isizwur 24
24
isḥaq d‑rifqa
1ha ibrahim yuwssr, izzri isggʷasn ggutnin, ibark‑as sidi rbbi ġ‑kullu ma‑dars‑illan. 2isawl s‑walli imqqurn ġ‑ih̬ddamn n‑uh̬iyyam‑ns, ig walli igabln kullu ayda‑ns, yini‑as: «srs‑d afus‑nk ġ‑ddu‑umṣaḍ‑inu, 3f‑ak‑ssgallġ s‑sidi rbbi bab n‑ignwan d‑wakal urd ttawit taslit i‑iwi zġ‑istis n‑ayt‑kanɛan lli‑mi‑zdġġ ġ‑gratsn, 4walaynni ddu s‑tmazirt‑inu dar tagʷmat‑inu, tawit‑d zġ‑gis taslit i‑iwi isḥaq.» 5yini‑as‑uh̬ddam: «walaynni iġ‑tagʷi‑tɛyyalt a‑d‑didi‑tmun s‑tmazirt‑ad, is‑a‑nawi yuk s‑wakal‑an zġ‑di‑tuškit?» 6yini‑as ibrahim: «han a‑ur‑tawit iwi s‑ġin. 7ašku isawl sri sidi rbbi bab n‑ignwan lli‑yyi‑d‑issufġn zġ‑dar ayt‑takat n‑baba ula zġ‑tmazirt lli‑ġ‑lulġ, iggall‑iyi yini: ‹amud‑nk a‑mi‑rad‑fkġ tamazirt‑ad.› d‑nttan a‑ra‑yazn lmalak‑ns ad‑ak‑izwur s‑ġin f‑a‑di‑tawit taslit i‑iwi. 8iġ‑ur‑tri‑tɛyyalt a‑d‑dik‑tmun, han ur‑ra‑fllak‑tqama‑tgallit‑ad. imma iwi, a‑ur‑ti‑tawit s‑ġin.» 9ig‑n‑uh̬ddam afus‑ns ġ‑ddu‑umṣaḍ n‑sidis ibrahim, iggall‑as f‑mayan.
10inkr‑uh̬ddam‑lli yawi mraw irɛman zġ‑irɛman n‑sidis iddu, yasi tirzzifin šwanin zġ‑dar sidis. imuddu s‑tmazirt n‑aram n‑gr isaffn, s‑tmdint n‑naḥur. 11lliġ‑n‑iruḥ, issutš irɛman ġ‑tama n‑wanu n‑waman ġ‑brra n‑tmdint. ig lḥal tadggʷat tasaɛt lli‑ġ‑a‑di‑tffuġnt‑tmġarin a‑n‑agʷmnt. 12iġr i‑rbbi ġakudan yini: «wa rbbi da‑illan, rbbi n‑sidi ibrahim, kmml‑iyi maylli‑f‑d‑uškiġ ġassad, tssafut lḥnant‑nk izgan i‑sidi ibrahim. 13ha‑yyi biddġ ġ‑tama n‑uġbalu n‑waman, han istis n‑tmdint‑ad ar‑di‑tffuġnt a‑n‑agʷmnt. 14taɛyyalt nna‑mi‑nniġ ‹ġir ssknu‑d agdur‑nm ad‑suġ›, iġ‑iyi‑tnna ‹su, hati rad‑ssuġ ula irɛman‑nk›, ġmkan a‑s‑rad‑issanġ izd taɛyyalt‑an a‑igan h̬talli trit i‑uh̬ddam‑nk isḥaq. ġmkan a‑s‑rad‑issanġ is‑tssuwfit lḥnant‑nk izgan i‑sidi.»
15ur‑ta‑ikmmil awal‑an s‑ha rifqa tffuġ‑d, tasi‑d agdur f‑tġruṭṭ‑ns. tga nttat illis n‑batwil lli‑igan yus n‑milka tamġart n‑naḥur lli‑igan gʷmas n‑ibrahim. 16taɛyyalt‑ad tfulki bahra, ur‑jji‑stt‑ilkim kra n‑urgaz. tʷggz s‑uġbalu tɛmmr‑d agdur‑ns tġli‑d. 17yazzl‑uh̬ddam imnaggar‑tt‑in yini‑as: «ġir fk‑iyi imikk n‑waman ad‑suġ zġ‑ugdur‑nm.» 18tini‑as: «hak a‑sidi a‑tsut.» ḥina tzzugz‑d agdur s‑gr ifassn‑ns tfk‑as a‑isu. 19lliġ‑ti‑tẓra išbɛ aman tsawl‑d tini‑as: «hati rad‑di‑ttagʷmġ ar‑sswaġ irɛman‑nk ard šbɛn ula ntni.» 20tḥarru tffi‑n agdur‑ns ġ‑ifrḍ, tazzl daġ s‑wanu a‑di‑tagʷm, tzayd ar‑di‑ttagʷm i‑kullu irɛman‑ns. 21ifssa‑urgaz ar‑gis‑itmnad. ira a‑yissan is‑as‑ikmml sidi rbbi maylli iqṣad nġd uhu. 22lliġ ilmma swan irɛman, ildi‑as‑d‑urgaz yat‑th̬urṣt n‑uwrġ iġʷlan d‑snat tannbalin mqqurnin n‑uwrġ i‑ifassn‑ns. 23isqsa‑tt: «ini‑yyi, illis n‑mit a‑tgit? is‑illa ġ‑tgmmi n‑babam maniġ a‑nssan inbgiwn?» 24tini‑as: «nkki giġ illis n‑batwil yus n‑milka lli‑turu i‑naḥur. 25illa‑darnġ‑walim d‑lɛlf ula maniġ a‑tnssam.» 26iknu‑urgaz ar akal isjd i‑sidi rbbi 27yini: «ulġġ rbbi da‑illan ig rbbi n‑sidi ibrahim, ašku ur‑ifil lḥnant‑ns izgan ula tayri‑ns idumn i‑sidi ibrahim, izwur‑iyi‑d ġ‑uġaras inmn s‑tgmmi n‑tagʷmat‑ns.»
