GENESIS 1
1
Mbuk Emi Abaŋade Eritɔŋɔ Ererimbot
1KE eritɔŋɔ Abasi okobot enyɔŋ ye isɔŋ. 2Ndien isɔŋ edi ikpikpu, ye ukpɔk; ekim onyuŋ odu ke enyɔŋ inyaŋ. Spirit Abasi onyuŋ ɔkubɔ ke enyɔŋ mmɔŋ.
3Ekem Abasi ɔdɔhɔ ete, Yak uŋwana odu: ndien uŋwana odu. 4Ndien Abasi okut uŋwana, ete ɔfɔn: 5Abasi onyuŋ adianare uŋwana ye ekim. Ndien Abasi okot uŋwana ete, Uwemeyo, onyuŋ okot ekim ete, Okoneyo. Ndien mbubreyo ye usenubɔk edi akpa usen.
6Ndien Abasi ɔdɔhɔ ete, Yak ikpa-enyɔŋ odu ke ufɔt mmɔŋ, yak onyuŋ adiaŋare mmɔŋ ye mmɔŋ. 7Ndien Abasi anam ikpa-enyɔŋ, onyuŋ adianare mmɔŋ emi odude ke idak ikpa-enyɔŋ ye mmɔŋ emi odorode ke ikpa-enyɔŋ: ndien edi ntre. Ndien Abasi okot ikpa enyɔŋ. Ete, Heaven. 8Ndien mbubreyo ye usenubok edi udiana akpa usen.
9Ndien Abasi ete, Yak mmɔŋ ke idak enyɔŋ oboho ke ebiet kiet, yak edisat isɔŋ onyuŋ ɔwɔrɔ: ndien edi ntre. 10Ndien Abasi okot edisat isɔŋ ete, Obot; onyun okot mmɔŋ emi obohode, ete Inyaŋ: ndien Abasi okut ete efɔn. 11Ndien Abasi ete, Yak isɔŋ otibe mbiet, ikɔŋ eke asiahade mkpasip, eto mfri eke oŋwumde mfri ke oruk esiemɔ, eke mkpasip esiemɔ odude enye ke esit, ke isɔŋ: ndien edi ntre. 12Ndien isɔŋ otibe mbiet, ikɔŋ eke asiahade mkpasip ke oruk esiemɔ, ye eto eke oŋwumde mfri, eke mkpasip esiemɔ odude enye ke esit, ke oruk esiemɔ: ndien Abasi okut ete efɔn. 13Ndien mbubreyo ye usenubɔk edi ɔyɔhɔ usen ita.
14Ndien Abasi ɔdɔhɔ ete, Yak mme uŋwana edu ke ikpa-enyɔŋ heaven man edianare uwemeyo ye okoneyo; yak enyuŋ edi nte mme idiɔŋɔ, ye nte ini, ye nte usen, ye nte isua. 15Yak mmɔ enyuŋ edi nte mme uŋwana ke ikpa-enyɔŋ, ndiyama nnɔ isɔŋ: ndien edi ntre. 16Ndien Abasi anam ikpɔ mme uŋwana mbiba oro; akamba uŋwana ete akara uwemeyo, ye ekpri uŋwana ete akara okoneyo: ye mme ntantafiɔŋ. 17Abasi onyuŋ esin mmɔ ke ikpa-enyɔŋ heaven, ete eyama enɔ isɔŋ, 18enyuŋ ekara uwemeyo ye okoneyo, enyuŋ edianare uŋwana ye ekim: ndien Abasi okut ete efɔn. 19Ndien mbubreyo ye usenubɔk edi ɔyɔhɔ usen inaŋ. 20Ndien Abasi ɔdɔhɔ, ete, Yak mmɔŋ ɔyɔhɔ udim-udim unam eke edude uwem, yak inuen enyuŋ efefe ekpɔŋ isɔŋ ke iso ikpa-enyɔŋ. 21Ndien Abasi obot ikpɔ unam mmɔŋ, ye kpukpru unam eke edude uwem eke esaŋade, eke eyɔhɔde ke mmɔŋ, ke oruk mmɔ, ye kpukpru inuen mba ke oruk mmɔ: ndien Abasi okut ete efɔn. 22Ndien Abasi ɔdiɔŋ mmɔ, ete, Mbufo etɔt, enyuŋ ewak, enyun eyɔhɔ ke mmɔŋ ke akamba inyaŋ; yak inuen enyuŋ ewak ke isɔŋ. 23Ndien mbubreyo ye usenubɔk edi ɔyɔhɔ usen ition.
24Ndien Abasi ete, Yak isɔŋ osioŋo unam eke edude uwem ke oruk mmɔ, ufene, ye andinyɔni, ye unam obot ke oruk mmɔ: ndien edi ntre. 25Ndien Abasi anam unam obot ke oruk mmɔ, ye ufene ke oruk mmɔ, ye kpukpru andinyɔni ke isɔŋ ke oruk mmɔ; ndien Abasi okut ete efɔn.
26Ekem Abasi ɔdɔhɔ, ete, eyak nnyin inam owo isin ke mbiet nnyin, etie nte nnyin: yak mmɔ enyuŋ ekara iyak ke akamba mmɔŋ, ye inuen ke enyɔŋ, ye ufene, ye ofuri isɔŋ, ye kpukpru mme andinyɔni eke enyɔnide ke isɔŋ. 27Ntem ke Abasi obot owo esin ke mbiet esiemɔ, ke mbiet Abasi ke obot enye; eren ye ŋwan ke obot mmɔ. 28Ndien Abasi ɔdiɔŋ mmɔ, Abasi onyuŋ ɔdɔhɔ mmɔ ete, Mbufo etɔt, enyuŋ ewak, enyuŋ eyɔhɔ ke isɔŋ, enyuŋ ekan enye: enyuŋ ekara iyak ke akamba mmɔŋ, ye inuen ke enyɔŋ, ye kpukpru nkpɔ uwem eke enyɔnide ke isɔŋ. 29Ndien Abasi ɔdɔhɔ ete, Sese mmɔnɔ mbufo kpukpru ikɔŋ eke esiahade mkpasip, emi edude ke iso ofuri isɔŋ ye kpukpru eto, eke mfri eto esiahade mkpasip odude mmɔ ke esit; eyedi udia mbufo. 30Mmonyuŋ nda kpukpru awawa ikɔŋ nnɔ kpukpru unam obot, ye kpukpru inuen enyɔŋ, ye kpukpru se inyɔnide ke isɔŋ, eke uwem odude mmɔ ke esit, ke udia: ndien edi ntre. 31Ndien Abasi okut kpukpru se enye akanamde, ndien, sese efɔn eti eti. Ndien mbubreyo ye usenubɔk edi ɔyɔhɔ usen itiokiet.
Trenutno odabrano:
GENESIS 1: ENA
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Efik Old Bible With Sectional Headings © Bible Society of Nigeria, 2013, 2019.