Luka 22
22
O le Taupulepulega Leaga e Fa‘asaga ‘iā Iesu
(Mata 26.1-5; Mare 14.1-2; Ioane 11.45-53)
1‘Ua latalata le tausamiga o areto e lē fa‘afefeteina, e ta‘ua o le paseka.#Eso 12.1-27 2‘Ona sā‘ili lea e lē ‘au ositaulaga sili ma le ‘au tusi‘upu pe fa‘apefea ‘ona latou fasioti ‘iā te ia; auā ‘ua latou matata‘u i le nu‘u.
‘Ua Lotomalie Iuta na te Fa‘alataina Iesu
(Mata 26.14-16; Mare 14.10-11)
3‘Ona uluitino ai lea o Satani ‘iā Iuta e ta‘ua o le Sekara, o le tasi lea o le to‘asefulu ma le to‘alua. 4‘Ua alu o ia, ‘ua talanoa ma le ‘au ositaulaga sili ma ta‘ita‘i o ‘au i se togafiti na te fa‘alataina ai o ia ‘iā te i latou. 5‘Ona latou fiafia lea, ‘ua latou tautalatala ma ia ma avatu tupe ‘iā te ia. 6‘Ua lelei ‘iā te ia, ‘ona lamalama lea o ia i se itū aso e faigofie ai, na te fa‘alataina ai o ia ‘iā te i latou, ‘ia aunoa ma le iloaina e tagata.
‘Ua Tapenaina e Iesu le Tausama‘aga o le Paseka
(Mata 26.17-25; Mare 14.12-21; Ioane 13.21-30)
7‘Ona o‘o mai ai lea o le aso o areto e lē fa‘afefeteina, e tatau ‘ona fasi ai o mamoe o le paseka. 8‘Ona ‘a‘auina atu lea e Iesu o Peteru ma Ioane, ‘ua fa‘apea atu, “Lua te ō e sauni le paseka mo i tatou, tatou te ‘a‘ai ai.”
9‘Ona la fai mai ai lea ‘iā te ia, “O ifea ‘e te finagalo i ai ma te saunia?”
10‘Ona fetalai atu lea o ia ‘iā te i lā‘ua, “Fa‘auta, a o‘o ‘oulua i totonu o le ‘a‘ai lua te fetaia‘i ma le tagata o ‘ave le vai ‘omea, lua te mulimuli atu ‘iā te ia i le fale e ulu atu ai o ia. 11Lua te fai atu i le matai o le ‘āiga, ‘‘Ua fai mai le a‘oa‘o ‘iā te oe, “o o ifea le potu e api ai mālō, ‘ina ‘ia matou ‘a‘ai ai le paseka, o a‘u ma o‘u so‘o?”’ 12‘Ona tusi atu ai lea e ia o le potu tele aupitoaluga ‘ua uma ‘ona teuteu; lua te sauni ai le paseka.”
13‘Ona la ō ai lea, ‘ua iloa ai pei ‘ona fetalai atu o ia ‘iā te i lā‘ua; ‘ona la sauni ai lea o le paseka.
O le Taumafataga a le Ali‘i
(Mata 26.26-30; Mare 14.22-26; 1 Kori 11.23-25)
14‘Ua o‘o i le itū aso, ‘ona nofo#22.14 nofo: O le fa‘aliliuga tuai; ta‘oto. ai lea o ia e taumafa, sa fa‘atasi ma ia le ‘au ‘aposetolo e to‘asefulu ma le to‘alua. 15‘Ua fetalai atu o ia ‘iā te i latou, “‘Ua tele lava lo‘u mana‘o, e mua‘i ‘ai lenei paseka ma ‘outou, a o le‘i o‘o i lo‘u tigā. 16Auā ‘ou te fai atu ‘iā te ‘outou, ‘ou te lē toe ‘ai ai lava, se‘ia o‘o ‘ina fa‘ai‘uina i le mālō o le Atua.”
17‘Ona tago ai lea o ia i le ipu ‘ua fa‘afetai, ‘ua fetalai atu, “‘Ia ‘outou tago i lenei ipu ma ‘ia tufatufa ane ‘iā te ‘outou; 18auā ‘ou te fai atu ‘iā te ‘outou, ‘ou te lē inu lava i le fua o le vine, se‘ia o‘o mai le mālō o le Atua.”