28tazzl‑tfruh̬t s‑dar innas ġ‑tgmmi, tini‑asn f‑kullu ma‑ijran. 29d‑rifqa dars gʷmas ism‑ns laban, inkr ġakudan yazzl‑d s‑dar‑urgaz ġ‑tama n‑uġbalu. 30ašku iẓra tah̬urṣt d‑tannbalin ġ‑ifassn n‑uwlltmas rifqa, isfld‑as tnna: ‹ha mad‑iyi‑inna‑urgaz‑an›. iddu s‑dar‑urgaz, yaf‑t‑in ibidd sul ġ‑dar irɛman ġ‑tama n‑uġbalu. 31yini‑as: «ašk‑id darnġ ay‑ambarki n‑sidi rbbi. mah̬ a‑sul‑tbiddt ġ‑brra? ha‑yyi jjujadġ tigmmi ula yan mani i‑irɛman.» 32ikšm‑urgaz s‑tgmmi. kksn itlsan i‑irɛman, fkn‑asn alim d‑lɛlf. awin‑as‑d aman a‑isird iḍarn‑ns nttan d‑irgazn lli‑dids‑illan. 33srsn‑as‑d ilmma tirmt, imma nttan inna‑yasn: «ur‑rad‑ššġ ard iniġ ma‑f‑d‑uškiġ.» yini‑as‑d laban: «sawl.»
34yini‑asn: «nkki giġ ah̬ddam n‑ibrahim. 35sidi ibrahim, ibark gis sidi rbbi issigt‑as lh̬ir, ifk‑as ulli d‑imugayn, ifk‑as nnʷqrt d‑uwrġ d‑ismgan d‑tsmgin d‑irɛman d‑iġʷyal. 36sarah tamġart n‑sidi turu‑as yan‑warraw ġakud lliġ tuwssr, d‑warraw‑an a‑mi‑ifka ibrahim kullu ma‑dars‑illan. 37issgall‑iyi sidi yini‑yyi: ‹a‑ur‑di‑tawit taslit i‑iwi zġ‑istis n‑ayt‑kanɛan lli‑mi‑zdġġ nkki ġ‑tmazirt‑nsn, 38walaynni ddu s‑dar ayt‑dar baba, tawit‑d taslit i‑iwi zġ‑tagʷmat‑inu.› 39iniġ nkki i‑sidi: ‹walaynni iġ‑tagʷi‑tɛyyalt a‑d‑didi‑tmun?› 40irar‑iyi‑d: ‹sidi rbbi lli‑d‑bdda‑munġ a‑ra‑yazn lmalak‑ns a‑dik‑yili ikmml‑ak maylli tqṣadt, f‑a‑di‑tawit taslit i‑iwi zġ‑tagʷmat‑inu d‑ayt‑dar baba. 41ġmkan a‑s‑ra‑tssafut awal lli‑s‑iyi‑tggullit. walaynni iġ‑tddit s‑dar‑ayt‑dari ur‑ak‑tt‑id‑fkin, han ur‑ra‑fllak‑tqama‑tgallit‑an.› 42mayan a‑f‑d‑uškiġ ġassad s‑uġbalu iniġ: ‹wa rbbi da‑illan, rbbi n‑sidi ibrahim, kmml‑iyi maylli‑f‑d‑uškiġ ġila. 43ha‑yyi biddġ ġ‑tama n‑uġbalu n‑waman. taɛyyalt nna‑d‑iffuġn a‑n‑tagʷm iniġ‑as: fk‑iyi imikk n‑waman ad‑suġ zġ‑ugdur‑nm, 44tini‑yyi: hak su, rad‑di‑ttagʷmġ ula i‑irɛman‑nk, ġmkan a‑s‑rad‑issanġ izd taɛyyalt‑an a‑ira sidi rbbi i‑yus n‑sidi.› 45ur‑ta‑kmmilġ awal‑an d‑ih̬f‑inu, s‑n‑tuška rifqa tasi‑n agdur f‑tġruṭṭ‑ns, tʷggz s‑uġbalu tagʷm‑d. iniġ‑as: ‹ġir ad‑iyi‑tfkt ad‑suġ› 46tḥarru tzzugz‑d agdur‑ns tini‑yyi: ‹hak su, rad‑ssuġ ula irɛman‑nk.› suġ ġakudan, tfk i‑irɛman ad‑sun ula ntni. 47sqsaġ‑tt ilmma: ‹illis n‑mit a‑tgit?› tini‑yyi‑d: ‹illis n‑batwil yus n‑naḥur lli‑as‑turu milka.› agʷlġ‑as ġakudan tah̬urṣt i‑tnh̬ar d‑tannbalin i‑ifassn. 48knuġ sjdġ i‑rbbi da‑illan, alġġ rbbi n‑sidi ibrahim lli‑yyi‑d‑izwurn ġ‑uġaras inmn f‑a‑d‑awiġ illis n‑ayt‑dar sidi i‑yus. 49ġilad iġ‑tram a‑tssafum lḥnant izgan ula tayri idumn lli‑illan ġ‑gratun d‑sidi, tinim‑iyi‑t. iġ‑ur‑trim, tinim‑iyi‑t, ad‑issanġ ma‑rad‑skrġ.»
