Matius 24
24
Yesu mampusua: kamaronnòngangnaa Tamming Kabussùngang
(Mrk. 13:1-2, Luk. 21:5-6)
1Ladu nai anto, missòhong ti Yesu mampalii: kaoneang Tamming Kabussùngang. Mindùkuꞌna‑mi ti pasikolaNa pang manturo: matairingna nasang pampatèdeꞌ ung ara i kaoneang Tamming Kabussùngang. 2Hampoꞌ Na sùmui teꞌ, “U ita‑mo se naꞌ nasang ti to? Matantu te ung Ku pusua: matung e teꞌ Harai:‑da moi besa hatu nai pampatèdeꞌ to ung leta:, ung dang nironnònga nai kaoneangna.”
Aka ti ung jadia, to hang nilampiꞌ‑mi ti katampàkangna lino tee
(Mrk. 13:3-13, Luk. 21:7-19)
3Lumanna‑mi ti Yesu i Mungku Saitun, pang mesong i anto. Mindùkuꞌna‑mi ti pasikolaNa pang mingkutiki teꞌ, “Paìsàngi‑kangka, i sangkannaa ti tempona aka to deꞌ? Pang aka ti tanda ung manturoa kabùruꞌangMu, pang ung manturo: teꞌ tempona‑mo ti katampàkangna lino tee?”
4Na sùmui Yesu teꞌ, “Toka:-tokana‑ko se, pakala‑rang ara tau ung mampahùling‑ko se mampatu: aka ti ung bùruꞌa. 5Sàbaꞌ boso: tau ung bùruꞌa mampake konaKu moa teꞌ, ‘Koi:‑mo ti Datu: Pipasalamaꞌ,’ pang mampahùlìnga boso: tau. 6U massàdìnga se moni kaputudaang pang kareba kaputudaang, hampoꞌ hau tipadàlaꞌ se pang mariaꞌ. Sàbaꞌ nasang to parallu nipaara, hampoꞌ handei:‑da palleona teꞌ tempona‑mo ti Àlona Puang. 7Sàbaꞌ suku besa situdaa suku sintàna:, pang mène: ho ti kadatuang besa mao i kadatuang sintàna:. Pang araa kaburoràngang pang pidodaꞌ iaka-aka. 8Hampoꞌ nasang to, pararanna‑da maang kamaparriꞌang, mène: pipanaꞌna bahine ung marrara na kekiꞌi.
9Tempo to, u nipeheaa se mangking nisolàngi, pang u nipateia. Pang tau i lìliꞌna lino mampukàràngo: se sàbaꞌ konaKu. 10Pang boso: tau mampaliia kapatongangangna‑i se pang sipehea-heaa mao i poni:-ponina‑i se pang sipukàrang. 11Boso: nabi-nabi ung dang tongang mingaroa pang mampahùling boso: tau. 12Pang kakadetuang dumallaꞌa iaka-aka, mambùruꞌ‑ing pìniꞌna tau mabàlia miluhali hang malemu‑i hura:. 13Hampoꞌ tau ung mantokaꞌ pàraꞌ kapatongangangna deaꞌ i katampàkangna, nipasalamaꞌa. 14Pang Kareba Belo: mampatu: kadatuang suruga tùrùnga nipakareba deaꞌ i lìliꞌna lino, mangking nasang suku massàding. Ladu to, bùruꞌa‑mo ti katampàkangna lino tee.”
