John 11
11
Lazarus Kithí
1Ike timi lakhi Lazarus ipikeu ye sǜ ae. Pa ye Mary ngò pa tsünipu Martha pama phu Bethany lo ache kemi ke. 2(Mary hipau ye tsüngqüi keu thazü pesü Jisü shou lepuku püzü li sà pesü pa pukhu isüve tsü keu hu ke, ike li pèu Lazarus ye sǜ akehu ihozü ae.) 3Ike pama atsünipu no Jisü lau hitoi asütsa tsüpuwu, “Ampeu, nono kimiye chekeu ye sǜ anie.”
4Jisü no hipau chilu kelo ishi pi, “Aküsǜ hipau ye akithí shivemo nani. Moe! Hiye Alhou juküvüpu ghenguno ke, tishianguno hipau vechewo Alhou Nu juküvü shilu peniye ke.” 5Jisü ye Martha ngò li tsünipu eno Lazarus ishi kimiye cheke. 6Ikemu kughou pa no Lazarus sǜ akeu chilu keno, pa no khile ngoa keno tilehi itaghi atsala kini ngove, 7eno tisheno pa no pa khopemiqo vilo pi, “Ningu Judea lo idewoni shilo.”
8Akhopemiqo no khochile, “Rabbi! kusho kumo lo tilehi Jewmiqo no atu pesü O ve niye pükapütsa keghi no ye tishimu tilau idewoni keshea?”
9Jisü no khochile, “Ayì kihedo chighikini atsala vü acheni ke kumo keshea? Khukhumu atsala küvü lo cheche kemi ye küpüxalumo nani, kughengu panongu ye ayeghi hipau küvü vechewo ithulu cheni. 10Ikemu kughou timi no putho lono alà cheni keno panongu no küpüxalu cheni, kughengu pano ye aküvü küha ke.”
11Pa no hi pive kitheu, pa no panoqo vilo kibe ghi pi, “Ningu küsàu Lazarus ye zühuvae; ikemu ni ye pa küdaputhu nike tilau wucheni.”
12Pa khopemiqo no khochile, “Ampeu, tsalá pa no zü aghí aye pa ye alo kitheve nanie.” 13Jisü ye Lazarus kithí ghili pia, ikemu pa khopemiqo no kümsü keu no pa ye alhoaye lono zü achekeu piani küghashive ke.
14Ike pa no mütsümishei panongu vilo pi, “Lazarus ye thivae, 15eno nongu ghenguno I no tila aghimo keu hu no I lovi ani, tishianguno nongu pelo pülülu peniye ke. Ike ningu pa lau wuni shilo.”
16Tipathiu Thomas (Didymus ipi ghí ku chekeu) no akhopemi kütamiqo vilo pi, “Ningu ghí wuni shilo, tishianguno ningu ghí Ampeu gholo thive kepu shini ke.”
Jisü no Lazarus Pafo pama Lokughuno tsü
17Pa no ighi kelo Lazarus ye akumoki lo atsala bidí ngo keu aghí keu Jisü no phulu. 18Ike Bethany ye Jerusalem lono mile kini nguno akughukhou ghüzüla ke, 19eno Jewmi kutomo no ighino Martha ngò Mary pama no apèu kühave keu lo pama lokughuno tsü nike ighi. 20Kughou Martha no Jisü cheni ipikeu sütsa chilu keno, li no pa sasü kusho nike khalau ipe, ikemu Mary ye aki lo ngove.
21Martha no Jisü vilo pi, “Ampeu! Nono tsalá hilau ngo aghí ke aye I pèu ye thimoni cheke. 22Ikemu itehimu Alhou vilo nono kiu-kiumu khu aye O tsü nani kepi I no ithi anie.”
23Jisü no li vilo pi, “O pèu ye akiniù ithughive nanie.”
24Martha no khochile, “Pa ye ashekha tsalà lo xülekuthu shi kelo itaghi ithughive nani kepi I no ithi anie.”
25Jisü no li vilo pi, “Ni ye xülekuthuu eno aküxü ke. Khuu no I pülüni keno panongu ye thive namu xüluve nanie; 26eno khukhumu I pülü keu vechewo xüni keno khilemu thivemo nani. No ye hipau pülü anima?”
27Li no khochile, “Iyei, Ampeu, no ye Messiah, Alhou Nu, khuu ayeghi lo ighi niye shi akeno tipau ke ipi I no pülü anie.”
28Li no hi pive kethiu, idechile wu no li tsünipu Mary ku no pi, “Akükütsüu ye hile ani püzü no ighiju anie.” 29Kughou Mary no ti chilu keno, li no paikhavi puthughove no pa lau wuve. 30Ike Jisü ye ti kutólo aphu lo ilomo no ae, ikemu Martha no khile pa sasü kusholu keno tilehi ngo ake. 31Mary lokughuno tsü niye li ki lo ngoa akemi Jewmiqo no li no paikhavi puthugho no khalau wuve keu ithulu kelo, li ye akumo lo mloqa niye wucheni küghashi kümsüve püzü panongu no li papesü wue.
32Kughou Mary no Jisü no ngo akeu tove püzü pa ithulu keno, li no pa pukhuphi lo ikiqi no pi, “Ampeu, tsalá nono hila ngo aghí ke aye I pèu ye thimoni cheke.”
