Utumbulilu 3
3
Adamu na Eva bhunhokela Chapanga
1Bhela lijoka lakabhi lichenjile kupeta hinyama yokapi ya muchitengu yeyabhombakiki na Bambo Chapanga. Lijoka lakumpwaghi mbomba, “Eti! Chakaka le kubha Chapanga akapwaghiki, ‘Ngamwikula mapambiku gha nkongu wokapi ghola wa muchijongu?’ ”
2Mbomba akamuyangiki lijoka, “Mapambiku gha mikongu ja muchijongu tuweza kula, 3nambu Chapanga akatupwaghili, ‘Ngamwikula mapambiku gha nkongu ghoubhi pachilanda ja chijongu, wala ngamwigusa, ngamwihika kupotela.’ ”
4Lijoka lakumpwaghi mbomba, “Chakaka ngamwipotele! 5Maghambu Chapanga amanyi kubha lichobha pamwikulaje mapambiku gha nkongu ghonihoghu, anamuyekuliwa mihu, nanamu anambya ngati Chapanga, mkamanya ghamboni na mahakau.”
6Mbomba paakaweni kubha lipambiku la nkongu ghonihoghu lakabhi linyahi kwa chilebhi na linyambiha mihu, na litokuleka kwa kujipatila mbulau, bhela akatongwi lipambiku la nkongu hoghu, na kula, akumpeki na ndomi waki, najombi bhelabhela akakulike. 7Palapala mihu ghabhu ghakayekuliwi, bhakamanyi kubha bhabhi heu, bhela bhakalilokili mahamba gha nkongu ghoulowakeka mtini, na kulilenganakela ingobhu.
8Panihapa mwanalomi na nhwanu waki bhakajowini sauti jaka Bambo Chapanga akajendaje muchijongu chikahi cha lyobha la pakamihi, Adamu na nhwanu waki bhakalihiiki mu mikongu ja chijongu, Bambo Chapanga ngaabhabhona. 9Nambu Bambo Chapanga akundohiki Adamu, “Bho, ubhi kwako?”
10Najombi akayangiki, “Nakajowini sauti ja kujenda kwaku muchijongu, nakajowipi maghambu nepani mi heu, bhela nakalihiike.”
11Chapanga akundalukile, “Bho, nde nane joakupwaghile kubha ubhi heu? Bho, ukuliki le mapambiku gha nkongu ghonukulaghalakile ngawikula?”
12Adamu akapwaghike, “Mbomba ajoju joumbekihe abya papamu na nepani nde joambekihe lipambiku la nkongu ghonihoghu, nanatu nakakulike.”
13Panihapa Bambo Chapanga akundaluki mbomba, “Henu uhengiki kike?”
Mbomba akayangike, “Lijoka lakangolwihe, nanatu nakakulike.”
Chapanga atemula
14Bhela Bambo Chapanga akumpwaghi lijoka, “Kwa kubha uhengiki bhenibhela, upekiwi masolu kupeta hinyama yokapi ya kudimakika, na hinyama yokapi ya muchitengu. Anaukwabhaje kwa lutumbu lwako, na anaukulaje luhombi machobha ghokapi gha matamu ghaku. 15Nanatu ananuntenda muhakalanya pachilanda jaku na mbomba hoju, na pachilanda ja lubheleku lwaki na lubheleku lwaku. Jombi anaakutimba mmutu waku, nanawu anaunduma kinjekinjeki.”
16Kabhete akumpwaghi mbomba, “Chakaka ananukujonjukya mabhinilu gha kubheleka kwaku, kwa mabhinilu anaubhelaka bhana. Na utokulelu waku anaubya kwaka ndomi waku, najombi anaakutawalaje.”
17Chapanga akumpwaghi Adamu, “Kwa kubha wehapa unjowanili nhwanu waku, na kula mapambiku gha nkongu ambau nakakulaghalaki, nakapwaghaje, ‘Ngawikula,’ bhela, luhombi lupekiwi masolu kwa ndandi jaku. Kwa lihoghatela anaulipatila chilebhi chaku monihomu, machobha ghokapi gha matamu ghaku. 18Luhombi analukubhelakya mingwandu na miha, nanawu anaukula mahamba gha mungonda. 19Kwa lihoghatela la pamihu jaku anaulipatila chilebhe, mbaka pawikelabhukaje mulutopi, maghambu ukatolakiki monihomu. Kwa kubha wehapa nde lutopi, nanawu mulutopi anaukelabhuka kabhete.”
20Adamu akundohiki nhwanu waki lihina Eva, maghambu jombi akabhi nde mabhu wa bhandu bhokapi. 21Bambo Chapanga akabhalenganakili Adamu na nhwanu waki ingobhu ya chingumba, na kubhawatika.
Adamu na Eva bhatopuleka muchijongu
22Bhela Bambo Chapanga akapwaghike, “Sajenu mundu ajoju abhi ngati jumu witu, kwa kumanya ghamboni na mahakau. Ipalika kunhibhalila ngayihatambula chiwoku chaki na kutongola lipambiku kuhuma mu nkongu wa womi, maghambu anaakuliki anaatama mileli.” 23Panihapa Bambo Chapanga akuntopwili Adamu kuhuma mu Chijongu cha Edeni, nahuli akalemaje lutopi ambamu akabhombakike. 24Paakuntopwili Adamu, Chapanga akabhekiki makelubi upambala wa kolipita lyobha wa Chijongu cha Edeni, papamu na lipanga la moto lelakabhi ling'anambuka akwo na akwo, kujilenda indela ja kujenda ku nkongu wa womi.
Chwazi Kounye ya:
Utumbulilu 3: MpBV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The New Testament in Mpoto Language ©The Word for the World International and Mpoto Language Translation, 2020 All rights reserved.