Zɛnɛse 46
46
Zeeka da ŋɔnûai dí lì Ize
1Nya ƃe Zeeka è ǹyée ŋá-sãa kélee sìɣe é pîlaŋ perêi. È sèri Bɛɛsiba é sâla kula naa ǹâŋ Aise Ŋɔɣâlai mâ. 2Ɣâla è lòno Zeeka pɔ́ a kpíni tɔnɔ zĩ̂a su ǹyɛɛ mai, “Zeeka, Zeeka!”
Zeeka ǹyɛɛ mai, “Ńyãa ká ŋí.”
3Ńyɛɛ Zeeka mai, “Ŋ́gaa a Ɣâla nyii gáa a ínâŋ Ŋɔɣâlai. Ífe yào íli mɛni ma Ize. Kpɛ́ni fêi, ŋa pâi ísuu su kɛ̂tɛi naa. 4Kwa yá kwa pâi liî Ize. Ŋá pâi pâi ŋɔ́nɔ a yá pôlu. Ǹyaŋ Zosɛ a pâi kɛ̂i íkɔlɛ a ísaa tãi.”
5Nya ƃe Zeeka è kùla Bɛɛsiba. Géleŋ-ŋai gâloŋ è dɛ̀ɛ a gɛɛ dí lí a diai, Zeeka ǹônii dí see zu da dínîa-pɛlɛɛi é pɛ́lɛ dínɛyâai dîa. 6Dí lì a dítaa-tulɛ-ŋai Ize lɔii su da díkɔ̃liŋ kélee nyii-ŋai dí zɔ̀lɔ ƃô Keena lɔii sui. Zeeka è lì a ŋɔnúu-suui kélee. 7È lì a ǹônii-sinaai, ǹônii-sinaai díwɔ lonii-sinaa, ǹônii-nɛyãai, nyíti-ŋai díwɔ̂ lonii-nɛyãai da ŋɔnuu-suui kélee.
8Zeeka ŋɔsuui láa ká ŋí nyii lì Ize lɔii sui. Zeeka da ǹônii-sinaai. Lubiŋ nyii kɛ̀ a Zeeka ǹóŋ-surɔ̂ŋ maa-ŋuŋ. 9Lubiŋ ǹônii-sinaai ƃe kɛ̀ a, Anɔ, Palu, Ɛzɔrɔŋ da Kami. 10Simiɔŋ da ǹônii-sinaai, Zemuɛ, Zamiŋ, Oa, Zakiŋ, Zoaa da Sau, nyii kɛ̀ a Keena nɛni tɔnɔ ǹóŋ. 11Liva da ǹônii-sinaai, Gɛsɔŋ, Koa da Melali. 12Zuda da ǹônii-sinaai, Sila, Pɛrɛzi da Zera. (Kɛ́lɛ ǹônii-sinaai veerɛ Ɛɛ̂ da Onaŋ dí sàa Keena lɔii su.) Pɛrɛzi ǹônii-sinaai láa ƃé kɛ̀ a Ɛzɔrɔŋ da Amu. 13Isaka da ǹônii-sinaai, Tola, Puva, Zasu da Simɔrɔŋ. 14Zɛbulɔŋ da ǹônii-sinaai, Serɛ, Ilɔŋ da Zalee. 15Liɛ ǹônii-sinaai ká ŋí nyii-ŋai da Zeeka dí dímaa sɔlɔ ƃô Mɛsopotamia é pɛ́lɛ díloŋ-nɛnii Dina ma. Ǹônii kélee dí kɛ̀ buu saaƃa káo saaƃa.
16Gâa da ǹônii-sinaai, Zefɔŋ, Agi, Suni, Ɛsiboŋ, Iri, Arɔ da Areli. 17Asɛ da ǹônii-sinaai, Iŋna, Isuva, Isivi, Beria da dílêɣe-nɛnii Seera. Beria ǹônii-sinaai ƃe kɛ̀ a, Ɛbɛ da Makiɛ. 18Ǹúɛ-nɛnii Zipa nyii Laƃaŋ è dɛ̀ɛ ǹóŋ-nɛnii Liɛ pɔ́i, da Zeeka dílônii-sinaai ká ŋí. Díkaa puu káo lɔ́ɔlu mɛi da.
