Juwawu 6
6
Yesu ohoindjiviha jodja
Matewuji 14:13-21; Markuji 6:30-44; Lukaji 9:10-17
1Noira eno, vagavirile malambo, Yesu ohovenyaga na anamamuharaye, aliwa lambuwa ntiya na Galileya, neno naitaniwa Tiberiya. 2Mwa tempu yenne mwindji wa atu oindjiva komuharaga Yesu na mwasa oona jionihedo jairana liye aavulumutchaga arenda. 3Kamuharagave, Yesu na anamamuharaye kohogwelaga mwangoni, aliwa garati. 4Tempu yenno yalinganne na Pwando ya Mavirelo ya aJudewu yagawandamenle. 5Kagali mwangoni ule, Yesu agaaonne atu oindjiva kazaga wali liye ule, ohonfuka Filipi ira: <<Kodi hiyo nnafuna nidowe nagule uvi pawu dokwakwana para adjiha atu atene anna?>> 6Yesu anfukaga Filipi enne era muxixa. Tchoira yafuna liye ira, mwinnya ohomala iziwa. 7Filipi ohomuwakula eraga: <<Masiki nahakayena nnga kobiri da parata 200,#6:7 kobiri da parata 200: Kobiri yaromola Filipi tchali ing'ono. Yali kobiri nnga inavahiwa mutu alaba mmundani mwa nfwaye malambo 200. kobiriwa tchakwakwana ira nigule mwana pawu imohi para kada mutu.>>
8Noira enne, namamuhara mmohiwa eriwa Andire, Simawu Peduru mbalaye, 9ohoira: <<Dihimuona muzombwe mmohi unna pawu tanu disakanyiwe na utu wa sevada#6:9 Sevada tchi yomela imohi ya burebure, yenno inasakanyiwana utu. Utuwa eto kanariya fiyeda nnga utu wa tirigu nari. Ku wonga pawu dile dasakanyiwe na utu wa sevada. na somba mbinli. Masiki eno, kodi ejo jinokwakwana ira anamwindjala kadje?>>
10Evale Yesu oharumaga anamamuharaye ira: <<Kaawandeleni atwala ira kagarati.>> Fwanyeya ira nimburo nali atu nne vohokala tongwe. Evale atwale kohogaratigi vati. Alombwana ve kaligi okwakwana 5.000, hiya ahiyana na ahima. 11Yesu ohotukulaga pawu dile, liye mutamalelana Mulugu, liye roma meya, avaheda anamamuharaye. Evale anamamuharaye ale aliwa agawelaga atwale kagaratile evale, kada mutu nnga mwafunela liye. Eto ohotukula somba dile liye irana makalelo mamohive. 12Evale atene kagamanle rumbala, Yesu oharuma anamamuharaye ale ira: <<Dodelani johala jatene ira jahakalevo jodimela.>> 13Anamwindji kagarumbanle, mwa pawu tanu doroma da sevada dile, anamamuhara Yesu kagadodenle, johala jile johokwakwana migogoda kumi na minli.
14Evale atwale kagaonne jionihedo jairile Yesu jile, kohowongaga keraga: <<Na ibaribari ndimuwola gu Namafiyiheda kamuwongetcha atu ira unoza mwilamboni.>>#Detoronomiyo 18:15-18 15Mwa enne kohokagana yofunafuna ira kamuhambihe Yesu umwene momuhindela. Mbwenye Yesu agaonne enne, ohovenyavo, liye maruwa ekave bahi, dowa mwangoni.
Yesu ohowenda vazulu va mahindje
Matewuji 14:22-33; Markuji 6:45-52
16Yagafiyile ora ya tchiguwo, anamamuhara Yesu kohodowa ntiya na Galileya, 17aliwa gwela mwadeya mmohi, roma lambuwaga ira kadowe kombela ya Kafaranamu. Kadowagave enne, unde wohofiyedaga diba kagalive okave eto Yesu ali ahanaze kala na aliwa. 18Evale nipevo nohogundeyaga na makalelo abure, mahindje roma manganyeya. 19Mwa enne kagatchapile fiyeda kilometuru tanu funaga fiyeda tanu na imohi, kohomuonaga Yesu awendaga vazulu va mahindje, awandamelaga mwadeya wenno wagwenle atu. Kagamuonne, kohoromaga rendjeya.
