Estè 5:1-8

Lè pèp Jwif la te sou twazyèm jou jèn yo, Estè mete wòb rèn li sou li epi l al kanpe nan lakou ki anndan bò palè wayal la, anfas kote twòn wa a ye a. Wa a te chita sou twòn li sou estrad la ki bay fas lakou a. Lè wa a wè rèn Estè kanpe nan lakou a, li te kontan wè l. Li lonje baton lò a ba li. Konsa, Estè avanse epi li touche pwent baton an. Wa a di Estè: “Kisa m ka fè pou ou rèn Estè? Di mwen kisa ou vle! M ap ba ou nenpòt sa ou mande, menm si se mwatye nan wayòm nan.” Estè di konsa: “Mwen prepare yon festen pou ou jodi a. Si sa fè ou plezi, èske ou menm ak Aman ta vini?” Alò, wa a di sèvitè li yo konsa: “Ale vit chache Aman pou n ka fè touswit sa Estè mande a.” Wa a ak Aman ale nan festen Estè prepare pou yo a. Pandan yo t ap bwè diven, wa a di Estè konsa: “Di mwen sa ou vle. M ap ba w nenpòt sa ou mande, menm si se mwatye nan wayòm nan, l ap pou ou.” Estè reponn: “Wi se vre mwen gen yon rekèt. Si mwen fè wa mwen an plezi, epi si li ta panse se yon bon bagay pou l ban mwen mwen mande l, m ap mande l souple pou l vini demen ankò avèk Aman nan yon lòt festen m ap prepare pou li. Lè sa a, wa mwen an, m ap rakonte ou rekèt mwen an.”