19‘Ona tago ai lea o ia i le areto, ‘ua fa‘afetai,#22.19 fa‘afetai: mai le gagana Eleni “eucharisteō.” ‘ua tofitofi, ma avatu ‘iā te i latou, ‘ua fa‘apea atu, “O lo‘u tino lenei, ‘ua foa‘iina atu mo ‘outou; tou te faia le mea nei e fai ma fa‘amanatuga ‘iā te a‘u.” 20Sa fa‘apea fo‘i ‘ona tago i le ipu, ‘ina ‘ua uma ‘ona talisua, ‘ua fa‘apea atu, “O le ipu lenei o le feagaiga fou lea i lo‘u toto, ‘ua fa‘amaligiina mo ‘outou.#Iere 31.31-34
21“‘Ae peita‘i, fa‘auta mai, o lo‘o ‘iā te a‘u i le laulau nei o lē fa‘alata ‘iā te a‘u.#Sala 41.9 22E alu lava le Atali‘i o le tagata e pei ‘ona tofia; a o lea tagata na te fa‘alataina o ia, ‘oi talofa ‘iā te ia!”
23‘Ona latou fesu‘ea‘i ai lea, po o ai o latou o le a na faia lea mea.
O le Fefinaua‘i po o ai e Sili?
24Sa latou fefinaua‘i fo‘i po o ai o latou e sili.#Mata 18.1; Mare 9.34; Luka 9.46 25A ‘ua fetalai atu o ia ‘iā te i latou, “O tupu o nu‘u ‘ese ‘ua ali‘ita‘i i latou; o ē pule fo‘i ‘iā i latou ‘ua ta‘ua i latou o ē agalelei.#Mata 20.25-27; Mare 10.42-44 26‘Ae lē fa‘apea ‘outou; peita‘i o lē sili ‘iā te ‘outou, ‘ia ‘avea o ia ‘ia pei o lē aupito itiiti; o le pule fo‘i, ‘ia pei o le ‘au‘auna ia.#Mata 23.11; Mare 9.35 27Auā po o ai e sili; o lē nofo ‘ea e ‘ai, po o lē ‘au‘auna mai? O lē e nofo e ‘ai e sili o ia. A o a‘u nei, o lo‘o ‘iā te ‘outou pei o le ‘au‘auna lava.#Ioane 13.12-15
28“O ‘outou fo‘i, ‘ua ‘outou tumau ‘iā te a‘u i ‘ou tofotofoga. 29E fa‘apei ‘ona tofia mai e lo‘u Tamā le mālō ‘iā te a‘u, e fa‘apea fo‘i ‘ona ‘ou tofia ‘outou, 30‘ina ‘ia ‘outou ‘a‘ai ma inu i la‘u la‘o‘ai i lo‘u mālō ma ‘ia nonofo i nofoāli‘i ma fa‘amasino atu i itū‘āiga o Isaraelu e sefulu ma le lua.”#Mata 19.28
‘Ua Fa‘ailoa e Iesu a le Fa‘afiti a Peteru
(Mata 26.31-35; Mare 14.27-31; Ioane 13.36-38)
31“Simona e, Simona e, fa‘auta, ‘ua mana‘o tele Satani ‘iā te ‘outou, ‘ia lūlū ‘iā te ‘outou pei o le saito, 32‘ae ‘ou te tatalo mo oe, ‘ina ‘ia ‘aua ne‘i vaivai lou fa‘atuatua;#22.32 ‘ou te tatalo mo oe, ‘ina ‘ia ‘aua ne‘i vaivai lou fa‘atuatua: O le fa‘aliliuga tuai; ‘ua ‘ou fa‘atoga mo oe, ‘ina ne‘i mavae lou fa‘atuatua. a e toe fo‘i mai ‘iā te a‘u, ‘ona e fa‘amalosi ai lea i ou uso.”
33‘Ua fai mai o Simona ‘iā te ia, “Le Ali‘i e, ‘ua ‘ou sauni tā te fa‘atasi ma oe i le fale puipui ‘atoa ma le oti.”
34‘Ona fetalai atu lea o ia, “Peteru e, ‘ou te fai atu ‘iā te oe, e lē vivini moa i le po nei, a ‘ua e fa‘afiti fa‘atolu mai, ‘e te lē iloa a‘u.”
O le ‘Ato tupe, Se‘evae ma le Pelu
35‘Ua fetalai atu o ia ‘iā te i latou, “Na ‘ou ‘a‘auina atu ‘iā te ‘outou e leai sa ‘outou ‘ato tupe, po o se ‘ato, po o se‘evae, pe na ‘outou matitiva ‘ea i se mea e tasi?”