33Jisü ye Mary eno li gholo Jewmi ighi akeqo ghí qa akeu ithulu püzü alokhümüive eno amloghime shive. 34Pa no iniju, “Nongu ye khilehi pa qhopüani kea?”
Panongu no khochile, “Ampeu, ighino julo.”
35Jisü no qa.
36Tipathiu Jewmiqo no pi, “Pa ye kiutoi Lazarus kimiyeche keno julo!”
37Ikemu panongu khami no pi, “Pa ye anhethi kighichemi nhethi xukhove tsü püzü timi hipau pelo thive pemo kepu shimlave keshea?”
Jisü no Akithí lono Lazarus Xüputhuve
38Jisü ye itaghi alokhümüyive no akumoki lo ighi. Akumoki ye atuki lakhi eno tipau ikulola ye atuqu lakhi pesü nhapepüa. 39Jisü no pi, “Atuqu ikhive lo.”
Ikelo Lazarus akithiu pafo Martha no ishi pi, “Ikemu, Ampeu, itehi ye axo lhoküsa münave aghíni ae, kughengu pa ye tilehi atsala bidí qhivea ke.”
40Ike Jisü no ishi pi, “Tsalá nono pülü aye, no ye Alhou juküvü ithulu nani ke ipi ni ye O vilo pike kumo keshea?”
41Ikehu panongu no atuqu ikhive. Tisheno Jisü no pishipuku ju no pi, “Apùo, nono I kighini chilutsü keu ghenguno O shikimthi. 42No ye alhokuthu I kighini chilutsü cheni kepi I no ithi anie, ikemu ni ye hilehi puthugho akemiqo kivipu ghenguno hi piani, tishianguno nono I puwu kepi panongu pelo pülülu peniye ke.”
43Kughou pa no hi pive keno, Jisü no asütsa kuloghi lono, “Lazarus! khalau ipeghi lo,” ipi. 44Thive keu timi hu no phephei keu phì no pa phi-au küzü no chijepu sü aphì lakhi no pa gi vehomxa pesü khalau ipeghi.
Jisü no panongu vilo pi, “Akumo phìqo xaqhive tsülo eno pa pelo wuve pelo.”
Jisü Pìthíve Niye Kümüqü Keu
45Mary xuju niye ighi kemi Jewmiqo ye Jisü no müla keu ithulu püzü pa shou pülüluve. 46Ikemu panongu khami no Phariseemiqo lau wu püzü Jisü no mülà keu ghili pesü panongu vilo pive. 47Ikelo achinetomi eno Phariseemiqo no Jewmi Hoho kukütsü püzü no aküküpütsa shi.
Panongu no ishi iniju, “Ningu ye kíshiveni kea? Timi hipau no hilehi amichipu kümlà kutomo shi anie. 48Tsalá ningu no pa pelo hitoi shiauve pe aye, kümtsü no pa shou pülüveni cheni, eno tisheno Rommiqo no ighi püzü ningu chineki eno ni shiye kinikujo pesü wuve tsüní chenie.”
49Ikelo panongu gholo Caiaphas ipikeu khuu tipau mpe lo achinetomiqo shou atou shi akeno, pa no ishi pi ipeghi, “Nongu ye kiumu ithi amoe! 50Nongu ye shiye kuchopu pühaveni keu züqhulo timi lakhi no timiqo kümtsü ghenguno thive keu no akiviu kepi vethalu amoe.”
51Pa ye pa kutoshi no atsa hipau pimoe, ikemu pa no tipau mpe lo achinetomiqo shou atou shi ake lono Jisü ye Jewmi shiye ghenguno thive nani kepi tungkuptsa kütüghütsü ke, 52eno tiye shiye tipau ghengu likhi no kumoe ikemu Alhou nuli apanaghave no akeqo ghenguno ghí ke, tishi keu vechewo panongu kümtsa süghi no lakhi shitsü niye ke. 53Ikehu atsala tipau thiu ye panongu ye Jisü küxü luve tsü niye kümüqü thuve.
54Tighenguno Jisü ye Jewmiqo zülo pekiphe shi iqho-iqi keu shimove. Tishini ke züqhu pa ye küghünamokeu-a phivilo aphu lakhi Ephraim ipikeu qhalo wu püzü pa khopemiqo sasü tilehi ngove.
55Kughou Jewmi Hechekulu ghulhu do kupunú ighive keno, timi kutomo no Hechekulu ghulhu züu no chine-chini kiqi lono shikimthe nike ghenguno hokümxaqo lono Jerusalem lo iqhoe. 56Panongu no tamo no Jisü phujua, eno panongu no achineki khala lo puthugho akelo panongu lakhi no lakhi vilo ishi iniju, “Nongu ye kíshi kümsü ani kea? Pa ye tiqhitini#11:56 Momu Hechekulu ghulhu lo ighi niye shiamo keshea?” 57Ikemu achinetomi eno Phariseemiqo ye Jisü küghaluve nike ghenguno khukhumu Jisü no ngo akeu-a phulu aye asütsa pìthitsü penike azah tsüve no ake.
Trenutno odabrano:
John 11: STB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.