Juwawu 7
7
Yesu ohodowa vaPwandoni ya Misasa
1Nomala eno, Yesu awendawenda muwari mwa Galileya bahi. Liye kadowa ilambo ya Judeya mwasiwa Judeya ule kohokalawo andimuwa a aJudewu kafuna jompa. 2Mwa tempu yenne yohowandamelaga Pwando ya Misasa,#7:2 Pwando ya Misasa yali pwando yadja aJudewu yaka datene. Muwari mwa Pwando ya Misasa, aJudewu komanga misasa diwa, aliwa mala sumana imohi kakalaga vamisasani viwa vale. Ali pwando youmbuwela tempu yakala aIzarayeli mmisasani kagali muisalesaleni kakumaga Ijipitu kahanavolowe ilambo ya Kana. Juwawu muwari mowonga Pwando ya Misasa ya aJudewu, ku wonga kaali Pwando ya Misasa yadja atu omuroromela Yesu mbwenye yadjiwa na aJudewu ohomuroromela Yesu. yenno yasakanya aJudewu. 3Evale Yesu adibiliye kohomuwongana ira: <<Kavenyawo uno udowe Judeya ira anamauharawo na aliwene kaonege mabasa unalaba we. 4Tchoira mutu afunaga iziweya, kanairana matikiniho mokoyeya. Unairana vatando ira atu kamuonege. Na wenne akala uli mutu oirana matikiniho, inafwanela wavioneyihe vari va atu atene.>> 5Aliwa kawongela eno mompeta mwasiwa adibiliye ale na aliwene eto tchamuroromela. 6Evale Yesu ohawandela ira: <<Miyo tempu yaga kinati. Nyo mbwenye tempu ili yatene tchofwanela ira muirena yengo ili yatene. 7Atu a ilambo ya vati kinauidani. Mbwenye anadiida miyo na mwasa oira miyo nnaawandela ibaribari ira: <Nyo mabasinyu botakala.> 8Nyo dowani pwandoni wo. Miyo mbwenye, tempu yaga kinadikwakwanele.>>
9-10Nomala wonga eno, abalaye kohodowaga pwandoni. Yesu mbwenye ababihile hala Galileya. Eto mwa ora ya vang'ono, na liyene ohoaharaga pwandoni ule. Mbwenye adowaga, adowile mozembiheya, hiya movioneyiha. 11Mwa enne andimuwa a aJudewu kohonvenda vapwandoni vale keraga: <<Kodi liye uli waani?>> 12Eto muwari mwa anamwindji kali vapwandoni vale, mohokumaga jowonga jidjindji zela wa Yesu. Amohiwa kaira: <<Yesu gu mutu wapama.>> Amohiwa mbwenye kaira: <<Iya, nari. Liye gu maliba anyenga atu.>> 13Mbwenye ejo kawongaga, kawonga mozembiheya, mwasiwa kaaova andimuwa a aJudewu.
Yesu ohoroma afundjiha atu vatando va Nyumba ya Yehova
14Malambo a pwando kagali vari na vari, Yesu ohovenya, liye dowa Nyumba ya Yehova, liye roma afundjihaga aJudewu kafwanyeya evale. 15Mwa enne aJudewu ale kavuruwanaga jofundjiha jaye, kohotikiniheya keraga: <<Kodi mutula uwandile avi iziwa toto datene dedi ahali mutu ofundja? Liye eto kanafundje na makalelo nnga nnafundjihetcha hiyo!>> 16Yesu ohawakula eraga: <<Jinafundjiha miyo kahi jaga. Nnafundjiha ja wenno udirumile. 17Ule unafuna irana funa wa Mulugu unoza aonelremo akala miyo nnafundjiha jaga, owu akala miyo nnafundjiha ja Mulugu.
18<<Ule unawonga jaye, unavenda ira atu kamutitimihege. Mbwenye mutu wa ibaribari, unamutitimiha wenno umurumile. Era eno liye kahi mutu onama.
