Cwaan 18
18
Ekii'otihtinikotc shimaakanihsha', Kihcianami'ewikimaa'
(Matthew 26.47-56; Mark 14.43-50; Luke 22.47-53)
1Kaa'ishkwaakakitotc, kii'animaacaawak Ciisahs, okihkino'amawaakana', akaamink siipiinhs Kitaran (Kidron)#18.1 Kitaran (Kidron) siipiinhs kii'ishiayaa nahsawaya'ii waapanonk inahke Ceroosalamink (Jerusalem), Aalip (Olive) Pihkwatinaank itahsh. ekii'ishinihkaatenik, ekii'aniaashawishkaawaatc. I'imaa tahsh kii'ayaa kihtikewin ekiihkihtikaanaahtikohkaak. Miihsh i'imaa kii'ani‑ishaawak Ciisahs, okihkino'amawaakana'. 2A'a tahsh Cootahs (Judas) kaaishinihkaasotc, amii wa'a kaakii'ishihcike'aatc Ciisahsoon ciotaahpinimintc, kaye wiin okiihkihkentaan i'i ayaawin, aaniihsh niipiwa'aank i'imaa aasha Ciisahs okii'ishiwiiciiwaa' okihkino'amawaakana'. 3Amiihsh i'imaa kaa'ishaatc a'a Cootahs kihtikewinink, aasha ekii'miinintc peshikwewaan shimaakanihsha' kaa Oroom ininiiwinitc (Roman), ahshic kaye kanawencikewi-shimaakanihsha' tino kaatananohkiinitc Kihcianami'ewikamikonk. Miiwa' o'o kaakii'ishinihsha'okonitc Kihcianami'ewikimaa' kaye Perahsii' (Pharisees). Miiwak itahsh iki kiihtakohshinook ekiihkikihkomaanewaatc kaye waahsahkonencikanan ekiihtahkonamowaatc, kaye aaninta ekii'niimaahkwa'amowaatc ishkoten ekii'waahsahkonencikaakewaatc. 4Ciisahs itahsh aasha ekiihkihkentank kahkina kekoon waa'ishiotihsikotc, pankii niikaanaya'ii kii'ishaa ekiihkanoonaatc: “Awenen entone'wek?” okii'inaa'.
5“Ciisahs Naasaritink (Nazareth) kaaonciitc,” okii'ikoo'.
“Niin ohsha,” okii'inaa'.
A'a tahsh Cootahs kaakii'ishihcike'aatc Ciisahsoon ciotaahpinimintc, mii 'imaa kewiin kiihtakokaapawi mekwe shimaakanihsh. 6Ahpii tahsh enaatc Ciisahs, “Niin ohsha,” kii'asheshkaawak, mihtahkamik kii'ishipankihshinook. 7Miinawaa okiihkakwecimaa': “Awenen entone'wek?” okii'inaa'.
Miihsh kii'ihkitowa': “Ciisahs Naasaritink kaaonciitc,” okii'ikoo'.
8Ciisahs okii'nahkwehtawaa': “Aasha kiwiintamawininim niin ohsha wa'a. Kiishpin niin entone'oyek, pakitinihkook oko kaawiiciiwakwaa,” okii'inaa'. 9Mii 'owe kaa'onci‑ihkitotc citipihsenik i'i kaakii'ihkitotc: “NinTete, iki kaakii'miishiyan, kaawiin awaac peshik ninkii'wani'aahsii.”
10Saaiman Piitar (Simon Peter) kihcimoohkomaan e'ayaatc, okii'manipitoon ekiihpahkihte'waatc Maawac Kihcianami'ewikimaan otanohkii'aakanini, ehpahkwaciwepa'amawaatc ohtawakini okihcinihkiniink inahke. Mii 'owe kaa'ishinihkaasotc anohkii'aakan, Maalhkahs (Malchus). 11#Mat 26.39; Mrk 14.36; Luk 22.42. Ciisahs itahsh okiihkanoonaan Piitaroon: “Kiiwepiina'an i'i kimoohkomaan! Kaawiin ina ninkaminihkwehsii 'i niminihkwaakan a'a Noohs kaakii'miishitc?” okii'inaan, okakwaatakihtoowin i'i kaa'itank 'iwe minihkwaakan.