50yini‑as laban d‑batwil: «kullu mayad iga win sidi rbbi. urd nkkʷni a‑rad‑ak‑yini iyah nġd uhu. 51ha rifqa ġ‑tama‑nk. awi‑tt tddum f‑a‑stt‑itahl yus n‑sidik ġmklli‑s‑inna sidi rbbi.» 52lliġ isfld‑uh̬ddam n‑ibrahim i‑mad‑nnan, iknu daġ ar akal isjd i‑sidi rbbi. 53ildi‑d tirzzifin n‑nnʷqrt d‑uwrġ d‑tmlsa šwanin ifk‑tnt i‑rifqa, ifk kra n‑tġawsiwin ġʷlanin i‑gʷmas d‑innas. 54išš ilmma isu ntta d‑usmun‑ns. nsn darsn ġ‑iyḍ‑an.
lliġ nkrn zikk ṣbaḥ yini‑asn: «aznat‑iyi ġilad s‑dar sidi.» 55irar‑as gʷmas n‑rifqa d‑innas: «adj tafruh̬t a‑sul‑darnġ‑tk imikk, wah̬h̬a ġir mraw‑uwssan, tddu ilmma ġakudan.» 56yini‑asn: «ad‑ur‑iyi‑tssmaṭlm ġila ġ‑iyi‑ikmml sidi rbbi maylli‑f‑d‑uškiġ. aznat‑iyi ad‑wrriġ s‑dar sidi.» 57inin‑as: «hiya a‑d‑nġr i‑tfruh̬t nsqsa‑tt.» 58ġrn‑d i‑rifqa inin‑as: «is‑trit a‑tmunt d‑urgaz‑ad?» tini‑asn: «rad‑dids‑munġ.» 59aznn ġakudan ulltmatsn rifqa nttat d‑tmġart lli‑stt‑issngin, ntnti d‑uh̬ddam n‑ibrahim d‑usmun‑ns. 60dɛun s‑lbaraka i‑rifqa inin‑as: «zayd a‑ulltmatnġ a‑km‑ig rbbi d‑innas n‑wafḍan f‑wafḍan n‑mddn, nrun tarwa n‑tarwa‑nm kullu inuwwašn‑nsn.» 61tnkr rifqa d‑tɛyyalin‑ns nint f‑irɛman ḍfurnt argaz‑an. ġmkan a‑s‑tmun rifqa d‑uh̬ddam‑lli, amẓn aġaras.
62imma isḥaq yuška‑d zġ‑tsga n‑bir‑laḥay‑ruwi, iwrri igawr ġ‑lh̬la n‑nagab. 63yat‑tdggʷat iffuġ a‑ifjjij ġ‑lh̬la, yall alln‑ns s‑n‑iẓra kra n‑irɛman kkan‑d aġaras. 64tall rifqa alln‑ns ula nttat, s‑n‑tẓra isḥaq. tʷggz‑d zġ‑urɛm, 65tsqsa ah̬ddam: «ma‑iga‑uɛyyal‑ad‑d‑iftan ad‑aġ‑d‑imnaggar?» yini‑as‑uh̬ddam: «sidi ayan.» tasi‑d rifqa afawwu tdl srs. 66isawl‑uh̬ddam ilmma d‑isḥaq, iɛawd‑as f‑kullu ma‑iskr. 67yawi‑tt isḥaq ġakudan, išškšm‑tt s‑uh̬iyyam n‑innas sarah. itahl rifqa iḥubbu‑tt bahra. iwrri isḥaq iṣbr f‑lmut n‑innas.
Jelenleg kiválasztva:
isizwur 24: SHILOT20
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Selected Old Testament in Tashelhayt (Latin script) © United Bible Societies, 2020.
Robert Bernard Dann.