Chenesis 31
31
1Atuk osh Laban ushi ʋhleha hʋt anumpulit, Chekob ʋt pi̱ki nana immi hatuk a̱ ishit tahlishke; micha, pi̱ki immi hatuk a̱ nan‐isht‐holitopa ilʋppa moma ai ishishke, achi na haklo tok.
2Atuk osh Chekob ʋt Laban nashuka ya̱ pisa ma, yakeh, tikba chatuk a̱ in chohmi keyu tok.
3Mihma Chihowah yʋt Chekob a̱, Falamʋt chi̱ki ʋhleha i̱ yakni onʋt, micha chi̱ kanomi ʋhleha ish im onashke; mikma chibafoyuka lashke, im achi tok.
4Mihma Chekob ʋt Lechel, micha Leah ya̱ hoyot i̱ nanʋlhpoa aiasha yakni haiaka ya̱ isht ona cha,
5Hʋch i̱ki nashuka yʋt tikba chatuk ʋt an chohmi keyu ka̱ pisa lishke: yohmi kia a̱ki in Chitokaka yʋt sʋbafoyuka hoke.
6Micha nan isht aia̱hlika ʋm aioklu̱ha hosh hʋch i̱ki ya̱ in toksʋli li tuk a̱ hʋsh ithanʋshke.
7Mihma hʋch i̱ki ʋt sa haksichi cha, nan isht ʋm ʋlhtoba ya̱ pokoli ha ʋm inlʋchi tuk oke: yohmi kia Chitokaka yʋt ik hotopalí, ik ahno tuk oke.
8Yakohmikma, Chikchiki ak osh ishit chim ʋlhtobashke, achi tuk ma, yohmikma nanʋlhpoa moma kʋt chikchiki yo̱ cheli chatuk: mihma, Tohbit afohoma ak osh isht chim ʋlhtobashke, achi tuk ma, yohmikma nanʋlhpoa moma kʋt tohbit afohoma ho̱ cheli chatuk oke.
9Yakohmichi hosh Chitokaka yʋt hʋch i̱ki i̱ nanʋlhpoa ya̱ im ishi cha, ʋma tuk oke.
10Atuk o̱ yakohmi tok, nanʋlhpoa yʋt ushi shali nitak a̱ sa holhpokna cha, hopo̱koyot pisa li ma, yakeh, nakni ʋt nanʋlhpoa ya̱ oiya kʋt tohbit afohoma, chikchiki, micha bakowa aiena tok.
11Mihma Chitokaka im enchel ʋt, sa holhpokna ho̱ ʋm anumpulit, Chekob ma, ʋm achi tok: mihma, Yak itonla lishke, achi li tok.
12Mihma, Akachakali cha pisá, nakni moma kʋt nanʋlhpoa ya̱ oiya kʋt tohbit afohoma, chikchiki, micha bakowa aiena hoke: Laban ʋt nana moma chi kaniohmichi ka̱ pisa li tuk oka.
13Behlel yʋmma nan isht‐ithana tʋli ya̱ nan ish ahʋmmi tok, micha yʋmma anumpa kʋllo is sʋm il ai onochi tok a̱ in Chitokaka sia hoke: yʋmohmi hoka himak a̱ wakaya cha, yakni ilʋppa ish kohchashke, micha falamʋt chi̱ kanomi i̱ yakni ya̱ ish onashke, ʋm achi tuk oke, im achi tok.
14Mihma Lechel, micha Leah ʋt afalaminchit, Pi̱ki in chuka achʋfa ya̱ akashapa, keyukmʋt il ai isha he ʋlhpesa yʋt a̱sha moma cho?
15Okla inla yak o̱ yʋmmʋt pit apesa keyu cho? pi kanchi tok osh pin tʋli holisso ak kia tahli tuk oka.
16Imila̱yak moma Chitokaka yʋt pi̱ki ya̱ im ishi tuk ʋt pimmi, micha pim ʋlla ʋhleha aiena kak o̱ immi hoka: yʋmohmi hoka himak a̱ Chitokaka yʋt nana ho̱ chi̱ mihakma, ish yʋmihchashke, im achit okla tok.
