YOHANE 1
1
Idedo likahaluka mndu
1Ipfo mawokyonyi kuweipfo idedo; liweipfo nalyo Idedo liwei na Ruwa, nalyo liwei Ruwa. 2Lyo liwekeri na Ruwa ili mawokyonyi. 3Shindo shose shiipfo nyi shiishitane na mweeke folyo. Nalyo kulawode liweipfo kuwechitano kindo ma kimu kya isho shii-shitanepfo. 4Lyo liwerie moo, na moo fu fukawa sa ya wandu. 5Na sa yo nyi iwaa ipfo meemenyi, na meema fu fulaiambye.
6 Kuwei-pfo mndu aledumo nyi Ruwa rina lyake nyi Yohane. 7O alecha kyewika-ho wuṟingishi kundu nawikye sa yo kiṟingishyo wandu washike iidikia wose. 8Chio awei sa iya amonyi-pfo kya indi alecha kundu nawe mṟingishi moṟingishya wandu sa yo. 9Nyi yo Sa ya lohi yo yelimika orio mndu ose ai kunu wuyana.
10Nyi idedo liwekeri kunu wuyana na wuyana wu wuwuumbe kui mweeke folyo na wuyana wu manya wulammanye. 11O nyi alecha na orukenyi loke amonyi na iwo wai wake ma walamwambye. 12Indi iwo walemwambya na imwidikia kawaenengya wulimbi wo itano wana wa Ruwa wose. 13Nawo nyiwo walefeo nyi Ruwa chi kui wuidimi wo mndu o wandupfo ma kui pfinya tsa mbihu-pfo, ma kui idumbwo lya msoro mliwe pfo kya indi Ruwa amonyi nyio ndeawo.
14Nalyo idedo likahaluka mndu arie nyama tsa wandu likakaa kodu. Natso lukawona wuitoṟi woke, nawo wuitoṟi wu wui wo Mana kimumu mfi aikaa na Wande aichuo wutonga pacha na wukilohi wose. 15Yohane nyi aṟingishye kyake kechipoṟohora na ihamba, “Ichu nyio ulya njilehamba kyake, ke kwipfo aicha oo numa yako na nawenjisongoye nyi aweipfo, kipfa o awekukeṟye-ho, inyi njilamefeo.”
16Na ili pfo koke nyi kidahyonyi lukawa welimyo kisumbo kikaweitumano nyi kisumbo. 17Cha kipfa Ruwa naleende wuwawaso wulya kui Mose, indi wutonga na wukilohi, wo nyi wuleendo nyi Yesu Kristo. 18Kuipfo mndu alemewona Ruwa ma indipfo. Ichu akeri Mana oke kimumu mfi ai cha Ruwa alunganyi na wande, nyio aleluongoya mbonyi tsa Ruwa.
Wuṟingishi wo Yohane Mpatisi
(Mat 3:1-12; Mar 1:1-8; Luk 3:1-18)
19Na kiṟingishyo kilya kya Yohane kikeri kii-le lya mandi Wayuda walemdumya wandu wakohanyi na Walewi wawuka kulya Yerusalemu wahende imbesa wahambe, “A iyo nyi ukeri o wu?” 20Nao kakuhambya na pata ma alakane kakuhambya, “Inyi chi njii Kristo-pfo.” 21 Wakambesa, “A iyo nyiu? Ngesa nyi ukeri Elia?” Yohane kahamba, “O chi inyipfo.” A ngesa ukeri mwikimbi ulya? Nao kahaluo, “Oo.” 22Nahong'u wakambia, “A nyi ukeri nyi wu? A nyi wuda ohamba kyapfo iyo kumonyi? Natso luwone kindo lochihenda iwia walya waludumye?” 23 Nao kahamba, “Inyi njikeri mndu ulya mwikimbi Yesaya alehamba kyake, ‘Ru lya mndu moedya kundo kuwode olele kehamba, keachikyenyi njia ya Mndumii.’”
24Na wandu walya wai-wadume nyi Wafarisayo. 25Wakawesa Yohane “A nyi ki kyaduma kowa mopatisa wandu na iyo kulakeri Kristo ma Elia, ma mwikimbi ulya?” 26Yohane kahalwo kahamba, “Inyi njechekepatisa na mṟinga, indi kwipfo ahoṟoki kiidi kyanu nanyo mulamwichi. 27Nyio sa aicha numa yako, na inyi njimfoi ma ipfungwo ngowa tsa shadu shakepfo.”
28Kyasia-ng'u nakyo kundo kyewutikya kido nyi kulya Betanyia kulya molyola ya meda fo Yordanyi kundo Yohane echipatisya.
