Népszerű bibliai igeversek innen: Noo Mian 6

Megosztás

Agh shir‐jee hoshiaght reeriaght Yee as e chairys, as bee shiu jeant magh lesh ooilley ny reddyn shoh.

Ny bee‐jee er‐y‐fa shen ayns imnea erbee son y laa mairagh, son tra hig y laa mairagh, hig e chiarrail marish: ta e heaghyn hene dy liooar er son y tra t’ayn.

Er‐yn‐oyr shoh ta mee gra riu, ny bee‐jee imneagh son nyn mea, cre nee shiu y ee, ny cre nee shiu y iv; ny foast son nyn girp, cre ver shiu y miu: Nagh vel y vea ny smoo dy ve soit jeh ny beaghey, as y corp ny coamrey?

Agh gow uss, tra vees oo goall padjer, stiagh ayns dty hiamyr, as erreish dhyt dty ghorrys y yeih, guee gys dty Ayr gy follit, as nee dty Ayr, ta fakin ny ta jeant gy follit, leagh y chur dhyt gy foslit.

Er yn aght shoh er‐y‐fa shen gow‐jee padjer: Ayr ainyn t’ayns niau, Casherick dy row dt’ennym. Dy jig dty reeriaght. Dt’aigney dy row jeant er y talloo, myr te ayns niau.

Cur dooin nyn arran jiu as gagh laa.

As leih dooin nyn loghtyn, myr ta shin leih dauesyn ta janoo loghtyn nyn oi shin.

As ny leeid shin ayns miolagh, agh livrey shin veih olk: son she liats y reeriaght, as y phooar, as y ghloyr, son dy bragh. Amen.

Son my leihys shiuish da deney nyn loghtyn, leihee nyn Ayr flaunyssagh myrgeddyn diuish.

Cur‐jee tastey da Eeanlee’n aer: son cha vel ad cuirr ny buin, ny chymsagh stiagh ayns soaltyn; foast ta nyn Ayr flaunyssagh dyn meaghey ad. Nagh vel shiuish foddey share ny adsyn?

¶ Ny stoyr‐jee seose berchys, er nyn son eu hene, er y talloo, raad ta’n lhemeen as y mergey cur mow, as raad ta maarlee brishey stiagh as geid. Agh stoyr‐jee [seose] er nyn son hene, berchys ayns niau; raad nagh vel y lhemeen ny’n mergey cur mow, as raad nagh vel maarlee brishey stiagh as geid. Son raad vees nyn stoyr, ayns shen myrgeddyn vees y cree eu.

¶ Cha vod dooinney erbee daa vainshter y hirveish: son edyr ver e dwoai da’n derrey yeh as graih da’n jeh elley, ny bee e jeidjagh da’n derrey yeh as soiee e beg jeh’n jeh elley. Cha vod shiu Jee as Mammon y hirveish.

My ta Jee, er‐y‐fa shen, myr shoh coamrey’n faar ta jiu ’sy vagher as mairagh caeu’t stiagh ayns yn oghe, nagh jean e foddey smoo er nyn son eavish, O gheney faase‐chredjuagh?

Agh tra t’ow uss cur da ny Boughtyn, ny lig da fys y ve ec dty laue chiare, cre ta dty laue yesh dy yannoo. Dy vod dty yeirk ve’r ny choyrt gy follit, as nee dty Ayr ta fakin ny ta jeant gy follit, dty leagh y chur dhyt gy foslit.

Cur‐jee twoai nagh der shiu da ny Boughtyn, kiongoyrt rish deney, er coontey dy ve er ny akin lioroo: er nonney cha vow shiu leagh veih’n Ayr eu t’ayns niau.

¶ As tra vees shiu trostey, ny bee-jee jeaghyn trimshagh, myr ny crauee-foalsey, son tar adsyn sollagh nyn eddinyn er chee deney dy chur tastey da’n trostey oc. Dy firrinagh ta mee gra riu, dy vel nyn leagh oc. Agh jean uss, tra vees oo trostey, dty chione y ooillagh as dt’eddin y oonlagh: Er coontey nagh nee deney ver tastey da’n trostey ayd, agh dty Ayr ta toiggal folliaghtyn, as nee dty Ayr ta fakin ny ta [jeant] gy follit, leagh y chur dhyt gy foslit.