चेलै रै कम 4
4
महासभा रै सामणै पतरस अतै यूहन्ना
1जैहणै पतरस अतै यूहन्ना मणु सोगी ऐह कणैणा लगुरा थियै, ता याजक, मन्दरा रै सरदार अतै सदूकि तियां पुर चड़ी आये। 2सो बड़ै गुस्सै भूच्ची गै क्ओकि सो मणु जो यीशु रै बारै मन्ज सखाणा अतै मरूरै थऊँ दोबारा जी उूठणै रै प्रचार करना लगुरै थियै। 3तिन्यै सो चेलै पकड़ी पायै अतै दूये दिन तक जेला मन्ज पाई दितै क्ओकि सँझ भूच्ची गच्छुरी थी। 4पर बचन जो हुणनैबाळै थऊँ मतै सारै मणु यीशु पुर विस्वास करू, अतै तंयारी गिणती पँज हजार मणु रै लगभग भूच्ची गई।
5दूये दिन ऐसा भूआ कि तंयारै शास्त्री, सरदार अतै स्याणै 6महायाजक हन्ना, कैफा, यूहन्ना अतै सिकन्दर अतै होर जैतणै महायाजक रै घरानै थऊँ थियै, सब यरूशलेम मन्ज इकट्ठै भुएै। 7सो तियां जो मन्जै खडेरी करी पुछणा लगै कि तुहै ऐह कम कसेरै सामर्थ अतै कसेरै नां सोगी करूआ। 8ता पतरसै पवित्र आत्मा सितै भरी करी तियां स्याणै सितै बल्लू, 9“हे मणु रै सरदारो अतै स्याणेओ, ऐस लंगड़ै मणु सोगी जैड़ी भलाई करी गई हा, अगर अज ठेरै बारै मन्ज असु थऊँ पुछताछ करी गान्दीआ, कि ऐह कियां ठीक भूआ। 10ता तुहै सब अतै इस्त्राएली मणु जाणी लेय्आ कि यीशु मसीह नासरी रै नां सितै जैसिओ तुसै क्रूस पुर चढाऊरा, अतै प्रमात्मैं मरूरै थऊँ जिआऊरा, ऐह मणु तून्दै सामणै भला चंगा खडूरा हा।”
11“ऐह सो ही पत्थर हा जैसिओ तुहै राजमिस्त्रीये तूछ जाणुरा
अतै सो कूणै रै सिरै रा पत्थर बणी गो।”#भज. 118:22-23; दानि. 2:34-35.
12“कसकि होरी रै द्धारा उद्धार निय्आ; स्वर्गा थऊँ थलै सिर्फ यीशु रै नां रै द्धारा ही अहै उद्धार पाई सकदै हिन।”
13जैहणै तिन्यै पतरस अतै यूहन्ना री हिम्मत हेरी, अतै ऐह जाणु कि ऐह ता अनपढ़ अतै सिधै मणु हिन, ता हैरान भुएै; फिरी तिन्यै सो पछैणै कि ऐह ता यीशु सोगी रैऊरै हिन।
14तैस मणु जो जैडा ठीक भच्छुरा थू, तियां चेलै सोगी खडूरा हेरी करी, सो मणु तंयारै वरोधा मन्ज कुछ ना बली सकै। 15पर तियां जो यहूदी सभा थऊँ बाहर गाणै रा हूक्म दी करी, सो अप्पू मन्ज सलाह करना लगै,
16“अहै इन्या मणु सोगी कै करन? क्ओकि यरूशलेम मन्ज रैहणै बाळै कई मणु जाणदै हिन कि इन्यै चमत्कार करूरै हिन; अतै इन्यारा इन्कार ना करी सकदै। 17पर ठेरैतांये कि ऐह गल्ल मणु मन्ज होर ना फैली गच्छा, अहै इन्या जो धमकान्दै, कि यीशु रा नां लेई करी फिरी कसी मणु सोगी गल्ल ना करन।”
18ता तिन्यै सो हैदै अतै चेतावनी दी करी बल्लू, “यीशु रै नां सितै कुछ भी मत बलदै अतै सखान्दै।” 19पर पतरस अतै यूहन्नै तियां जो जवाव दिता, “तुहै ही न्याय करा; कै ऐह प्रमात्मैं रै नेड़ै खरा कि प्रमात्मैं री गल्ला जो छड़ी करी तुन्दी गल्ला मना। 20क्ओकि ऐह ता असु थऊँ ना भूच्ची सकदा कि जैडा अहै हेरूरा अतै हुणुरा, सो ना कणैन।”
