యోహా 13
13
యేసు సిష్యుల్ను గోఢ ద్హొవను
1యో ఆ ములక్‍మతూ భా కన జావనుతూతె వహఃత్‍ ఆయుకరి యేసునె పస్కాపండగను అగాఢిస్‍ మాలంకర్యోహుయిన్‍ ములక్మాఛాతె ఇవ్నుఖారవ్‍నా ఫ్యార్‍కరిన్ ఇవ్నా ఆఖరితోడి ఫ్యార్‍కర్యో.
2యేసుబి ఇను సిష్యుల్‍ ధాన్‍ ఖంకరమా ఇన ధర్యాయ్‍దేనుకరి సీమో‍న్ను ఛియ్యోహుయోతె ఇస్కరియోతు యూదను దిల్‍మా భూత్‍నె అనేఖుఅగాఢి ఖాయల్‍ పైదాకర్యాకొ అనటేకే 3భానె ఇనహాత్మా సమస్తంనా హాత్మా దెవ్వాఢి రాక్యోస్‍కరి, ఇనే దేవ్కంతూ నాకిన్‍ ఆయోకరి, దేవ్కన జావను ఛాకరి యేసు మాలంకరిన్‍; 4ధాన్‍ ఖావను ఎజ్గాతూఉట్టీన్‍ ఉప్పర్ను లుంగ్డానా ఫార్‍బెందీన్‍ ఏక్ టువాల్‍ పల్లీన్‍ కంబర్‍నా బాందిలిదో. 5తెదె గిన్నిమా పాని నాకిన్‍ సిష్యుల్ను గోఢ దొవ్వానటెకె, ఇనే కంబ్బర్‍న బాందిరాక్యోతె టువాల్‍తీ సిష్యుల్నా నుఛ్చనటేకె సురుకర్యూ.
6అమ్‍కర్తూ యో సీమోన్‍ పేతుర్‍కన ఆయుతెదె ఇనే ప్రభూ, తూ మార గోఢన దొయిస్నా? కరి ఇనేతి బోల్యొ.
7అనటెకె యేసు బోల్యు, మే కరుకరతె హంకె తుమ్న మాలంకొహుసేని పన్కి హంకేతునికిన్‍ మాలంకర్లిసుకరి ఇనేతి బోలమా.
8పేతుర్‍ “తూ కెదేబి మార గోఢన నోకొదొవ్” కరి ఇనేతి బోల్యు. అనటెకె “యేసు మే తార గోఢనా దొయ్యోతొతెదె, తూ మారేతి సిష్యుడ్నిహుయీన్‍ కోరహీస్ని” కరి బోల్యు.
9సీమోన్‍ పేతుర్‍ “ప్రభూ, మారగోఢస్‍ కాహేతింమ్‍ మారహాత్, మార ముడ్‍క్యూనాబి దోవ్కరి” ఇనేతి బోల్యొ.
10యేసు ఇన దేఖీన్ బోల్యొ పాని నొయ్యుతె యో బుజు కాయిబి దొవ్వాను అవసరంకొయినీ, యో కేవలమ్‍ పవిత్రుడుహుయో. “తుమేబి పవిత్రుల్‍ పన్కి తుమారమా ఖారు పవిత్రులు కాహేకరి” బోల్యు. 11యేసునా ధరాయ్‍ దెవ్వాలొన మాలంకర్యొ అనటెకె తుమారమా ఖారు సుద్ద్ కాహెకరి ఇనే బోల్యొ.
12ఇవ్ను గోఢన దొయ్యీన్‍ ఇను ఉప్పర్ను లుంగ్డఫర్‍ నాఖను పాసల్తీ, యో బుజు బేసీన్‍ మే తుమ్న కర్యోతె కామ్‍ తుమ్న మాలంహుయూనా? 13“బోధకుడ్కరి, ప్రభూకరి తుమె మన బులాంకరస్‍; మే బోధకుడ్కరి ప్రభూకరిబి అనటేకె ఇమ్ బులావనూ న్యాయమస్‍. 14అనహాఃజె ప్రభూబి, బోధకుడ్‍హుయోతె మే తుమారు గొఢ ధొయ్యోతొతెదె తుమేబీ ఏక్ను గోఢన ఏక్ దొవ్వును” బోల్యొ. 15మే తుమ్న కర్యొతింమ్‍ తుమేబి కర్నూకరి తుమ్న మాదిరింతరా అమ్‍ కర్యొ. 16దాసుడ్‍ ఇను యజమానితీబి గొప్పవాడ్‍ కాహె, మొక్లిరాక్యొతె ఇన మొక్లోతె ఇనేతీబి గొప్పవాడ్‍ కాహేకరి తుమారితి ఖాఛితి బోలుకరూస్‍. 17ఆ సంగతుల్‍ తుమె మాలంకర్యాకస్‍ అనహాఃజె ఆహాఃరు కర్యతొ తుమె ధన్యుల్‍ హుషు.
18తుమ్నా హాఃరవ్నా బారెమా మే బోలు కరూకొయిని; మే చూణిరాక్యొతె ఇవ్నా మాలంకర్యాక్యోస్‍ పన్కి మారేతి బేసీన్‍ ధాన్‍ఖాహదొహో మనస్‍ పాచుపర్యాన్‍ ఇను వైరీహుయీన్‍ ఛా. కరి లేఖనాల్‍ నెరవేర్చన అంనితర జరిగ్యూ. 19హుయుతెదె మేస్‍ యోకరి తుమే నమ్మతింమ్‍ యోహువకొయింతె అగాఢిస్‍ తుమారితి బోలుకరూస్‍. 20మే కినా మొక్లుస్‍కి ఇన చెరాయ్‍లెవాలొ మన చెరాయ్‍ లావాలోహుసె; మన చేర్చాయ్‍లావాలొ మనమొక్లొతె ఇనబి చేర్చాయ్‍లావాలొహుసెకరి తుమారితి ఖాఛితి బోలుకరూస్‍కరి ఇవ్నేతి బోల్యొ.