20Mbwenye Yesu ohawandela eraga: <<Kamuove, gu miyo vano.>> 21Kagavwile mazwale, koziveliwaga keraga: <<Zani mugwele mmwadeyani mu.>> Evale Yesu agagwenle mmwadeyani mule, kari kari, ku fiya wene kombela wayaga atu.
Atu adjindji kohomuhara Yesu mofuna dja pawu bahi
22Unde wagatchile, anamwindji vahanle atu wewo wadjile atu pawu, kagaing'anne mwiko, kohoona ira: <<Mwadeya mmohive ali uno, ugwenle ba anamamuharaye okave bahi, Yesu kadowile na aliwa.>> 23Vevale kohoonaga mwadeya dimohi dizaga, dikumaga Tiberiya, difiyaga wandamelana nimburo nenne vadjile atu pawu karumbala, Yesu agamutamalenle Nabwiya. 24Mwa enne aliwa kagaonne ira Yesu kanafwanyeyavo nne anamamuharaye kilivo, kohogwelaga mwadeya dazile dile, aliwa dowaga Kafaranamu ira kanvendege. 25Mwa enne kaganfwanyile kombela imohiwa ya ntiya nne, kohonfuka ira: <<Namafundjiha, kodi uno muzilewo ora nni?>> 26Yesu ohawakulaga eraga: <<Miyo nnafuna duwandeleni ibaribari. Nyo eni kamunadivendela mokana ibaribari zela jionihedo jiirilena miyo, nari. So munadivendela na mwasa orumbala pawu bahi.>>
Yesu gu pawu ya ingumi
27Yesu ohowongagave eraga: <<Kamuzuzumelege udja wewo unavunda. So mbwenye, muzuzumele mudjelo unavaha ingumi yohomala, mudjelo wenno unafuna uvahani Mwana wa Mutu. Liye unowanda uvahani ingumi yohomala ineriha Mulugu Baba gumuhambihile.>>
28Evale atu kohonfukaga keraga: <<Ira hiyo niiregena mabasa a Mulugu, nnafuna niire avi?>> 29Evale Yesu ohawakula ira: <<Mabasa anafuna Mulugu boira mmuroromelege wenno umurumile liye.>>
30Yesu agawongile mazu anne, atwale kohomuwakula, aliwa ira: <<Hiyo ira nuroromeleni nyo, jionihedo nni jinafuna nyo irana? Na nyenne kairanani jionihedo jenyu ira nuroromeleni. 31Makolo ehu malambo a mundulrimu tempu yali atu muisalesaleni, aliwa kodja mana aavaha Mozeji, tchoira ihilrembiwa mMazuni ira: <Liye ohavaha atu pawu dokumela zulu ira kadjege.>#Salmu 78:24 >> 32Yesu ohawakula, liye ira: <<Miyo nnafuna duwandeleni ibaribari. Auvahileni pawu ya ibaribari yokumela zulu kaali Mozeji. Mbwenye pawu ya ibaribari yokumela zulu unauvahani gu Baba. 33Tchoira pawu ya Mulugu gwenno ukumenle zulu, aza mwilamboni ya vati. Liye unaavaha ingumi atu a mwilamboni.>>
34Evale aliwa kohomuwakulaga, aliwa kwi: <<Andimuwa, hiyo nnafuna nnga malambo matene munivahege munya pawu yenno.>>
35Evale Yesu ohawakula, liye ira: <<Miyo dili pawu ya ingumi. Mutu wenne unaza wa miyo kaza akana ndala. Eto ule unadiroromela kaza akana ntona. 36Mbwenye miyo duhuwandelani ira kamunadiroromela, masiki mudionagave.
