Gimpuunan 28
28
1Nakan ipinatawag ni Isaak si Hakub. Igu rinmas-ug, pinapaladan niya ag sinugu, “Danga kawu mag-asawa taga Kanaan. 2Pag-alistu kawu ag pag-ati sa Padan Aram, ati sa magtal-anakan ni Bitwil kay ama nimu ina. Ati kawu pag pili kanmu arasawan-un sa manga anak daraga ni Laban, ti patar-ari nimu ina. 3Mana papaladan kawu Diyus Makamaskihan ag pakan-an mayamu pag anak hampay kawu ti bumaliw ama mayamu nasyun. 4Mana ipakaun diman sa kanmu hanggan sa kanmu manga linahi ti inayaw pag papalad sa kan Abraham, hampay maapu nimu inda pag daga kanmu pag-ulian taynguna bilang usa ka day-uhan. Inda pag daga ipinakaun ngani Diyus sa kan Abraham.” 5Bag-u pinaati ni Isaak si Hakub sa Padan Aram, sa rugar ni Laban kay anak ni Bitwil usa ka Amuriyu. Si Laban kay patar-ari ni Ribika kay ina nida ni Hakub ni Isaw.
Nag-asawa maan si Isaw
6Naalaman ni Isaw pinapaladan ni Isaak si Hakub ag ipinaati sa Padan Aram hampay ati pag manhanap arasawan-un. Naalaman diman niya igu pinapaladan ni Isaak si Hakub kay binilinan danga mag-asawa taga Kanaan. 7Ag naalaman diman niya sinunud ni Hakub kanda gurang ag inmati sa Padan Aram. 8Nakan ati pag naalaman ni Isaw dayu maaw kay ama manga babayi taga Kanaan. 9Nakan inmati siya sa kay bapa sa kan Ismail kay anak ni Abraham sa kan Hagar. Bukud sa duwa niya ka asawa, inasawa waya gid niya si Mahalat kay anak ni Ismail ag patar-ari ni Nibayut.
Nanagin-up si Hakub ati sa Bitil
10Nighit si Hakub sa Biirsiba ag inmati sa Haran. 11Igu mag-isalup yi ti init, nakaras-ug siya sa usa ka rugar ag ati siya pag napalipas yabi. Nagbuul siya usa ka batu ag binwat niya sangdayan sa kay magkaturug. 12Igu turug yi si Hakub, nanagin-up siya may usa ka agdan matindugan sa daga abut tugka sa langit. Nakitan niya ti manga anghil Diyus magdayik ag magdugsun sa agdan. 13Nakitan diman niya ti Panginuun matindugan sa tungud agdan#28:13 sa tungud agdan: ngatay, sa kay arani. ag magkun tag sa kanya, “Aku ti Panginuun, ti Diyus ni Abraham ag ni Isaak. Ipakaun niku sa kanmu ag sa kanmu manga linahi inda pag daga kanmu pag paigyaan. 14Kanmu manga linahi yumamu ga galbuk sa daga. Man-ngalat sida sa inda pag tuhay-tuhay pag bahagi daga. Sa panab-anan nimu hanggan nimu manga linahi, papaladan niku ti tanan tawu sa kalibutan. 15Pirmi nimu alalahanun aku kanmu kaibahan ag alagaan niku kawu una naan tabug. Ipabalik niku kawu sa inda pag daga ag balaw pabay-anan tugka sa matupad niku kang itinaratu sa kanmu.”
16Nipulaw si Hakub ag magkun sa kay sadili, “Unman niku alam atay maaw ti Panginuun sa inda pag rugar.” 17Kinulbaan siya ag magkun, “Makadululaw inda pag rugar! Ulian inda Diyus ag sitay gid ngap ti sabian atabug sa langit.”
18Maaga binmangun si Hakub. Bin-ul niya ti batu kay sinangdayan sa tunda pag yabi ag ipinatindug bilang usa ka alaala. Bag-u binuhusan niya inda lana ulibu hampay bumaliw banal. 19Iningarnan ni Hakub tunda pag rugar Bitil.#28:19 Bitil: Kay ibug sabihun, ulian Diyus. Kaybi Lus kay ngaran tunda pag rugar. 20Susun nagtaratu si Hakub ag magkun, “Diyus, nu ibahan niyu aku sa kang maglakaw ag pakan-an karan-unun hanggan rutay, 21ag nu makabalik maan aku sa balay niku ama sa unman may nu hintay pag kadautan ti mangyari sa kangku, kilalan-un niku kawu kang Diyus. 22Inda duy pag batu kang ipinatindug bilang usa ka alaala pumatutuu kanmu kadayawan atay sa inda pag rugar.#28:22 pumatutuu ... rugar: sa Hibriyu, bumaliw ulian Diyus. Ag ipakaun niku sa kanmu kang ikasampu pag bahagi sa tanan nimu ipakaun sa kangku.”
Chwazi Kounye ya:
Gimpuunan 28: HNN
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Copyright © 2023 by OMF International, Philippines