Matiw Yakshiiy
Yakshiiy
Pwoo'wurett sarr Matiw a r'an w'u yak pwoo'wurett le Jesu a Gu'bham w'u gyet Naan bwakhatbhelepp le riy p'ee pihh nyi, w'u a dhighin ni bhi Naan gam bhelepp w'u gyet bwakhat gurum keeniy mwopp dhighin klap'ran mhi Gabshit Wu'sihkhir. Baah pwoo'wurett mhize ni a p'ee Zhepp Yahuda mwopp kyekk w'u gyet mwopp l'aa Jesu a dhighin mwopp yakhal tong naar mwopp mou; nyi a p'ee gurum w'u dhighin yill ni kihhdihng.
Gu ran Pwoo'wurett sarr Matiw ni tapp'pee r'an ni saag nett-nett. Shee kihh pwookaah arr w'u mwopp l'aa Jesu diy, kihh baptisma w'u Yohanna sh'in nyi, kihh zhwaan'pee w'u Shetan sh'in nyi. Bwoon kihhsheh bhi ran pwookaah dhakk khi Jesu ni w'u sh'in Galili kaa kihhshe se: dhakk satt pwooNaan khinyi, kihh kamm khinyi, kihh bar shw'al w'u sh'in nihghin Galili. Bwoon mihhseh, bhi ran pwookaah mwaan khi Jesu yakhal Galili shi'baa k'aa wull Urshalima, kihh v'ur bii mwan sh'in dhighin shaptarr w'u kyess mhi t'ong khi Jesu dhighin yill mhize, dum sihkhitt kihh pwookaah rooh mwopp pwas nyi kihh sheepmuutt, kihh ya'khal khinyi kihh seen kih peemuutt.
Klap'ran Pwoo'wurett sarr Matiw ni kihh kamm munn le Jesu a Gukamm Wu'yon w'u kihh pee mhi satt shiiy W'aar khi Naan yakhal sh'in kamm kaah dhenglong khi Naan. Gu ran Pwoo'wurett sarr Matiw ni shap dhess dhighin bii w'u Jesu kamm a der kaahpwoo paad kaa kihhshe se: (1) Wu'shee: Jesu satt pwooNaan kih dhengbwumm. Kamm mhize ni mwopp a kaah mihhseh khi gurum, kihh dhakk'shin, kihh kadpee, kihh kyess khi zhepp khi dhenglong khi Naan, (Mat 5-7). (2) Wu'vel: Yakshiiy dhakk w'u Jesu pihh Zhepp'lop keeniy w'u kaghapaad baa'vel (Mat. 10). (3) Wu'kunn: Shummpwoo kaah dhenglong khi Naan. (Mat 13). (4) Wu'feerr: Kamm kaah a mihyeh a shiiy khi dumdang Jesu (Mat. 18). (5) Wu'paad: Kamm kaah kyess khi yiiy w'u mwasseh kihh ji khi dhenglong khi Naan, (Mat. 24-25).
Bii w'u dhighin Pwoo'wurett sarr Matiw ni
Shumm mhishak kih Jesu Kristi kihh yak arr w'u mwopp l'aa nyi diy (Mat 1:1-2:23)
Dhakk satt pwooNaan khi Yohanna Gu-Baptisma (Mat. 3:1-12)
Baptisma khi Jesu kihh pwookaah zhwaan'pee w'u Shetan sh'in nyi (Mat 3:13-4:11)
Dhakk PwooNaan w'u Jesu sh’in kih k'aam dhighin Galili (Mat 4:12-18:35)
Jesu yakhal mwaan Galili k'aa dum Urshalima (Mat 9:1-20:34)
Shaptarr w'u kyess ni w'u Jesu sh'in dhighin Urshalima kihh kwangpee w'u kuss kihh Urshalima
Pwookaah yakhal kih peemuutt khi Daah Jesu kihh rooh dyingg shin zheppkamm keeniy mwopp. (Mat. 28:1-20)
Chwazi Kounye ya:
Matiw Yakshiiy: Chakfem
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
©️2022 Luke Initiative for Scripture Translation