19<<Kodi nyo malamulo uuvahileni bani? Kaali Mozeji? Nyo eto kamunawanda kwakwaneliheda, tchoira munafuna jodipa miyo. Akala muli okwakwaneliheda, kodi mwasiwa gwa nni nyo funaga jodipa?>> 20Mwa enne anamwindji kafwanyeya evale kohomuwakula ira: <<Weyo ukana munemba wabure! Unafuna upa bani?>> 21Yesu ohowakula ira: <<Miyo diirilena yotikiniha imohi bahi eto nyo atene roma tikina. 22-23Mozeji ohouwandelani makalelo omuinela mwana.#7:22-23 Mozeji ohouwandelani makalelo omuinela mwana: Ineliwa unawongiwa va kahi nnga ineliwa wa tempu ili hiyo ila. Wanle Mulugu ohomuwandela Abarahamu ira: mwana wa mwanapongwe uli watene unabaliwege vande vawo, akwakwanihaga malambo matanu na mararu, inafwanela aineliwe. (Jenesesi 17:10-14) Eto aineliwa ali ahima a alombwana ve, kakwakwaniha malambo matanu na mararu. Ku wonga mwana agali nnyenya na mmandani. Nione Levitiku 12:3. Ku wonga ja lunga jinera azombwe eto ja zoma na anamwali jinera atu tempu ili hiyo ila kajinna pandi na Mulugu. Eto ibaribari iwa, ineliwa kukumile mwa Mozeji eka, mbwenye uzile mwa makolo a wanle. Muwari moinela mule, ira nyo muwande kwakwaneliheda malamulo, vamohi vuwa munohinda mabasa omuinela mutu siku na sabado. Nnga munawanda avi ditakaleliwa miyo vano dahindaga mabasa onvulumutcha mutu ompumbula siku na sabado, agali nyo eto munohinda mabasa omuinela mutu siku na sabado? 24Kamutongege muwari moing'ana makalelo a mutu. Mbwenye mutongege na matongelo a ibaribari.>>
Atu kohokana yofuka ira: <<Kodi Yesu gu Namatikeliwa?>>
25Yesu awongaga enne, anamurala amohiwa a Jeruzalemu kafwanyeya evale kohoromaga wonga keraga: <<Kodi mutu ananvendetcha atu ira kampe kahi wenna? 26Kaing'anani eto, liye peno unalaleya vatando vene. Andimuwa kamusayela ira kampe banna kali eva eto kinawonga yengo zela liye. Kodi aliwa kohofiyeda iziwa ibaribari ira liye gu Namatikeliwa? 27Namatikeliwa aza, kalivo unafuna iziwa unakumela liye. Eto mulombwanola hiyo nihimala iziwa ukumenle liye. Nnga unawanda avi kala Namatikeliwa?>>
28Evale muwari moafundjiha atwale Nyumba ya Yehova, Yesu ohowonga mokuwa eraga: <<Nyo muhumala diiziwa eto muhuiziwa dikumenle miyo. Mbwenye za uzile miyo, kadire viruma meka. Ukala udirumile. Udirumile gwa ibaribari wenno mwahamuiziwile nyo. 29Umuiziwile gu miyo mwasiwa dikumenle wa liye. Liye gudirumile.>>
30Yesu agawongile eno, kohokalavo karomile jofuna ira kamuhinde. Mbwenye tchawandile muhinda, mwasiwa tempu yaye yali yahanakwakwane. 31Mbwenye muwari mwa mwindji watene wa atu kafwanyeya evale, adjindji kohoroma muroromela, aliwa roma wonga ira: <<Kodi Namatikeliwa aza sogolro wu unerege irana jionihedo jokwaranya jeji jinairana mulombwanola?>>
AFarizewu vamohi na andimuwa a anamakuta koharuma agwarda ira kadowe kamuhinde Yesu
32Mwa enne aFarizewu kafwanyeya evale kohovwaga ira anamwindji ale komuwonga Yesu. Mwa enne aFarizewu ale vamohi na andimuwa a anamakuta koharuma agwardiwa ira kadowe kamuhinde. 33Yesu mbwenye ohawandela ira: <<Miyo nnakala na nyo tempu ya vang'onove bahi. Mbwenye amala nnowelela wa wenno udirumile. 34Dadowa, nyo munerege divenda eto kamunadionege. Tchoira unadowa miyo, nyo kamunawanda diharawo.>> 35Evale aJudewu ale, kohoromaga wonga oka oka keraga: <<Kodi liye unafuna adowe uvi wewo wahananda hiyo fiyawo? Kodi unafuna adowe vilambo dimohi dohokala da aJudewu wewo unafwanyeya aJudewu amohiwa kabalaleyile mwilamboni muno?#7:35 vilambo dimohi dohokala da aJudewu: Owu hehi vilambo da aGerego. Kodi unafuna adowe aafundjihege atu ohokala aJudewu wewo? 36Kodi jinawonga liye airaga: <Dadowa, nyo munerege divenda eto kamunadionege. Tchoira unadowa miyo, nyo kamunawanda diharawo.> jeji ku tapulela nni?>>
Yesu gu mahindje a ingumi
37Siku nogomiheda na pwando, siku neno nafwanyeya nagali siku nindimuwa, Yesu ohoimelaga, liye kuwa na mazu olimbiha eraga: <<Ule unna ntona, aze wa miyo, ang'we. 38Ule unadiroromela miyo, mmirimani mwaye munokuma mihindje da mahindje a ingumi, nnga mwemo mulrembele atu mMazuni.>>#Izaiya 58:11; Zakariya 14:8 39Yesu awongaga eno, awonga zela Munemba Otchena wenno afuna kana atu omuroromela liye. Tchoira ora yenno Munemba Otchena ali ahanarumiwe ira aze akale mmirimani mwa atu, mwasiwa Yesu ali ahanavahiwe undimuwa.#7:39 mwasiwa Yesu ali ahanavahiwe undimuwa: Vahiwa undimuwa unawongiwa va ku tukuleliwa zulu dowa garati mpando wa umwene, muwononi odjana wa Babaye. Mwasiwa Yesu agali ilambo ya vati owanda akamiheda atu. Mbwenye nnga liye afuna avenyevo, ohowonga ira nnomuruma mutu mmohiwa unafuna kala vamalroni vaga ira awandege akamiheda atu. Munemba Otchena uhanle vamalroni va Yesu. Tchoira liye ohowonga ira: <<Miyo dahadowe, Nkamihedi kanauzelani.>> (Juwawu 16:7) Yesu awongaga ira miyo nnakalave na nyo ante magomelo wa ilambo (Matewuji 28:20), liye afuna akalege na hiyo muwari mwa Munemba waye Otchena hiya kala na hiyo muwari mwa maningo.
