Lk 1
1
1Kwa Theovilo:
Andũ aingĩ nĩmatatĩte mũno kũandĩka maũndũ onthe ala meekĩkie katĩ waitũ. 2Maandĩkĩte maũndũ ala twataviw'e nĩ andũ ala maĩ vo maũndũ asu mayambĩĩa, na matavanasya ũvoo ũsu. 3Na kwoou mũkumye Theovilo, nonie nĩ ũndũ ũseo ngũandĩkĩe maũndũ aa nĩmaatĩanĩsye nesa, nũndũ nĩnĩmekuũĩte nesa kuma mwambĩlĩĩlyonĩ. 4Nĩĩka ũu nĩ kana ũtonye kũmanya ũw'o wa maũndũ ala ũmanyĩĩtw'e.
Kũsyawa Kwa Yoana Mũvatisi Kũyathanwa
5Ĩvinda yĩla Elote waĩ mũsumbĩ wa Yutia, kwaĩ mũthembi ũmwe weetawa Nzekalia, ũla waĩ wa nguthu ya ũthembi ya Aviya. Mũka wake eetawa Elisavethi, ũla o nake waĩ nzyawa ya mũthembi Alũni. 6Nzekalia na Elisavethi nĩmekalĩte mwĩkalo wa kũmwendeesya Ngai na kũkwataa mĩao yake. 7Ĩndĩ mayaĩ kana, nũndũ Elisavethi aĩ ngũngũ, na me elĩ maĩ akũũ mũno.
8Mũthenya ũmwe Nzekalia nĩwatethasya wĩa wa kĩ-ũthembi Ĩkalũnĩ, ĩvindanĩ yĩla nguthu yake yavangĩwe ũthũkũmi ũsu. 9Kwĩanana na walany'o ũla athembi maatĩĩaa, Nzekalia nĩwe wakũnĩiwe kula alike Ĩkalũnĩ akatoeesye ũvani kĩthembeonĩ. 10Andũ aingĩ nĩmavoyaa me nza ĩvinda yĩla ũvani wavĩvaw'a.
11Mũlaĩka wa Mwĩai nĩwamumĩlĩĩle Nzekalia ngalĩkonĩ ya kw'oko kwa aũme kwa kĩthembeo kĩla kyavĩvĩaw'a ũvani. 12Nzekalia oona mũlaĩka nĩwatelemile na akwatwa nĩ w'ĩa. 13Ĩndĩ mũlaĩka amwĩa atĩĩ, “Eka kũkĩa Nzekalia! Ngai nĩwĩw'ĩte mboya syaku, na kwoou Elisavethi mũka waku akakũsyaĩa kavĩsĩ na ũkaketa Yoana. 14Kũsyawa kwako kũkakũtanĩthya na ũkwĩw'ĩthya mũyo, o na andũ aingĩ makatana kasyawa. 15#Mot 6.3 Yoana akeethĩwa e mũndũ mũnene methonĩ ma Ngai. Ndakanyw'a ndivai kana mũthemba o na wĩva wa ũkĩ, na akeethĩawa ausũĩtwe nĩ Veva Mũtheu o na kuma kũsyawanĩ kwake. 16Akaalyũla andũ aingĩ ma Ĩsilaeli mamũsyokee Mwĩai Ngai woo. 17#Mal 4.5-6 Akathi mbee wa Mwĩai e na veva na ũtonyi ta ũla waĩ wa Eliya. Akeew'anĩthya syana na aaĩthe moo, na akaalyũla andũ mbaa matũ methĩwe makĩsũanĩa ũndũ ũmwe na ala mamũkĩaa Ngai. Kwa nzĩa ĩsu akatuma andũ methĩwa meyũmbanĩtye kwondũ wa Mwĩai.”
18Nzekalia nĩwakũlilye mũlaĩka atĩĩ, “Ngamanya ata kana ũndũ ũũ ũkeekĩka? Nyie na mũka wakwa twĩ akũũ.”
