Chenesis 30
30
1Atuk o̱ Lechel ʋt Chekob a̱ ʋlla ik im esho kʋt pisa mʋt, Lechel ʋt akni hash i̱ potʋnno tok; micha Chekob a̱, Ʋlla ʋmá, keyukma sʋlla chi̱ hoke, im achi tok.
2Mihma Chekob ʋt Lechel a̱ i̱ sanalit isht im ai i̱ nukkilli ʋt libbit, Chitokaka ʋlhtobʋt hikia li cho? yʋmmak osh chim oshʋtto atoba ka chi̱ katʋbli tuk oke, achi tok.
3Mihma, Yakeh, an tishu ohoyo Bilhah ya̱ ish iba chukowashke; yohmi na ʋlla ʋm eshit saiyi̱kalaha paknaka ya̱ bohlashke: yohmi na ʋno ak kia yʋmmak a tuk ak o̱ ʋlla yʋt ʋm ashashke, achi tok.
4Mihmʋt tekchi ya chi̱ ho̱ in tishu ohoyo Bilhah ya̱ ima tok: mihma Chekob ʋt iba chukowa tok.
5Atuk o̱ Bilhah hʋt chakali cha, Chekob a̱ ʋlla nakni yo̱ im eshi tok.
6Mihma Lechel ʋt, Chitokaka yʋt si apehpoʋshke, micha ʋm anumpa ha̱ haklo cha, ʋlla nakni yo̱ ʋmʋshke, achi tok: yʋmohmi hatuk osh Tan hochifo tok.
7Atuk osh Lechel in tishu ohoyo Bilhah hʋt anonti chakali cha, atukla ma Chekob a̱ ʋlla nakni yo̱ im eshi tok.
8Mihma Lechel ʋt, Ʋmʋni ya̱ iti̱ kʋllo fehnʋt iti̱ kʋllo li hosh imaiya lishke achi tok: mihmʋt Naftali hochifo tok.
9Atuk o̱ Leah ʋt ʋlla eshit issa tuk ʋt pisa mʋt, in tishu ohoyo Silpah ya̱ ishi cha, tekchi ya chi̱ ho̱ Chekob a̱ ima tok.
10Atuk o̱ Leah in tishu ohoyo Silpah ʋt Chekob a̱ ʋlla nakni yo̱ im eshi tok.
11Mihma Leah ʋt, Laua hosh mintishke, achi tok: mihmʋt hohchifo ha̱ Kat achi tok.
12Atuk o̱ Leah in tishu ohoyo Silpah ʋt Chekob a̱ atukla ma ʋlla nakni yo̱ im eshi tok.
13Mihma Leah ʋt Sai yukpʋshke, ohoyo ʋhleha hʋt nayukpa si acha chi̱ hoke: achi tok, mihmʋt hohchifo ha̱ Ashe achi tok.
14Atuk o̱ onush ʋmo nitak o̱ Luben ʋt osapa ya̱ ia tuk osh okcha̱k holba ahayuchi cha, ishki Leah ya̱ isht im ona tok. Mihma Lechel ʋt Leah ya, Chiso im okcha̱k holba kaniohmi ka̱ is sʋmashke, chim asilhha lishke, im achi tok.
15Mihma, A̱ hatak a̱ is sʋm ishi ka̱ nan ik ahobo cho? yohmi mʋt sʋso im okcha̱k holba ak kia ish isha chi̱ cho? im achi tok. Mihma Lechel ʋt, Yʋmohmi hoka chiso im okcha̱k holba atuk mak o̱ himak ninak a̱ chiba nusashke, achi tok.
16Atuk o̱ Chekob ʋt opia ma osapa ʋttʋt minti ma, Leah hʋt kohchʋt iʋt afama cha, Is sʋba nusashke: sʋso im okcha̱k holba ishit chi tohno li tuk ʋt a̱hli hoka, achi tok. Atuk o̱ mih ninak ma iba nusi tok.
17Atuk o̱ Chitokaka yʋt Leah ya̱ i̱ haponaklo na chakali cha, ʋlla nakni ishit tahlapi ka̱ Chekob a̱ im eshi tok.
18Mihmʋt Leah ʋt, Ʋm ʋlhtoba ya̱ Chitokaka yʋt ʋmʋshke, an tishu ohoyo yash a̱ hatak a̱ ima li tuk oka, achi tok: mihmʋt hohchifo ha̱ Issaka achi tok.
19Atuk osh Leah ʋt anonti chakali cha ʋlla nakni ishit hannali ka̱ Chekob a̱ im eshi tok.
20Micha Leah ʋt, Nahʋlbina achukma ho̱ Chitokaka yʋt sa habenʋchishke; himak ano a̱ hatak ʋt sa takla ahanta chi̱ hoke, ʋlla nakni hannali ho̱ im eshi li hoka, achi tok: mihmʋt hohchifo ha̱ Sebulun achi tok.
21Atuk osh i̱ himmakma ushetik o̱ eshi cha, hohchifo ha̱ Tinah achi tok.
22Mihma Chitokaka yʋt Lechel a̱ anukfilli cha i̱ haponaklo mʋt, im oshʋtto ya̱ i̱ wakʋmmichechi tok.
23Mihma chakali cha, ʋlla nakni yo̱ eshi tok; micha, Chitokaka yʋt nan ishit sa hofahya ya̱ ishit a̱ kanchishke, achi tok.
24Micha hohchifo ha̱ Chosef achi tok: mihmʋt, Chihowah yʋt ʋlla nakni inla ya̱ ʋm ibafohka chi̱ hoke, achi tok.
25Atuk o̱ yakohmi tok, Lechel ʋt Chosef a̱ eshi ma, Chekob ʋt Laban a̱, Ik iá is sʋm ahni na aiʋtta li, micha a̱ yakni ya̱ ona lashke.
