Vilinga 7
7
Setefwano mwavalumbunwina vaka-kuyula
1Kaha kapilishitu wakulitulaho amuhulishile ngwenyi, Evi vinapu vyamuchano tahi?
2Kaha Setefwano ambile ngwenyi,
Enu malunga, nayenu vausoko wami, nayenu vatata, ivwililenu. Kalunga Mwenya-upahu alisolwele kuli kakuluka yetu Apalahama haze apwilenga kuMesopotamya, shimbu kanda achitwame kuHalane.
3 Amwambile ngwenyi,
Fuma mulifuchi lyove nakuli vausoko wove,
Yako kulifuchi lize nangukwinyikila.
4Haze vene afumine mulifuchi lyavaKalateya nakutwama kuHalane. Kaha kufuma haze áfwile ise, Kalunga amunungulwilile mulifuchi lino muli nakutwama oholili.
5Chipwe ngocho Kalunga kamuhanyinemo uswana wamavuko, chipwe tuhu mwakweseka nachilyachilo. Oloze amushikile
Kukamuhana lifuchi likapwenga lyenyi,
Nambuto yenyi nayikasemuka munyima yenyi,
chipwe haze kapwile namwanako.
6Kaha Kalunga ahanjikile ngana ngwenyi,
Vana vove navakazuzumana mulifuchi lyambala,
kaha
Navakahetuwa kuli vaEjipitu nakuvayanjisanga myaka makulukaji awana (400).
7Oloze Kalunga ambile ngwenyi,
Lize lifuchi nalikavaheta nangukalizangamisa,
Kaha kutwala muze navakalovokamo,
Navakalifukulanga kuli Ami muno.
8Kaha Kalunga amuhanyine chilongeselo-chalushiko chakujihana. Ngocho Apalahama asemene Isaka, amujihanyine halikumbi lyamuchitanu naatatu. Isaka asemene Yakova, Yakova asemene vakakuluka#7:8 MuchiHelase, vakakuluka vamalunga. jetu likumi navavali (12).
9Kaha vaze vakakuluka vevwilile Yosefwe lushiushiu, vamulanjishile kuEjipitu. Oloze Kalunga apwilenga nenyi,
10kaha amuyowele mumakava enyi osena, amuhanyine mangana nakumulingisa awane uselewa kuli Fwalo, mwangana waEjipitu, uze amulingishile kupwa twamina wamuEjipitu nakunganda yenyi yosena.
11Jino, kuEjipitu kwosena nakuKanane nawa kwaholokelele zala yakalombolombo naluyando lwalunene, kaha vakakuluka jetu kavawanyinenga vyakulyako.
12Oloze, Yakova omu evwile ngwavo kuEjipitu kuli vyakulya, atumineko vakakuluka jetu.
13Hajila yamuchivali, Yosefwe alijimbwile kuli vandumbwenyi, kaha tanga yaYosefwe vayitachikijile kuli Fwalo.
14 Kaha Yosefwe avashikile vakanehe ise Yakova navausoko wenyi vosena, vaze vosena vapwile vatu makumi atanu naavali navatanu (75).
15 Kaha Yakova ashikumukile kuEjipitu, kukiko akafwililile navakakuluka jetu vosena.
16Kaha, vavatwalilenga kuShekeme nakuvasavalika muchimbumbe chakusendeleka chize álanjile Apalahama kuli vana vaHamole vakuShekeme najimbongo japalata.
17Jino omu ngonde yalushiko yapandamine, luze Kalunga ashikile Apalahama, muyachi wetu wasemunwinyine chikuma muEjipitu
18swi-i nomu
Kwapwile mwangana weka kuEjipitu, uze katachikijile Yosefweko.
19 Ikiye azangaminyine muyachi wetu hakuvakenyukila vakakuluka jetu nakuvalingisa vambilenga vakemba javo mangana vafwenga.
20 Hakiko hangonde asemukilile Mose, kaha apwile wamwaza kumeso aKalunga. Vamulelele muzuvo yaise tukweji vatatu.
21Kaha omu vamumbilile, mwanaFwalo wapwevo amwanjile nakumulela kupwa mwanenyi.
