युहन्ना 4
4
येसुजि हसे सामरि जनियानि
1येसुजि युहन्नासे बहुत चेला बनोइ बडसि हसे बप्तिस्मा देइ बडसि कहके फरिसियाह सुनले बडइ कहके प्रभुजि थाह पउलसि। 2वास्तवमा येसुजि यपनहिँ हइने, बाकि हुनेक चेलवाह बप्तिस्मा देइ। 3जब येसुजि इअ बतवा थाह पउलसि, हुने यहुदिया छेतर छाडके फेरि गालिलमा फिरलसि।
4येसुजि गालिलमा जाइकि सामरिया छेतर हखते जाए परइ। 5हुने सामरिया छेतरक सुखार कहल सहरवामा यापुगलसि। उअ सहरवाक लजिके याकुब यापन बेटवा योसेफके जागा देले रहलिय।#उत्पति ३३:१९; यहोसु २४:३२ 6वहवाँ याकुबक इनार रहलइ। हुने यातरा करइकि हरियइलेसे उहे इनरवाक तिरवामा बेठलसि। तखनहिँ दिनक लगभग बारह बजल रहलइ।
7वहवाँ एक जन सामरि जनियानि पानि भरेके तहिँया यलिय। येसुजि वकरेके कहलसि, “मोरके पानि पियके दे।” 8(तखनहिँ हुनेक चेलवाह सहरवामा खइना चिजु किने गेल रहलइ।)
9तब सामरि जनिनिया हुनेके कहलिय, “यपनहुँ यहुदि भके फेनि मुइ सामरि जनियानिक हथवासे कस्के पानि पियबहुँ?” (केहकेकि यहुदियाह सामरियानिसाङे किहो सम्बन्ध हइने रखइ।)#एज्रा ४:१-५; नेहमिया ४:१-२
10येसुजि वकरेके जवाफ देते कहलसि, “यगर तुइ परमेस्वरक वरदान हसे तोरसाङे पानि मङलहरा मन्सावाके चिनले रहतहि त, तुइ वकरेसे मङतहि हसे उअ तोरके जिवनक पानि देतिय।”
11उअ जनिनिया हुनेके कहलिय, “हजि, यपनहुँसाङे पानि भरना बल्टि त हइने बडइ हसे इनरवा फेनि गहिर बडिय। तब यपनहुँ जिवन देना पानि कहवाँसे यनबहुँ? 12कथि यपनहुँ हमार पुरखा याकुबसे फेनि महान हखहुँ, जुने हमराके इअ इनरवा देले बडिय? उअ यपनहिँ, वकर बेटवाह हसे गइया-गोरुवाह इहे इनरवाक पनिया पियलइ।”
13येसुजि वकरेके जवाफ देते कहलसि, “इअ पनिया पियलहरा जम्मे जनक फेरि पियास लगतइ, 14बाकि जुने मोर देलि पनिया पिअबिय वकर कबहुँ नाहिँ पियास लगतइ। केहकेकि मोर देलि पनिया वकरमा म्वाका फुटल नहिँया हतइ हसे इहे वकरेके परमेस्वरसाङे सबदिन रहना जिवन देबिय।”
15तब उअ सामरि जनिनिया कहलिय, “हजि, वसके भेले, मोरके उहे पनिया देहुँ हसे मोर कबहुँ नाहिँ पियास लगतइ तके यहवाँ पानि भरे नाहिँ यावे परतइ।”
16येसुजि वकरेके कहलसि, “जाहि यापन मरदावाके बलाके यहवाँ यनहिँ।”
17उअ जनिनिया कहलिय, “मोर त मरद हइने बडइ।”
तब येसुजि वकरेके कहलसि, “मोर मरद हइने बडइ कहके तुइ ठिके कहलहि। 18तोर त पाँच जन मरदसभ भेसकल बडइ हसे जुने यखनि तोरसाङे बडिय, उअ फेनि तोर मरद हइने हखिय। तोर कहलि बतवा सदियो हखइ।”
