Zɛnɛse 40
40
Zosɛ è pélesinɛ-ŋai dísee-wooi su kùla
1Nyíŋi pôlu ma Ize kaloŋ ŋɔteƃelei mâ tii kɛ́-nuui da ŋɔkpólo kpɛtɛ-nuu kɛ́tɛi dí sɔnyɔ̂ŋ kɛ̀ a dínuu-namui. 2Nya ƃe gâloŋ è ǹíi ŋwàna ŋɔteƃelei mâ tíi kɛ́-nuu kɛ́tɛi mà da ŋɔkpólo kpɛtɛ-nuu kɛ́tɛi. 3È dísòŋ a pélesinɛ é dítɛɛ gɔkuluƃa-ŋai kɛ́ m̀ɛi káai dínuu kɛ́tɛi ŋɔpɛ́rɛi lá ƃɛ́i Zosɛ è kɛ̀ naa kpini-pɛrɛ mui. 4Kɔ-kuluƃa-ŋai dínuu kɛ́tɛi nyii kɛ̀ Zosɛ mɛi kâai è Zosɛ tɛ̀ɛ dípɔ a gɛɛ gɛ̀ tíi kɛ́ dîɛ tãi díkɛ̀ la gbinipɛrɛi mui.
5È kɛ̀ a kpíni tɔnɔ, Ize kaloŋ ŋɔteƃelei mâ tii-kɛ-nuu kɛ́tɛi da ŋɔkpólo kpɛtɛ-nuu kɛ́tɛi, nyii-ŋai kɛ̀ gbini-pɛrɛi mui, dí see ƃô. Dísee-wooi è kɛ̀ a dee-tee zu-kulai kɛ́ ƃò tɛi-tɛi. 6Tãi Zosɛ è pà la dípɔ naa a maa ɣele-walai, è gàa a gɛɛ dílii è kɛ̀ sɛ̂lɛnii. 7Nya ƃe è dímarê kɛ̀ ǹyɛɛ diai, “Lé ƃé kálii sɛ̂lɛnii sâa?”
8Díyɛɛ mai, “Kú see ƃô, kɛ́lɛ núu da fé naa é zu kula kûɛ.”
Nya ƃe Zosɛ è mò dîa ǹyɛɛi, “See-woo su-kulaa fé a Ɣâla pɔ́? Ka kpera kâa, ka zee-wooi ƃó ḿâ.”
9Nya ƃe teƃelei ma tii-kɛ-nuu kɛ́tɛi è ŋɔsee-wooi ƃô Zosɛ ma ǹyɛɛi, “Kpɔmɔ è kɛ̀ ńduɛ ŋáseei su. 10Gbɔmɔi ŋoŋo saaƃa è kɛ̀ ma. Tãi è pòa la é ƃái, m̀á é kpɔlu. 11Gâloŋ ŋɔkɔ̂pui è kɛ̀ ńyêei. Nya ƃe ŋá gbɔmɔ-ƃai sìɣe ŋá ǹúaŋ zu, ŋá dɛ́ɛ gâloŋ pɔ́.”
12Nya ƃe Zosɛ è mò ma ǹyɛɛi, “Ísee-wooi su-kulai ká ŋí. Gbɔmɔ woŋo saaƃai ƃa ɣele kûu saaƃa. 13Ɣele kûu saaƃa à tɛ̀ɛ, gâloŋ a pâi íkulâi ƃɛ́ é lí a yá pôlu ítii kɛ́ɛi su. Ƃa pâi kɛ̂i gâloŋ ŋɔkɔ̂pui tɛɛ̂i ƃɔ́ yɛ̂ɛ berei í kɛ̀ gɛ̂i la a bɔlɔi. 14Kɛ́lɛ ḿaa mɛni é lɛ́ɛ íkili ŋá. Ɣâla à kpɔ̀ŋ yá, ḿaa mɛni ƃó gâloŋ mâ, ŋa íkperai fêi a gɛɛ é ŋgúla bɛ́rɛi ŋí mu. 15Kpɛ́ni fêi, dí ŋ́ûma Ibulu-ŋai dílɔii su dí pá a ńyãa ƃɛ́. Ǹyaŋ fé mɛni nyɔ́mɔɔ da kɛ́ ní a gɛɛ da pɔ̂ri ḿbûi la kpíni-pɛrɛ mu.”
16Tãi gbólo kpɛtɛ-nuu kɛ́tɛi è gàa la a gɛɛ zee-wooi su-kulai è kɛ̀ a ǹɛ́lɛɛi, è mò Zosɛ ma ǹyɛɛi, “Ńyãa máŋ ŋá see ƃô. Kpólo kpɔ̂lɔ saaƃa dí kɛ̀ ŋ́ûa seêi-pere. 17Gbɔ̂lɔi mɛi-pere, kpólo sîi támaa è kɛ̀ naa gâloŋ mɛni ma. Kɛ́lɛ ŋɔni-ŋai dí kɛ̀ gbelêi ŋ́ûa gbɔ̂lɔi su.”
18Nya ƃe Zosɛ è zu tòo ǹyɛɛi, “Ísee-wooi su-kulai ká ŋí. Gbɔ̂lɔ saaƃai ƃa ɣele kûu saaƃa. 19Ɣele kûu saaƃa à tɛ̀ɛ, gâloŋ a pâi íŋuŋ teêi, é ísɛ̂lɛŋ wúru ma. Ŋɔni-ŋa da pâi íluu kpelêi.”
20Ŋ̀éle kûui zaaƃa-ɣelei nyii kɛ̀ a gâloŋ maa sɔlɔ-ƃó ɣelei, è kúu kɛ́tɛ kɛ̀ ŋɔtíi kɛ́-ƃelai kélee mɛni ma. Nya ƃe è ŋɔteƃelei ma tii-kɛ-nuu kɛ́tɛi kùla gbini-pɛrɛi mu da ŋɔkpólo kpɛtɛ-nuu kɛ́tɛi é pá a dîa ŋɔtíi-kɛ-ƃelai kpéli-ŋai sáma. 21È ŋɔteƃelei mâ tii-kɛ-nuu kɛ́tɛi ŋɔtíi tɛ̀ɛ bɔ́ pôlu a gɛɛ é kɛ́ gâloŋ ŋɔkɔ̂pui tɛɛ̂i bɔ́. 22Kɛ́lɛ è gbólo kpɛtɛ-nuu kɛ́tɛi sɛ̀lɛŋ yɛ̂ɛ berei Zosɛ è mò lai. 23Kɛ́lɛ Zosɛ maa mɛni fé lɛɛ ní gâloŋ ŋɔteƃelei mâ tii-kɛ-nuu kɛ́tɛi kíli ŋá.
Chwazi Kounye ya:
Zɛnɛse 40: KWB
Pati Souliye
Pataje
Konpare
Kopye
Ou vle gen souliye ou yo sere sou tout aparèy ou yo? Enskri oswa konekte
© 2012 Bible Society in Liberia