita ikoyisa, nanomba ilifikile kale, ulo mwakwisa kupalangana nokuya kumwenu-mwenu. Elo nakushala nenka. Nangu chakuba mfi, tanshakabepo nenka pakuti Bata bali nandibo. 33Namweba amashiwi nga ukuti mube nomutende wakuchetekela muli ne. Muno chalo mukaba mukuchula. Nangu chibe mfi, sekeleleni pantu nachimfya ichalo.”
Trenutno odabrano:
Yohane 16: LalaNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Chilala New Testament © Bible Society of Zambia, 1998.