Kamaparriꞌang ung bùruꞌa pang nabi-nabi ung dang tongang
(Mrk. 13:14-23, Luk. 21:20-24)
15“U mangitaa se tau mampukauꞌ ‘Kauꞌ ung Burere ung na Pudàku Puang’ i Kaoneang Malìsong, mène: ung na pusua: nabi Daniel.*#24:15 Dan. 9:27, 11:31, 12:11. Sua: te, parallu na tangaꞌ belo:-belo: tau ung mambasa. 16Tempo to, tau ung one: i Yudea parallu mampalai‑ing kalaena mao i mungku. 17Tau ung tarrang iaho atuꞌ ung marante,*#24:17 Rasangna tu Yudea, atuꞌna marante. Ereng ung mao i atuꞌ, i sòhongna rasang. Biasa tau lumao i atuꞌ i malena millìhe, mingkasaui pang silàha:-làha:. hau na mintama hura: i rasang mangala aka-aka. 18Tau ung mingkamaꞌ i kinete:, hau na mao hura: mangala jekeꞌna dea‑raka komoꞌna. 19Hang makàdaꞌ‑ida masussannaa ti bahine ung kaleang pang ina: ung mupasusu maang anakàna tempo to! 20Musumbayang‑ko se mangking tempo u mampalai‑ing se kalaemu to, handei: tempo paraurang dea‑raka àlo kapillìheang. 21Sàbaꞌ tempo ung dang makàdaꞌ mipaiꞌna to, dea‑mo besa kamaparriꞌang ung dang ara‑kang niola:‑i songka: aranna lino deaꞌ i latenna. Pang liung nai anto, hang nipaarai: hura: ti ung mène: to. 22Àla: dang na pakapodiꞌ‑ida Puang ti temponaa kamaparriꞌang to, baꞌ harai:‑da moi besa tau ung lupu tuho:. Hampoꞌ na pakapodiꞌ‑i Puang, sàbaꞌ mangkalehai tau ung Na pirarai: miluhali taunNa.
23Tempo to, ìna ara tau ung musua: matung teꞌ, ‘Hele! Inne:‑da ti Datu: Pipasalamaꞌ e!’ dea‑raka, ‘One:‑Da i antoo!’ hau patongang se ti tau to. 24Sàbaꞌ araa ti tau ung si mangkonai: kalaena Datu: Pipasalamaꞌ dea‑raka nabi, pang mampukauꞌi: se tanda kalle-kalleang ung lammuꞌ, mangking mampahùling tau, mintama ho ti taunna Puang ìna hela na pahùling. 25Jadiꞌ, kalehai‑ko se! Sàbaꞌ nasang to, hang nipaara‑mi, Ku pusua:‑mo ìnang matung.
26Deanna‑mo to, ìna ara tau ung musua: matung teꞌ, ‘Hele! One:‑Da i padang ung tunini!’ hau mao se i anto. Pang ìna ara ung mangkonai: teꞌ, ‘Hele! One:‑Da i laling kamaraꞌ tee!’ hau patongang se. 27Sàbaꞌ kabùruꞌangna Anaka Tulino niitaa iaka-aka pòteng, mène: salabia: i mata kùlaꞌ niita deaꞌ i kalìliang kùlaꞌ. 28Iaka teng ara ung mate, i anto mukobua ti kudaꞌ ung manganne:.”
Kabùruꞌangna Anaka Tulino
(Mrk. 13:24-27, Luk. 21:25-28)
29“Ladu tempo kamaparriꞌang to, kùlaꞌ miluhalia makarinning, hulang hang tumpanai: hura:, ana-anaka hulang maràsànga nai langiꞌ, dea‑mo kuasa-kuasa i langiꞌ nidodaꞌa. 30Tempo dea‑mo to, niitaa ti tandana Anaka Tulino i langiꞌ pang tau i lìliꞌna lino kumàràka pang mangitai: se Anaka Tulino bùruꞌ mangola: kahung sìnang kuasa pang kamalabiꞌang ung lammuꞌ. 31Sipolai: moni lalloro: ung lammuꞌ, Anaka Tulino mampantuyua malaikaꞌ-malaikaꞌNa lumao mangkungku taunNa nai lìliꞌna lino, hari: ung Na pakaliung.”