Ekii'ishiwinintc Aanahsan kaa‑ayaanitc
12Miihsh kaa'ishitahkonaawaatc Ciisahsoon iki shimaakanihshak kaaOroomininiiwiwaatc (Roman), maamaw kaye oshimaakanihshiiwikimaamiwaan kaye kanawencikewi-shimaakanihshak kaakii'ishinisha'okowaatc Coowa'. Okii'mamaancikwahpinaawaan itahsh. 13Miitahsh i'i okii'ishiwitawaawaan Aanahsan (Annas) nihtam. Aaniihsh mii ono kaaoshihshenshitc a'a Keyahpahs (Caiaphas). Mii wa'a Keyahpahs Maawac kaaKihcianami'ewikimaawitc mii 'iwe ahpii e'ahkiiwank. 14#Jhn 11.49-50. Shikwa mii wa'a Keyahpahs kaakii'wiintamawaatc Coowa': “Nawac taaminwaapatan meshkwac peshik a'a inini cinipoohtamawaatc kahkina pemaatisinitc,” ekii'inaatc.
Ekii'aanawenimaatc Piitar Ciisahsoon
(Matthew 26.69-70; Mark 14.66-68; Luke 22.55-57)
15Weti tahsh Saaiman Piitar (Simon Peter) okii'anikanawaapamaan Ciisahsoon, kotak kaye peshik kihkino'amawaakan ekiihpiminisha'ikewaatc. A'a tahsh kihkino'amawaakan okii'nanamaayenimikoon Maawac Kihcianami'ewikimaan. Miitahsh kaa'ishiwiicipiintikemaatc Ciisahsoon i'imaa piihtawiya'ii 'imaa waahkaa'ikan e'menikanihkantek, Maawac Kihcianami'ewikimaan kaashiayaanitc. 16A'a tahsh Piitar i'imaa kii'niipawi akwaci‑ishkwaantemink. Wa'a kotak kihkino'amawaakan kaananamaayenimikotc Maawac Kihcianami'ewikimaan, miinawaa kiihkiiwesaaka'am. Miihsh okii'awikanoonaan ini oshkiniikihkwen kaakanawentaminitc kihcimenikani‑ishkwaantem. Miihsh a'awe kihkino'amawaakan kaa'ishipiintikanaatc Piitaroon. 17Okiihkanoonikoon tahsh Piitar ini oshkiniikihkwen kaakanawishkwaantawenitc: “Kaawiin ina kiin peshik ini okihkino'amawaakan a'a inini?” okii'ikoon.
Miihsh kii'ihkito: “Kaawiin niin,” kii'ihkito.
18Ikihsh anohkii'aakanak kaye kanawencikewishimaakanihshak i'imaa kii'naaniipawiwak, ekiihpootawewaatc ahkahkanshewi‑ishkote, ekii'awasowaatc. Aaniihsh kii'onsaamitahkaayaa. Kaye wiin tahsh a'a Piitar okii'awiwiicikaapawiihtawaa' ekii'awasotc.
Ekiihkakwecimikotc Ciisahs ini Kihcianami'ewikimaan
(Matthew 26.59-66; Mark 14.55-64; Luke 22.66-71)
19Miitahsh Maawac Kihcianami'ewikimaa okiihkakwecimaan Ciisahsoon keinaacimaanitc okihkino'amawaakanini, keitaminitc kaye okihkino'ikewinini. 20Ciisahs itahsh okii'nahkwehtawaan: “Mohshe piko ninkiihkaakiikit kahkina awiya cinoontawiwaatc. Mooshak ninkiihpapaakihkino'amaake anami'wikamikonk kaashiayaakin kaye 'omaa Kihcianami'ewikamikonk kahkina kaashimaawaci'itiwaatc. Kaawiin kekoon ninkiihkiimooci kihkino'amaakehsii. 21Wekonen tahsh niin wencikakwecimiyan?” okii'inaan. “Kakwecim iki kaakii'noontawiwaatc aaniin kaakii'inakwaa. Okihkentaanaawaa kaakii'inakwaa,” okii'inaan.