19Zeeka ŋɔnɛnîi Leesɛ ǹônii-sinaai ƃe kɛ̀ a, Zosɛ da Bɛŋsima. 20Zosɛ è Manasɛ da Ifiraŋ maa sɔlɔ ƃô Ize lɔii su Asena ma. Asena è kɛ̀ a Oŋ taa-leei ŋɔsâla-laa soŋ-nuu kɛ́tɛi nyii da kâa dôli a Potifɛrai, ǹóŋ-nɛni. 21Bɛŋsima da ǹônii-sinaai, Bela, Bekɛ, Asibɛ, Gera, Naamaŋ, Ei, Loo, Mupiŋ, Upiŋ da Adi. 22Leesɛ da Zeeka dísuui su-ƃelai ká ŋí nyii-ŋai díkaa a núu puu káo náaŋ.
23Daŋ da ǹóŋ-surɔ̂ŋ, Usiŋ. 24Nɛfɛtɛli da ǹônii-sinaai, Zazɛɛ, Guni, Zezɛ da Sileŋ. 25Ǹúɛ-nɛnii Bila nyii Laƃaŋ è dɛ̀ɛ ǹóŋ-nɛnii Leesɛ pɔ́i, da Zeeka dílônii-sinaai ká ŋí, nyii-ŋai díkaa a núu lɔ́ɔlu mɛi feerɛi.
26Zeeka ŋɔsuui su-ƃela kpîŋ-ŋai è lì a dia Ize lɔii sui, dí kɛ̀ a núu buu lɔ́ɔlu mɛi da káo lɔ́ɔlu mɛi da, é kúla ǹônii-sinaai dínɛyâai pôlu. 27Zosɛ è lóŋ-surɔ̂ŋ feerɛ maa sɔlɔ ƃô Ize lɔii su. Zeeka ŋɔpɛ́rɛi mu-ƃelai kélee, nyii-ŋai lì Ize lɔii sui, dí kɛ̀ a núu buu lɔ́ɔlu mɛi feerɛ.
Zeeka da ŋɔnûai díkaa Ize
28Nya ƃe Zeeka è Zuda tɛ̀ɛ tuɛ Zosɛ pɔ́ naa a gɛɛ é mó ma da ǹyaa dí koyâŋ Gosɛŋ. Nya ƃe dí pà Gosɛŋ lɔii su. 29Zosɛ è ŋɔkéleŋ maa mɛni su kpɛ̀tɛ é lí a gɛɛ da ǹâŋ dí koyâŋ Gosɛŋ lɔii su. Tãi è sèri la ǹâŋ mai, è kpùlɔŋ gɔŋ mâ é wɔ́lɔ kpɔ́ a ŋánaa. 30Nya ƃe Zeeka è mò ǹóŋ Zosɛ ma ǹyɛɛi, “Ŋa pɔ̂ri nâa saâi, kpɛ́ni fêi, ŋa ŋ́ɛi pɛ́lɛ yâ. Ŋa gɔ́lɔŋ a gɛɛ íkaa niî ɣele ma.”
31Zosɛ è mò ǹêɣe, ǹîa-ni é pɛ́lɛ ŋɔpɛ́rɛi mu-ƃelai dîa ǹyɛɛi, “Ŋa pâi liî ŋá mó gâloŋ ma a gɛɛ ńêɣe da ńîa-ni é pɛ́lɛ ńâŋ ŋɔpɛ́rɛi mu-ƃelai kélee dîa, nyii-ŋai kɛ̀ Keena lɔii sui, da pá ḿbɔ. 32Ŋa pâi môi mà a gɛɛ zinâai díkaa a ƃála mɛi káa-ƃela, kpɛ́ni fêi, díkaa a taa-tulɛ tɔɔ-ƃela. Ǹyaŋ dí pà a díƃala-ŋai da dítaa-tulɛ-ŋai é pɛ́lɛ díkɔ̃liŋ kélee ma. 33Gâloŋ à kátòli à kámarê kɛ̀ ǹyɛɛ, ‘Kátii ƃa lé?’ 34Ka mó ma kâa, ‘Kûai a íyee mu-ƃelai kwa kúnâŋ-ni kélee kúkaa a taa-tulɛ tɔɔ-ƃela é síɣe kúnia-pɛlɛɛ tãi ma é tóo tãi ŋí ma.’ Bere sîi ŋí su ƃé ka pâi pɔ̂rii seêi la Gosɛŋ lɔii su.” Kpɛ́ni fêi, Ize-ƃelai dífe ƃála mɛi káa-ƃela wɛ́lini a dɔnɔ kpîŋ.
Chwazi Kounye ya:
Zɛnɛse 46: KWB
Pati Souliye
Pataje
Konpare
Kopye
Ou vle gen souliye ou yo sere sou tout aparèy ou yo? Enskri oswa konekte
© 2012 Bible Society in Liberia