चेलै रै कम 5
5
हनन्याह अतै सफीरा
1हनन्याह नां रा अक्क मणु थू अतै तसेरी घरावाळी रा नां सफीरा थू, तिन्यै अपणी कुछ जिंमी बेची। 2अतै तठेरै दाम थऊँ कुछ अपणै तांई रखी लैऊ अतै ऐसा गल्ला तसेरी घरावाळी भी जाणदी थी, अतै तठेरा अक्क हेसा लेई करी प्रेरिता रै पैरा रै अगो रखी दिता।
3पतरस बलणा लगा, “हे हनन्याह! शैतानै तेरै मना मन्ज ऐह गल्ल कजो पाई हा कि तू पवित्र आत्मा सोगी झूठ बला, अतै जिंमी रै दाम थऊँ कुछ रखी लेय्आ? 4बेचणै थऊँ पैहलै कै सो जमीन तेरी ना थी? अतै जैहणै बिकी गई ता कै तठेरी किमत तेरै हत्थै ना थी? तून्दै मना मन्ज ऐसा बुरी गल्ला रा विचार कजो आ? तैंई मणु सोगी ना पर प्रमात्मैं सोगी झूठ बलूआ।” 5ऐह गल्ला हुणदै ही हनन्याह धरती पुर पैई गो, अतै मरी गो, अतै सब हुणनैबाळै पुर ड़र छाई गो। 6फिरी मणुऐ अर्थी बणाई अतै बाहर नी करी सो दबी पाऊ।
7लगभग त्रीं घंटै बाद तसेरी घरावाळी, जैडा कुछ भच्छुरा थू ना जाणदी थी, अन्दर आई। 8ता पतरसै तैस सोगी बल्लू, “मिन्जो दस्स कै तुहै ऐह जिंमी तूणै पैसै मन्ज ही बेची थी? तैहै बल्लू, हाँ, इतनै मन्ज ही।”
9पतरसै तैहा सोगी बल्लू, “ऐह कै गल्ल हा कि तुहै प्रभु री आत्मा री परीक्षा तांयें अक्क जिन्ना ही बल्लू हा? हेर, तेरै पति जो दबाणैवाळै हालि तिकर द्धारा मन्ज ही खडुरै हिन, अतै तिजो भी बाहर लेई गाणा।”
10ता सो झट तसेरै पैरा बलै धरती पुर पैई गई अतै सो भी मरी गई; अतै जवानै अन्दर ईच्ची करी तैहा जो मरूरा हेरू, अतै बाहर नी करी तैसारै पति रै ब्रखै दबी दिता। 11यरूशलेम री कलीसिया रै सब विस्वासी मन्ज ऐसा गल्ला जो हुणनैबाळै पुर बड़ा ड़र छाई गो।
चमत्कार अतै अदभुत कम
12प्रेरिता रै हत्थै मतै सारै चमत्कार अतै कम मणु रै मन्जै भूणा लगै, अतै सो मसीह रै सब विस्वासी अक्क चित भूच्ची करी सुलैमान रै बराण्ड़ै मन्ज इकट्ठा भुन्दै थियै। 13पर होरी मन्ज ऐह कसी जो हिम्मत ना भुन्दी थी तियां सोगी गिच्ची करी मुळन; तांभी मणु बड़ी बड़ाई करदै थियै।
14विस्वास करनैवाळै मतै सारै मणु अतै जनानी प्रभु री कलीसिया मन्ज बड़ी संख्या मन्ज मिलणा लगै। 15ऐड़ी तक कि मणु बीमारा जो सड़का मन्ज अणी अणीकरी, खाट अतै खटोळै मन्ज लम्बै पाई दिन्दै थियै कि जैहणै पतरस अईआ, ता तसेरी परछाई ही कसकि पुर पैई गच्छा। 16यरूशलेम रै अखै-ब्रखै नगरा थऊँ मतै सारै मणु बीमारा अतै दुष्टात्मा रै सताऊरै जो प्रेरिता बलै अणी अणीकरी इकट्ठै भुन्दै थियै, अतै सब खरै करै गान्दै थियै।
प्रेरिता री गिरफ्तारी
17ता महायाजक अतै तसेरै सब साथी जैड़ै सदूकि रै दल रै थियै, डाह सोगी भरी गै। 18अतै प्रेरिता जो पकड़ी करी जेला मन्ज पाई दिता। 19पर राती प्रभु रै अक्की स्वर्गदूतै जेला रै द्धारा खोली करी तियां जो बाहर अणीकरी बल्लू, 20“गच्छा, मन्दरा मन्ज खड़ी करी ऐसा नोई अनन्त जिन्दगी री सब गल्ला मणु जो हुणा।”
21सो ऐह हुणी करी भ्याग भुन्दै ही मन्दरा मन्ज गिच्ची करी उपदेश दिणा लगै।
ता महायाजक अतै तसेरै साथियै ईच्ची करी यहूदी महासभा जो अतै इस्त्राएली रै सब स्याणै जो इकट्ठा करू अतै जेला मन्ज संदेसा भैजू जे तियां जो लेई अईआ। 22पर सैनक जेला मन्ज गिच्ची करी तियां जो ना पाऊ, अतै ईच्ची करी संदेसा दिता, 23“अहै जेला जो बड़ी चौकसी सोगी बन्द करूरा थू, अतै पैहरैदार बाहर द्धारा मन्ज खडुरै थियै; पर जैहणै जेल खोली ता, अन्दर कोई ना मूळु।” 24जैहणै मन्दरा रै सरदार अतै प्रधान याजकै ऐह गल्ला हुणी, ता तंयारै बारै मन्ज भारी चिन्ता मन्ज पैई गै कि तंयारा कै भूआ भोला!