17Yohmi ma Chekob ʋt wakaya mʋt, ushi ʋhleha, micha tekchi ʋhleha aiena ka̱ kamel a̱ om binohlichi tok.
18Mihmʋt i̱ki Aisak aiʋtta Kenan yakni ya̱ ia chi̱ hosh nanʋlhpoa moma, micha ʋlhpoyak ahayuchi tuk ʋt moma, Patan‐alam a̱ nanʋlhpoa ya̱ ai ahayuchi tuk ʋt isht ia tok.
19Mihma Laban ʋt in chukfʋlhpoa hishi ʋmot ia tuk atok: mihma Lechel ʋt i̱ki i̱ naholbʋt toba ya̱ i̱ hu̱kopa tok atok.
20Atuk o̱ Chekob ʋt kʋnia mʋt, ik im anolo hatuk osh Silian hatak Laban a̱ haksichi tok.
21Yohmi hosh nana moma im a̱sha tuk ʋt ishi cha kʋnia tok: micha wakaya cha okhina ya̱ tanʋblit, nʋnih Kileat pilla ha̱ nashuka ya̱ pit talali tok.
22Atuk o̱ nitak ont atuchina kak o̱ Chekob ʋt kʋnia tuk a̱ Laban a̱ im anoli tok.
23Mihma Laban ʋt itibapishi ʋhleha pehlichi cha, hliolit, nitak untuklo anowa yo̱ ona tok; micha nʋnih Kileat ak o̱ ont a sakki tok.
24Atuk o̱ Silian hatak Laban ʋt ninak ma holhpokna na Chitokaka yʋt im ʋlʋt, Ahah, ish ahni cha, Chekob a̱ achukma hokma, okpulo hokma nana kia chik im anumpulo kashke, im achi tok.
25Yohmi ma Laban ʋt Chekob a̱ sakki tok. Yohmi ma Chekob ʋt nʋnih ak o̱ im ʋlhtipo ya̱ a hilechi tok: atuk o̱ Laban ʋt itibapishi ʋhleha aiena kʋt Kileat nʋnih ak o̱ a binachi tok.
26Atuk osh Laban ʋt Chekob a̱, Nanta mak o̱ ish yʋmihchi cho? is sa haksichi cha, bʋshpo falaia ishit yukachi tuk chohmichit sʋsotek ʋhleha ha̱ pehlichit ish kʋnia tuk oke.
27Nanta katiohmi ho̱ lumʋt malelit is sa haksichi cha chik sʋm anolo na nayukpa, micha ilhtʋlwak, micha ʋhlepa, micha hap aiena olahanchi hosh ik ia ak chim ahno tuk oh cho?
28Micha sʋso ʋhleha, micha sʋsotek ʋhleha aiena ka̱ ik i̱ su̱ksowa, chik sʋm ahno tuk oh cho? himak a̱ im anukfila iksho chohmit ish yʋmihchi tuk oke.
29Chi hotopali la hi ʋt sʋbbak a̱ foyuka hoke: yohmi kia chi̱ki ya̱ in Chitokaka yʋt pilashash ninak a̱ ʋm anumpulit, Ahah, ish ahni cha achukma hokma, okpulo hokma nana kia Chekob a̱ chik im anumpulo kashke, ʋm achi tuk oke.
30Atuk o̱ himak a̱ ia hosh ish a̱yʋshke, chi̱ki in chuka ya̱ ish i̱ palata fehna hokʋt: yohmi kia nanta katiohmi ho̱ a̱ naholbʋt toba ya̱ is sa̱ hu̱kopa tuk oh cho? im achi tok.
31Mihma Chekob ʋt afalaminchit Laban a̱, Sa nukshopa hatuk oke: Chisotek ʋhleha ha̱ afoʋt is sʋm isha hinla yoba ká, achi li tuk oke.