19उअ जनिनिया हुनेके कहलिय, “हजि, यपनहुँ अगमवक्ता हखहुँ कहके मुइ चिनलहिँ। 20हमार पुरखावासभ त इअ पहडावामा परमेस्वरक आराधना करइ। बाकि यपनहुँ यहुदियानि परमेस्वरक आराधना करना ठउरि यरुसलेमहिँ हखइ कहके कहसहुँ।”
21तब येसुजि वकरेके कहलसि, “अरि बहिनिया, मोर कहलि बतवामा विस्वास करहि, उअ जुन यवइ बडइ, जब तोहरा नत इअ पहडावामा न यरुसलेममा पिताक आराधना करबह। 22तोहरा सामरिसभ वकर आराधना करसह जकरेके हइने चिनसह। हमरा यहुदियाह वकर आराधना करसहुँ जकरेके चिनसहुँ, केहकेकि मुक्ति यहुदियानिसे यसइ। 23बाकि जुन यवइ बडइ हसे यखनि यासकल बडइ, जब सत्य आराधना करलहराह पिताके आत्मा हसे सत्यतासे आराधना करतइ। केहकेकि पिता यसने आराधना करलहरानिके खोजससि। 24परमेस्वर आत्मा हखसि, उहेसे हुनेके आराधना करलहराह आत्मा हसे सत्यतामा आराधना करे परसइ।”
25इअ सुनके उअ जनिनिया हुनेके कहलिय, “मोर थाह बडइ कि, मसिह यबसि जकरेके ‘ख्रिस्ट’ कहसइ। हुने यइलेपर जम्मे बतवा हमराके कहबसि।”
26तब येसुजि वकरेके कहलसि, “जुने तोरसाङे फदकइ बडिय, मुइ उहे हखहि।”
27तखनहिँ येसुजिक चेलवाह फिरके यापुगलइ हसे हुनेके एक जन जनियानिसे फदकइकि देखके हुनुका छक परलइ। बाकि “यपनहुँ कथि चाहसहुँ?” कि “यपनहुँ केहके इअ जनिनियासाङे फदकइ बडहुँ?” कहके कुनहुँ फेनि हइने पुछलइ।
28तब उअ जनिनिया पनियाक गगरिया वहवाँहिँ छाडके गउँवामा गेलिय हसे मन्सावानिके यसके कहलिय, 29“यउह हसे एक जन मन्सेके हेरह! हुने मोर करलि जम्मे कमवा कहदेलसि। कतहुँ हुनेहिँ मुक्ति देलाहर ख्रिस्ट त हइने हखसि?” 30तब हुनुका गउँवासे निकडके हुनेक लघिना गेलइ।
31तखनहिँ हुनेक चेलवाह, “गुरुजि, किहो खाहुँ” कहके हुनेके बिन्ति करलइ।
32बाकि येसुजि हुनुकाके कहलसि, “मोरसाङे यसनुक खइना चिजु बडइ, जाकर बारेमा तोहार थाह हइने बडइ।”
33इअ सुनके चेलवाह एक-दोसरि जनसे यसके कहे लगलइ, “कुनहुँ हुनेके खइना चिजु यानके देलइ किहा?” 34बाकि येसुजि हुनुकाके कहलसि, “मोर खइना चिजु त मोरके पठोलहराक इछा यनुसार चलेके हसे हुनेक काम पुरा करेके हखइ। 35तोहरा कहसह, ‘बालि पाकेके यखना चार महिना लगतइ’ बाकि मुइ तोहराके कहबहिँ, खेतवा निहारके हेरह, बलिया काटेके तहिँया जुन भेसकल बडइ। 36यखनि फेनि बालि कटलहरा बनिहारि पउते बडइ हसे परमेस्वरसाङे सबदिन रहना जिवनक तहिँया बालि बटियोते बडइ। तब बिया छिटलहरा हसे बालि कटलहरा सङ-सङहि आनन्द मनोतइ। 37उहेसे ‘एक जन छिटबिय हसे दोसरि जन कटबिय’ कहलि बतवा सदियो हखइ। 38मुइ तोहराके वहवाँ बालि काटे पठोलहिँ, जहवाँ तोहरा मेहनत हइने करले बडह। याको जन मेहनत करले बडइ हसे हुनुकर मेहनत करलिक फर तोहरा पउले बडह।”
