Yowannisi Gimo
Gimo
Hini awuddinnee Mishiraachoon koorito, aaraa gutte Yesuusichi dabbeenaꞌo daggoochee ikkoo tuneti Yowannisine; biyoo “Yesuusi shunniibeeti dabboo” getteetone. Hini Mishiraachoon bi kooriti yemeeno 83 Maaree Natonaa 93 Maaree Natona daggoochiye; bi koorito “Yesuusi aroo Kiristoosi Yeerichi Bushoo bi tunoon ittoshi iberiyemmoyich, bi toommooch mulloon tooꞌiiree bi shigoona kashoon ittoshi danemmoyichiye” (Yowa. 20:31).
Yowannisi Kooriti Mishiraachoo Yesuus Kiristoosichi kashee mooyonaa shuunoonon yaari yaaroona gettiibeeto bi tunetaanoona, bare keejje Mishiraachee Macaafeenaꞌoyee oogichii bariti macaafoone. Yowannisi bare Mishiraachee Macaafooch kooreyaani Yesuusi tuniiti uuche gaakkechi shuunoon kooritone; wotta bare Mishiraachee Macaafooch kooreeti gaakkechi shuunoochee guttoon baach kooritone. Hini Macaafooch Yesuusi shaahiyoona dojjiti mooyo kooreyaanoone. Ebiyoo Yesuusi ikkikke asheenaꞌona tookkii biich beeti ikkittinoon manjii bekkiibeeti macaafooniye bi shaahiibeeto.
Hini Mishiraachee Macaafo kooreeti naboo, bare Mishiraachee Macaafoochaa gaakkechi shuunoo getteeti malletoon nooch getoyichiye. Yowannisi gettiibeeti malleteenaꞌo Kiristoosi Yeeri bi tunoonaa bulliyee beshiti giidecho bi tunoonon xiishii arichii beetinaꞌone. Yesuusi Yeerichi Bushoo bi tunee xiishoon kupphiiꞌi Yowannisi gettitaanolla, wotta daakkiꞌi asho bi tunoon ikkikke mooyinaꞌon getona wodde wottoon bekkiitone. Ebi mooyinaꞌoo bi maraato, bi ayinoo, bi shaacoonaa asheenaꞌon bi shunonane.
Inde Moochi Sheqqo
Shiichoonaa aafechi mooyona (1:1-18)
Yesuusi baribare asheenaꞌona tookkii bi dano (1:19–4:54)
Yeerichi Bushoo bi tunoona Yesuusi shuuneti shuunoo (5:1–10:42)
Yerusaalemaa Yesuusi toommooch tiyiti mooyo (11:1–12:50)
Bi dabbeenaꞌoyich Yesuusi dojjiti doyeenaꞌo (13:1–17:26)
Nallee gabberooch bi giddo, bi qitoonaa bi duukkoona (18:1–19:42)
Qitoochee bi timonaa ciireexi mooyona (20:1–21:25)
Trenutno odabrano:
Yowannisi Gimo: KBRC
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
SIM International, 2020.