32Yʋmohmi hoka kʋna hosh chi̱ naholbʋt toba ya̱ i̱shi ka̱ ish ahayuchikma, yʋmmʋt ik okcha̱yo kashke: pitibapishi ʋhleha itikba nana hosh chimmi hosh sʋbafoyuka tukma, ish ithana cha, ish ishashke im achi tok: Lechel ʋt hu̱kopa tuk a̱ Chekob ʋt ik ithano tuk okʋt.
33Mihma Laban ʋt Chekob im ʋlhtipo ya̱ ont chukowa mʋt, Leah im ʋlhtipo ma ont chukowa cha, tishu ohoyo tuklo im ʋlhtipo ya̱ ont chukowa tok: yohmi kia ik ahayucho tok. Yohmi mʋt Leah im ʋlhtipo ya̱ a kohcha mʋt, Lechel im ʋlhtipo ya̱ ont chukowa tok.
34Yohmi ka̱ naholbʋt toba ya̱ Lechel ak osh ishi tuk osh kamel i̱ nachukushpa ibafohki cha, om binili tuk atok. Mihma Laban ʋt ʋlhtipo ya̱ a mominchit hoyo kia, ik ahayucho tok.
35Mihma Lechel ʋt i̱ki ya, chi tikba ya̱ ak wakayo ka̱ a̱ shahli hʋt ik nuklibisho kashke; ohoyo nana im akaniohmi ʋt si onʋtonla hoka, im achi tok. Mihma hoyo kia naholbʋt toba ya̱ ik ahayucho tok.
36Mihma Chekob ʋt nukhobela cha, Laban a̱ itachowa tok: micha Chekob ʋt afalaminchit Laban a̱, Nanta ho̱ ʋbanʋbli li tuk oh cho? micha nanashʋchi li ʋt nanta hatuk o̱ achunanchit is sa hlioli kʋt chi yʋmohmi tuk oh cho?
37A̱ nachukushpa ya̱ moma ish a hoyo hókʋt nana achʋfa nanta ho̱ chin chuka achʋfa nachukushpa yatuk a̱ ish ahayuchi cho? sʋtibapishi ʋhleha, micha chitibapishi ʋhleha aiena itikba ilʋppa talalí, yohmi na pim itin takla ya̱ nana a pim apesashke.
38Afʋmmi pokoli tuklo ilʋppa chi takla ahanta li chatuk; chin chukfʋlhpoa tek, micha chim issi kosoma tek aiena kʋt ushi im akʋma chatuk keyu; micha chi̱ nanʋlhpoa ya̱ ai ishit chukfʋlhpoa nakni ya̱ ʋpa li chatuk keyu hoke.
39Nampoa okpulo yosh ʋbi tuk a̱ ishit chim ona li chatuk keyu; ʋno ak osh a̱ kʋnia chatuk; nitak o̱ hu̱kopa tuk okmá, keyukmʋt ninak o̱ hu̱kopa tuk okmá nana kia sʋbbak ak o̱ is sa̱ hoyo chatuk oke.
40Si yakohmi chatuk oke; nitak ma lʋshpa, micha ninak ma hotonti hosh sa tahli chatuk oke; mihma nusi hʋt sa nishkin a̱ i̱ filʋmmi chatuk oke.
41Yakohmi hosh afʋmmi pokoli tuklo ho̱ chin chuka ahanta li tuk oke: chisotek tuklo ka̱ afʋmmi auah ushta ho̱ chin toksʋli li tuk oke, micha chi̱ nanʋlhpoa ya̱ afʋmmi hannali ho̱ chin toksʋli li tuk oke: micha nan isht ʋm ʋlhtoba ya̱ pokoli ha is sʋm inlʋchi tuk oke.
42A̱ki in Chitokaka, Eblaham in Chitokaka, micha Aisak ʋt I̱ nukshopa ʋt sʋbafoyuka hatuk keyukma, nana iksho ho̱ is sa chʋffichi pulla hetuk oke. Chitokaka yʋt a sʋlbʋsha, micha sʋbbak toksahanli ka̱ pi̱sa tuk osh pilashash ninak ma na chi̱ miha tuk oke, im achi tok.
