Utumbulilu 4
4
Kaini na Abeli
1Adamu akaghonili na nhwanu waki Eva, najombi akapatiki chitumbu, na kumbeleka Kaini. Eva akapwaghike, “Numpatiki mwana wa chikambaku kwa ujangatilu waka Bambo.” 2Panakatai akumbeliki ndongu waki Abeli. Abeli akabhi mdima wa mambelele, na Kaini akabhi ndemi. 3Chikahi pachapetiki, Kaini akaletiki ilebhi ya mungonda ngati nyambiku kwaka Bambo. 4Abeli najombi akaletiki bhabhelakeka bha kutumbula bha mambeleli ghaki na pandu papanonike pa mambeleli ghaki. Bambo akanyambakiki na Abeli papamu na nyambiku jaki, 5nambu Chapanga ngacheakunjetakili Kaini papamu na nyamabiku jaki. Bhela Kaini akahakali namaa, na pamihu jaki pakabhi na ngwinyanila. 6Panihapa Bambo akumpwaghi Kaini, “Bho, maghambu kiki utehi kuhakalila? Na maghambu kiki pamihu jaku pabhi na ngwinyanila? 7Bho, anauhengiki lamboni le ngawijetakalewe? Na nangakuhenga lamboni, bhela, lihoku lukujobhalela pundyangu, najombi jukutokulela wehapa, nambu ikupalika ujiwezaje.”
8Bhela Kaini akumpwaghi ndongu waki Abeli, “Tumboka kuuwanda.” Chikahi pabhakabhi kuuwanda, Kaini akundapwi ndongu waki Abeli na kunkoma.
9Panihapa Bambo akundaluki Kaini, “Bho, ndongu waku Abeli abhi kwako?”
Akayangiki, “Nepani ngachemanye. Bho, nepani le nde mlonda waka ndongu wango?”
10Bambo akapwaghike, “Henu uhengiki kike? Jowanyaje! Mwahi waka ndongu waku unelela nepani kuhuma mu luhombi. 11Henu wehapa upekiwi masolu na kubhohakeka kuhuma mu luhombi, ambalu lukahipiki na kujopalela mwahi waka ndongu waku jounkomike. 12Pawilema luhombi, ngalwakupekehi kabhete ilebhi yaki. Anaubya mundu wa kupotoka potoka, na mundu wanga kutamakila pandu pamu.”
13Kaini akumpwaghi Bambo Chapanga, “Utemulu wangu nde ukolongwa nakanope, ngachenhweza kuhinakila. 14Lalenu, undopwili kuhuma pamihu ja luhombi londone, nanatu ananhiyakika kutali na pamihu jako. Anamya mundu wa kupotoka potoka, na jwanga kutamakila pandu pamu na jokapi joanamonaje anaangomaje.”
15Nambu Bambo Chapanga akumpwaghile, “Ngabhela! Mundu jokapi joanaakukoma wehapa wa Kaini anaalepishwa mala saba nakanopi.” Bhela Bambo Chapanga akumbekiki Kaini alama nahuli mundu jokapi joanaambonaje ngaankoma. 16Panihapa Kaini akabhokiki palongi jaka Bambo, akapiti kutama ku inchi ja Nodi, upambala wa kolipita lyobha wa Edeni.
Bhabhelakeka bhaka Kaini
17Kaini akaghoni na nhwanu waki, najombi akapatiki chitumbu, na kumbeleka Henoko. Chikahi hechi Kaini akachengiki muchi, na akaulohiki muchi ghonihoghu Henoko, lihina laka mwana waki. 18Henoko akumbeliki Iladi, na Iladi akumbeliki Mahuyaeli, na Mahuyaeli akumbeliki Mesushaeli, najombi Mesushaeli akumbeliki Lameki. 19Lameki akatoghwi akambomba bhabheli, jumu akalowakiki Ada, na jongi akalowakiki Sila. 20Ada akumbeliki Yabali, jonihoju nde akabhi hokolu wa bhadima bha hinyama bhabhatamika mu mahema. 21Ndongu waki akalowakiki Yubali, jonihoju nde akabhi hokolu wabhu bhabhahona lipenga na filimbe. 22Sila najombi akumbeliki mwana wa chikambaku joakundohiki Tubali Kaini, jonihoju akabhi nde joaponda hindu ya kila ntundu ya madini gha shaba na choma. Na ndombu waka Tubali Kaini akabhi Naama.
23Lameki akabhapwaghi akabhahanu bhaki,
“Ada na Sila munyowanyaje. Mwenga akabhahanu bhaka Lameki, njowanya malobhi ghango. Nepani nakunkomiki mundu kwa ndandi ja kunapula, ena, nakunkomiki nkombu kwa ndandi ja kumboteka.
24Ngati Kaini anaalepishwi mala saba,
chakaka Lameki anaalepishwa mala sabini na saba.”
Seti na Enosi
25Adamu akaghonili kabheti na nhwanu waki Eva, najombi akumbeliki mwana wa chikambaku, akundohiki Seti akapwaghaje, “Chapanga anyangatili kupata mwana jongi pandu paka Abeli joakakomakiki na Kaini.” 26Seti najombi akapatiki mwana wa chikambaku, akundohiki lihina laki Enosi. Panihapa nde bhandu pabhatumbula kundobha Bambo kwa lihina laki.
Chwazi Kounye ya:
Utumbulilu 4: MpBV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The New Testament in Mpoto Language ©The Word for the World International and Mpoto Language Translation, 2020 All rights reserved.