LUKA 24
24
1’Bo i luŋa laga a kayo lo sabitilo, i wara na kani, ko druga utu i gulo yu, i zonga na kapazi lo ŋmwa SiSiSi laga ma Se kukundri kilo. 2Ko ku rumbi ŋurupina adukazi kaŋo i gulo kutuni, 3ku ko naga alubo kata yu ko aku rumbi opu lo Mata Yesulo. 4Ku ko naga ku teiliko kase kilo i’do’do ku kine kulia de, ku’de ŋutulu mure druga lira kasiko i lagani ti asozu bongola naga na mo’yu koru kine. 5Ku ko naga ku kuze, ti ko kine asozu konye kilo ka, ŋutulu ŋani kilo druga takindra ko adi, “Ta ga’yu ŋutu laga zorulo i dridriŋi na opuo kilo gbandra ya? 6Lepe nide ’bayi, ’bo lepe aŋiyoro azo. Yoleta kulia naga ma lepe takindri ta ti lu Galili yu kine‚ 7adi, ‘Ŋiro lo ŋutulo ititiki i kenisi ti katoronya, i ’be’beko, ’bo i luŋa lo musala lu lepe iŋiŋiye.’ ” 8Ko druga rambu kuru kulia na ta lepe kine‚ 9’bo ko druga yitozi i guloni i trukokindro na ŋutulu laga mere gele koyita gele kilo‚ ku ku’de kilo ŋutulu giri kine kuliata de giri. 10Ti kine wate de ku Maria na Magadalana kasi Yoana, ku Maria naga a ŋote Yakobo, ku wate ku’de kine kasi ko se na trukokindro lososonyo kilo kine kuliata de. 11’Bo kpe, kine kulia de gbo kasikoni beti likikiri laga a ’busa, ko aku rugo uye. 12’Bo Petero druga ŋiyoro, druga wo i gulo yu. Lepe ku dulazini ka yu, druga medra bongola nakpe kine ka’delo. Lepe druga yitozi kanye ’ba yu, ti teili lo lepelo ilo rambu mugu ku kulia na kondra ’beri kine. 13I lu luŋa logele de ku’de ŋutulu mure kasiko i dridriŋi yu kulu tu i ’ba le’de lo luŋu a Emau, driŋi nasikona ku Yerusalema beti ŋona kilomitazi mere gele koyita gele de. 14Kasiko i utuni, ko kulu kekenadru kase dridriŋi yu kuliata giri na kondra ’beri kine. 15Ku ko laga kilo i kekenadru ku i pipiza na ’beri ku kuliata ŋani kine kugele, Yesu lepe druga mizoro kasiko i nyoga yu, druga tu kasiko kugele. 16Ti konye kasiko kilo amuko ka’bi ko ku tritrimba lepe. 17Lepe druga piza ko adi, “Kulia naga ma ta ’dodri ti ta kilo i woroni kine adinyo ya?” ’Bo ko alira tri ku koŋosi naga a luŋuli kine. 18Ŋutu gele lo luŋu a Kileopalo druga teyitokindro lepe adi, “Do gele’du i dridriŋi na komo kilo Yerusalemani laga aku deni kuliata na kondra ’beri i kilo luŋazi de kine ya?” 19Lepe druga piza ko adi, “Kuliata naga a inyo?” Ko druga teyitokindro lepe adi, “Kuliata ti Yesu lo Nazareta, laga a kakeyoni laga ku teriŋi i konesi ku i kulia ku Ŋun i koŋoni ku ŋutulu giri itro‚ 20laga ma ka’i’ila kaya kilo ku drumala kaya kilo tikindri i ŋera na kulia i tuwana, druga ’be’be lepe i kedini mugu ilo. 21’Bo yi kazu yendru adi kodro lepe lo idakundra Isiraeli kilo. Iye i dridriŋi na kine kulia de gbo’di ayeŋundra a luŋa laga a togi musala ŋiyu i luŋa lo kondri kine kulia de ’beri lu. 22’Bo wate ku’de naga kayani kine atikindra yi i rambu na ’beri koru. Ma ko gbo’dini i gulo yu kutumalu ’bero ’berona, 23ko aku rio opu lo lepelo. Ku ko naga ayite, ko akulia adi se amedra malaika apuku kaseni lo kulia adi lepe ilo zoru. 24Ŋutu kaya ku’de kilo druga wo i gulo yu. Ko druga rumbi kulia kine be naga ma wate kine kulianina, ’bo lepe ku mugu ko aku meri.” 25Lepe druga takindra ko adi, “Ta laga ’ba dendra kilo de‚ lo gbo’da ku teiliko logo laga ani rukoni kuliata giri naga ma kakeyo kilo kebini kine kilo! 26Ani gbo’da a kulia na nyara adi ti Kristolo sasanyani sasanya ku kuliata naga kine de bulo ku lubo kanye mo’yu kata yu ya?” 