37<<Atene Baba unadivaha liye anoza wa miyo. Eto ule unaza wa miyo, kadiza dimutamangiha. 38Tchoira miyo ira dikume zulu, dize ilambo ya vati, kadizele ira diiregena jofuna jaga. Mbwenye dizele ira diiregena jofuna ja wenno udirumile.
39<<Yofuna ya Babaga wenno udirumile, ufunne ira daakoye atu atene udivahile liye ahakalevo odimela eto siku nogomiheda dize daavenyihe mokwani. 40Mwasiwa yofuna ya Baba tchoira mutu watene unadiing'ana eto adiroromelaga miyo Mwanaye udirumile liye, mutuyo akayena ingumi yohomala eto vasogolro dize dinvenyihe mokwani.>>
41Mwa enne aJudewu kali evale kagavwile mazu oira: <<Miyo dili pawu yokumela zulu>>, kohoroma munong'ona Yesu keraga: 42<<Iya, uluwole kahi Yesu mwana Joze? Babaye na mmaye hiyo kanaaiziwile? Kodi unawanda avi wonga ira: <Miyo dikumenle zulu.>?>>
43Yesu ohawakula eraga: <<Nyo kamudinong'onege na mwasa wa ejo jiwongile miyo. 44Kalivo unaza wa miyo mwa kopolo daye. So Baba wenno udirumile, gunamuzana wa miyo. Ule Baba unamuzana liye wa miyo, miyo siku nogomiheda nnonvenyiha mokwani.
45<<Tchoira ihilrembiwa mMazuni mwa anamafiyiheda ira: <Atene anofundjihiwa na Mulugu.> >>#Izaiya 54:13 Nona atu atene anavwa ja Baba, kafundja mwa liye, banno anafuna za wa miyo. 46Kairaga eno kahi ira aliwa kohomuona Baba, nari. Tchoira kalivo mutu mmohiwa umuonne Baba ahali wenno ukumile wa Mulugu. Wenno ukumile wa Mulugu mbwenye gumuonne.
47<<Miyo nnafuna duwandeleni ibaribari. Ule unadiroromela ukana ingumi yohomala. 48Miyo dili pawu yonvaha mutu ingumi. 49Ababinyu kawendaga muisalesaleni kohodja mana eto aliwa kohokwa. 50Mbwenye mutu uli watene unadja pawu yenno yokumela zulu, liye kaza akwa. 51Miyo dili pawu ya ingumi ikumenle zulu. Mutu wenne unadje pawu yenna unokalawo kala no kala. Pawuwa inafuna miyo avaha atu a mwilamboni ira kakayena ingumi ba maningwaga.>>
52Noira enne, aJudewu kohoroma runihana oka oka keraga: <<Mutula unafuna anivahe maningo aye ira nidjege na makalelo bavi?>> 53Evale Yesu ohawandela eraga: <<Miyo nnafuna duwandeleni ibaribari. Nyo mwahadje maningo a Mwana wa Mutu eto mwahang'we sangiri naye, kamunawanda kana ingumi muwari mwa nyo nyokave. 54Mbwenye ule unadja maningwaga eto ule unang'wa sangiri naga, ukana ingumi yohomala. Eto miyo nnoza dinvenyihe mokwani siku nogomiheda. 55Tchoira maningwaga anafwanyeya kagali yodja ya ibaribari. Eto sangiri naga nnafwanyeya nagali yong'wa ya ibaribari. 56Ule unadja maningwaga no ng'wa sangiri naga, liye unokalave muwari mwa miyo eto miyo nnokalave muwari mwa liye.
