M. Yohana 21
21
1PAVULI pa ivi Yesu eliŵonesya soti kwa asambili ŵala pa chimana cha Tiberiya; naye eliŵonesya tetino. 2Enzepo pamo Simoni Petro, na Tomaso woitiwa Wa mapasa, na Natanayeli wa pa Kana wa mGalilaya, na ŵana a Zebedayo, na ayake aŵiri a asambili ŵake. 3Simoni Petro eŵauzya, Nikuyokasya masaŵi. Ŵeve emnenera, Nase kumo tiye namwe. Ŵechiya noloŵa mu wato; na usiku ula aliyopaya kantu. 4Sembe pekwenzekucha lomba Yesu epanama pa chinsinsi: sembe asambili nteziŵa kuti ni Yesu. 5Teti Yesu enena naŵo, Mwanamwe, muli nako kantu kakulya? Ŵemyasuka, Tiliye. 6Naye eŵauzya, Pozani kombe dera la kwanja kwendi la wato, ninga mfwange. Tetyo epoza, na lomba kwiŵakanga kumguza chikomo cha winji wa masaŵi. 7Nipo msambili ula wechitemwa Yesu emuuzya Petro, Ni Asikuru. Tetyo Petro akamvwe kuti ni Asikuru evwala mwinjira wake (peenzeve nyula) nopona mchimana. 8Sembe asambili ayake echiza mkawato (pepenze pafupi na pasilya, nga ni mikono myanda iŵiri), enzoguza kombe wozula masaŵi. 9Naŵo akafumile pasilya eŵona palapa mulilo wa minyeku na saŵi losanzikiwapo na mtanda. 10Yesu eŵauzya, Ulaponi masaŵi amwapaya lomba pano. 11Tetyo Simoni Petro ekwerapo nomguza kombe pasilya wozula masaŵi akuru, mwanda na makumi asano na mpuzyo atatu: chukanga enze anyinji tetyo kombe aliyotendeka. 12Yesu eŵauzya, Izani mulye. Paliye yeka umo wa asambili ekaŵalala kumkonsha, Nimwe ŵani? poziŵa ni Asikuru. 13Yesu echiza euula mtanda noŵapa na masaŵi tetila. 14Iyi lomba ni nsita yakatatu yechililangizya kwa asambili pavuli pechizyuka kwa akufwa.
15Lomba ŵakalye Yesu emnenera Simoni Petro, We Simoni, mwana wa Yohana, kansi weo unitemwa kupula aŵa? Enena naye, Inde, Asikuru; muziŵa numtemwani. Emuuzya, Lyesya tumbelele twangu. 16Enena naye soti pakaŵiri, We Simoni, mwana wa Yohana, kansi weo unitemwa? Enena naye, Inde, Asikuru; muziŵa numtemwani. Emuuzya, Ŵeta mbelele zyangu. 17Enena naye pakatatu, We Simoni, mwana wa Yohana, kansi weo unitemwa? Petro endandaula pakuti emnenera pakatatu, Kansi weo unitemwa? Naye emuuzya, Asikuru, muziŵa vyonse; muziŵisya kuti numtemwani. Yesu emuuzya, Lyesya mbelele zyangu. 18Lezee lezee nukuuzya, Pewenze mlumbwana wenzolimangira muluunda wamwine, noyenda kwiwipangwa: sembe ukazokota uzotambulule manja ŵako, na muyako azakumange muluunda na kuya nawe kuusapangwa kuya. 19Lomba enena teti kululula imfwa yotyani yati akamchinzike nayo Mlungu. Naye akanene teti emuuzya, Unikonke neo. 20Petro pocheuka emuŵona msambili wechitemwa Yesu enzokonka; wamene soti esamila pa chifuŵa chake pa mulalilo ula na kuti, Asikuru, ati ampunzeni ni ŵani? 21Teti Petro pechimuŵona emnenera Yesu, Asikuru, nga uyu azachite syani? 22Yesu enena naye, Nikapangwa kuti aŵepo mpaka penti nize, ni chinji kuli weo? nikonke. 23Teti lizu ili liŵirikila mwa akwaŵo lakuti ula msambili sati afwe: sembe Yesu aliyomnenera kuti saafwa; sembe, Nikapangwa kuti aŵepo mpaka penti nize, ni chinji kuli weo?
24Uyu ni msambili ovichitira untoni ivi novilemba ivi: nase tuziŵa untoni wake ni wachendi.
25Vilipo soti vinyinji vyechichita Yesu, vingati vulembewa vyonse, nulinga kuti chukanga charo chine cha pansi sembe chuchepa na mabuku angati olembewa.
Trenutno odabrano:
M. Yohana 21: MA23
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Mapangano Alomba © Bible Society of Zambia, 1923.