27Ŋiyu i kulia na wuru Mose, yeŋadru tozo ku kulia na wuru kakeyo kilo kine giri, lepe druga ’dutukindro ko kulia na ’dinyani nye i kulia na wuwuro katani kine giri. 28Kugbo ko laga ayenga nyoga i ’ba laga ma ko utunilo, lepe kodro lu rosodru ŋero, 29’bo ko druga gogo lepe adi, “Sakani kasi yi ki’do, igbonaga kana gbo’di a tokotria, kolona gbo’di a’doro.” Lepe druga lubo ku saka kasi ko. 30Ku lepe laga agbi’diki i mesa kutu kasi ko, lepe druga ’dumundra ’dilona, druga ’boriza lepe, druga ŋoŋowuzu i tikindra na ko. 31Konye kasiko kilo druga ŋaŋazu ’beri, ko druga tritrimi tritrimi lepe. I bo ŋanina lepe druga liliki kasiko i konyeni kaŋo. 32Ko druga pipiza ’beri kase dridriŋini adi, “Teiliko kaya kilo aku kobu kaya muguni i naga ma lepe kuliani ku yi i kiko yuna, i naga ma lepe ŋakindri yi kulia na wuwuro kinena ya?” 33Ko druga ŋi i nu baŋe de i yito Yerusalema yu. Ko druga ku rumbi ŋutulu laga mere gele koyita gele kilo ti kulu atunundra ’beri kugele ku ŋutulu laga kasi ko, 34lo kulia adi, “Matalo aŋiye a ’diri, lepe apuku ku Simonani!” 35Ko druga kekendra kulia na kondra ’beri i kiko yu kine, ku kulia naga ma lepe todenakindri mugu kasikoni i ŋoŋowuzu nanye na ’dilo nu kine. 36Ku ko laga kilo i tazu na kine kulia de, Yesu ku mugu druga lira kasiko i dridriŋini, druga takindra ko adi, “Ti teili lo trotro gbo’dini kasuni!” 37Teiliko kasiko kilo druga ’du’duki adi ru, druga ko kukuze, ’bo ko druga rambu adi se amedra mulete. 38Lepe druga piza ko adi, “Teiliko kasu kilo ’do’do ’do’do gbandra ya? Ta pipiza piyeta kasu teilikoni gbandra ya? 39Meteta kenisi kuwe kilo ku mukuzi kuwe kilo, ilo a na lepe. ’Boleta na, boŋeta na. Muletelo ’ba nyalaka, ’ba kuyu be naga ma ta medri adi na ku kuwe kilona.” 40Ku lepe laga akulia de lepe druga kpekindra ko kenisi kanye kilo ku mukuzi kanye kilo. 41Ku ko laga aku rugo ku kulia ti nyola kine ku ti rambu na teiliko kine, lepe druga piza ko adi, “Ta gbo ku kapatio lo nyenyei ya?” 42Ko druga tikindra lepe merete lo sumuti laga adrera. 43Lepe druga ’dumundra i nyosu kasiko i koŋoni. 44Lepe druga takindra ko adi, “Kine de a kulia kuwe naga ma na takindri ta kine, ti na inga lu kasi ta, adi kulia giri na wuro ku na i kukuzu na Mosena kata yu ku i bukulo ti kakeyo kine, ku i sauma kata yu kine ma totorumoki.” 45Lepe druga ŋaŋa yoyolozu nasikona i dendra na kulia na wuwuro kine, 46druga takindra ko adi, “Awuro adi Kristolo ti sanyani sanya ma bulo ku ŋiyu i dridriŋi na ŋutulu laga atatuwa kilo i luŋa lo musalalo, 47ma zuro kilo giri trukoki kulia ti lopuko na teili ku ’diya na toro ku kari kanye kine, sulukindra Yerusalemani. 48Ta a ka’doto ti bo na kine kulia de. 49’Bo boŋeta, na ilo sunyukindro ta ŋo lo sari Monye liolo ilo. ’Bo sakanita inga kezini, yeŋadru tozo i luŋa lo ku mokani ta ku teriŋi naga na ŋiyu ki yuna lu.” 50Lepe druga ’doladru kuwe nasikona yeŋadru tozo Betania yu, druga lepe ŋiyudru kenisi kanye kilo ki i tikindra na ko koŋo na’bu ina. 51Ti inga lepe lo i tikindra na ko koŋo na’bu‚ lepe druga tokoradru mugu kaŋo, druga ’depazi i ’diko yu. 52Ko druga teminizo lepe‚ druga yitozi bo Yerusalema yu ku nyola koru. 53Ko druga saka i kadi na Ŋun ina kata yu mu luŋa i teminizo na Ŋun.
Trenutno odabrano:
LUKA 24: KNT77
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Kakwa New Testament © Bible Society of Uganda, 1974, 1977.