19 #
Nda 8.16; 9.21 Mũlaĩka amũsũngĩa atĩĩ, “Nyie nĩtawa Kavilieli na nĩkalaa ĩtunĩ ngĩmũthũkũma Ngai. Andũmĩte nũke kũneena naku ngũtavye ũvoo ũũ mũseo. 20Nayu nũndũ ndũnetĩkĩla ndeto syakwa ila ikeanĩa ĩvinda yasyo yavika, nũũvindya na ndwĩĩthĩwa ũtonya kũneena kũvika yĩla ũndũ ũsu ũkekĩka.”
21Ĩvindanĩ yĩu yonthe andũ nĩmamweteelete Nzekalia, na nĩmaseng'aa nĩkĩ ũtindie Ĩkalũnĩ mũno wĩana ũu. 22Yĩla Nzekalia wesie kumaala, ndaatonya kũneena namo na nĩmamanyie kana ve woni woona e Ĩkalũnĩ. Amaneenasya na moko nũndũ we ndaĩ atonya kũneena.
23Ĩvinda yake ya kũthũkũma Ĩkalũnĩ yathela nĩwaendie mũsyĩ. 24Ĩtina wa matukũ mavũthũ, Elisavethi mũka wake nĩwaitavie, na ekala mũsyĩ vandũ va myei ĩtano atekumaala. Nĩwanenaa ngoonĩ yake ayasya, 25“Ũndũ ũũ nĩ Mwĩai ũmbĩkĩte. Nũmbĩw'ĩĩte ĩnee na akambetangĩa ntheko ya andũ.”
Kũsyawa kwa Yesũ Kũyathanwa
26Mweinĩ wa thanthatũ wa kũitava kwa Elisavethi, Ngai nĩwatũmie mũlaĩka Kavilieli athi ndũanĩ yĩ Kalilii yĩtawa Nasaleti. 27#Mat 1.18 Amũtũmĩte kwa mwĩĩtu weetawa Meli, weevaĩtw'e nĩ Yosevu ũla waĩ nzyawa ya Ndeviti. 28Mũlaĩka ũsu nĩwaendie vala ve Meli na amwĩa atĩĩ, “Wakya, we ũla ũnengetwe mumo nĩ Ngai! Mwĩai e vamwe naku!”
29Ndeto isu nĩsyamũthĩnisye mũno ngoonĩ yake, na ambĩĩa kwĩsilya yo ngethi ĩsu nĩ ya mũthemba mwaũ? 30Ĩndĩ mũlaĩka Nĩwamwĩie atĩĩ, “Ndũkakĩe Meli nũndũ Ngai nũkũnengete mumo. 31#Mat 1.21 We ũkaitava na ũkasyaa kavĩsĩ, nako ũkaketa Yesũ. 32#2Sam 7.12,13,16; Ĩsa 9.7 Akeethĩwa e mũndũ mũnene, na akeetawa Mwana wa Ngai Ũla wĩ Ĩũlũ Mũno. Mwĩai Ngai akamũnenga kĩvĩla kya kĩ-ũsumbĩ kya Ndeviti ũmae wake. 33Akasumbĩka nzyawa sya Yakovo tene na tene, na ũsumbĩ wake ndũkethĩwa na mũminũkĩlyo.”
34Nĩvo ĩndĩ Meli wakũlilye mũlaĩka ũsu atĩĩ, “Ũndũ ũũ ũkeanĩa ata nakwa ndyaamanyana kĩ-mwĩĩ na mũndũ-ũme?”
35Mũlaĩka nĩwamũsũngĩie amwĩa atĩĩ, “Veva Mũtheu akatheea ĩũlũ waku, na vinya wa Ngai ũkeethĩwa naku, na kwoou kana kala kesyawa kakeethĩwa ke katheu na kakeetawa Mwana wa Ngai. 36O ta ũu manya kana Elisavethi ũla wa mũkonyo waku nĩ mũito akũĩte ũu ũkũĩte; o na kau atwĩe etawa ngũngũ, yu e na ĩvu ya myei thanthatũ. 37#Mwa 18.14 Nĩkwĩthĩwa kwa Ngai vai ũndũ ũtatonyeka.”