21ता तिन्यै तैसिओ होर धमकाई करी छड़ी दिता, क्ओकि मणु री वजह थऊँ तियां जो दण्ड़ दिणै रा कोई दाँव ना मूळु, ठेरैतांये कि सेरै ठीक भूणै री वजह थऊँ सब मणु प्रमात्मैं री बड़ाई करू करदै थियै। 22सो मणु जैसिओ ठीक भूणै रा चमत्कार दसुरा थू, चाळी साला री उम्रा रा थू।
विस्वासी री प्रार्थना
23पतरस अतै यूहन्ना छुटीकरी अपणै साथी बलै आये, अतै जैडा कुछ प्रधान याजकै अतै स्याणै बलुरा थू, तियां जो हुणाई दिता। 24ऐह हुणी करी तिन्यै अक्क चित भूच्ची करी जोरा सितै प्रमात्मैं सितै बल्लू, “हे स्वामी, तू सो ही हा जिनी स्वर्ग, धरती, समुंद्र अतै जैडा कुछ ऐत मन्ज हा बणाऊरा।#निर्ग. 20:11; भज. 146:6. 25तैंई पवित्र आत्मा रै द्धारा अपणै सेवक इन्दै पूर्वज दाऊद रै द्धारा थऊँ ऐह कणैऊरा:”
“अन्य जातिऐ हुल्लड़ कजो मचाऊरा?
अतै देशा देशा रै मणुऐ कजो बेकार गल्ला सोची?
26प्रभु अतै तसेरै मसीहा रै वरोधा मन्ज
धरती रै राजा खड़ी गै हिन,
अतै हाक्म भी किठ्ठी गै हिन।”#भज. 2:1-2.
27“क्ओकि सच मन्ज तेरै सेवक यीशु रै वरोधा मन्ज, जैसेरा तैंई अभिषेक करूरा, हेरोदेस अतै पुन्तियुस पिलातुस भी गैर यहूदी#4:27 गैर यहूदी गैर यहूदी सो मणु हिन जैड़ै यीशु जो ना मन्दै अतै व्यवस्था जो भी ना मन्दै। अतै इस्त्राएली सोगी ऐस नगर मन्ज इकट्ठै भच्छुरै हिन,#यशा. 61:1. 28कि जैडा कुछ पैहलै थऊँ तेरी सामर्थ अतै मती थऊँ थू, सो ही करदै रेय्आ। 29अबै हे प्रभु इन्यारी धमकी जो हेर; अतै अपणै दासा जो ऐह वरदान दे तेरा बचन बड़ी हिम्मत सोगी हुणान।”
30“ठीक करनै तांयें तू अपणा हत्थ अगो कर कि चिन्ह अतै अनोखै कम तेरै पवित्र सेवक यीशु रै नां सितै होर भी करै गान।” 31जैहणै सो प्रार्थना करी बैहै ता सो जगह जैड़ी सो किठूरै थियै हिली गो, अतै सो सब पवित्र आत्मा सितै भरी गै, अतै प्रमात्मैं रा बचन हिम्मत सोगी हुणादै रैह।
विस्वासी री इकट्ठी जिन्दगी
32विस्वास करनैवाळै री मण्ड़ळी अक्क चित अतै अक्क मन री थी, ऐड़ी तक की कोई भी अपणी सम्पति जो अपणा ना बलदा थू, पर सब कुछ सांझै रा थू। 33प्रेरित बड़ी सामर्थ सोगी प्रभु यीशु रै दोबारा जी भूणै री गवाही दिन्दै रैह अतै तियां सबी पुर बड़ी कृपा थी। 34तियां मन्ज कोई भी गरीब ना थू क्ओकि जैस बलै जिंमी या घर थियै, सो तियां बेची बेचीकरी तठेरा दाम लैईन्दै, अतै तैतिओ चेलै रै पैरा बलै रखदै थियै, 35अतै जिंआं जैसिओ जरूरत भुन्दी थी, तसेरै अनुसार हरेक जो बण्ड़ी दिन्दै थियै।
36यूसुफ नां साइप्रस रा अक्क लेवी थू जैसेरा नां प्रेरितै बरनबास रखूरा थू। 37तसेरी कुछ जिंमी थी, जैतिओ तिनी बेचु, अतै दाम रै पैसै अणीकरी प्रेरिता जो दी दिन्दै थियै।
Արդեն Ընտրված.
चेलै रै कम 4: GBKNT
Ընդգծել
Կիսվել
Պատճենել

Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
This work is licensed under Creative Commons Attribution-ShareAlike 4.0 License.