Estè 2
2
Wa a chwazi Estè pou larenn peyi a
1Apre sa, lè kòlè wa a fin pase, lide wa a te toujou sou sa Vachti te fè a ak sou desizyon li menm li te pran lè sa a. 2Se #1 Wa 1.2 konsa, nan moun ki toujou avèk wa a, gen ladan yo ki di l:
— Poukisa ou pa mete moun chache pou ou kèk bèl ti jenn fi ki tifi toujou? 3Nan tout pwovens peyi ou la, w'a chwazi kèk enspektè ki va chache dènye bèl ti jenn fi ki poko nan gason. Y'a mennen yo nan kay madanm ou yo, isit la, lavil Souz, kapital la. W'a mete yo sou kont Egayi, domestik konfyans ou ki reskonsab madanm ou yo, pou li ba yo tou sa yo bezwen pou fè kò yo bèl. 4Lèfini, jennfi ki va fè ou plezi plis la, w'a mete li larenn nan plas Vasti.
Wa a wè se te yon bon lide, li fè sa konsa vre.
5Lè #1 Sam 9.1 sa a, nan lavil Souz, kapital peyi a, te gen yon jwif ki te rele Madoche. Se te pitit Jayi, nan branch fanmi Benjamen. Li te sòti nan fanmi Kich ak Chimeyi. 6Lè #2 Wa 24.14,15; Jer 24.1; 29.1,2 Nebikadneza, wa peyi Babilòn lan, te pran Jekonya, wa peyi Jida a, ansanm ak lòt prizonye yo nan lavil Jerizalèm pou l te depòte yo, Madoche te ladan l tou. 7Li te gen yon ti kouzin li ki te rele Estè. Men bon non jwif li se te Adasa. Se te yon bèl fi anfòm. Lè papa l ak manman l mouri, Madoche te pran l lakay li, li leve l tankou pwòp pitit fi li.
8Apre yo te fin pibliye lòd wa a, yo mache chache anpil jenn fi, yo mennen yo lakay wa a lavil Souz, kapital la. Estè te ladan yo tou. Se konsa li te lakay wa a, sou kont Egayi ki te reskonsab tout madanm wa yo. 9Estè te fè Egayi plezi anpil. San l te ale avè l. Li pa pèdi tan li, li ba li tou sa li te bezwen pou fè kò l bèl ak manje ki bon pou li. Li chwazi sèt bòn lakay wa a, li bay Estè pou sèvis pa l, epi li mete l nan pi bon apatman ki te genyen nan kay madanm wa yo.
10Estè pat kite pèsonn konnen moun ki peyi ak ki ras li te ye, paske Madoche te ba li lòd pou l pat di anyen sou sa. 11Chak jou, Madoche bò pa l menm t'ap pwonmennen devan lakou kay medam yo pou l te konnen jan Estè t'ap degaje l, ki jan sa ta pral pase pou li.
12Yo te pran yon lanne nèt pou pare jenn fi yo. Yo pase sis mwa ap pran masaj ak lwil fèt ak lami, sis mwa ak odè ansanm ak krèm fèt pou madanm marye. Apre sa, yo mennen jenn fi yo yonn apre lòt al jwenn wa Asyeris. 13Men ki jan sa te fèt: lè yon jenn fi ap kite kay medam yo pou ale kay wa a, yo ba li tou sa li te vle mete sou li. 14Se #Estè 4.11 yon jou swa yo toujou mennen l. Nan maten, yo fè li ale nan yon lòt kay wa a te genyen pou mètrès li yo. Yo renmèt li nan men Chagaz ki te reskonsab kay sa a. Jennfi a pa te gen pou li te tounen kay wa a ankò, esepte si wa a te vle. Lè konsa se wa a ki pou bay non fi li vle a.
15Jou pou Estè ale kay wa a rive. Estè, pitit fi Abikayil la, kouzin Madoche te pran pou pitit fi li a, leve, li pa mande anyen pase sa Egayi, domestik konfyans wa a ki te reskonsab jenn fi yo, te ba li konsèy mande pou mete sou li. Tout moun tonbe pou Estè lè yo wè l. 16Se konsa, Asyeris t'ap mache sou sètan depi li te wa, nan dizyèm mwa, mwa yo rele Tebèt la, lè yo mennen Estè devan wa a lakay li. 17Wa a #Estè 1.11 tonbe pou Estè plis pase pou tout lòt fanm li te janm konnen. Estè te rive fè wa a plezi plis pase tout lòt jenn fi yo. Wa a renmen l plis pase lòt yo. Li mete kouwòn li a sou tèt Estè, li nonmen l larenn nan plas Vachti a. 18Lèfini li voye envite tout chèf li yo ak moun pa li yo. Li fè yon gwo resepsyon pou estè. Li bay vakans nan tout peyi a nèt epi li voye kado adwat agoch jan wa yo te konn fè li a.
Madoche sove lavi wa a
19Pandan tout tan yo t'ap mennen jenn fi yo bay wa a, Madoche te chita bò pòtay palè a. 20Estè menm pat kite pèsonn konnen moun ki peyi ak ki ras li te ye. Madoche te ba li lòd pa di anyen sou sa. Estè te obeyi l jan li te toujou obeyi l lè li te timoun lakay li.
21Antan #Estè 1.10 Madoche te chita bò pòtay la, de domestik konfyans wa a, Bigtan ak Tèrèch, ki t'ap fè pòs devan chanm wa a, fache sou wa a, yo fè konplo pou yo touye l. 22Madoche #Estè 6.2 vin konn sa. Li di larenn Estè sa. Larenn Estè menm al di wa a men sa Madoche voye di l. 23Yo #Estè 6.1 mennen ankèt, yo jwenn sa Madoche te di a se te vre. Yo pann de mesye yo. Lèfini, wa a bay lòd pou yo ekri koze a nan gwo liv achiv gouvènman yo.
Chwazi Kounye ya:
Estè 2: HAT98
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Haitian Creole DC Bible © Societé Biblique Haïtienne, 1998.