Genesis 6
6
Danab Kayak noobppa eheɗ oidppig
1Haen danab ag kuɗum appatnana amu, ag nid ah menuatteg, 2Kayak bekkod ag danab amu aɗelkad, ag iɗulag tuqak ele anadna, ag ahilag dabmakppa diippig.
3Amu Yawe Nug aum. “Dahil Ouɗi Nug hanhan danab oolagppa ii daama. Aɗinu? Ag am danab; ag mauhtteb. Ahilag dayak am maɗ 120 batak daakku,” awa aum.
4Haen amuppa, dimppa ele, danab beɗulkad okkai okkai ele, Nepil buɗub atteb, ag wanppa daappig. Aɗinu? Kayak bekkod ag wanppan ah diieg, ag ele oiyegeg, ah ag nid danab menuadppig ele, danab amu ag nai alagppanu danab onilkad okkai okkai ele.
5Amu Noanu haenppa Yawe nug danab dilag kobol, amu dabmak ele nauib daye anttom. 6Nug amu antta, danab wanppa daaglagnu hattomnu kahipa aoɗom bia doya, ahilag haknu ooppa guittak doyom. 7Yawe Nug anam antta doya amu, Nug aum. “Da danab hemi amu, ag, aria doɗ, doɗ laa ag oolag wan qeeqe oitteb, amu ai hab waappa hagagaɗna oitteb ele amu, da heppi, ag oh iitta mekkulag. Aɗinu? Da ag hattaminu kahipal aoɗom bia doottem,” awa aum. 8Amge Noa nug Yawe noobppa ena dayom.
9Noa, nuhig hak amu inam.
Noa nug wanppa dayom, haen amuppa nug danab ah oolagppa nug genab tutukku hak danab dayaya, Kayaknu neekkakppa danab ooppa kaliak laa iitta ele oiyeye, Kayak ele oittapiɗ. 10Amu Noa nug nid danab ewam ele; ag am Sem, Ham, Japet ele.
11Noa nug anam dayeye, wanppan danab ah laa oh amu, ag Kayaknu neekkakppa kobol nau uɗig wak ele heegeg, laa guittak nau mauhnoak mettak kobol am ele wanppa ambak dayom. 12Danab ah ag kobol nau uɗig wak ele henan daappig amunu, Kayak Nug neekkakka, Nug danab oh ag akka ahilag dabmak dim lamidnana, kobol nau uɗig wak eleib heegeg anttom. 13Antta amu, Kayak Nug Noa amegppa aum. “Danab ah ag heegeg, laa guittak nau mauhnoak mettak kobol am wanppa ambeum daatte amunu, da heppi, danab oh ag iitta mekkulag. Genab da heppi, danab oh, wan ele padal mekkulag. 14Da anam hekkul amunu, na ad saiprus aona, ad amuppa na uub nahip itakkut. Uub ooppa dayak aben aben hattona, ooppa, dimittim ele na kol tar laitte! 15Aria, uub amunu amu, na inam ite! Elab nuhig amu 140 mita. Emaitak nuhig amu 23 mita. Attan tak nuhig amu 13.5 mita maha ele. 16Na uub lag haug biappa tone, amge uubnu gilil amu haug ii yaama. Mita laippunu maha am hamu dayaɗ. Uubnu gililppa amu, na od mena, ooppa lag oo okkai ewam, laa attan, laa gamagppa, amu laa honap ele he! 17Da keeke bau wan qaɗeppa oitteb ele amu mauhkkulagnu heppi, le hiɗ naɗi bekku. Beeb amu, keeke amu oh mauhkkulag. 18Amge da heppi, na ele nug tituanɗa nai qakkagnih ⌊amunu, diig amunu⌋, na, ah nahip, amu na begapad, ag waalkad ele amu, ag uub ooppa nokkulag. 19Na keeke oh bau daatteb ele amu, na amunu aɗit aɗit, anig, dawai ele diiadna, uub ooppa na ele bau daaglagnu maadkkut. 20Ai, doɗ, doɗ laa ag oolag wan qeeqe oitteb ele amu, amu oh aɗit aɗit nahip-ppa uɗiglag, amu na diiadna, bau daaglagnu uub ooppa maatte! 21Doɗ dilag ee, nahip ee ele oh aon me!” awa aum.
22Kayak Nug anam a amu, Noa nug keeke oh, Kayak hekkununab aum bia amu, nug anam heum.
Trenutno odabrano:
Genesis 6: NB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2022, Wycliffe Bible Translators, Inc. All rights reserved.