खास चेलों 10
10
कुरनेलियुस को पतरस तैं बुलाण
1कैसरिया नगर मा कुरनेलियुस नौ को एक मनखि रौन्दु छौ। अर यू इतालियानी पलटण को सुबेदार छौ। 2अर यू परमेस्वर को भक्त छौ, अर यू अर येका घौर का सब लोग परमेस्वर पर अपणी पूरि सरदा रखदा छा। अर यू गरीब लोगु तैं भौत दान-दकछिणा देन्दु छौ, अर जादातर परमेस्वर बटि प्रार्थना कनु रौन्दु छौ।
3अर एक दिन इन ह्वे कि दुफरे तीन बजी का करीब कुरनेलियुस न एक दरसन देखि, कि परमेस्वर को एक स्वर्गदूत वेका पास ऐ अर वेन वेकू बोलि, “हे कुरनेलियुस” 4अर वेन स्वर्गदूत की तरफा ध्यान से देखि अर डौऽरी गै अर बोलि, “यू क्या च श्रीमान,” स्वर्गदूत न वेकू बोलि, “परमेस्वर न तेरी प्रार्थनाओं तैं, अर जु दान-दकछिणा तू देन्दी छैई वु सब परमेस्वर का समणि गै अर वेन वु सब अरपण का रुप मा स्वीकार कैरियाली। 5अर अब इन कैर की अपणा कुछ लोगु तैं याफा नगर मा भेज अर उख बटि शमौन नौ का मनखि तैं बुलवै के लऽ। अर सुण, वे शमौन कू पतरस भि बुले जान्दु। 6अर वु चमड़ा का काम करण वळा शमौन का इख मैमान बणि के रुक्युं च, अर वेको घौर समुन्दर का छाला पर च।”
7अर जब वु स्वर्गदूत उख बटि चलि गै जैन वेसे बात कैरी छै, तब कुरनेलियुस न अपणा दुई नौकरों तैं अर जु लोग वेका दगड़ा मा रौन्दा छा ऊंमा बटि एक खास भक्त सिपै तैं बुलै, 8अर ऊंतैं सब कुछ समझै-बुझै के याफा नगर भेज दिनी।
पतरस तैं दरसन
9अर दुसरा दिन कुरनेलियुस का द्वारा भेज्यां लोग अपणी यात्रा का दौरान याफा नगर का पास पौंछी गैनी। वे बगत पतरस लगभग दिन की बारह बजी प्रार्थना करणु खुणि छत पर चलि गै। 10अर वेतैं भौत तेज भूक लगि अर वेन कुछ खाण चै, मगर खाणुक बणणे की तयारी ही चलणी छै, तब उ अपणा सुद-बुद मा नि रै। 11अर वेन देखि की आसमान खुलि गै, अर एक बड़ा चदरा का जन कुई चीज मूड़ी औणी च अर वेतैं चौतरफि बटि पकड़ी के धरती पर लये जाणु छौ। 12अर वेमा हरेक किसम का जानबर याने की चार खुटों वळा जानबर, रिंगण वळा, अर पंछि भि छा। 13फिर एक आवाज ऐ कि, “हे पतरस उठ, यों तैं मार अर खै ले।” 14मगर वेन बोलि, “ना प्रभु कभि भि ना, अगर मितैं कुई भि चीज खाणु कू मिलेली त मिन वींतैं इन्नि नि खै देण, किलैकि आज तक मिन ऊं चीजों तैं नि खै जु कि अशुद्ध#10:14 इख मा पतरस अपणा रीति-रिवाजों तैं ध्यान मा रखी के या बात बोन्नु च, किलैकि ऊंतैं खाण-पीण का मामला मा कुछ नियम दिये गै छा (लैव्य 11:1-47)। अर पवित्र नि छिन।” 15फिर दुसरि दौं भि वेतैं आवाज सुणै कि, “परमेस्वर न जौं चीजों तैं शुद्ध कैरियाली, तू वेकू अशुद्ध नि बोल।” 16अर तिसरी दौं भि इन्नि ह्वे, अर वेका बाद चदरा जन वा चीज आसमान मा वापस उठये गै।
17अर पतरस न दरसन मा जु कुछ देखि छौ, वीं बात तैं लेके उळझण मा पोड़ि गै, कि ईं बात को मतलब क्या ह्वे सकदु। अर सुणा, जौं लोगु तैं कुरनेलियुस न भेजि छौ ऊ लोग शमौन चमड़ा वळा का घौर को पता लगौन्द-लगौन्द वेका द्वार तक पौंछी गैनी। 18अर ऊंन धै लगै के पूछी, “शमौन जैकू पतरस भि बुले जान्दु क्या वु इखि छिन?” 19पतरस अभि तक वे दरसन का बारा मा सुचणु ही छौ, कि तबरि पवित्र आत्मा न वेकू बोलि, “सुण, तीन लोग त्वेतै खुज्याणा छिन। 20इलै उठ अर हिचकिचौ ना, अर मूड़ी जैके ऊंका दगड़ा मा चलि जा, किलैकि ऊंतैं इख मिन ही भेजि।”