25ऐतनै मन्ज कुणकी ईच्ची करी तियां जो बल्लू, “हेरा, जिंआं जो तुहै जेला मन्ज बन्द रखूरा थू, सो मणु मन्दरा मन्ज खडी करी उपदेश दिच्छु करदै हिन।” 26ता सरदार, सैनका सोगी गिच्ची करी तियां जो लेई आये, पर जोरा जबरदस्ती सितै ना क्ओकि सो मणु थऊँ डरदै थियै कि ऐह असु पुर पत्थर ना मारन।
27तिन्यै चेलै जो अणीकरी यहूदी महासभा रै सामणै खडेरी दिता; ता महायाजकै तियां थऊँ पूछु, 28“कै अहै तुसिओ टणकाई करी हूक्म ना दितुरा थू कि तुहै ऐस नां सोगी उपदेश मत करदै? तांभी हेरा, तुहै पूरै यरूशलेम जो अपणै उपदेश सोगी भरी दितुरा हा अतै तैस मणु रा खून इन्दै हेरै अणना चाहन्दै हिन।”
29ता पतरस अतै होर प्रेरित बलणा लगै, “मणु रै हूक्मा थऊँ बदिकरी प्रमात्मैं रै हूक्मा रा पालन करना ही इन्दा फर्ज हा। 30इन्दै पूर्वजा रै प्रमात्मैं यीशु जो मरूरै थऊँ जिआऊरा, जैसिओ तुहै मणुऐ क्रूस पुर लटकाई करी मारी दितुरा।#व्य. 21:22-23. 31तैसिओ ही प्रमात्मैं प्रभु अतै उद्धारकर्ता ठहराई करी, अक्क ऐसा आदर अतै अधिकार दिता कि अहै इस्त्राएल रै मणु अपणै पापी स्वभाव थऊँ प्रमात्मैं री कनारी फिरन अतै इन्दै पाप तसेरै द्धारा माफ करै गान।#लूका 24:47. 32अहै इन्या गल्ला रै गवाह हिन अतै तियां ही पवित्र आत्मा भी, जैसिओ प्रमात्मैं तियां जो दितुरा जैड़ी तसेरै हूक्मा जो मन्दै हिन।”
33ऐह हुणी करी महासभा रै अगुवै जळी नकैऐ, अतै प्रेरिता जो मारी दिणा लगै। 34पर गमलीएल नां रा अक्क फरीसी जैडा शास्त्री अतै सब मणु मन्ज माननीय थू, यहूदी महासभा मन्ज खड़ी करी चेलै जो बाहर गाणै रा हूक्म दिता। 35ता तिनी यहूदी महासभा रै अगुवै जो बल्लू, “हे इस्त्राएलिओ, तुहै जैड़ै कुछ ईयां मणु सितै करना चाहन्दै हिन, सोची समझी के करै। 36क्ओकि ईयां दिन थऊँ पैहलै थियूदास ऐह दावा करदा थू कि अऊँ भी कुछ हा; अतै कोई चंऊर सो मणु तैस सोगी भूच्ची गै, पर सो मारी दिता अतै जैतणै मणु तैसिओ मन्दै थियै सब तितर-बितर भूच्ची गै। 37तैत थऊँ बाद जनगणना रै टैमैं गलीलवासी यहूदा भी ऐह दावा करदा थू, कि अऊँ भी कुछ हा; अतै कुछ मणु तिनी अपणी तरफा जो करी लै; सो भी नष्ट भूच्ची गो अतै जैतणै मणु तैसिओ मन्दै थियै सब तितर-बितर भूच्ची गै।”
38“ठेरैतांये अबै अऊँ तूसु सोगी बलदा, ईयां मणु जो दुख मत देय्आ अतै छड़ी देय्आ क्ओकि अगर ऐह कम धर्म या मणु री तरफा थऊँ भोला ता मिटी गाणा; 39पर अगर प्रमात्मैं री तरफा थऊँ हा, ता तुहै ऐतिओ कदी भी ना मिटाई सकदै। करखी ऐसा ना भोआ कि तुहै प्रमात्मैं रै खिलाफ लड़नैवालै ठहरन।”
40ता तिन्यै तसेरी गल्ल मनी लेई; अतै यूहन्ना अतै पतरस जो हैदी करी पिटवाऊ; अतै ऐह हूक्म दी करी छड़ी दिता कि यीशु रै नां सितै कोई गल्ल मत करदै।
41सो ऐसा गल्ला थऊँ खुश भूच्ची करी यहूदी महासभा रै सामणै थऊँ चली गै, कि अहै यीशु नां तांयें अपमानित भूणै रै योग्य ता ठहरै। 42सो रोज मन्दरा मन्ज अतै घर-घर गिच्ची करी ऐसा गल्ला जो सखादैं अतै ऐह सुसमाचार हुणनै थऊँ ना रूकै कि यीशु ही मसीहा हा।
Արդեն Ընտրված.
चेलै रै कम 5: GBKNT
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
This work is licensed under Creative Commons Attribution-ShareAlike 4.0 License.