‘Ua fai mai i latou, “E leai lava.”#Mata 10.9-10; Mare 6.8-9; Luka 9.3; 10.4
36‘Ona fetalai atu ai lea o ia ‘iā te i latou, “A o lenei, ‘ai se tagata e ana se ‘ato tupe, ‘inā tago ia i ai, e fa‘apea fo‘i sana ‘ato; o le tagata fo‘i e leai sana pelu, e tatau ‘ona fa‘atau atu lana ‘ofu ‘ina ‘ia mafai ai ‘ona ia fa‘atau mai sana pelu. 37Auā ‘ou te fai atu ‘iā te ‘outou, e tatau ‘ona taunu‘u mai ‘iā te a‘u o le mea ‘ua tusia, ‘Na faitauina fo‘i o ia fa‘atasi ma ē pagotatā;’ auā fo‘i o le a fa‘ai‘uina mea ‘ua tusia ‘iā te a‘u.”#Isai 53.12
38‘Ua latou fai mai, “Le Ali‘i e, fa‘auta, o pelu nei e lua.”
‘Ona fetalai atu lea o ia ‘iā te i latou, “Sōia.”
‘Ua Tatalo a Iesu i le Mauga o Olive
(Mata 26.36-46; Mare 14.32-42)
39‘Ua maliu atu o ia i fafo, ‘ua savali atu i le mauga o Olive, ‘ua fa‘apea lana masani; ‘ua mulimuli atu fo‘i ona so‘o ‘iā te ia. 40‘Ua o‘o atu o ia i lea mea, ‘ona fetalai atu lea o ia ‘iā te i latou, “‘Ia ‘outou tatalo ne‘i o‘o mai le fa‘aosoosoga ‘iā te ‘outou.”
41‘Ona maliu ‘ese lea o ia ‘iā te i latou, e pei o le togi o le ma‘a lona mamao, ‘ona to‘otuli ai lea o ia ‘ua tatalo, 42‘ua fa‘apea atu, “Lo‘u Tamā e, a e finagalo i ai, ‘ia e ‘ave ‘ese lenei ipu ‘iā te a‘u; ‘ae ‘aua le faia lo‘u loto, a o lou finagalo.” 43‘Ona fa‘aali mai ai lea ‘iā te ia o le agelu mai le lagi, ‘ua fa‘amalosi ‘iā te ia. 44‘Ua puapuagā o ia, ‘ua atili ai lana tatalo; o lona afu fo‘i ‘ua pei o ‘alu‘alu toto ‘ua pa‘ū ifo i le ‘ele‘ele.#22.44 O nisi fa‘aliliuga e lē maua ai le fuai‘upu 43-44.
45‘Ua tula‘i o ia sa tatalo, ‘ona maliu atu lea i ona so‘o, ‘ua maua i latou ‘ua momoe, ‘ina ‘ua tigā i le alofa. 46‘Ona fetalai atu lea o ia ‘iā te i latou, “Se a le mea tou te momoe ai? ‘Inā tula‘i ia, ‘inā tatalo, ne‘i o‘o mai le fa‘aosoosoga ‘iā te ‘outou.”
O le Pu‘ega o Iesu
(Mata 26.47-56; Mare 14.43-50; Ioane 18.3-11)
47O lo‘o fetalai o Iesu, fa‘auta, o le motu o tagata ma lē ‘ua igoa ‘iā Iuta, o le tasi o le to‘asefulu ma le to‘alua, ‘ua muamua mai o ia ‘iā te i latou, ma sōsō mai ‘iā Iesu e sogi ‘iā te ia. 48A ‘ua fetalai atu Iesu ‘iā te ia, “Iuta e, ‘e te fa‘alataina ‘ea le Atali‘i o le tagata i le sogi?”
49‘Ua iloa e i latou ‘ua fa‘atasi ma ia, o le mea o le a fai, ‘ona latou fai mai ai lea ‘iā te ia, “Le Ali‘i e, pe matou te taia ‘ea i le pelu?” 50O le tasi tagata o i latou ‘ua tā e ia le ‘au‘auna a le ositaulaga sili, ‘ua tipi‘esea lona taliga taumatau.
51‘Ona fetalai atu lea o Iesu, ‘ua fa‘apea atu, “Sōia, ‘ua lava lea.” ‘Ona tago ai lea o ia i lona taliga, ‘ua fa‘amālōlō ‘iā te ia.