21तब पतरस न मूड़ी ऐके ऊं लोगु कू बोलि, “क्या बात भैजी तुम मितैं खुज्याणा छाँ, मि छौं शमौन पतरस, पर भैयों इन बता कि तुमरो इख औण को मकसद क्या च?” 22तब ऊंन बोलि, “हमतै सुबेदार कुरनेलियुस न इख भेजि, अर वु एक धरमी अर परमेस्वर पर अपणी पूरि सरदा रखण वळु मनखि च, अर यहूदी लोग भि वेकी भौत तारीफ करदिन। अर परमेस्वर का एक पवित्र स्वर्गदूत न कुरनेलियुस तैं बतै कि तुमतै अपणा घौर मा बुलये जौ, ताकि तुमरा द्वारा वु उपदेस सुणी सैको।” 23तब पतरस न ऊंतैं भितर बुलै, अर ऊंकी खातिरदारि कैरी।
अर दुसरा दिन पतरस तयार ह्वे अर ऊंका दगड़ा मा चलि गै, अर याफा नगर का कुछ बिस्वासी भै भि वेका दगड़ा गैनी।
कुरनेलियुस का घौर मा पतरस
24अर दुसरा दिन पतरस अर ऊ सब लोग याफा से कैसरिया नगर मा पौंछिनी। अर कुरनेलियुस ऊंको इंतजार कनु छौ, अर वेन अपणा रिश्तेदारों अर अपणा खास दगड़्यों तैं भि बुलै के अपणा इख इकट्ठा कैरी। 25अर जब पतरस वे घौर मा पौंछी, त कुरनेलियुस वे बटि मिलणु कू वेका पास ऐ अर वेका खुटों मा पोड़ि के वेको आदर-सम्मान कैरी। 26पर पतरस न वेतैं उठे अर बोलि, “अरे भैजी, क्या कना छाँ तुम खड़ा ह्वा मि भि त तुम ही जन एक मनखि छौं।” 27तब पतरस वेका दगड़ा बात करद-करद घौर का भितर गै, अर उख वेन भौत सा लोगु तैं इकट्ठा होयुं देखि, 28अर वेन ऊंकू बोलि कि, “तुम लोग त जणदा ही छाँ, कि कै भि यहूदी जाति का मनखि तैं दुसरि जाति का लोगु का दगड़ा मा कन्द्रयो भि मेल-जोल रखण या ऊंका इख जाण, हमरा नियम-कानूनों का खिलाप मा च। मगर फिर भि परमेस्वर न मितैं इन दिखै, कि मि कै भि मनखि तैं इन नि समझु, कि वु पवित्र नि च या परमेस्वर कैतैं स्वीकार नि करदु। 29इलै जब मितैं इख बुलये गै, त मिन बिन कुछ बुलयां इख ऐ ग्यों। अर अब तुम मितैं इन बता कि तुमुन मितैं इख किलै बुलै?”
30तब कुरनेलियुस न जबाब देई, “आज से ठिक चार दिन पैलि दुफरे तीन बजी का करीब मि घौर मा ये ही बगत पर प्रार्थना कनु छौ, कि तबरि मिन देखि कि एक आदिम चमकिला कपड़ा पैरयूं मेरा समणि खड़ु ह्वे गै। 31अर वेन मिकू बोलि, ‘हे कुरनेलियुस, परमेस्वर न तेरी प्रार्थनाओं तैं, अर जु दान-दकछिणा तू देन्दी छैई वु सब परमेस्वर का समणि गै अर वेन वु सब अरपण का रुप मा स्वीकार कैरियाली। 32अर अब इन कैर की कैतैं याफा नगर मा भेज अर उख बटि शमौन तैं बुलवै के लऽ जैकू पतरस भि बुले जान्दु। अर उ चमड़ा का काम करण वळा शमौन का इख मैमान का रुप मा रुक्युं च।’ अर वेको घौर समुन्दर का छाला पर च। 33इलै मिन तुमतै बुलाणु खुणि अपणा लोगु तैं तुरन्त भेजि, अर या बात अच्छी च कि तुम इख ऐ भि ग्यां। अब जु कुछ भि वचन परमेस्वर न तुमतै दिईं, वु सब कुछ सुनणु खुणि ही हम इख इकट्ठा होयां छां, अर परमेस्वर भि हमरा बीच मा च।”
कुरनेलियुस का लोगु तैं पतरस को उपदेस