Kichondi kya Ruwa
29Na ili lya ngama Yohane kawona Yesu kyechimchea kahamba, “Aiki kichondi kya Ruwa kyechiwuta-ho wunyamaṟi wo wuyana. 30Nao nyio ichu njiweihamba kyake ke kwipfo msoṟo aicha numa yako, na nyi aweipfo kipfa o awekukerye-ho inyi njilamefeo. 31Na inyi njimonyi njiwemwichipfo. Indi o kundu namanyike na pata ipfo ko wandu wa Israeli nkyo kindo njilechea njipatise na mṟinga.”
32Na Yohane kawika kiṟingishyo kahamba, “Njilewona Mumuyo fo Ruwa echimsokya ai cha mbeta awuka ruwehu kacha ikaa nao. 33Na inyi njiwemwichipfo, indi ichu alenjiduma njipatise wandu na mṟinga nyio alenjiwia, ‘Mndu-chu ochimbona Mumuyo fo Ruwa fochimsokia fuwuka ruwehu fukamkaya nyio echiwa mopatisa na Mumuyo Mwele. 34Na inyi iwona ngamebona ngawika kiṟingishyo kyake ngahamba, ke ichu nyio Mana o Ruwa.’”
Wa kiloshionyi wa kuwoka
35Nahong'u ili lya ngama Yohane awehoṟoki-ho lingi arianyi na wa kiloshyonyi kyake wawi. 36Kawona na Yesu echikuidyaho kahamba, “Ichu nyio ihuṟuwi lya Ruwa.” 37Nahong'u walya wawi wa kiloshyonyi wamwicho Yohane adeda adi madedoho wakaoshana na Yesu. 38Yesu kainduka kawawona wa kiloshionyi waimwituma kawawia, “Iki mwipfula nkyo ki?” Nawo wakambia, “Hoi Rabi (Nakyo nyi kimu na Mlosha) nyi ku okekaa?” 39Kawawia, “Kyenjonyi muwone.” Nahong'u wa kiloshionyi wakacha wakawona hando ekyekaa wakatsinda nao mkonu fulya puti. Nalyo nyi mbe saa ikumi kyukanyi.
40Andrea, manomae o Simon Petro, nyi umu o walya wawi waleicho kilya Yohane ahamba wakamwituma Yesu numa. 41Andrea kawoka iwona manomae o Simon kambia, “Lombona Mesia.” (Nakyo kokihalwo kigriki nyi kimu na Kristo.) 42Kaduo Simon na alya ko Yesu. Yesu kaambuya Simon faa kahamba, “Nyi iyo Simon ui mana o Yona nolahong'u rina lyapfo nyi Kefa.” (Nakyo kohalwo nyi kimu na Petro iho lya “ngina.”)
Filipo na Natanaeli walaho
43Ili lya ngama Yesu awerie ihenda kulya Galilaya. Nalyo kakoya Filipo. Yesu kambia, “Oshana na inyi.” 44Na Filipo awei mndu o Betisaida, o mṟi fulya fo Andrea na Petro. 45Filipo kawona Natanaeli kambia, “Hoo lomekuwonya ichu amhambe nyi Mose na waikimbi, nyio Yesu o Yosefu ulya o kulya Nasareti.” 46Natanaeli kawesa Filipo, “A kulya Nasareti kindo kyechiwukaho kii kicha nkyo kiki?” Filipo kambia “Kenjoo-wo uambuye.” 47Yesu kawona Natanaeli kecha na oo ando akeri kadeda kyake kehamba, “A ichu mndu Mwisraeli o lohi; alawode mtambo ipfo mrimenyi.” 48Na Natanaeli kambia, “A nyi nonjimanya kuda?” Yesu kahalwo kambia, “Ili Filipo alawemekulahe kukeri alya tsindenyi ya mkuyu fulya na mbemekuwona.” 49Natanaeli kamhaluo, “Hoi Rabi, iyo nyi ukeri Mana o Ruwa, Iyo nyi Mangi ya Israeli.” 50Yesu kahalwo kambia, “Ili ngamekuwia ke nyi njiwekuwonyi kukeri alya tsindenyi ya mkuyu fulya nkyo kyakuenenga koidikya-ng'u. Nyi ochikaa nowone kyeching'anya isho.” 51 Nalyo Yesu kambia, “Na lohi na lohi ngambia, nyi mochiwona kulya ruwehu kuṟuhukye na wasu wa Ruwa wechido na isoka wekaya Mana chu o mndu.”
Walinyi wo Kana
Chwazi Kounye ya:
YOHANE 1: KIM2
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Kimochi Bible © Bible Society of Tanzania, 2016.