Lō͘-ka Hok-im 19

Iâ-so͘ kap Sat-kai

1Iâ-so͘ ji̍p-khì Iâ-lī-ko, tùi hia teh keng-kè. 2Tī hia ū chi̍t ê lâng miâ kiò-chòe Sat-kai; i sī ba̍uh-sè ê thâu-lâng, chin hó-gia̍h. 3I ài-beh khòaⁿ Iâ-so͘ sī sím-mi̍h khoán lâng, put-kò in-ūi lâng chin chōe, i ê sin-châi koh óe, khòaⁿ bōe tio̍h. 4I chiū cháu chìn-chêng, peh-chiūⁿ chi̍t châng sng-châi-chhiū beh khòaⁿ Iâ-so͘, in-ūi Iâ-so͘ teh-beh tùi hia keng-kè.

5Iâ-so͘ kiâⁿ kàu hit-ê só͘-chāi, gia̍h-thâu khòaⁿ, tùi i kóng, “Sat-kai, kóaⁿ-kín lo̍h--lâi; kin-á-ji̍t góa it-tēng beh tòa lín tau.” 6Sat-kai chiū kóaⁿ-kín lo̍h--lâi, hoaⁿ-hoaⁿ-hí-hí chiap-thāi Iâ-so͘. 7Chèng-lâng chi̍t-ē khòaⁿ--tio̍h, nga̍uh-nga̍uh-liām kóng, “Chit-ê lâng soah ji̍p-khì chōe-jîn ê chhù tòa!”

8 Sat-kai khiā--teh, tùi Chú kóng, “Chú ah, góa beh the̍h châi-sán ê chi̍t-pòaⁿ chín-chè sàn-chhiah-lâng. Góa nā ū kā lâng pián-chîⁿ, beh sì pē hêng i.”

9Iâ-so͘ tùi i kóng, “Kin-á-ji̍t chín-kiù í-keng lîm-kàu chit-ê ke, in-ūi i mā-sī A-pek-la-hán ê kiáⁿ-sun. 10Jîn-chú lâi sī beh tui-chhē koh chín-kiù sit-lo̍h ê lâng.”

Cha̍p Ê Kim-pè ê Phì-jū

(Thài 25.14-30)

11Chèng-lâng teh thiaⁿ chiah-ê ōe ê sî, Iâ-so͘ koh kā in kóng chi̍t ê phì-jū, in-ūi I teh-beh kàu Iâ-lō͘-sat-léng, koh hiah-ê lâng siūⁿ-kóng Siōng-tè-kok liâm-piⁿ ōe si̍t-hiān. 12Só͘-í Iâ-so͘ kā in kóng, “Ū chi̍t ê kùi-cho̍k khì chin hn̄g ê só͘-chāi beh siū hong choh-ông chiah tńg--lâi. 13I tiàu-chi̍p cha̍p ê po̍k-jîn lâi, hō͘ in cha̍p ê kim-pè#19.13 “Kim-pè” goân-bûn sī “Bí-ná”. Chi̍t bí-ná iok tng-sî chi̍t ê lâng saⁿ kò-ge̍h ê kang-chu., chi̍t lâng chi̍t ê, kā in kóng, ‘Góa tńg--lâi í-chêng, lín ēng chiah-ê kim-pè khì chòe seng-lí.’ 14Pún-kok ê jîn-bîn oàn-hūn i, chhe chi̍t ê sù-chiá tè i ê āu-bīn khì, tùi hông-tè chàu kóng, ‘Goán bô ài chit-ê lâng chòe goán ê ông.’

15“Chit-ê kùi-cho̍k siū hong choh-ông tńg--lâi ê sî, kiò hiah-ê niá-tio̍h chîⁿ ê po̍k-jîn lâi, ài chai in ta̍k-ê lâng thàn jōa-chōe. 16Thâu chi̍t ê lâi i ê bīn-chêng, kóng, ‘Chú ah, góa ū ēng lí hit-ê kim-pè thàn cha̍p ê.’ 17Chú-lâng kā i kóng, ‘Chin hó, hó ê po̍k-jîn! Lí kì-jiân tī sió-sū tiong-si̍t, góa beh hō͘ lí ū koân koán-lí cha̍p ê siâⁿ.’ 18Tē-jī ê lâi, kóng, ‘Chú ah, góa ū ēng lí hit-ê kim-pè thàn gō͘ ê.’ 19Chú-lâng mā án-ni kā chit-ê lâng kóng, ‘Góa beh hō͘ lí koán-lí gō͘ ê siâⁿ.’