38Nĩvo ĩndĩ Meli waisye atĩĩ, “Nyie nĩ mũthũkũmi wa Mwĩai, nĩkwĩthĩwe kwakwa kwĩanana na ũndũ wasya.” Na mũlaĩka ũsu amũtia athi.
Meli Aithokea Elisavethi
39Ĩtina wa ĩvinda ĩkuvĩ, Meli nĩweeyũmbanisye na athi na mĩtũkĩ ndũanĩ ĩmwe yĩ iĩmanĩ sya Yutia. 40Nĩwavikie mũsyĩ kwa Nzekalia, na amũkethya Elisavethi. 41Yĩla Elisavethi weewie wasya wa Meli aimũkethya, kana nĩkathakie ke ĩvunĩ yake na ausũwa nĩ Veva Mũtheu. 42Nĩwaneenie na wasya mũnene amwĩa Meli atĩĩ, “We wĩ mũathime kwĩ aka onthe, na mwana ũla wĩsyaa nĩ mũathime! 43Asi! Ũndũ ũũ kote mũnene! Inyia wa Mwĩai wakwa oke kũnthokea! 44Nĩwĩsĩ, wakilya wangethya oou, kana kathaka ke ĩvunĩ yakwa nĩ mũyo! 45We wĩ mũathime nũndũ nũneetĩkĩlile kana maũndũ ala ũnataviw'e kuma kwa Ngai makeanĩw'a!”
Wathi wa Meli wa Kũtaĩa Ngai
46 #
1Sam 2.1-10
Nake Meli asya atĩĩ,
“Nyie nĩngũmũtaĩa Mwĩai,
47na ngoo yakwa yĩna ũtanu,
nũndũ wa Ngai Mũtangĩĩi wakwa.
48 #
1Sam 1.11
Nĩkwĩthĩwa nũmũsyaisye na ĩnee,
mũthũkũmi wake ũte nguma.
Kwondũ wa ũu kuma yu,
nzyawa syonthe ikaasya nĩ mũathime.
49Ũla wĩ Ũtonyi nũmbĩkĩte maũndũ manene,
na ĩsyĩtwa yake nĩ ĩtheu.
50Ĩnee yake nĩ kuma nzyawa kũthi nzyawa,
kwa ala mamũkĩaa.
51Nĩwĩkĩte maũndũ manene na kw'oko kwake,
na nũnyaĩĩkĩtye ala mekathĩĩaa ngoonĩ syoo.
52 #
Yovu 5.11; 12.19 Nĩwumĩtye asumbĩ ivĩlanĩ syoo,
ĩndĩ akanenevya andũ mate nguma.
53Nũvũnĩthĩtye ala me na nzaa na syĩndũ nzeo,
ĩndĩ akalũngya ala athwii makathi mate na kĩndũ.
54Nũmũtethetye Ĩsilaeli mũthũkũmi wake,
aililikana tei wake,
55 #
Mwa 17.7
ũla wamathie aaũmae maitũ,
Avalaamu na nzyawa syake tene na tene!”
56Meli nĩwekalile na Elisavethi vandũ va myei ĩtatũ na ĩndĩ asyoka mũsyĩ kwoo.
Kũsyawa kwa Yoana Mũvatisi
57Ĩvinda ya Elisavethi ya kũsyaa nĩyavikie na asyaa kavĩsĩ. 58Yĩla atũi na andũ ma mũkonyo wake meewie kana Ngai nũmwĩw'ĩie ĩnee yĩnenevete ũu, nĩmatanie vamwe nake.