22'Iwehsh ekii'ihkitotc, peshik iniweniwan kanawencikewishimaakanihshan e'niipawinitc okiihpahsiinkwekanaamikoon. “Mii na 'i eshinahkwehtawatc a'a Maawac Kihcianami'ewikimaa?” okii'ikoon.
23Ciisahs 'iwe okii'inaan: “Kiishpin mecikiikitowaanen, tipaatotan tahsh miyaanaatanokwen, kahkina cinoontawihkwaa. Kiishpin itahsh kwayahk ehkitowaanen, wekonen itahsh wencipahkihte'oyan?” okii'inaan.
24Miitahsh a'a Aanahs (Annas) okii'ishinisha'waan Ciisahsoon keyaapi ekii'mamaancikwahpisonitc, i'imaa ci‑ishiwinimintc kaashiayaanitc Keyahpahsoon (Caiaphas), mayaa Maawac kaaKihcianami'ewikimaawinitc.
Miinawaa Piitar ekii'ihkitotc ekaa ehkihkenimaahsik Ciisahsoon
(Matthew 26.71-75; Mark 14.69-72; Luke 22.58-62)
25Keyaapihsh 'imaa Piitar (Peter) kii'naaniipawi kaaishiawasotc. I'ihsh kotakiya' okiihkanoonikoo': “Kaawiin ina kekiin peshik okihkino'amawaakanan?” okii'ikoo'.
Kii'aanwehtam: “Kaawiin niin,” kii'ihkito.
26Peshik itahsh otanohkii'aakanan a'a Maawac Kihcianami'ewikimaa, otinawemaakanan ini ohtawakaani Piitar kaakii'maniwepa'amawaatc, okiihkanoonikoon: “Kaawiin ina kikii'waapamihsinoon ekii'wiiciiwatc kihtikewinink?” okii'ikoon.
27Piitar miinawaa kii'aanwehtam: “Kaawiin,” kii'ihkito. Miihsh shemaak inkoci ko 'imaa kiihtepihtaakosi naapepaahka'aahkwaan e'noontaakositc.
Ekii'oncishkawikaapawihtawaatc Ciisahs ini Paailatoon
(Matthew 27.1-2, 11-14; Mark 15.1-5; Luke 23.1-5)
28Wiipa kiihkishepaawakan i'i ahpii. Miitahsh i'imaa Keyahpahsoon (Caiaphas) kaakii'ishiayaanitc okii'anioncimaaciinaawaan Ciisahsoon, ekii'ishiwinaawaatc tipaahkonikewikamikonk, Pariihtooriyam#18.28 Pariihtooriyam kaaishinihkaatek, mii 'iwe kihcionahshowewikimaa owaahkaa'ikan kaaicikaatek. (Praetorium) e'ishinihkaatek. Kaawiin wiinawaa kiihpiintikehsiiwak oniikaanisiiwi Coowak, ekii'inentamowaatc ewii'manaawiini'itisowaatc,#18.28 ewii'manaawiini'itisowaatc: kiishpin hsa Coo kii‑ishipiintiketc otaawininiink kaakiihCoowiwihsinik, mii hsa kaainakimintc ehpehkisihsik. Kaawiin itahsh kiihpakitinaahsii ciwiitoohkaasotc aaniin kaakii'ishianami'ehkamikaninik. Waapantan “Wiinentaakosiwin” ihkitowinan kaaishioshipii'ikaatekin. ewiihpehkisiwaatc 'imaa ewii'ishiwiihsiniwaatc Pimaaci'ikoowi Wiihkwantiwinink ekii'inentamowaatc. 29A'a tahsh kihcionahshowewikimaa Paailat (Pilate) kiihpisaaka'am ekiihkanoonaatc: “Wekonen tahsh eshianaamimek wa'a inini?” okii'inaa'.
30Okii'nahkwehtaakoo' itahsh: “Kiishpin ekaa kiimacitootansikipan, kaawiin kitaakiihpi‑ishiwitamaakoohsii a'a inini,” kii'ihkitowa'.
31Okii'inaa' itahsh Paailat: “Kiinawaa otaahpinihk, tipaahkonihk enahtek i'i kiinawaa kitoonahshowewiniwaa,” okii'inaa'.
