Vilinga 1
1
Mwata Yesu mwavalweza vavandamine Shipilitu Wajila
1Mumukanda wakavanga, Ove Teyofwilo, ngwasonekelemo vyosena vize aputukile Yesu kulinga nakunangula,
2palanga nakulikumbi lize vamutwalile mwilu, kufuma hakusela vaposetolo#1:2 Nge ngwavo, Valuwa. vaze ásakwile vize ávalwezele muli Shipilitu Wajila.
3Kaha kufuma hakumona makava nakufwa, alisolwele kuli vakiko wamutonyi, naunjiho wakutamo wauvulu — alisolwelenga kuli vakiko makumbi makumi awana (40) nakuvalweza vyawangana waKalunga.
4Jino omu apwile navo, avalwezele ngwenyi, Kanda namufuma muYelusalemako, oloze vandaminenu Uze walushiko lwaTata, Uze mwevwile kuli Ami,
5mwomwo Yowano ajimikilenga vatu mumeya, oloze kaheshi kuhita makumbi amavuluko numba vamijimike muli Shipilitu Wajila.
Mwata Yesu mwakinduluka mwilu
6Shikaho, omu vakungulukile vamuhulishile ngwavo, Ove Mwata, nauhilwishila vaIsalele wangana oholili tahi?
7Avambile ngwenyi, Kutachikiza myaka chipwe jingonde áhakako Tata kutesa nangolo jenyi, kacheshi chayenuko.
8Oloze namutambula ngolo omu mweza Shipilitu Wajila hali enu, kaha namupwanga muvinjiho jami muYelusalema namuYuleya mwosena namuSamaliya, mbwe nakuze kwakumina mavu.
9 Kaha omu akumishile kuhanjika mazu awa, oku vali nakumona kapu, vamuzezwile, kaha livwi lyamufumishile kumeso avo.
10Kaha omu vapwile nakushishika mwilu shimbu apwile nakuya, kukasumuka, malunga vavali muuvwalo utoma vanemana navo.
11Vambile ngwavo, Enu malunga vakuNgalileya, ika munemanyina nakushishika mwilu ngana? Ou Yesu vanafumisa mukachi kenu nakumutambula mwilu, mwakeza mwomumwe nge omu munamumono hakuya mwilu.
Navasakula wakushisa muli Yuta
12Haze vene, vakindulukile kuYelusalema kufuma kupili yize vavuluka ngwavo Milive yálihata naYelusalema, tunda yacho nge musango wakutambuka haSambata#1:12 Vetavilile vaYuleya kutambuka kafwe 1 km kaha haSambata..
13Kaha omu vengilile muYelusalema, vengilile nawa muzuvo nakukanduka mukapete wahelu muze vatwaminenga vosena — Petulu naYowano naYakova naAndelei, Fwilipu naTomase, Mbala-Tolomeu naMateu, Yakova mwanaAlefweu naShimona uze Zelote#1:13 Nge ngwavo, Ou afwila chikuma vyaKalunga., naYuta mwanaYakova.
14Vosena ava vakakachililenga kukulomba namuchima umwe — namapwevo hamwe, naMaliya naye yaYesu, navasongo jaYesu vamalunga.
15Hamakumbi kana aze, Petulu akatukile mukachi kavandumbwenyi (lizavu lyavatu vosena lyapwile kafwe likulukaji namakumi avali, 120), nakwamba ngwenyi,
16Enu vandumbwami vamalunga, Mazu-vasoneka-ajila kuvanga kuwatesamo, aze vapolofwetele kuli Shipilitu Wajila mukanwa kaNdavichi hakuvuluka Yuta, uze atetekelele vaze vákwachile Yesu,
17mwomwo apwile minetu mutwazachililenga#1:17 MuchiHelase ngwavo, Atambwile chazano chenyi kumilimo eyi. hamwe.
18(Oloze fweto yakuhengesa chenyi yikiko vamulanjilile mavu, kaha omu aholokele hamavu chamutwe, apulikile hakachi, kaha mijingwa yosena yalovokele.
19Kaha chevwakanyine kuli vaka-Yelusalema vosena, kaha aze mavu vawalukile mulilimi lyavo ngwavo, Akeletama, nge ngwavo, Mavu-amanyinga).
20Mwomwo muMukanda waJisamu vasonekamo ngwavo,
Limbo lyenyi lipwenga ngundu,
Kaha lizeneke wakutwamaho.
Kaha nawa ngwavo,
Utwamina wenyi vautambule kuli weka.
21Shikaho, hakachi kamalunga vaze vatambwojokelenga nayetu makumbi osena twapwile naMwata Yesu,
22 kuputuka kulujimiko lwaYowano, palanga nakulikumbi lize vatambwile Mwata Yesu mwilu — umwe wavo kuvanga apwenga chinjiho wakusanguka chaMwata hamwe nayetu.
23Kaha vemikile vavali — Yosefwe uze vavulukilenga ngwavo Mbalasava chipwe Yushitu, naMachiya.
24Kaha valombele ngwavo, Ove Mwata watachikiza michima yavatu vosena, tusolwele ou unasakula hali ava vavali,
25ashise mumilimo namuuposetolo ákanyine Yuta hakulikanga, uze aya kuchihela chize chamutela.
26Valowele tutachikijilo twakusakwisa, kaha katachikijilo kenyikile Machiya, kaha apwile umwe wavaze vaposetolo likumi naumwe.
Trenutno odabrano:
Vilinga 1: LUE
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of Zambia