M. Marko 15
15
1NIPO lomba pano apa mmawa mwake eyeruzyana akuru a ansembe na akuruakuru na alembi na akuru ŵonse a milandu, emmanga Yesu emuula nompeleka kwa Pilato. 2Naye Pilato emkonsha, Niwe Mfumu ya Ayuda kansi? Eyasuka emnenera, Mulaŵira. 3Nipo akuru a ansembe emsimikizya vinyinji. 4Naye Pilato emkonsha soti echiti, Suyasuka kantu? ŵona vingani ivyo vyakukunenera untoni. 5Sembe Yesu aliyoyasuka kantu; tetyo ni pechizizwa Pilato.
6Lomba pa siku likuru echifwa kwamangululila womangiwa umo, uyo wechisenga kwake. 7Enzepo muntu zina lake Barabba womangiwa pamo na aŵo etwanga, amene epaya ŵantu mkutwanga. 8Nipo liumba lizapo liyambomsenga kuti achite umo mwechiyoŵererera kwachitira. 9Naye Pilato eŵayasuka echiti, Kansi mupangwa nimmangululileni Mfumu ya Ayuda? 10Chikomo eziŵa kuti kwa tima akuru a ansembe ni pechimletera. 11Sembe akuru a ansembe elikulumizya liumba kuti ngakongako aŵamangululile Barabba. 12Nipo Pilato eyasuka soti eŵanenera, Nimchitirenji kansi uyo umkuti ni Mfumu ya Ayuda? 13Ekuwa soti, Mpachikeni pa msalaba. 14Naye Pilato enena naŵo, Echita viipa vyanji? Ŵeve ekuwisya, Mpachikeni. 15Nipo Pilato popangwa kulinkazika mtima liumba eŵamangululila Barabba, nompeleka Yesu akamlambatule kuti apachikiwe.
16Nipo ankondo emkulika noloŵa naye mnsaka, niyo Pretoriyo; eunganisya mpingo wamsuma. 17Naŵo emvwalika kaniki, epikilizya nkata ya minga noivwinikila pali yeve; 18etatikomlonjera, Timuŵoneni, Mfumu ya Ayuda! 19Naŵo emnyata pa mutu na tete, emtira mata nomlambila kopeteka nkokola zyaŵo. 20Nipo akamfweye emvula kaniki emvwalika minjira yake, emkwekwesyera kuti akampachike.
21Naŵo emuyumilizya muntu enzopita, Simoni wa pa Kurene, kufumira ku mipunda, awisi a Alesandro na Rufo, kuya naŵo pamo akatwale msalaba wake. 22Emuula ku malo a Golgota, ni kulongosolewa, Ku malo a chingolomwa. 23Naŵo esakompa mvinyu woyovizyana na muro: naye aliyoulonde. 24Naŵo empachika pa msalaba, eyaŵana minjira yake pakati paŵo, epoza mlondola wa iyo kuti ali wonse aulenji. 25Yenze nsita yakatatu ni pechimpachika. 26Malizu ŵomsimikizya a mlandu wake elembewa pamulu akuti, MFUMU YA AYUDA. 27Pamo naye epachika tupondo tuŵiri, kamo kwanja kwake kwendi, kamo ku manzyere. [28Malembo naŵo esilizika emene ŵala ŵechiti, Ependewa mwa anyaluŵifya.] 29Ŵa enzopita emtafulila nopukumula mitu yaŵo echiti, Ha! we upasula chipupilo nochimanga masiku atatu, 30ulipuzumusye wamwine nosika pa msalaba. 31Tetyo soti akuru a ansembe emchitira fweyo ŵekaŵeka pamo na alembi echiti, Epuzumusya ayake; mwine yeka ntangalipuzumusye. 32Uyo Kristo, Mfumu ya Israeli, nasike lomba pa msalaba kuti tiŵone tizomere. Soti ŵa epachikiwa pamo naye emtotofya.
33Lomba ikaze nsita yakasano na limo penze mfinzi pa charo chonse mpaka nsita yakasano na kane. 34Pa nsita yakasano na kane Yesu elilisya na malizu akuru, Eloi, Eloi, lama sabakitani? ni kulongosolewa, Mlungu wangu, Mlungu wangu, ni chinji pamwanisiya? 35Ayake a aŵo enzepeneme pafupi akamvwe echiti, Ŵonani, omuita Eliya. 36Nipo umo eutuka ezuzya chinkupule na mvinyu wolula, echisomeka pa tete echimpa amwe echiti, Lekani; tiŵone kano Eliya akuza amsisye. 37Naye Yesu elila na muŵila ukuru esindika mzimu. 38Nipo chinyula chochinga cha mchipupilo chipazuka pakati kufumila pamulu mpaka pansi. 39Naye kenturiyo uyo enzepeneme pafupi naye pechiŵona kuti wasindika mzimu teti echiti, Lezee uyu muntu enze Mwana wa Mlungu. 40Enzepo soti anakazi enzolola kutali, pali paŵo ni Mariya Magadalene na Mariya, anyina a Yakobo mtonto na a Yose, na Salome; 41aŵa peenze yeve mGalilaya emkonka nomteŵetera; na ayakene anakazi anyinji amene echiza pamo naye ku Yerusalemi.
42Nipo chikaze lomba chingulo pakuti kwenze Chiwamizyo, kuti mailo ni la sabata, 43echiza Yosefe wa pa Arimateya, mkuru wa nsaka womvwika, uyo naye soti enzoulolera ufumu wa Mlungu; ekaŵalala noloŵa kwa Pilato nochisenga chitanda cha Yesu. 44Naye Pilato ezizwa kati wafwa kale: lomba akamuite kwake uyo kenturiyo emkonsha kati wafwa kale. 45Akaziŵe kwa kenturiyo emzomezya Yosefe chitanda. 46Naye esita nyula emsaula nomzeŵezya mnyula, nomuŵika mchikwe chofokolewa pa luŵambe; ekunkuzizyapo mwala pa mulyango pa msitu. 47Naye Mariya Magadalene na Mariya anyina a Yose eŵonapo pechiikiwa.
Trenutno odabrano:
M. Marko 15: MA23
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Mapangano Alomba © Bible Society of Zambia, 1923.