Kut 4
4
1Adamu akateerana n'omukazi we Eva, yaatwara enda, yaazaara Kaini. Yaagira ati: Ahabw'okuhwerwa Nyakubaho, naazaara omushaija. 2Kandi bwanyima yaazaara Abeeli. Abeeli murumuna wa Kaini, akaba omuriisa w'entaama; Kaini we yaaba omuhingi. 3Obunaku ku bwahikire, Kaini yaareeta ebi yaayerize omu itaka yaabitoijera Nyakubaho. 4Na Abeeli yaareeta emwe aha mujigaijo erikwonka ey'omu busyo bwe bw'entaama; haza ebicweka byayo eby'ebishaju, yaabitoijera Nyakubaho. Nyakubaho yaasiima Abeeli n'ebi yaatoija. 5Kwonka tiyaasiima Kaini n'emitoijo ye. Ekyo kyareetera Kaini kugira ekiniga kingi, n'okuhinduriza ahamaisho. 6Nyakubaho yaagira Kaini ati: Ahabw'enki oine ekiniga, kandi ohinduriize ahamaisho? 7Ku oraakore gye torikusiimwa? Kwonka ku oraabe otakozire gye, ekibi kibandami aha rwigi kikugwereire; kwonka iwe oshemereire kukisingura.
8Reero Kaini yaagira Abeeli omurumuna, ati: Ka tushohore, tuze omu ishwa. Mbwenu ku baabaire bari okwo omu ishwa, Kaini yaagurukira omurumuna Abeeli yaamwita. 9Bwanyima Nyakubaho yaabuuza Kaini ati: Abeeli, murumuna waawe ari nkahi? Onu yaamugarukamu ati: Tindikuhamanya! Mbwenu shi, niinye murinzi wa murumuna wangye? 10Nyakubaho nawe amugira ti: Waakora ki? Reeba eiraka ry'eshagama ya murumuna waawe nirimpururiza omu itaka. 11Mbwenu waakyeenwa aha butaka obwayashamya akanwa kaabwo bukamira eshagama ya murumuna waawe, ei waasheesha. 12Ku orihinga eitaka, tiririkwereza byokurya bundi; oryaguma ori empungi kandi ekizengyerezi omu nsi. 13Kaini yaagira Nyakubaho ati: Ekifubiro ki wampa ka ni kihango, eki ntarikubaasa kwemera! 14Reeba, eri izooba wancwa aha butaka, kandi tinkireebwa mu maisho gaawe. Haza ndyaguma ndi empungi kandi ekizengyerezi omu nsi, na weena orindeeba aryanyita. 15Nyakubaho nikwo kumugira ati: Tikwo kiri! Ku harigira owaita Kaini, aryahoorwa emirundi mushanju. Atyo Nyakubaho yaata akamanyiso ahari Kaini, ngu weena orimubugana, atarimwita. 16Bwanyima Kaini yaaruga omu maisho ga Nyakubaho, yaatuura omu nsi y'oburugwa-izooba ari ekizengyerezi.
Oruzaaro rwa Kaini
17Kaini akateerana n'omukazi we, yaatwara enda, yaazaara Enoka. Kandi yaayombeka orurembo, yaarweterera omutabani Enoka. 18Enoka akazaara Iradi, na Iradi yaaba ishe wa Mehuyaeli, Mehuyaeli nawe yaaba ishe wa Metushaeli, na Metushaeli yaaba ishe wa Lameki. 19Lameki akashwera abakazi babiri. Omwe akaba naayetwa Aada, n'ondi naayetwa Ziila. 20Aada akazaara Yabali, ishenkuru w'abaraara omu mahema baine amatungo. 21Eiziina ry'omurumuna rikaba riri Yubali; niwe ishenkuru w'abateezi b'enanga n'emikuri. 22Ziila nawe akazaara Tubali-Kaini, owaabaire ari omuheesi w'eby'okusharuza eby'emiringa n'eby'ebyoma. Kandi munyaanya wa Tubali-Kaini akaba ari Naama. 23Lameki ogwo akagira abakazi be, ati:
Aada, na Ziila nimumpurire!
Imwe baka Lameki nimuhurire eki ndikugamba:
Nyitsire omuntu ahabw'okumputaaza,
omutsigazi ahabw'okunteera.
24Kaini ku araabe naahoorerwa emirundi
mushanju,
buzimazima Lameki n'ow'okuhoorerwa emirundi
makumi mushanju na mushanju.
Adamu okuzaara Seeti
25Adamu akagaruka yaateerana n'omukazi we; ogwo mukazi yaazaara omutabani, yaamweta Seeti, ahabw'okuba akagira ati: Ruhanga anshumbuusize ondiijo mwana, omu mwanya gwa Abeeli ou Kaini yaitsire. 26Seeti nawe akazaara omutabani, yaamweta Enosi. Obwo nibwo abantu baatandika kuramya Nyakubaho nibamweta eiziina Nyakubaho.
Oruzaaro rwa Adamu
Trenutno odabrano:
Kut 4: RKK2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The Bible with Apocrypha in Runyankore-Rukiga, new revised joint translation © The Bible Society of Uganda, 2008.