39उअ सामरि जनिनियाक “मोर करलि जम्मे कमवा हुने कहदेलसि” कहलि गवाहिक कारनसे उअ सहरवाक बहुत जन सामरिसभ हुनेमा विस्वास करलइ। 40सामरियाह हुने लघिना याके, हमारसाङे किहो दिन रहहुँ कहके बिन्ति करलेसे येसुजि वहवाँ दु दिन रहलसि। 41हुनेक फदकलि वचनवाक कारनसे याको बहुत जन विस्वास करलइ।
42हुनुका उअ जनिनियाके कहलइ, “यखनि तोर कहलि बतवा सुनके हमरा विस्वास हइने करले हखहुँ, बाकि हमरा यपनहिँ हुनेक बतवा सुनलहुँ हसे हुनेहिँ संसारक मुक्तिदाता हखसि कहके याबे हमरा थाह पउलहुँ।”
येसुजि हकिमवाक बेटवाके डउल बनोलसि
43दु दिन पाछा येसुजि वहवाँसे गालिलमा गेलसि। 44(येसुजि यपनहिँ कहले रहलसि कि, अगमवक्तावाके यपने हुरकलि गउँवामा यादर हइने देसइ।)#मति १३:५७; मरकुस ६:४; लुका ४:२४ 45जब येसुजि गालिलमा यापुगलसि, तब वहवाँक मन्सावाह हुनेके स्वागत करलइ। जुन कमवा हुने निस्तार-पबनियामा यरुसलेममा करले रहलसि हुनुका उअ जम्मे देखले रहलइ, केहकेकि हुनुका फेनि निस्तार-पबनियामा गेल रहलइ।#युहन्ना २:२३ 46येसुजि फेरि गालिलक काना सहरवामा यलसि। उहे सहरवामा हुने पनियाके अंङगुरक मोद बनोले रहलसि। वहवाँ एक जन सरकारि हाकिम रहलिय, जाकर बेटवा कफरनहुम सहरवामा मनियाइल रहलिय।#युहन्ना २:१-११ 47येसुजि यहुदिया छेतरसे गालिलमा याइल बडसि कहके सुनलेपर उअ हुनेक लघिना गेलिय हसे याके मोर बेटवाके डउल बनादेहुँ कहके बिन्ति करलिय, केहकेकि वकर बेटवा मरइ रहलिय।
48येसुजि वकरेके कहलसि, “तोहरा यचम्मक चिन्हा हसे कामसभ नाहिँ देखइलइ कबहुँ फेनि विस्वास नाहिँ करबह।”
49उअ हकिमवा कहलिय, “गुरुजि, मोर बेटवा मरलिसे यागा यपनहुँ यादेबहुँ।”
50येसुजि वकरेके कहलसि, “जाहि, तोर बेटवा बचबिय।” उअ मन्सावा हुनेक कहलि बतवामा विस्वास करलिय हसे यापन पइडा लगलिय।
51उअ पइडवामा जइतेहि वकर बहरियावाह वकरेके भेटके “यपनहुँक बेटवा जिउते बडिय” कहके कहलइ। 52उअ हुनुकाके पुछलिय, “मोर बेटवा कखनासे डउल भेलिय?” हुनुका कहलइ, “काल्हु दिन एक बजेसे जरवा वकरेके छडलिय।” 53तब वकर याद भेलइ कि, येसुजि ठिक इहे जुनवामा तोर बेटवा बचबिय कहके कहले रहलसि। उहेसे उअ हसे वकर जम्मे परिवरवा येसुजिमा विस्वास करलइ।
54यहुदिया छेतरसे गालिलमा याके येसुजिक करल इअ दोसर यचम्मक चिन्हा हखइ।
Trenutno odabrano:
युहन्ना 4: CTHR
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2023, Wycliffe Bible Translators, Inc. and Nepal Bible Society