Pipaturo: nai lòpo: ara
(Mrk. 13:28-31, Luk. 21:29-33)
32“Ala‑ko se pipaturo: nai lòpo: ara. Ìna maràsang ti daungna pang na olaing milolo:, niìsang teꞌ kùlaꞌ kaùnga‑mo. 33Mène: ho to ìna u mangita se nasang kamasussaang to, u ìsànga‑mo se teꞌ dùkuꞌ‑mo ti bùruꞌna Anaka Tulino, one:‑mo i baba:. 34Matantu te ung Ku pusua: matung e teꞌ Hang tempona‑mi mate ti tau ung si mangita tanda-tanda to, ìnang bùruꞌa‑mo ti Anaka Tulino. 35Moi langiꞌ pang lino hùlìnga, hampoꞌ suaKu tontònga deaꞌ tùrungna.”
Pasakiꞌ mangking lupu toka:-tokana
(Mrk. 13:32, 35, Luk. 17:26-30, 34-36)
36“Hampoꞌ moi mène: to, hari:‑da ung mangìsang i sangkannaa ti àlona pang jaangna, moi malaikaꞌ-malaikaꞌ i suruga pang Anaka.*#24:36 pang Anaka. Ara teks Yunani lùlung ung dang ara sua: tee. Ama:‑da teng i suruga ti ung mangìsang. 37Sàbaꞌ tempona kabùruꞌangna Anaka Tulino, mènea to tempo Nuh lùlung. 38Sàbaꞌ, tempona lino hang na kabùruꞌi‑mi uhai sabaꞌ, tulino lupu teng manne:, menung, silopaka pang mupasilopaka, deaꞌ àlona Nuh mintama i laling lemmang ung mène: kapalaꞌ tasiki. 39To na lampiꞌ‑mo tempona uhai sabaꞌ te lino e, màli: na pasàdaꞌ‑i se aka ti ung bùruꞌ mao i dei: se, na ola:‑ing mate pàhuꞌ‑i se nasang. Mènea‑da ho to ti tempona kabùruꞌangna Anaka Tulino.
40Tempo to, araa idua muane ung tarrang mingkamaꞌ i kinete:. Dea ti besa nialaa pang besa nipaleta:. 41Pang araa idua bahine ung tarrang mukampung. Dea ti besa nialaa pang besa nipaleta:. 42Deanna‑mo to, lupu‑ko se toka:-tokana, sàbaꞌ ha u ìsang‑ko se i sangkanna ti Puangmu bùruꞌa.
43Kalehai‑ko se ti tee! Àla: na ìsang‑i ampu rasang ti jaang pira i pihengi na bùruꞌa ti ung pumanauang, àla: hang leto‑ida, mangking ung pumanauang hang mintama‑i i rasangna. 44Deanna‑mo to, dio se ho parallu toka:-tokana, sàbaꞌ Anaka Tulino bùruꞌa i tempo ung dang nu sàdaꞌ-sàdaꞌ se.”
Rampeang besa pangkoring ung minumpu dea‑raka ung dang minumpu
(Luk. 12:41-48)
45“Pangkoring ung minumpu pang kitangaꞌ belo:, na turoa tuangna mangìsang pangkoring sintàna:, mangking lupu mampangatoroꞌ‑ing ung na annena‑i se songka: na palii: tuangna. 46Maupaꞌ ti pangkoring to ung na kabùruꞌi tuangna tarrang mangkamaꞌ kamaꞌangna. 47Matantu te ung Ku pusua: matung e teꞌ Tuangna mallantoing pangkoring to mangìsang nasang aka-aka ung na ampu. 48Hampoꞌ ìna pangkoring ung kadetu pinanahanna, baꞌ mantangaꞌ‑da moa teꞌ, ‘Masaia maang ti tuangku màli: na sumule:,’ 49pang na ala kanàha: mampanaꞌi pangkoring sintàna:, pang manne:, menung sola: tau ung si pungenung. 50Tuangna to bùruꞌa i àlo pang jaang ung dang nisàdaꞌ-sàdaꞌ, 51pang pangkoring to, na tatàka tuangna pang na tibe mao i kaoneangna tau ung si tangkasi:. I anto mantalihuhui: se kumàraka pang sikùriki ti sisena.”
Արդեն Ընտրված.
Matius 24: skx
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք