Liuk 1
1
Ntȯn̄ȯ Nsen̄e
1Anwi-upono Tiofilȯs, awikiwak in̄wi ekewed eban̄a ima mpȯ ami aban̄a Jizȯs ami aketibe kotu inyin ukem sighi Ahta-Etie ȯkȯwȯn̄ȯ. 2Imi ekewed ima mpȯ-ntibe ani enim ukem sighi in̄wi ami ekekid anye ma anye tȯn̄ȯ ki ntȯn̄ȯ ekebuk eban̄a. Imami ekekid anye ma anye ani ekenni iyuvȯk ami ekebe ima nsen̄e ani etan̄ enȯ inyin. 3Ami ngo n̄nen̄enye ndime ukime idinne nduȯn̄ȯde afidefid ima mpȯ ami aban̄a Jizȯs, tȯn̄ȯde ki ima mpȯ ami eketibe pan̄ Anyi amana. Ami ngo nkid ki ȯfȯ idiwed inȯ fi n̄nenen seketibe nnȯ fi Tiofilȯs. 4Man asie ken avi enen̄ede-afiak ki ima upiek-mpȯ ami avi ȯkȯbȯhȯ anni apanikwȯ.
Emana anin̄ Jȯn ȯluȯk-mmȯn̄
5Kini Erȯd akenni akrikra ki ipehe Judia, ȯgu anin̄ Ahta-Etie ami ekekre Zakaria akabak nen. Anyi okodio ki nga ima ȯgu ami ekekre nga Abija. Anyi ma nwa iseghe Elizabed ekesie epok anin̄ Erȯn ami akenni apa ȯgu ki Isuel. 6Zakaria ma Elizabed ekenni inininen in̄wi ki anye anin̄ Ahta-Etie. Imi ekedu uwem sighi ibed anin̄ Ahta-Etie atime enȯn̄ enana ndo ki afidefid adeghe. 7Ani imi ekenye oyo sisin̄ siaki Elizabed akeni azi, ngo anyi ma Zakaria ebie iseghe ekezȯn̄ eti-eti. 8Uso sin̄ sighi Zakaria ekenne ubiȯn̄-uto iseghe si ȯgu ki anye anin̄ Ahta-Etie, siaki nga imi ekenye ubiȯn̄uto ki Obio anin̄ Ahta-Etie ki Jeruzelem. 9Sia akasan̄a anni ulo ima ȯgu iditie nsa idimek anwi amanasi ȯluk Obio anin̄ Ahta-Etie idifȯ insens kubie ufȯ insens. Kini ima ȯgu enne sen, enyin anin̄ Zakaria ȯgbȯ ala. 10Ki ini ami Zakaria ȯfȯ insens, awikiwak in̄wi ebono ki esen̄e Obio anin̄ Ahta-Etie ȯbȯn̄ akam. 11Sighi Zakaria odio ki Obio anin̄ Ahta-Etie, enjel ami Ahta-Etie ȯkȯdȯn̄ uto ȯnȯ anyi ȯgbȯ-nwe ala kubȯk ulo mbie-ufȯ insens. 12Kini Zakaria akid enjel ani, azid etimede anyi udulan̄a alaha ȯmȯ anyi. 13Ani enjel ani ȯdȯhȯ anyi, «Zakaria, kuyak udulan̄a ȯmȯ fi, siaki Ahta-Etie agie akam avi. Elizabed nwa avi ma eme oyo-anweni. Anasi avi okuo anyi Jȯn. 14Anyi made opono unniezid ma idra ȯsȯk fi, in̄wi ngo medra kini anyi amana. 15Ahta-Etie made anyi si ȯgbȯnye anwi. Anyi enasi ȯnwȯn̄ ufȯfȯ ma mmi sisin̄ ami ȯmȯ anwi. Elille Sibirid made anyi adeghe tȯn̄ȯde ki udip anin̄ ekie iseghe. 16Anyi ma enne awikiwak ntihiyo Isuel etre udiȯk-mpȯ eliek ekȯn̄ Ahta-Etie. 17Anyi ma aben̄e in̄wi ile aban̄a adidi Ȯgwȯn̄-Etie, ki ukem udȯk ma ulu ami asiakuduak Elaija akenye. Anyi ma enne ima etie enne emem ma iyo imi, ma ȯnȯn̄ enne awikiwak in̄wi ami nama ekesu-uboho enȯ Ahta-Etie eliek ebine eti-uboho ami Ahta-Etie ȯnȯ inininen in̄wi. Anyi adinne sem man enne in̄wi ebak ki mben̄e-ile eban̄a adidi Ȯgwȯn̄-Etie. 18Ani Zakaria ȯdȯhȯ enjel ani, «Ami nzȯn̄, nwa ami ngo ȯzȯn̄ ogbo-ayak idime oyo, si ndinne deghe n̄nim ki si avi atan̄ ma ȯgbȯsu?» 