59 #
Ali 12.3
Mũthenyanĩ wa nyanya ĩtina wa kana kau kũsyawa, nĩmookie nzaĩkonĩ yako. Nĩmendaa kũketa Nzekalia ta ĩthe wako, 60ĩndĩ inyia wako asya atĩĩ, “Ai, aiee, keĩtwa Yoana.”
61Namo mamwĩa atĩĩ, “Ii! Mbona vai mũndũ wa mũkonyo waku wĩtawa Yoana!” 62Nĩvo ĩndĩ kwa kũtũmĩa moko, makũlilye ĩthe wa kana ũndũ ũkwenda makete.
63Nzekalia nĩweetisye kĩndũ kya kũandĩkĩa, na aseng'ya andũ asu onthe yĩla waandĩkie atĩĩ, “Ĩsyĩtwa yako nĩ Yoana.” 64O vau kwa vau Nzekalia nĩweethĩiwe atonya kũneena ĩngĩ, na aneena akĩmũtaĩa Ngai. 65Atũi onthe nĩmakwatiwe nĩ w'ĩa, na ngewa ya maũndũ asu meekĩkĩte nĩyo yaeawa kũu kw'onthe iĩmanĩ sya Yutia. 66Onthe ala meewie maũndũ asu nĩmekalile maisũanĩa na ngoo na kwasya, “We mwana ũũ ko ũkatw'ĩka kyaũ eana?” Mo nĩmamanyie kana vinya wa Mwĩai wĩ vamwe nako.
Wathi wa Nzekalia wa Kũtaĩa Ngai
67Nzekalia ĩthe wa Yoana nĩwausũiwe nĩ Veva Mũtheu, na athana ayasya atĩĩ,
68“Nĩataĩwe Mwĩai, Ngai wa Ĩsilaeli!
Nũmatethetye andũ make na kũmatangĩĩa.
69Nũtũnengete Mũtangĩĩi wĩ vinya,
kuma nyũmbanĩ ya Ndeviti mũthũkũmi wake,
70o tondũ waneenie ĩvinda ya tene,
kwĩsĩla vala ve athani make atheu.
71Mũtangĩĩi ũsu akatũtangĩĩa kuma amaithanĩ maitũ,
na kuma ũtonyinĩ wa ala matũmenete.
72Ngai nĩwaisye akamew'ĩa tei aaũmae maitũ,
na akalilikana ũtianĩo wake mũtheu.
73Nĩwamwathie Avalaamu ũmae waitũ kwa kwĩvĩta,
74kana akatũvonokya kuma ũtonyinĩ wa amaitha maitũ,
nĩ kana tũmũthaithae tũte na w'ĩa,
75na twĩthĩwe twĩ atheu na twĩ na mwĩkalo wa kũmwendeesya Ngai,
mĩthenya yonthe ya thayũ witũ.
76 #
Mal 3.1
“Naku we mwana wakwa, ũkeetwa mwathani wa Ngai Ũla wĩ Ĩũlũ Mũno.
Ũkathi mbee wa Mwĩai ũkamũseũvĩsye nzĩa;
77ũkamatavye andũ ma Mwĩai kana nĩmeũtangĩĩwa kwa kũekewa naĩ syoo.
78Nĩkwĩthĩwa Ngai waitũ e tei mwingĩ,
akatũma syũa ya wovosyo kuma ĩũlũ yĩtũkenee.
79 #
Ĩsa 9.2
Nĩyĩkamulĩkĩla ala mekalaa kĩvindunĩ na mũisyonĩ wa kĩkw'ũ,
na kũtũtongoesya twĩsĩlae nzĩanĩ ya mũuo!”
80Yoana nĩweanie na aendeea kwĩthĩwa na vinya wa kĩ-veva. Nĩwekalaa weũnĩ kũvika mũthenya ũla weeyumĩlilye andũnĩ ma Ĩsilaeli.
Trenutno odabrano:
Lk 1: KAMBA
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
BIBLE SOCIETY OF KENYA © 2011