43Mihma Laban ʋt afalaminchit Chekob a̱, ushetik ilʋppʋt sʋsotek ʋhleha hoke, mikma ʋlla ʋhleha ilʋppʋt ʋm ʋlla ʋhleha hoke, micha nanʋlhpoa ilʋppʋt a̱ nanʋlhpoa yoke, micha nana ish pi̱sa moma kʋt ʋmmi hoke; yohmi ka̱ himak nitak a̱ sʋsotek ʋhleha ilʋppa, micha eshi tok ʋlla ʋhleha ha̱ nanta ho̱ katiohmichi la hinla cho?
44Yʋmohmi hoka himak a̱ inta, ʋno, micha chishno il ita tuklo kʋt nan il itim apesashke: mikma nan atokoli yosh pim itin takla ya̱ hikiashke, im achi tok.
45Mihma Chekob ʋt tʋli ishi cha, nan‐isht‐ithana ikbit hilechi tok.
46Mihmʋt Chekob ʋt itibapishi ʋhleha ha̱, Tʋli oh aiowá, im achi tok; mihma tʋli aiowa cha, itʋnahli tok: mihmʋt itʋnaha ya̱ paknaka okla ai impa tok.
47Mihma Laban ʋt, Cheka‐sahatuhla hochifo ma, amba Chekob ʋt Kaleet hochifo tok.
48Mihma Laban ʋt, Itʋnaha ilʋppʋt himak nitak a̱ ʋno micha chishno nan atokoli yosh pim itin takla ya̱ hikia hoke, achi tok. Yʋmohmi hatuk o̱ hohchifo ha̱ Kaleet; achi tok.
49Micha Mispeh achi tok: Il iti̱filʋmmit il a̱yakma, Chihowah yʋt pim itin takla ya̱ a pi apesahanchashke.
50Sʋsotek ʋhleha ha̱ ish ilbʋshalikma, keyukmʋt sʋsotek ʋhleha ha̱ aieninchit ohoyo inla ho̱ ish ishikma, hatak nana hosh piba fo̱kʋt pi pi̱sa keyushke: Chitokaka ak osh ʋno, micha chishno, pim itin takla ya̱ pim atokoli yosh hikia hoke, achi hatuk okʋt.
51Micha Laban ʋt Chekob a̱, Yakeh, itʋnaha ilʋppa, micha yakeh, nan isht‐ithana ilʋppa ʋno, micha chishno pim itintakla ya̱ hilechi lishke.
52Itʋnaha ilʋppʋt, micha nan isht‐ithana ilʋppʋt nan okpulo aiahnit, itʋnahahchi ilʋppa ant iʋt ak chim ono ka he, mikma itʋnahahchi ilʋppa, micha nan isht‐ithana ilʋppa ant iʋt chik sʋm ono ka he atokoli yashke.
53Eblaham in Chitokaka, micha Naho in Chitokaka, i̱ki ya̱ in Chitokaka yak osh pim itin takla ya̱ nana ai apesashke, im achi tok. Mihma Chekob ʋt i̱ki Aisak ʋt I̱ nukshopa ak o̱ hochifot anumpa kʋllo il onochi tok.
54Yohmi mʋt Chekob ʋt i̱ nanʋlhpoa ya̱ ai ishit nʋnih hash ai ʋbi cha, pʋska ʋpa chi̱ ho̱ itibapishi ʋhleha ha̱ hoyo tok: mihma pʋska okla ʋpa cha, nʋnih ha̱ a̱sha na onna tok.
55Atuk o̱ onna kʋt onnahinli fehna ho̱ Laban ʋt wakaya cha, ushi ʋhleha, micha ushetik ʋhleha ha̱ i̱ su̱ksowa mʋt, anumpa yukpali onochi tok: micha Laban ʋt falamʋt iʋt aiʋtta ya̱ ona tok.
Արդեն Ընտրված.
Chenesis 31: CHH
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Published by the American Bible Society 1848-1886, reprinted 1913