Mwa aliba vwa jowonga ja Yesu mohokalaga gaweya
40Anamwindji atene kafwanyeya evale, kagavwile jejo jawongile Yesu, kohokana gaweya muwari mwa aliwa. Amohiwa korumelaga ira: <<Na ibaribari ula gu Namafiyiheda namudediha hiyo.>> 41Amohiwa eto kowonga keraga: <<Ula gu Namatikeliwa namudediha hiyo.>> Mbwenye amohiwa koruniha keraga: <<Iya, hehi. Tchoira ula ukumile muwari mwa Galileya. Namatikeliwa unadedihiwa kanakumela muwari mwa Galileya, nari. 42Tchoira mMazuni mulrembiwe ira Namatikeliwa unafuna za, unakumela muzizani mwa Davi, tatamo ya Beleme wewo wakala Davi. Mutula eto ukumile Galileya.>> 43Mwa enne atwale tchawandile vwanana jowonga jiwa zela Yesu. Mohokala gaweya.
44Evale kohokalawo kazilege mofuna ira kamuhinde Yesu.#7:44 kohokalawo kazilege mofuna ira kamuhinde Yesu: Kafuna jomuhinda ali agwarda a Nyumba ya Yehova. Tchoira vs noharela nnawonga ira aliwa kagadowile gumana na andimuwa a anamakuta na aFarizewu aliwa kohosanyiwa ira: <<Mwasiwa gwa nni muza mwahamuhindaga, mmuzagana.>> Mbwenye kalivo awandile venya ira amuhinde.
Yesu aoniwa nnga mutu ohokana mabasa
45Noira eno, agwarda a Nyumba ya Yehova kohodowaga gumana na andimuwa a anamakuta na aFarizewu. Kagagumanne, aliwa kohafukaga keraga: <<Nnga mwasiwa gwa nni nyo zaga eni, hamuzagana mutuyo?>> 46Agwarda ale kohoira: <<Ii, hiyo kannanfwanye nne mutu mmohi unawonga nnga ha jejo jinawonga liye.>> 47AFarizewu ale kohawakula ira: <<Kodi na nyenne muhumala nyengiwa? 48Kodi nyo mwaonamo, muwari mwa hiyo andimuwa atene a anamakuta vamohi na aFarizewu, kodi ukala umuroromenle liye? 49Mbwenye anamuroromela ba anamwindji a atu otembelrelreya, anno kahaiziwile malamulo.>>
50Muwari mwa andimuwa ale, mmohi ali Nikodemu, wenno avennyege vari va mahiyu adowa agumana na Yesu. Nikodemu ule ohowongaga na andimuwa afwaye ale, liye ira: 51<<Kodi muwari mwa malamulo anawendana hiyo, inowandeya hiyo mutonga mutu nahanavwe jowonga jaye, nahanaiziwe jinera liye?>> 52Evale aliwa kohowakulaga, aliwa ira: <<Aa, kodi eto na wenne ukumenle ilambo imohive ya Galileya?! Wasaka iziwa ibaribari, unofwanya ira kalivo namafiyiheda unakuma ilambo ya Galileya.>>
53[Noira eno, atu atene kohomala balaleya, kada mutu dowaga vande vaye.#7:53 MaBibiliya amohiwa oroma kinawonga mazu a Juwawu 7:53-8:11.
Chwazi Kounye ya:
Juwawu 7: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral