Chenesis 32
32
1Mihma Chekob ʋt a̱ya tok; atuk o̱ Chitokaka im enchel ʋhleha hʋt afama tok.
2Atuk o̱ Chekob ʋt pisa mʋt, Ilʋppʋt Chitokaka im ʋlbina hoke achi tok: micha yakni yʋmma hohchifo ha̱ Mahanaim achi tok.
3Mihmʋt Chekob ʋt anumpa shali tikba tihlelit, Sei yakni, Etom apehlichika, itibapishi Esau aiasha ya̱ pit im pila tok.
4Micha i̱ miha mʋt, Yakohmichi hosh a̱ shahli Esau ya̱ hʋsh im anumpulashke; Chin tishu Chekob ʋt yak achishke, Nowʋt a̱ya yosh Laban ak o̱ takla ahanta li chatuk, micha yʋmmak o̱ ahanta li̱ himak a hoke:
5Micha wak, micha issuba haksobish falaia, micha nanʋlhpoa chipinta, micha hatak tishu ʋhleha, micha ohoyo tishu ʋhleha aiena ka̱ pehliechi lishke: atuk osh a̱ shahli ha̱ pit im anolit, holhponayo hanta ya̱ chi tikba ai ahayuchi la chi̱ hosh pit chi̱ pila lishke, achishke, hʋsh im achashke, achi tok.
6Atuk o̱ anumpa shali ash osh falamʋt, Chekob a̱ im ʋla mʋt, Ish itibapishi Esau ya̱ il im ona tuk oke; mihma chi afamʋt minti akinlishke, mihma hatak tahlepa ushta hosh api̱ha hoke, achi tok.
7Mihma Chekob ʋt nukshopa cha komota fehna tok: mihmʋt okla apehʋt a̱ya tuk a̱, micha nanʋlhpoa chipinta, micha nanʋlhpoa hochito, micha kamel puta aiena ka̱ ita kʋshkolit a̱ya tuklochi tok.
8Micha Esau ʋt a̱ya achʋfa ka̱ ant afama cha, issot kanchikma, yohmikma a̱ya achʋfa kʋto yihlepʋt hlakoffashke, achi tok.
9Mihmʋt Chekob ʋt, A̱ki Eblaham a̱ in Chitokaka, micha a̱ki Aisak a̱ in Chitokaka, Chihowah, Falamʋt chi̱ yakni, micha chi̱ kanomi ya̱ ish im onashke, mikma achukma ho̱ chi̱ yʋmihchi lashke, is sʋm ahanchi tuk chia ma,
10Nan isht ish i̱ nukha̱klo moma ik lauwo ka̱, micha chim anumpa a̱hli moma chin tishu ha̱ ish pisachi chatuk a̱ si ahalaia he ʋlhpesa keyushke: an tʋbi ya̱ ieshi hosh Chatan ilʋppa hlopulli li tok osh, himak ano a̱ya tuklo toba li hokʋt.
11Itibapishi li ibbak, Esau ibbak a̱ im ai ishit is sa hlakofichashke, chim asilhha lishke, i̱ sa nukshopa hoka: ʋlʋt issot sa kanchikmʋt, ishki, micha ʋlla ʋhleha ma issot kanchi yoba ná.
12Achukma ho̱ chi yʋmihchi li pulla chi̱ hoke; micha chim ishtatiaka ya̱ laua kʋt holhtina he keyu, shinuk okhʋta aiasha kak o̱ choyuhmichi la hi oke, ish achi tuk oke, achi tok.
13Micha mih ninak ma yʋmmak inli anta tok; micha itibapishi Esau ya̱ habenʋcha chi̱ kʋt nana hosh ibbak ant fohkakmʋt, ishi tok.
14Issi kosoma tek tahlepa tuklo, micha issi kosoma nakni pokoli tuklo, chukfʋlhpoa tek tahlepa tuklo, micha chukfʋlhpoa nakni pokoli tuklo,
15Kamel i̱ bishahchi pokoli tuchina, ushi aiena, wak tek pokoli ushta, micha wak nakni pokoli, issuba haksobish falaia tek pokoli tuklo, micha ushi pokoli aiena hatok.
16Micha ilap a̱ya achʋfa aiyukali ho̱ in tishu ʋhleha ibbak fohki tok: micha in tishu ʋhleha ha̱, Sa tikba hʋsh tanʋbli cha, a̱ya achʋfa aiyukali kʋt iti̱ mishemanchi hosh hʋsh a̱yashke, im achi tok.
17Micha tikba fehna a̱ya ka̱, Itibapishi li Esau ʋt afama cha chi̱ ponaklot, Kʋta immi chia hoh cho? micha katima ish ia cho? micha chi tikba a̱ya ilʋppʋt kʋta immi hoh cho? achikma:
18Yohmikma, Chin tishu Chekob a̱ immi hoke: nahʋlbina yo̱ a̱ shahli Esau ya̱ et i̱ pila tuk: atuk o̱ yakeh, olbʋl minti akinli hoke, ish achashke, achit i̱ miha tok.
19Micha yʋmihchi hosh atukla, micha atuchina, micha a̱ya kaniohmi hosh pit iakaiya moma ka̱ i̱ mihʋt, Yakohmichi hosh Esau ya̱ hʋsh pisakmʋt, hʋsh im anumpulashke, ahanchi tok.
20Micha achakalinchit, Yakeh, chin tishu Chekob ʋt olbʋl minti akinlishke, hʋsh achashke, achi tok. Nahʋlbina sa tikba ia kak o̱ ishit nuktalali lashke; yohmi ha yosh nashuka ya̱ pisa lashke: a̱ kanʋt ʋm aiokpʋcha hinla yoba ká, achi hatuk okʋt.
21Yohmi ma nahʋlbina yʋt tikba ia tok; mihma ilap ʋto mih ninak a̱ abinanchi ya̱ anta tok.
22Atuk osh mih ninak a̱ wakaya mʋt, tekchi tuklo, micha in tishu ohoyo tuklo, micha ushi auah achʋfa aiena ka̱ ishi cha, Chabbok okhina kohcha ya̱ pit hlopulli tok.
23Mihmʋt ishi cha, okhina yash pit hlopullichi mʋt, moma i̱shi tuk ʋt pit hlopullichi tok.
24Micha ilap bano hosh anta tok; atuk o̱ hatak osh ont iti̱hi̱shi na onnʋt minti tok.
25Atuk osh imaiya he keyu kʋt pisa mʋt, Chekob iyubi itachosholi kolukbi ya̱ potoli tok: mihma itishi mʋt, Chekob ʋt iyubi ai itachasholi ʋt shu̱fa tok.
26Mihma, Onnʋt minti hoka, ak iá, achi tok. Mihma, Chik sai yukpalokma, ik iá, chim ahni la he keyu, achi tok.
27Mihma, Chi hohchifo hʋt nanta hoh cho? im achi ma, Chekob sia hoke, achi tok.
28Mihma, Himak pilla ma chi hohchifo ha̱ Chekob acha he keyu, amba Islael ahi oke: hatak holitopa chia hosh Chitokaka ya̱ ish i̱ kʋllo hokʋt, hatak ʋhleha ha̱ ish imaiya chi̱ hoke, achi tok.
29Mihma Chekob ʋt i̱ ponaklot, Chi hohchifo ha̱ ʋm anolí, chim asilhha lishke, achi tok: mihma Nanta katiohmi ho̱ sa hohchifo ha̱ ish ponaklo cho? achi tok. Mihmʋt yʋmmak o̱ a yukpali tok.
30Mihma Chekob ʋt yakni yʋmma hohchifo ha̱ Penuel achi tok: Chitokaka ya̱ nashuka iti̱ sanalit pisa lish si okcha̱ya moma hokʋt, achi hatok.
31Atuk osh Penuel a̱ hlopullit ia ma, hʋshi ʋt kohchʋt on tommi tok; mihma iyubi ya̱ ishit shaiiksheli hosh nowa tok.
32Yʋmohmi kak o̱ Islael im ʋlla ʋhleha hʋt akshish yʋmmʋt iyubi itachosholi kolukbi o̱ hikia kʋt shulla tok ak o̱ ik po chatuk osh himak nitak a̱ moma hoke: Chekob iyubi itachosholi kolukbi ya̱ potoli na akshish ʋt shulla tuk atok.
Արդեն Ընտրված.
Chenesis 32: CHH
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Published by the American Bible Society 1848-1886, reprinted 1913