20“Koh lēng-gōa chi̍t ê lâi, kóng, ‘Chú ah, lí khòaⁿ, lí ê kim-pè tī chia. Góa ēng chhiú-kun kā i pau khí-lâi khǹg. 21Góa chin kiaⁿ lí, in-ūi lí sī chi̍t ūi giâm-hat ê lâng, bô kià, lí mā beh niá; bô chèng, lí mā beh siu.’ 22Chú-lâng kā i kóng, ‘Lí chit-ê khó-ò͘ⁿ ê po̍k-jîn, góa beh chiàu lí ka-kī só͘ kóng--ê kā lí tēng-chōe. Lí kì-jiân chai góa sī giâm-hat ê lâng, bô kià mā beh niá, bô chèng mā beh siu, 23lí ná bô chiong góa ê chîⁿ kià tī gûn-hâng, tán góa tńg--lâi ê sî thang niá bú-chîⁿ kap lī-sek?’

24“Chú-lâng chiū kā khiā tī piⁿ--á ê lâng kóng, ‘Kā i ê kim-pè the̍h--lâi, kau hō͘ hit-ê ū cha̍p ê kim-pè--ê!’ 25In chiū tùi i kóng, ‘Chú ah, i í-keng ū cha̍p ê kim-pè lah.’ 26Chú-lâng kóng, ‘Góa kā lín kóng, í-keng ū--ê, beh koh-khah chōe hō͘ i; bô--ê, liân i só͘-ū--ê mā beh kā i chhiúⁿ--khí-lâi. 27M̄-kú hiah-ê tùi-te̍k góa, bô ài góa chòe in ê ông--ê, kā in thoa-lâi chia, tī góa ê bīn-chêng kā in thâi-sí!’”

Iâ-so͘ Kong-êng Chìn-ji̍p Iâ-lō͘-sat-léng

(Thài 21.1-11; Khó 11.1-11; Iok 12.12-19)

28Kóng chiah-ê ōe liáu-āu, Iâ-so͘ kiâⁿ chòe-chêng chiūⁿ Iâ-lō͘-sat-léng. 29I teh-beh kàu Kaⁿ-ná-soaⁿ soaⁿ-kha ê Pek-hoat-kî kap Pek-tāi-nî ê sî, chhe nn̄g ê bûn-tô͘, 30hoan-hù in, kóng, “Lín khì tùi-bīn ê chng-siā, ji̍p--khì ê sî ōe khòaⁿ-tio̍h chi̍t chiah m̄-bat hō͘ lâng khiâ--kè ê lû-á-kiáⁿ pa̍k tī hia. Lín kā i tháu-khui, khan-lâi chia. 31Nā ū lâng mn̄g, ‘Lín sī-án-chóaⁿ teh tháu lû-á-kiáⁿ?’ Lín tio̍h kóng, ‘Chú beh ēng i.’”

32In chiū khì, só͘ tú--tio̍h ê tāi-chì ta̍k-hāng kap Iâ-so͘ só͘ kóng--ê siâng-khoán. 33In teh tháu hit-chiah lû-á-kiáⁿ ê sî, chú-lâng mn̄g in kóng, “Lín sī-án-chóaⁿ teh tháu chit-chiah lû-á-kiáⁿ?”

34In ìn kóng, “Chú beh ēng i.” 35In chiū khan hit-chiah lû-á-kiáⁿ lâi Iâ-so͘ hia, chiong ka-kī ê gōa-saⁿ phoa̍h tī lû-á téng, kā Iâ-so͘ hû-khí-khì khiâ. 36Iâ-so͘ khiâ lû-á-kiáⁿ chìn-chêng kiâⁿ ê sî, chèng-lâng chiong ka-kī ê gōa-saⁿ pho͘ tī lō͘--ni̍h kā I hoan-gêng. 37Iâ-so͘ teh-beh kàu Iâ-lō͘-sat-léng beh lo̍h Kaⁿ-ná-soaⁿ ê só͘-chāi, kui tōa-tīn ê bûn-tô͘ in-ūi khòaⁿ-tio̍h it-chhè kî-biāu ê sū chiū lóng hoaⁿ-hí, tōa-siaⁿ o-ló Siōng-tè kóng:

38Hōng Chú ê miâ lâi ê Ông eng-kai siū chheng-chàn!