Coowak itahsh kii'nahkwehtamook: “Kiinawaa kaa‑Oroom‑ininiiwiyek (Romans) kaawiin kipakitinihsiinaam niinawint awiya citipaahkonankitc cinihsankitc,” kii'ihkitowak. 32#Jhn 3.14; 12.32. O'owe tahsh kii'ishiwepan citipihsenik i'i Ciisahs kaakii'ihkitotc ekii'niikaaniwiintank aaniin keishinipotc.#18.32 aaniin keishinipotc: kii‑inaahkonimintc awiyan cinihsimintc, Coowak okiihpapimwahsina'aawaan, Oroomiwininiwak (Romans) itahsh wiin okii'akosaka'waawaan.
33Miitahsh miinawaa Paailat kiihkiiwepiintike otipaahkonikewikamikonk, ekii'antomaatc ini Ciisahsoon, miitahsh ekiihkanoonaatc: “Kiin ina kaawii'okimaahkantawatwaa iki Coowak?” okii'inaan.
34Ciisahs okii'nahkwehtawaan: “Kiin ina 'o kitinentamowin kaaihkitoyan? Komaa na awiyak kekoon kikii'wiintamaakook ehtashimiwaatc?”
35Paailat itahsh okii'inaan: “Coowak ina tinowi kitinenim? Kiin kiwiicitanahkiimaakanak kaye Kihcianami'ewikimaak, miiwak ohsha iki kaakii'miishiwaatc citipaahkoninaan! Wekonehsh kaa'ishimamaashiiyan?” okii'inaan.
36Ciisahs itahsh kii'nahkwehtam: “Kaawiin o'omaa ahkiink nintooncimiinikoohsii eshiokimaawiyaan. Kiishpin ahkiink oncimiinikooyaampaan, taakii'miikaasowak iki kaawiici'iwaatc cikiinaatamawiwaahpan. Kaawiin tahsh nintaakiihkaahcitinikohsiik iki niikaanisiiwi Coowak. Kaawiin tahsh wiin o'omaa ahkiink nintooncimiinikoohsii nintookimaawiwin,” okii'inaan.
37Amiihsh kaa'ikotc Paailatoon: “Mii na tahsh tepwe kihciokimaa ehtinowiyan?” okii'ikoon.
Ciisahs tahsh okii'inaan: “Kiin kitish kihciokimaa ehtinowiyaan. O'owehsh ehta wencitakwihshinaan o'omaa ahkiink, kaye mii 'owe kaakii'oncinihtaawikiyaan, citipaatotamaan i'i tepwewin. Awiya piko tepwewinink oncitipentaakositc ninkapisintaak i'i ehkitoyaan,” okii'inaan.
38Paailat itahsh kii'ihkito: “Wekonehsh i'i tepwewin?”
Ekiihkiishaahkonintc Ciisahs ciakosaka'ontc
(Matthew 27.15-31; Mark 15.6-20; Luke 23.13-25)
Ahpiihsh 'iwe kaa'ihkitotc Paailat (Pilate), miinawaa kiihsaaka'am ekiihkanoonaatc Coowa' kaamaamawenonitc: “Kaawiin kekoon nimihkamowaahsiin a'a inini cioncinihsintipan,” okii'inaa'. 39“I'iwe tahsh kaanihtaa ishihcike'ikooyek, tahsink iko ehPimaaci'ikoowi Wiihkwantinaaniwank mooshak kipakitinamawininim peshik kaakipa'ontc. Kinantawenimaawaa na 'owe ahpii cipakitinamawinakook kiinawaa Coowak kikihciokimaamiwaa?” okii'inaa'.
40Kiihshaakowewak itahsh: “Kaawiin wiin wa'a inini!” kii'ihkitowak. “Paraapahs (Barabbas) pakitinamawihshinaam!” kii'ishishaakowewak. Omahkantweshk itahsh kiihtinowihkaaniwi a'a Paraapahs.
Chwazi Kounye ya:
Cwaan 18: OJBR
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ojibwe Shorter Bible (Roman Script) © 2008 Canadian Bible Society