19Enjel ȯbrȯ anyi, «Ami n̄ni Gebrel, nla ki anye anin̄ Ahta-Etie n̄ne mpȯ n̄nȯ Anyi. Ahta-Etie ȯkȯdȯn̄ mi man ede Mi ȯkurȯ edeghe etie ami aban̄a oyo avi nzȯk fi. 20Sese, afidefid si ndȯhȯ fi ma ȯgbȯsu kini ami Ahta-Etie akenim. Ani siaki nama avi unim nsen̄e ami kapanikwȯ, avi ma anni umun̄ tutu ȯkȯ uso ami oyo avi adimana.» 21Sighi Zakaria odio ma engel eneme n̄neme ki ȯvȯhȯ Obio anin̄ Ahta-Etie ki Jeruzelem, otu-in̄wi ebono ki etehe ebie anyi ȯgbȯdi, siaki akeni mpȯ mpe-ile anyi ididio ibuk sen. 22Kini anyi ȯgbȯ ki Obio anin̄ Ahta-Etie adi, esȯkȯd etan̄ nsen̄e ma in̄wi. Ani anyi ede ubȯk enne idion̄ȯ. Ene in̄wi efiak ki anyi akekid nkikid ki ȯvȯhȯ Obio anin̄ Ahta-Etie ki Jeruzelem. 23Kini ubiȯn̄ uto anin̄ Zakaria ama ekekre, anyi alaha ȯnyȯn̄ uvȯk iseghe ki Judia. 24Kuyo ini amakogbo, Elizabed n̄wa iseghe oyo udib, kuvan̄ ȯfiȯn̄ iten̄ anyi odio kuvȯk etre idigbȯ esen̄e in̄wi edekid anyi. 25Anyi ȯdȯhȯ, «Ahta-Etie enne mi n̄yo-udib, anyi ȯfȯ mfȯ ma ami. Abe asuene ami in̄wi ekenȯ mi ki ntak ami nama ankenye oyo aseghe.»
Esian Meri eban̄a emana anin̄ Krais
26Kini Elizabed oyo-udib ki ulaha ȯfiȯn̄ iten̄esin̄, Ahta-Etie ȯdȯn̄ enjel Gebrel aka udun̄ sin̄ ami ekre Nazared ki ipehe Galilii. 27Enjel ani akabine oyo anwin̄wa sin̄ ami ekekre Meri, ami nama ekesefiak anweni ufȯ. Anweni ami ekekre Josef ami akesie epok anin̄ ȯgwȯn̄ Devid ȯkȯmȯ Meri idilȯ. 28Engel ani adidȯhȯ Meri ȯgȯ, «Nkȯ fi! Ahta-Etie mȯkabak ma avi ididiȯn̄ fi. Anyi ȯdiȯn̄ fi ekie afidefid mmani. 29Kini Meri agie si enjel ani atan̄, akikre etimede anyi. Anyi ekre si utȯ ekȯ ani ȯmȯgbȯ. 30Ani enjel ȯdȯhȯ Meri, «Kuyak udulan̄a ȯmȯ fi, mfȯ anin̄ Ahta-Etie ȯkȯh fi udime. 31Sese, avi ma oyo udib eme oyo anweni. Anasi avi aseghe Anyi enyin Jizȯs. 32Anyi adinni ȯgbȯnye anwi, menȯn̄ ekuo Anyi oyo anin̄ nkon̄-nkie Ahta-Etie. Ahta-Etie ma enne Anyi anni ȯgwȯn̄ sighi etietie Iseghe Devid akenii. 33Anyi ma akra ubon anin̄ Jekȯb ki nsinsi. Ukra Iseghe edinye utid. 34Meri abid enjel, «Ami si ndinne deghe mme oyo kini ami nama ansamfiak anweni ufȯ? 35Enjel ȯdȯhȯ anyi, «Elille Sibirid ma alaha oduo fi, ulu anin̄ Ahta-Etie ma akan fi ȯkuk. kutȯ ntak ani, oyo ami avi adime adini elile. Menȯn̄ ekuo Anyi Oyo anin̄ Ahta-Etie. 36Ani sese, ayekie anin̄ ekie avi ami anni Elizabed mȯkasan̄a ma udib oyo anweni kini uzȯn̄ iseghe. Ȯfiȯn̄ iten̄esin̄ anemi tȯn̄ȯ anwi ami ekekuo azi akasan̄a ma udib. 37Siaki nama ebak si akak Ahta-Etie idinne.» 38Meri ȯbrȯ enjel ȯgȯ, «Ami n̄ni ȯvȯn anwinwa anin̄ Ahta-Etie, yak osu ȯnȯ mi sighi avi atan̄. Keni ki enjel alaha ayak anyi.