34तब पतरस न बोलि, “अब मि सच्चि मा जाणि ग्यों, कि परमेस्वर कै का दगड़ा मा भि भेदभाव नि करदु, 35अर हरेक वु मनखि जु की परमेस्वर पर अपणी पूरि सरदा रखदु अर भलै का काम करदु, अब वु चै कैं भि जाति को किलै नि हो परमेस्वर वे मनखि तैं स्वीकार करदु। 36अर यीशु मसीह जु की सभ्यों को प्रभु च वेका द्वारा शान्ति को शुभ समाचार सुणौन्द दौं परमेस्वर न इस्राएली लोगु का पास जै वचन तैं भेजि वेतैं त तुम जणदा ही छाँ। 37अर यूहन्ना बपतिस्मा देण वळा का परचार का बाद गलील मुलक बटि लेके यहूदिया का मुलक मा जु कुछ भि ह्वे वेका बारा मा भि तुम जणदा ही छाँ। 38अर पिता परमेस्वर न नासरत गौं का यीशु तैं अपणी पवित्र आत्मा अर सामर्थ देके चुणी के ठैरै, अर उ जग-जगा जैके के भलै का काम करदु छौ, अर जु लोग शैतान का द्वारा सतयां छा, यीशु ऊं लोगु तैं खूब करदु छौ, अर यू सब उ इलै करदु छौ, किलैकि परमेस्वर वेका दगड़ा मा छौ। अर ईं बात का बार मा भि तुम जणदा ही छाँ। 39अर जु काम यीशु न यहूदी लोगु का देस मा अर यरूशलेम नगर मा करिनी, ऊं सब कामों का गवा हम छां। अर लोगु न वेतैं क्रूस पर मरवै दिनी, 40मगर परमेस्वर न वेतैं तिसरा दिन मुरदो मा बटि ज्यून्दु कैरी, अर परमेस्वर न वेतैं लोगु पर परगट कैरी। अर हमुन वेतैं देखि, 41पर फिर भि वु सब लोगु तैं नि दिखै, बस ऊं लोगु तैं ही दिखै जौं तैं परमेस्वर न पैलि बटि गवा होणु खुणि चुण्यूं छौ, अर वु गवा हम ही छां। किलैकि यीशु की मौत मा बटि ज्यून्द होण का बाद हमुन वेका दगड़ा मा #यूहन्ना 21:9-14; लूका 24:28-30 खाणुक-पीणुक खै। 42अर वेन ही हमतै इन #मत्ती 28:18-20आज्ञा दिनी कि लोगु का बीच मा जैके परचार कैरा अर इन गवै द्या, कि यू उई यीशु च जैतैं परमेस्वर न मुरयां अर ज्यून्दा लोगु को न्याय करण वळु ठैरैयालि। 43अर परमेस्वर का सब रैबर्या वेकी गवै देन्दिन, कि जु कुई वे पर बिस्वास करदु ऊंका पाप वेका नौ का द्वारा माफ किये जाला।”
सब खुणि पवित्र आत्मा को दान
44अर अभि पतरस यों सब बातों का बारा मा बोन्नु ही छौ, कि तबरि पवित्र आत्मा को दान ऊं सभ्यों तैं मिली गै जु वेकी बातों तैं सुनणा छा। 45अर खतना कियां बिस्वासी लोग#10:45 यू यहूदी लोग वु छिन जु कि यीशु मसीह पर बिस्वास करण वळा ह्वे गै छा। जु कि पतरस का दगड़ा मा अयां छा ऊंन देखि, कि जु लोग यहूदी जाति का नि छिन ऊंतैं भि पवित्र आत्मा को दान दिल खोली के दिये गै। अर यू देखि के वु लोग हकदक ह्वे गैनी। 46किलैकि ऊं बिस्वासी लोगु न कुरनेलियुस का घौर मा इकट्ठा होयां लोगु तैं बन्नि-बन्नि किसमे की भाषा बुल्द, अर परमेस्वर की बडै करद सुणी।
47तब पतरस न बोलि, अब यों लोगु तैं पाणिळ बपतिस्मा लेण से कु रोकी सकदु? किलैकि जन हमतै पवित्र आत्मा दिये गै, ठिक उन्नि यों लोगु न भि पयेलि। 48तब पतरस न ऊंतैं यीशु मसीह का नौ से बपतिस्मा लेण की आज्ञा दिनी। अर बपतिस्मा लेण का बाद कुरनेलियुस न ऊंतैं कुछ और दिनों तक उख रौण कू बोलि।
Trenutno odabrano:
खास चेलों 10: GBM
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© (Active) Wycliffe Bible Translators, Inc. All rights reserved.