యేసు ధర్యాయ్‍ దేవాలను బారెమా బోలను
21యేసు ఆవాత్‍ బోలీన పాసల్‍ ఆత్మమా గబ్రాయిన్‍ తుమారమా ఏక్జనో మన దర్యాయ్‍దిసె తుమారేతి హాఃఛితి బోల్యకరి రూఢిమ్‍తర బోల్యు.
22యో కినబారెమా అమ్‍నితర బోల్యొకి కరి సిష్యుల్‍ సందేహంహూతు ఏక్ను బాజు ఏక్జను దేక్తూ రవ్వామా. 23ఇను సిష్యుల్‍మా యేసు ఫ్యార్‍కర్యోతె ఏక్జనో యేసున హఃమే బేసిన్‍ ర్హంకరమా. 24అనహాఃజె కినబారెమా యో బోల్యొకి ఆ హమ్నా బోల్‍కరి సీమోన్‍కరి బోల్వాతే పేతుర్‍ ఇన సైగకర్యో.
25ఇనే యేసున బుజుఖాందె లగ్గిన్‍ ప్రభూ, యోకోన్కరి ఇనపుఛ్చాయో.
26అనహాఃజె యేసు బొల్యొ మే రొట్టాను టుక్డా డుబాయిన్‍ కిన దేవ్‍స్కి యోస్కరి బోలీన్‍ ఏక్ టుక్డోన డుబాయిన్‍ సీమోన్‍ ఛియ్యోహుయోతె ఇస్కరియోతు యూదన దిదో; 27ఇనే యో టుక్డోన లెంకరస్మా సాతాన్‍ ఇనమా గయూ. యేసు తూ కరుకరాతె ఎగ్గిస్‍ కర్కరి ఇనేతి బోలమా. 28యో సానఖాజె ఇనేతి ఇంమ్‍ బోల్యుకి ఆ ధాన్‍ ఖావన బేష్యుతె ఇవ్నమా కినాబి మాలంకోహుయూని. 29రప్యాను సంచి యూదకనా తూ అనహాఃజె పండగన ఇవ్నా హోనుతె రాఛున లీలకరిబితోబి, గరీబ్న సాత్బీ దా! కరితోబి యేసు ఇవ్నేతి బోలన్‍తార థోడుజను ర్హైయిగు.
30ఇనే యో ముక్కన లీన్ ఎగ్గీస్‍ భాదర్‍ చలిగయో; తెదె రాత్నువఖాత్‍.
నవూ ఆజ్ఞ
31యూదా చలీజావన పాసల్‍ యేసు అంమ్‍బోల్యు, హంకె అద్మినఛియ్యో మహిమ పరచబడిన్‍ ఛా; దేవ్బి ఇనపర్‍ మహిమ పరచబడిన్‍ ఛా 32దేవ్‍ ఛియ్యోన ఖామే మహిమ పరచబడితొ, దేవ్‍ ఇనఖామే ఇన మహిమపరస్చే; ఎగ్గిస్‍ ఇన మహిమపరస్చే. 33లడ్కా అజుబి థోడుధన్‍ తుమారితి ర్హహీస్‍ తుమే మన దుమ్‍డ్చూ మేకెజ్గా జైయిస్కి ఎజ్గా తుమే ఆవ్సుకొయిని మే యూదుల్తి బోల్యొతిమ్మస్‍ హంకె తుమారితిబి బోలుకరూస్‍ 34తుమే ఏక్న ఏక్ ఫ్యార్‍కర్లేనుకరి మే తుమ్న ఫ్యార్‍కర్యో తిమ్మస్‍ తుమేబి ఏక్న ఏక్ ఫ్యార్‍కర్లేనుకరి తుమ్న నవూ ఆజ్ఞన దెమ్‍కరూస్‍ 35తుమే ఏక్న ఏక్ ఫ్యార్‍కరవాలహుయోతొ అనబట్టీనస్‍ తుమే మార సిష్యుల్‍కరి ఖారుజనుబి మాలంకర్‍లిసెకరి బోల్యు.
పేతురు అగాఢీస్‍ ఛాడ్‍ బోల్‍సేకరి యేసు బోలను
36సీమోన్‍ పేతుర్‍ “ప్రభూ, తూ కెజ్గా జంకరస్కరి” ఇనేతి పుఛ్చావమా, యేసు మే జంకరతె జొగోమ తూ హంకె ఆయిస్‍ కొయిని పన్కి, పాసల్తీ ఆయిస్కరి ఇనేతి బోల్యు.
37అనహాఃజె పేతుర్‍ ప్రభూ, మే సానటెకె హంకె తారకెడె ఆయిస్‍ కొయిని తారటెకె మార జాన్‍న బేందీస్‍కరి ఇనేతి బోలమా.
38యేసు బోల్యొ, తూ మారటెకె తార జాన్నా బేందీస్‍నా? మే కోన్కి మాలంకొయినీకరి తీన్‍ఛోట్‍బోలన అగాడి ముర్గు వ్హాక్చేకొయినికరి తారేఖూ హాఃఛితి బోలుకరూస్‍ కరి బోల్యొ.
Trenutno odabrano:
యోహా 13: NTVII24
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The New Testament in Vagiri Language © The Word for the World International and Vagiri Nawa Jivan Kristi Madadi Telangana, India. 2024