22Mose vamulongeselenga mangana avaEjipitu osena, kaha apwilenga wangolo namumazu namuvilinga vyenyi nawa.
23Oloze, omu ahetele mumyaka makumi awana (40), avezukile vandumbwenyi vana vaIsalele himwaya nakuvameneka.
24Omu amwene umwe vali nakumulinga mwamupi, amukafwileko nakumutenda hakujiha uze kaEjipitu.
25Ashinganyekele ngwenyi vandumbwenyi nachivalumbunukila omu Kalunga mwavalwila nalivoko lyaikiye Mose, oloze kachavalumbunukilileko.
26 Kaha omu kwachele, awanyine vamwe vaIsalele vali nakulizungisa, kaha asakile kuvaunjisa valinunge, avambile ngwenyi, Enu malunga, enu muwana wakwenu, ika muli nakulilingila mwamupi ngana?
27Oloze, uze apwile nakulinga mukwavo mwamupi amushinjikile nakumwamba ngwenyi,
Iya akulingisa kupwa umuka-kutuyula nakutusopesa?
28Unasake ungujihe ngana muze wajihanga uze kaEjipitu zau tahi?
29Hakwivwa lizu eli, Mose achinyinyine kulifuchi lyaMichane nakuzuzumanako, kuze ásemenene vana vamalunga vavali.
30 Kaha omu myaka makumi awana (40) yateselemo#7:30 Nge ngwavo, mwaya lushiko lwaKalunga kuvanga punga yenyi yitesemo.,
Kangelo asolokele kuli ikiye muchiputa chamingonga chapwile mumilangi yakakahya mupambo yapili yaShinai.
31Jino omu Mose amwene chize chimweneso, alikomokelele. Hakupandamako atale kanawa, evwile lizu lyaMWATA ngwenyi,
32 Ami yami Kalunga kavakakuluka jove, Kalunga kaApalahama, Kalunga kaIsaka, Kalunga kaYakova.
Mose alizuzukilile, kahasukile kutalakoko.
33MWATA amwambile ngwenyi,
Zula mendelo kumahinji ove, mwomwo oho hamavu unemana homa hajila.
34 Ngunamono omu vali nakuvayanjisa vatu jami muEjipitu, ngunevu mikemo yavo, kaha ngunasuluka mangana nguvayovole. Kaha jino twaya ngukutume kuEjipitu.
35Ou Mose vakanyine ngwavo,
Iya akulingisa kupwa umuka-kutuyula nakutusopesa?
Ikiye vene ou Kalunga atumine kupwa muka-kuyula, muka-kusokola, nalivoko lyauze kangelo alisolwe kuli ikiye muze muchiputa.
36Ikiye avalowelemo, hakulinga vyakukomwesa navinjikizo — mulifuchi lyaEjipitu, nahakalungalwiji Uchila, namupambo myaka makumi awana (40).
37Ou ikiye vene uze Mose ambile vana vaIsalele ngwenyi,
Kalunga mwakamikatwila Kapolofweto wamuli vandumbwenu wakupwa nge ami.
38Ou ikiye vene uze apwile mulizavu lyavaIsalele mupambo, hamwe nauze kangelo áhanjikile nenyi kupili yaShinai, hamwe navakakuluka jetu. Ikiye uze atambwile mazu amwono aupolofweto#7:38 Nge ngwavo, mazu vamuhanyine kuli Kalunga hapili yaShinai, aJishimbi naaze achiyulo chaKalunga. nakutuhanawo.
39Oloze vakakuluka jetu vakanyine kumwononoka, valumukile mumichima nakutalisa kuEjipitu.
40 Vambile Alone ngwavo,
Tutengele tulunga vatutwaminyine, mwomwo ou Mose atulowele mulifuchi lyaEjipitu, katwatachikijile ocho chínamuwaneko.
41Kaha hamakumbi aze vatengele likombelo lyamwanangombe, kaha vamuvatwilile chimuna nakuwahilila hamilimo yamavoko avo.
42Oloze Kalunga avatalishile nyima, avechele vakombelelenga liyongomena lyavashipilitu vavapi vahautangatanga, nge muze vasoneka hamukanda wavapolofweto ngwavo,
Enu muyachi wavaIsalele,
Kumana Yami mwahanyinenga vimuna vakuvatula namawana akulumba,
Hamyaka makumi awana (40) mupambo numba?
