Chenesis 33
33
1Atuk osh Chekob ʋt akachakalit pisa ma, yakeh, Esau ʋt hatak tahlepa ushta hosh api̱ha ho̱ minti tok. Mihmʋt ʋlla ʋhleha ha̱ ila hiohlichit Leah, micha Lechel, micha tishu ohoyo tuklo aiena ka̱ ima tok.
2Micha tishu ohoyo tuklo, micha im ʋlla ʋhleha aiena kak o̱ tikba fehna hiohlichi mʋt, Leah micha im ʋlla ʋhleha aiena ka̱ iakaiyʋchi mʋt, Lechel micha Chosef a̱ olbʋl fehna hilechi tok.
3Mihmʋt tikba ia tok; micha untuklo ha akachunolit aka hlipiʋt ma̱ha̱ya mʋt, itibapishi ha̱ bili̱ka ona tok.
4Mihma Esau ʋt malelit ont afama mʋt, shoyulit ikunla ya̱ on hlipia cha, i̱ su̱ksowa tok: mihma yaiyʋt okla tok.
5Atuk osh akachakali cha, ohoyo, micha ʋlla ʋhleha aiena ka̱ pisa mʋt, Yʋmmʋt kʋta hosh chi api̱ha cho? achi tok. Mihma, Chin tishu ha̱ Chitokaka yʋt i̱ nukha̱klot ima tuk ʋlla ʋhleha hoke, achi tok.
6Yohmi ma tishu ohoyo tuklo, im ʋlla ʋhleha aiena kʋt bili̱ka ʋlʋt akachunolit aka hlipkʋchi tok.
7Mihma Leah ak kia im ʋlla ʋhleha aiena kʋt bili̱ka ʋlʋt akachunolit aka hlipkʋchi tok: mihma iakaiya kʋt Chosef, micha ishki itatuklo kʋt bili̱ka ʋlʋt akachunolit aka hlipkʋchi tok.
8Mihma, Pehlichit isht a̱ya na afama li tuk moma ilʋppak osh nanta chi̱ katiohmi hoh cho? achi tok. Mihma, A̱ shahli itikba ya̱ holhponayo hanta ya̱ ai ahayuchi la chintuk mak oke, achi tok.
9Mihma Esau ʋt, Ʋm ʋlhpesa akinli hoke, itibapishi li ma, nana ish i̱shi tuk ʋt ish ieshashke, achi tok.
10Mihma Chekob ʋt, Aha̱, himak a̱ holhponayo hanta ya̱ chi tikba ai ahayuchi li hokma, a̱ nahʋlbina sʋbbak foyuka ka̱ ish ishashke, chim asilhha lishke: yʋmohma he ak o̱ chi nashuka ya̱ Chitokaka i̱ nashuka chohmi ho̱ pisa li ma, is sa hʋlhpa̱sha hoka.
11Nan ishit yukpali li ishit chim ʋla tuk a̱ ishí, chim asilhha lishke; Chitokaka yʋt a̱ kana tuk oka, micha ʋm ʋlhpesa tuk oka, achi tok: mihmʋt im achiba ma, ishi tok.
12Mihmʋt, Wakayʋt il iashke, mikma chi tikba ia lashke, achi tok.
13Mihma, Ʋlla ʋhleha hʋt ik kʋllo, micha nanʋlhpoa chipinta, micha nanʋlhpoa hochito ʋt ushi pehlichi hosh si api̱hʋshke; atuk o̱ hatak ʋt nitak achʋfa ho̱ atablit tihlelikma, nanʋlhpoa moma kʋt illit taha hinla ka̱ a̱ shahli hʋt ithanʋshke.
14A̱ shahli hʋt in tishu ha̱ itikba iashke, chim asilhha lishke: mikma nanʋlhpoa yʋt sa tikba a̱ya kak osh kaniohmit a̱yakma, micha ʋlla ʋhleha hak osh kaniohmit a̱yakma, lumʋt ma̱ha̱ya li tuk osh a̱ shahli hʋt Sei ai ʋtta ka̱ im ona lashke, im achi tok.
15Mihma Esau ʋt, Yohmi ka̱ hatak kaniohmi ka̱ si api̱ha ka̱ ak chim ashachí, achi tok: mihma, Nanta katiohma chi̱ ho̱? A̱ shahli itikba ya̱ holhponayo hanta ya̱ ai ahayuchi lashke, achi tok.
16Yohmi ho̱ mih nitak a̱ Esau ʋt falamʋt i̱ hina fohkʋt Sei pilla ha̱ ia tok.
17Mihmʋt Chekob ʋt a̱ya mʋt, Sukkolh a̱ ona cha, in chuka ikbi cha, i̱ nanʋlhpoa ya̱ hoshontika im ikbi tok: yʋmohmi kak o̱ yakni yʋmma hohchifo ha̱ Sukkolh achi tok.
18Atuk o̱ Chekob ʋt Patan‐alam ʋttʋt ʋla mʋt, Shalem, yʋmmʋt Shekem in tʋmaha holihta yosh Kenan yakni talaia ka̱ ʋla tok: micha tʋmaha holihta itikba ak o̱ im ʋlhtipo ya̱ hilechi tok.
19Micha im ʋlhtipo a̱ a hilechi tuk ʋt Shekem i̱ki Hamo ya̱ im ʋlla ʋhleha ha̱ tʋli hʋta tushahli tahlepa achʋfa ho̱ osapa kashapa yo̱ chumpa tok.
20Micha yʋmma alta hilechi cha, El‐elohe‐Islael hochifo tok.
Արդեն Ընտրված.
Chenesis 33: CHH
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Published by the American Bible Society 1848-1886, reprinted 1913