Meri akatin Elizabed
39Ki ima uso emakegbo, Meri eben̄ile aka udun̄ obodobod ki ipehe Judia. 40Kini anyi akasim, anyi ȯluk uvȯk anin̄ Zakaria ȯkȯ Elizabed nwa iseghe. 41Kini Elizabed agie uje ekȯh anin̄ Meri, oyo atuak anyi ki udib. Inisin̄inisin̄, Elille Sibirid adiduo Elizabed. 42Anyi atan̄ nsen̄e ki otuitu uje ma Meri ȯgȯ, «Ahta-Etie ȯdiȯn̄ fi ekie afidefid mmani, ȯnȯn̄ȯ ȯdiȯn̄ oyo ami avi adime. 43Ani mpȯ upono ȯnȯ mi, ekie Ȯgwȯn̄-Etie mi ididitin mi. 44Akeni ngiegie uje ekȯ avi, oyo atuak mi ki udib ȯnȯ unniezid. 45Ahta-Etie ȯdiȯn̄ fi siaki avi akenim ki si Ahta-Etie ȯwȯn̄ȯ ȯnȯ fi ma ȯgbȯsu.»
Ikuȯ anin̄ Meri
46Meri ȯkuȯ ikuȯ ȯgȯ,
«Ma afidefid azid ami ntro Ahta-Etie.
47Upȯn̄ ami adra ki Ahta-Etie anyin̄inyan̄a mi.
48Siaki Anyi akid nsuhȯde-ile ȯvȯn anwinwa Iseghe, ani sese,
tȯn̄ȯde kemi deka, afidefid emana mekuo mi ȯdiȯn̄idiȯn̄.
49Siaki nkon̄-nkie Ahta-Etie enne utibe mpȯ ȯnȯ mi.
Enyin Iseghe anni mfȯ-mma.
50Mbȯm Iseghe abak ȯnȯ ima ami ebiak Anyi ki afidefid eje.
51Anyi ede opono ulu Iseghe enne ipono mpȯ,
Anyi abiad akikre ima ntan̄ile.
52Anyi etehe ima akrikra ki ufim ukra imi,
ani Anyi abe ima nsuhȯde-ile ate ki ideghe utio.
53Anyi ȯyuȯ ima mbiȯn̄ ma ideghe mpȯ,
ani enne ima unye enyȯn̄ ubȯk upȯk.
54Anyi anwam inyin iyo Isuel iyuto Iseghe,
kenyi idituei ewȯn̄ȯ
55idigbȯ Ebraham ma afidefid ubon iseghe mbȯm ki nsinsi,
Ki idinne sen, Anyi enne si Anyi ȯkȯwȯn̄ȯ ȯnȯ ima etietie, Ebraham ma ubon iseghe ki nsinsi.
56Meri odio ma Elizabed ki ulaha ȯfiȯn̄ ite pan̄ alaha ȯnyȯn̄ uvȯk iseghe ki Nazared.
Emana anin̄ Jȯn Ȯluȯk-Mmȯn̄
57Kini ini adikȯ amanasi Elizabed emme oyo, anyi emme oyo anweni. 58Kini ima ndun̄-mbra ma nyetie iseghe egie si Ȯgwȯn̄-Etie anye mbȯm aban̄a anyi imi edra ma anyi.
Utene-ibu anin̄ Jȯn ȯluȯk-Mmȯn̄
59Ki ȯyȯhȯ uso itan̄a-ete, ndun̄-mbra ma nyetie edi aninam utene-ibu oyo-anweni anin̄ Zakaria. Siaki etie oyo ekekre Zakaria, imi eluȯn̄ȯ idikuo oyo ukem enyin ani. 60Ani ekie iseghe ȯdȯhȯ, «Anyi adikre Jȯn.» 61Ani imi edȯhȯ anyi ȯgȯ, «Ebak anwi kuvȯk ifi ami ekre utȯ enyin ani-o.»
62Ani imi enne idiȯn̄ȯ kubȯk edebid etie oyo sighi anyi ȯluȯn̄ȯ oyo iseghe ekre. 63Anyi enne idiȯn̄ȯ yak ebe utai-nwed esȯk imi. Kini ebe esȯk anyi, anyi ewed ȯgȯ, «Enyin iseghe anni Jȯn». Afidefid imami ekekid si Zakaria ewed ebak ki mpile. 64Kukem ini ani, Ahta-Etie atra Zakaria elei ayak ukeme idisitan̄ nsen̄e. Anyi ȯtȯn̄ȯ iditro Ahta-Etie. 65Udulan̄a ȯmȯ afidefid ima ndun̄-mbra, imi elaha ebak ki mpile. Afidefid in̄wi ki nkan̄ obod ipehe Judia eneme eban̄a afidefid seketibe. 66Afidefid in̄wi ami ekegie eban̄a seketibe ekre ȯgȯ, «Oyo ami mapo adinni ata ȯgbȯnye anwi.» Siaki imi ekid ki Ahta-Etie abak ma anyi.
Ikuȯ anin̄ Zakaria
67Ani Elille Sibirid ede Zakaria adeghe enne anyi atan̄ nsen̄e ki ulu anin̄ Ahta-Etie ȯgȯ,
68«Yak inyin itro Ȯgwȯn̄-Etie ami anni Ahta-Etie Isuel,
siaki Anyi adivak inyin in̄wi Iseghe,
Anyi ma avak inyin.
69Anyi ȯnȯ anyulu anyin̄inyan̄a esȯk inyin
ami asie ubon oyuto Iseghe Devid,
70(Sighi Ahta-Etie ekede ima ilille asiakuduak Iseghe atan̄ ki ima uso ogbo-ede.)
71Anyin̄inyan̄a inyin aseghe ki ubȯk ima esughe inyin,
ma ki ubȯk afidefid ima ami esughe inyin.
72Ahta-Etie enne man Anyi ȯgbȯ ima etietie inyin mbȯm Iseghe, alaha enne si Anyi ȯkȯwȯn̄ȯ idinne ki elille ediomo Iseghe.
73Ami anni ewȯn̄ȯ ami Anyi ediomo ȯnȯ etietie inyin Ebraham
74ȯgȯ, «Ami enyan̄a ifi nseghe kubȯk ima esughe ifi,
man ifi ikime idituak-uboho inȯ Mi ikinye udulan̄a.»
75Anyi ȯluȯn̄ȯ inyin inye mbuȯdile ilaha isu-uboho inȯ ibed Iseghe kadan̄a ini sighi inyin idu uwem.
76Ani avi oyomi, mekuo fi asiakuduak anin̄ nkon̄-nkie Ahta-Etie.
Siaki avi ma enne in̄wi ebak ki mben̄e-ile enȯ Ȯgwȯn̄-Etie. Ene in̄wi ebine-ile etio ebie adidi Iseghe.
77Avi ma anwam in̄wi Iseghe idifiak ki Ȯgwȯn̄-Etie mȯkedi anyin̄inyan̄a imi.
man Anyi efen udiȯk-mpȯ imi.
78Ahta-Etie ki ȯnyȯn̄ efen udiȯk-mpȯ in̄wi Iseghe siaki Anyi ȯyȯhȯ ma mbȯm.
Asieki mbȯm ami, Krais sezi utin-usieje ma asiaha asie Ahta-Etie adiebine inyin.
79Anyi ma anwam imami ebak ki ekim
ma n̄nananye ami udulan̄a mpe ȯmȯ imi,
man asie ken imi edu uwem ki emem ma Ahta-Etie.
80Ani Jȯn ebek opo afiak-ile, otu ki sibirid ma ki nlaha. Akadun̄ ki ofio tutu ȯkȯ ini ami anyi ȯgbȯ aditȯn̄ȯ idikurȯ edeghe etie inȯ in̄wi Isuel an̄wanwa.
Chwazi Kounye ya:
Liuk 1: EBG
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ebughu Bible by Beyond Translation is licensed under Creative Commons Attribution-ShareAlike 4.0 License.