52‘Ua fetalai atu Iesu i le ‘au ositaulaga sili ma ta‘ita‘i o ‘au o le malumalu, ma toeaina, ē na ō mai ‘iā te ia, “‘Ua ‘outou ō mai ma pelu ma uatogi, peiseaī o se pu‘ega o se fao mea? 53Sa ‘ou i ai mo ‘outou i le malumalu ma aso fai so‘o, e le‘i o‘o mai lava o ‘outou lima ‘iā te a‘u; a o lo ‘outou itū po lenei ma le pule a le pouliuli.”#Luka 19.47; 21.37
O le Fa‘afiti o Peteru ‘iā Iesu
(Mata 26.57-58, 69-75; Mare 14.53-54, 66-72; Ioane 18.12-18, 25-27)
54‘Ona latou pu‘e lea ‘iā Iesu ma ta‘ita‘i ma ‘ave ‘iā te ia i le fale o le ositaulaga sili. A ‘ua mulimuli mamao atu Peteru. 55‘Ua latou tafu le afi i totonu o le maota, ‘ua latou nonofo i lalo, ‘ua nofo fo‘i Peteru fa‘atasi ma i latou. 56A ‘ua iloa atu o ia e le tasi ‘au‘auna teine o nofo mai, i tafatafa o le afi, ‘ona pulato‘a lea ‘iā te ia, ‘ua fa‘apea ane, “O le tagata lenei sa fa‘atasi ma ia.”
57A ‘ua fa‘afiti atu o Peteru ‘ua fa‘apea atu, “Funa e, ‘ou te lē iloa o ia.”
58‘Ua toe itiiti, ‘ona va‘ai mai lea o le tasi ‘iā te ia, ‘ua fa‘apea mai, “O oe fo‘i le tasi o i latou.”
‘Ona fai atu lea o Peteru, “Sole, e lē o a‘u.”
59‘Ua mavae, pe ‘atoa le itū po e tasi, ‘ona matuā fai mai ai lea o le tasi, ‘ua fa‘apea ane, “E moni lava, sa ‘iā te ia lenei tagata; auā o le Kalilaia fo‘i o ia.”
60‘Ona fai atu lea o Peteru, “Sole, ‘ou te lē iloa le mea ‘e te fai mai ai.”
‘Ona vivini loa lea o moa, a o tautala o ia. 61‘Ona fāliu lea o le Ali‘i, ‘ua silasila atu ‘iā Peteru. ‘Ona manatu mai ai lea o Peteru i le fetalaiga a le Ali‘i, na ia fetalai mai ai ‘iā te ia, “E lē vivini moa se‘ia e fa‘afiti fa‘atolu mai ‘iā te a‘u.” 62‘Ona alu ai lea o Peteru i fafo, ‘ua tagi lotulotu ia.
O Iesu ‘ua Fa‘atauemuina ma Sasaina
(Mata 26.67-68; Mare 14.65)
63O tagata ‘ua tāofi ‘iā Iesu, ‘ua latou tauemu ma sasa ‘iā te ia. 64‘Ua latou ufiufi ona fofoga, ‘ona pō mai ai lea i ona fofoga, ‘ua fesili mai fo‘i ‘iā te ia, ‘ua fa‘apea mai, “‘E te ‘i‘ite mai, po o ai na pō atu ‘iā te oe?” 65O isi fo‘i ‘upu e tele ‘ua latou ‘upu leaga ai ‘iā te ia.
O Iesu i luma o le Fono
(Mata 26.59-66; Mare 14.55-64; Ioane 18.19-24)
66‘Ua ao, ‘ona fa‘apotopoto ai lea o le taupulega o le nu‘u, o le ‘au ositaulaga sili ma le ‘au tusi‘upu, ‘ona ta‘ita‘i atu lea ‘iā te ia i la latou fono, ‘ua fa‘apea mai, 67“‘Āfai o oe o le Keriso, fai mai ia ‘iā te i matou.”
‘Ona fetalai atu lea o ia ‘iā te i latou, “Pe ‘āfai ‘ou te fai atu ‘iā te ‘outou, tou te lē talitonu mai lava; 68‘āfai fo‘i ‘ou te fesili atu ‘iā te ‘outou, tou te lē tali mai lava. 69E amata i nei ona po ‘ona nofo o le Atali‘i o le tagata i le itū taumatau o le Atua mamana.”
70‘Ona fai mai lea o i latou uma, “O oe ‘ea, o le Alo o le Atua?”
‘Ua fetalai atu o ia ‘iā te i latou, “O a‘u lea ‘ua ‘outou fai mai ai.”
71‘Ona latou fai ane ai lea, “Tatou te lē toe mana‘omia se molimau, auā o i tatou lava, ‘ua tatou fa‘alogo i lana lava ‘upu.”
Trenutno odabrano:
Luka 22: RSCB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Revised Samoan Catholic Bible © Bible Society of the South Pacific, 2010.