43Nduma!
Oloze mwambachilenga mbalaka yaMoloke,
Natanganyika yakalunga kenu Lefwane,
Aze vene makombelo mwatengele
mangana ngwenu mulifukulengako.
Kaha nangukamitundula nakumitwala kweka kuhambakana
Mbavilone.
44Vakakuluka jetu vapwilenga nambalaka yaunjiho mupambo, yakutunga ngana muze Kalunga alwezele Mose ayitunge, mwaya tungiso yize amumwenesele.
45Ngocho vakakuluka jetu vaze vaswikileko vayinehele hakwiza hamwe naYoshua, haze vatambwile luheto lwavaka-mafuchi vaze ahangile Kalunga kumeso avakakuluka jetu. Kaha yapwileko lika palanga nakumakumbi aNdavichi,
46uze awanyine uselewa kuli Kalunga. Kaha alombele vamwitavile kumuwanyina Kalunga kaYakova mwakutwama.
47Oloze, Solomone ikiye amutungilile zuvo.
48Chipwe ngocho, Ou alitulaho katwama mumazuvo akutunga namavokoko, nge omu nambe kapolofweto ngwenyi, Ivene MWATA nambe ngwenyi,
49 Lilu likiko litanda lyami lyawangana,
Mavu akiko chitwamo chamahinji ami,
Namungutungila zuvo yamuyachi muka?
Nyi chihela chami chakunokela nachipwa changachilihi?
50Kumana keshi livoko lyami lyatengele vyosena eviko numba?
51Enu vavakalu michima#7:51 MuchiHelase ngwavo, Enu vakukakama jishingo., enu vakuzeneka kujihana kumichima nakumatwitwi#7:51 Nge ngwavo, enu vakuzeneka kuhandunuka kuvyavaka-mafuchi vyashili.! Enu mweji kulikanganga kuli Shipilitu Wajila makumbi osena. Muze valingilenga vakakuluka jenu, mukiko muli nakulinga nayenu nawa.
52 Kapolofweto muka vazenekele kuyanjisa vakakuluka jenu? Vajihile vaze vapolofwetele kwiza chaUze Muka-kwoloka, Ikiye Ou munahane jino kumavoko avaka-kole nakumujiha,
53enu vene mwatambwile Jishimbi hakumihanajo kuli vangelo, oloze kamwajilamineko.
Navasa Setefwano malolwa
54Jino vakiko hakwivwa mazu awa, vapihililile chikuma, kaha vamungenjungilile kumazo.
55Oloze ikiye hakupwa wakuzala naShipilitu Wajila ashishikile mwilu, kaha amwene upahu waKalunga, naYesu nemana kulivoko lyaKalunga lyachilyo.
56Kaha ambile ngwenyi, Talenu, ngunamono mwilu munasokoloka, naMwanamutu nemana kulivoko lyaKalunga lyachilyo.
57Oloze vakiko vatambakanyine namazu akukanguka, vakanyine kumwivwilila#7:57 MuchiHelase ngwavo, vajikile mumatwitwi., kaha vamuzombokelele namuchima umwe.
58 Kaha vamukokelele kusali yanganda nakumwasa malolwa. Kaha vinjiho#7:58 Kuli vaYuleya chinjiho ikiye eji kulivanganga kwasa lilolwa uze vanawane namulonga wakutela kufwa. vatumbikile uvwalo wavo wahelu kumahinji amukweze walunga lijina lyenyi Saulu#7:58 Kulumbununa ngwavo, uze vatumbikileko uvwalo kumahinji enyi, alitavijile navakiko muvilinga vyavo..
59Kaha omu vapwile nakumwasa malolwa, Setefwano asanyikile Mwata ngwenyi, Ove Mwata Yesu, tambula shipilitu yami.
60Kaha afukamine nakutambakana ngwenyi, Ove Mwata, kanda uvahishila hamulonga ouko. Kaha omu ahanjikile ngocho asavalile tulo.
Trenutno odabrano:
Vilinga 7: LUE
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of Zambia