26Sa tekchi ʋhleha, micha ʋm ʋlla ʋhleha yʋmmak oka chin toksʋli li tuk a̱ is sʋma na ia lashke; natoksʋli chim atahli li tuk a̱ ish ithana hokʋt, im achi tok.
27Mihma Laban ʋt, Holhponayo hanta ya̱ chi tikba ai ahayuchi li tuk okma, ish antashke, chim asilhha lishke: chishno ak atuk pulla kak o̱ Chihowah yʋt sai yukpali hoka, akostininchi lishke, im achi tok.
28Micha, Chim ʋlhtoba ya is sʋm apesashke, mikma chima lashke, achi tok.
29Mihma Chekob ʋt, Kaniohmit chin toksahanli li tuk, micha chi̱ nanʋlhpoa ʋt kaniohmit si apehʋt aiasha tuk a̱ ish ithanʋshke.
30Ak lo ki̱sha kano kanomosi hosh chim aiasha tuk osh himak ano wayʋt apaknʋt taha hoka: mihma Chihowah yʋt ʋla li tuk takla ka̱ chi yukpalishke: yohmi ka̱ himak a̱ katiohmik mak o̱ an chuka achʋfa yak kia nan im atahlit ahanta la chi̱ cho? im achi tok.
31Mihma Laban ʋt, Nanta ho̱ chima la chi̱ cho? achi tok. Mihma Chekob ʋt, Nana is sʋma he keyu: ilʋppak o̱ is sa̱ yʋmihchikma, anonti chi̱ nanʋlhpoa chipinta ya̱ pehliechit impʋchi lashke.
32Himak nitak a̱ chi̱ nanʋlhpoa chipinta moma ka̱ iba chukowʋt, ahlopullit chikchiki moma, micha bakowa moma ka̱ ila filʋmmichit, micha lusbi moma chukfʋlhpoa ya̱ iba̱lhto ka̱, micha chikchiki, micha bakowa issi kosoma iba̱lhto ka̱ ila filʋmmichi lashke: mikma yʋmma chohmi kak osh ʋm ʋlhtoba yashke.
33Yohmi ho̱ nitak inla minti ka̱ asitʋbi li tuk ʋt hoyo likmʋt, aiʋlhpiesa ho̱ yʋmihchi li tuk ʋt chi tikba si ai atokolashke: chikchiki, micha bakowa keyu yosh issi kosoma ya̱ ibafo̱ka, micha lusbi keyu yosh chukfʋlhpoa ya̱ ibafo̱kak mʋt, moyuma kʋt hu̱kopa li tuk osh ʋm anta ʋlhpisashke, achi tok.
34Mihma Laban ʋt, yakeh, chim anumpa hatuk mak o̱ yʋmohmik bano ahni lishke, achi tok.
35Mihmʋt nitak yʋmmak inli ka̱ issi kosoma nakni tohbit afohoma, micha bakowa, micha issi kosoma tek chikchiki, micha bakowa, moma micha tohbi kaniohmi kʋt laponli, moma micha lusbi yosh chukfʋlhpoa ya̱ ibafo̱ka moma ka̱ ila filʋmmichit ushi ʋhleha ha̱ ibbak fohki tok.
36Micha ilap, micha Chekob itatuklo ka̱ iti̱ filʋmmichit nitak tuchina anowa yo̱ ashachi tok: mihma Laban i̱ nanʋlhpoa inla ka̱ Chekob ʋt pehliechit impʋchi tok.
37Micha Chekob ʋt sipsi okcha̱ki, micha hasel, micha oti ʋpi tʋptua aiena ka̱ ishi cha hlohlit bʋsolichit tohbichi cha, iti tʋptua atohbi kash haiakʋchi tok.
38Micha nanʋlhpoa chipinta yʋt ushi shala chi̱ ho̱ iti tʋptua hlohli kash osh nan ʋlhpoa chipinta yʋt ishka chi̱ hosh ʋlak ma itikba oka a yanʋlli, micha oka ai ipeta peni ya̱ a hiohlichi tok.
39Atuk o̱ nanʋlhpoa chipinta yʋt iti tʋptua yash itikba ya̱ ushi a shali beka tok; micha tohbit afohoma, chikchiki micha bakowa aiena ka̱ cheli tok.
40Mihma Chekob ʋt chukfʋlhpoa ushi yash ila filʋmmichi mʋt, nanʋlhpoa chipinta nashuka ya̱ Laban i̱ nanʋlhpoa chipinta yash tohbit afohoma, micha lusbi moma aiena ka̱ pit apissʋlechi beka tok; mihmʋt ilap i̱ nanʋlhpoa chipinta ya̱ ila ashachi cha, Laban i̱ nanʋlhpoa chipinta yano ik ibafohko tok.
41Atuk o̱ yakohmi tok, nanʋlhpoa kʋllo i̱ shahli ʋt ushi shalikma no Chekob ʋt iti tʋptua ai itin takla ya̱ ushi shala chi̱ ho̱ nanʋlhpoa nishkin itikba oka ayanʋlli ya̱ iti tʋptua yash ashachi tok.
42Amba nanʋlhpoa hliposhikmʋno, ik ashacho beka tok: yʋmohmi ho̱ hliposhi ak osh Laban immi hokma, kʋllo i̱ shahli yak osh Chekob immi hatok.
43Micha hatak ash osh i̱ shahlit ma̱ha̱ya fehna cha, nanʋlhpoa, micha ohoyo tishu, micha hatak tishu, micha kamel, micha issuba haksobish falaia puta aiena kʋt in laua fehna hatok.
Արդեն Ընտրված.
Chenesis 30: CHH
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Published by the American Bible Society 1848-1886, reprinted 1913