Goān thiⁿ-téng ū hô-pêng, êng-kng kui hō͘ chì-koân ê Siōng-tè!

39Chèng-lâng tiong-kan, ū kúi-nā ê Hoat-lī-sài-phài ê lâng kā Iâ-so͘ kóng, “Lāu-su, tio̍h chek-pī lí ê bûn-tô͘!”

40Iâ-so͘ ìn kóng, “Góa kā lín kóng, in nā tiām-tiām, chiah-ê chio̍h-thâu mā ōe tōa-siaⁿ hoah--chhut-lâi.”

Iâ-so͘ ūi-tio̍h Iâ-lō͘-sat-léng Ai-khàu

41Iâ-so͘ teh-beh kàu Iâ-lō͘-sat-léng, khòaⁿ-tio̍h siâⁿ, chiū ūi-tio̍h siâⁿ ai-khàu, 42kóng, “Góa si̍t-chāi chin ài lí kin-á-ji̍t chai án-chóaⁿ chiah ōe kiâⁿ ǹg hô-pêng! M̄-kú chit-ê sū hiān-chāi tùi lí khàm--teh, hō͘ lí khòaⁿ bōe tio̍h. 43In-ūi ji̍t-chí teh-beh kàu, hit-sî lí ê tùi-te̍k ōe tī lí ê chiu-ûi chō thô͘-tui pau-ûi, tùi sì-bīn kā lí kong-kek. 44In ōe chiong lí kap lí siâⁿ-lāi ê jîn-bîn choân-pō͘ húi-bia̍t, bô lâu nn̄g tè chio̍h sio-tha̍h, in-ūi lí khòaⁿ bōe chhut Siōng-tè chín-kiù lí ê sî-ki.”

Iâ-so͘ Kiat-chēng Sèng-tiān

(Thài 21.12-17; Khó 11.15-19; Iok 2.13-22)

45Iâ-so͘ ji̍p-khì Sèng-tiān, chiū khí-chhiú kóaⁿ hiah-ê bōe mi̍h-kiāⁿ ê lâng chhut--khì. 46I kā in kóng, “Sèng-keng ū kì-chài:

Góa ê chhù eng-kai sī kî-tó ê tiān,

lín soah kā i pìⁿ-chòe thó͘-húi-á khut.”

47Iâ-so͘ ta̍k-ji̍t tī Sèng-tiān kà-sī lâng. Chè-si-tiúⁿ, keng-ha̍k-kàu-su, kap jîn-bîn ê thâu-lâng it-ti̍t siūⁿ pān-hoat beh hāi-sí Iâ-so͘, 48m̄-kú chhē bô hoat-tō͘, in-ūi chèng-lâng lóng chin chù-ì teh thiaⁿ I ê ōe.

Chwazi Kounye ya:

Lō͘-ka Hok-im 19: TTVR

Pati Souliye

Pataje

Kopye

Ou vle gen souliye ou yo sere sou tout aparèy ou yo? Enskri oswa konekte

The Bible Society in Taiwan

Aprann plis bagay sou 現代台語譯本羅馬字版

Lō͘-ka Hok-im 19

Vèsè popilè nan Bib la ki soti nan
Lō͘-ka Hok-im 19

Bib:

Chinese, Min Nan

Vèsyon: 現代台語譯本羅馬字版 - TTVR

Lō͘-ka Hok-im 19

Lō͘-ka Hok-im 19

Vèsè popilè nan Bib la ki soti nan Lō͘-ka Hok-im 19

Bib:

Chinese, Min Nan

Vèsyon: 現代台語譯本羅馬字版 - TTVR

Lō͘-ka Hok-im 19

Vèsè popilè nan Bib la ki soti nan
Lō͘-ka Hok-im 19