57<<Baba wenno udirumile ukana ingumi, nona eto na miyene dihikana ingumi. Sawasawa nnga Baba unodivaha miyo ingumi, na miyene mutu wenno unafuna didja, miyo nnonvaha ingumi. 58Fwanyeya ira pawu ya tchineneva na pawu da wanle vihikala hiyana. Tchoira makolo enyu anno kadjile pawu da wanle kohokwa. Mbwenye ule unadja pawu ya tchineneva yokumela zulu unokalawo kala no kala.>>
59Yesu jatene eji awongile agali Kafaranamu muwari mwa nyumba yofundjamo Mazu.#6:59 nyumba yofundjamo Mazu yali nyumba aJudewu mwafundja atu mazu wanle. Tchoira aliwa kohovahiwa malamulo madjindji a Mulugu na sanganiko didjindji. Evale aliwa kohokana nyumba yagumanetcha atu kafundjagamo jatene ejo. Kada vatatamoni kohokana nyumba yewa yofundjamo mazu nnga vinaireya na maigereja malambwala. Ku wonga nyumba dofundjamo Mazu mwilamboni yatene kahi ira yali nyumba imohive nari. Dohokalamo didjindji dene. So mbwenye Nyumba ya Yehova yali imohive ilambo yatene ya vati. Tempu ya Yesu, liye agali mwilamboni ya vati, ovolowetcha nyumba dofundjamo Mazu dile.
Atu oindjiva kamuhara Yesu kohoroma mutawa
60Yesu agawongile mazu matene anne, anamamuharaye adjindji kohowongaga, aliwa ira: <<Mazwala borutcha. Kodi mutu guvi unafuna rumela jeji?>>
61Evale Yesu agaiziwile na mmirimani mwaye ira anamamuharaye kong'ong'ohaga oka oka, ohawongana eraga: <<Kodi mutakaleliwele zela jiwongile miyo? 62Nnga ahakale mudiona miyo Mwana wa Mutu digwelaga didowaga zulu wakaletcha miyo, mwakala avi? 63Unavaha ingumi gu Munemba. Mbwenye maningo kinalaba yengo ili yatene. Mazu anawonga miyo ala kakumile mwa Munemba, nona anovaha ingumi. 64Mbwenye muwari mwa nyo kohokalamo kahanadiroromela.>> Yesu aza awongaga eno, tchoira kuma voroma vene liye ohaiziwa ale kahamuroromela eto liye ohomuiziwa ule afuna za muguliha.
65Yesu agairile: <<Muwari mwa nyo kohokalawo kahanadiroromela>>, ohowongagave, liye ira: <<Nona tcheniyo idiwongihile ira: <Kalivo unaza wa miyo ahali Baba unamurumeliha.> >>#6:65 Kalivo unaza wa miyo ahali Baba unamurumeliha: Mazu a Mulugu anoniwandela ira onelramo ibaribari no twaruwa no kana nroromelo kunazela mofuna wa kada mutu. So mbwenye mutu ira akayena jatene ejo, unavahiwa. Kohokalawo anavahiwa eto kohokalawo kahanavahiwa. Nione Matewuji 13:11; Markuji 4:11-12; Lukaji 8:10, 18:34; Joira ja Anamarumiwa 16:14; Roma 9:16; 2 Timoteyo 2:25. 66Yesu agawongile mazwale, anamamuharaye oindjiva kohomuhiyaga, aliwa dowaga jiwa. 67Evale Yesu agahanle na anamamuharaye kumi na ambinli, ohafuka ira: <<Kodi na nyenne munafuna mudihiye?>> 68Evale Simawu Peduru ohomuwakulaga eraga: <<Nabwiya kodi hiyo nakuma mwa nyo, nnafuna nidowe nakale na ani? Tchoira nyo mazu enyu ba mazu ovaha ingumi yohomala. 69Hiyo eto nihimala uroromelani eto nihifiyeda iziwa ira nyo muli Mutu Otchena okumela wa Mulugu.>>
70Evale Yesu ohowakulaga, liye ira: <<Kodi uusakunlreni nyo kumi na ambinli kahi miyo vano? Eto muwari mwa nyo, ukala mutu mmohi uli Diyabo.>> 71Diyabo amuwonga liye, awonga zela Judasi, mwana wa Simawu Iskariyoti. Tchoira Judasi ule ali muwari mwa anamamuhara kumi na ambinli a Yesu eto liye gwafuna za muguliha.
Chwazi Kounye ya:
Juwawu 6: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral