Hidingoto 2
2
Ma Jou o Womaha woboa onanguku
1De ipahaino abe o Pentakosta ma rame-rame adonoka de ona mata-mata yomatoomuinoka abe o ngi moioka. 2De ka itodokanino de naga yoihene o Horogauku ma ruruhu moi abe imaketero hoka o rato duru ma amoko iboa dakuino. De ma ruruhu gea naga ma tau ma goronaka ho ma ngi abe o kiaka yomatoomuino gea duru aomangoka de ma ilingi. 3De ahao nagali abe ona yamake hoka o uku o doomu moi, abe ma uku homoi-homoi ma rupa ngade-ngade hoka o nyawa manga akiri ma rupa. De ahao ma uku gea ikerewoto la yadangi ona homoi-homoiuku. 4De duru ma oraha gea dika de ona mata-mataika yakokilufungoka de Ma Jou o Womaha, ho ona yotemo-temo de o demo utuoli abe hokokia dika Ma Jou o Womaha wahiakunu ona homoi-homoiika.
5De abe ma oraha gea naga o Yerusaleeme ma kotaka o Yahudi ma nyawa duru ko manga ngoe abe ka ihikaika yomahuba-huba Ma Jouika. Abe ona gea yoboa manga tona-tonakoka de yaino la yodioniki o Yerusaleemino, ho ngaro o tonaka o kia dika naga o duniaka naa masara naga utu o Yahudi ma nyawa abe yoboa gea ma tonakino la yakokiniiki o Pentakosta ma rame-rame. 6Ho abe ma oraha ona mata-mata yokokiihene o nyawa manga hagaaga ma ilingi gea, ona yabobaataino la ato ihioriki o kia idadioka. De ona mata-mata yomahiadonoka abe iwingaku-ngakuoka manga ngi de duru yokokiheranga angamoi ona homoi-homoi yoboriihene to ona ma hirete manga bahasa ma demo abe ihupu iwingaku-ngaku manga uruino.
7De ona duru yokokiherangoka ho hiadono yomakokeleha ato, “Naa done sarakia? Angamoi abeika, ona gea mata-mata o Galilea ma nyawa, 8masara ngone naa homoi-homoi hoihene abe manga uruino ihupu to ngone nanga bahasa ma demo abe biaha hatobapake nanga demo homoi-homoi nanga tona-tonakoka! 9De ngone naa utu nanga tonaka o Paratia, de utu o Mede ma tonakino hoboa, de utuoli o Elamoka ma nyawa. De ngone utu nanga gogere o Mesopotamia ma tonakoka, utu o Yudeaka, de utu o Kapadokia ma tonakoka, de utuoli o Pontusu ma tonakino eko o Asia ma tonakino hoboa. 10De nagahi ngone utu abe o Firigia ma tonakoka de utu o Pamafilia ma tonakoka ma nyawa. De utuoli o Mesiiroka ma nyawa, de utu o Libia ma nyawa abe o Kirene ma datekoka nanga gogere, de ngone utu o Roma ma nyawa abe hodionikino. De abe o Romaka de aino, ngone utu homaboa o Yahudi ma nyawaino, de utuoli ko o Yahudi ma nyawaua masara ma oraha naa de homaputuhoka la hatobanii-niiki to ona manga pareta de manga hiaturu. 11De ngone utuohi o Kereta ma nuuhu ma nyawa de utu o Araba ma nyawa. Masara ngaro nanga tona-tonaka de nanga demo duru ikurutika masara ngone hoihene o nyawa naa abe ihidemo de to ngone homoi-homoi nanga bahasa ma demo, de manga demoino gea de ihingahu-ngahu Ma Jou ai datoro duru ihohailoa abe wodiaioka!” 12De ona duru yokokiheranga hiadono manga hiningaka ko yomamakeokaua. De yomakokeleha ato, “Ho naa done ma titi o kia?” 13Masara naga utu manga hidogoronaka yamia-mia abe ona iwingaku-ngakuika ato, “Ona gea bote yadalukoka, de genangino ma titi hiadono manga demo o fara moi!”
O Peturusu wahikodoku Ma Jou ai Demo-demo abe o nyawa yowoe-woeika
14De ahao o Peturusu de ai dodiawo yangimoi de yamoi ona yomaokoino o nyawa yowoe-woe manga hima-himangoka. De o Peturusu waamo-amokiye de wotemo ona mata-mataika wato, “Ahi gogianongoru o Yahudi ma nyawa de ngini utu mata-mata abe o Yerusaleeme ma kotaka naa nimanoa. Abeika nitotoihene ahi demoino naa la ka idadi tinihitararono nginika! 15Abe ngini utu nimihidutugaino niato ngomi naa imidalukoka. Masara naa duru tagoungu tinihingahu abe ngomi ko imidalukua. Abeika naa naga o ngorumino abe o takoro hiwo, de duru ko ma iwa abe ka o ngoruminohi de o nyawa yadalukoka! 16Ho hokogenangua ma titi hiadono ngini niamake ma heheranga naa! De gea tanu ma heheranga ma titi ka idadi hamake Ma Jou ai Demo-demoka, angamoi duru ma dodihiraka de Una wonahingahuoka wato ahao kiani idadi hokonaa. Abe ai uru ma dodofanga o Yoele wohitulihuku ai demo wato,
17 ‘Ma Jou wotemo wato, “Ahao abe ma oraha o dunia ma bobaha itigioka de Ngohi ahi Womaha ahao tagopoauku o nyawa mata-matauku, la hiadono ti ngini nia ngofaka o nau-nauru de o ngo-ngofekaoo ahao ka idadi yahingahu-ngahu to Ngohi ahi hingahu ma demo nginika. De ngaro nia ngofaka o goo-goduuru masara ona ahao yamake o himatoko Ngohioka de aino. De o nauru abe yapoperekioka ona ahao tahidoaka o buluhara onangika abe ahi hiningaka de aino.
18 De ma oraha gea ahao to Ngohi ahi Womaha tahikokodoku ona mata-mataika abe ihitobaleleani Ngohino, ngaro o nau-nauru eko o ngo-ngofeka, la ona ka idadi adofanga to Ngohi ahi hingahu ma demo nginika.
19 De ma oraha gea ahao todiai la o heheranga ma dodunguu idadi abe daku ma dihangoka de nagali dau ma duniaka ahi kuaha ma dodunguu. Abe nako o duniaka gea ahao o nyawa yamake ma awunu, de ma uku, de o uku ma nofo duru ma amoko ihao-haotiye.
20 De daku ma dihangoka de o wange ahao idadi ifufutuoka, de o mede ahao yamake ma doka-dokara abe imaketero hoka o awunu. De gea ipahaino de ahao nanga Baluhu idodutu ai gahe adonoka abe ma wange gea duru ka enangohi de ma titioka. Angamoi ma wange gea de ahao Una watailako o nyawa mata-mataika ma titi manga datoro.
21 De abe ma oraha gea de onagona dika yomagahoko o duduhunu nanga Baluhu idodutuika, ona gea ahao waduhunu manga hohowonoka de aino.” #2:21 Yoele 2:28-32
Hokogea o Yoele wohitulihuku duru ma dodihiraka.’”
22De o Peturusu ka wotemohi onangika wato, “Ngini o Isiraele ma nyawa kiani nitotoihene ahi demoino! Naa ma duru o Yesusu, abe o Nasaretoka ma nyawa gea, Una wowango ti ngini nia hidogoronaka. De ma oraha gea de Ma Jou winihitaana nginika abe ma titi o Yesusu Una duru wagoungu nanga Mesia, Ma Jou ai Ngofaka abe wodiai o heheranga ma dodunguu ma ngoe Unangino. De gea wodiai duru ti ngini nia hidogoronaka la ka idadi niamake to Yesusu ai kuaha de ai buturungu duru kohaamoko. 23De ngaro ngini niamake to Una ai dodunguu gea, masara ngini ka niwihidapakuika o gota isosalioaika de niwitoma abe ma oraha Una niwiao onangika abe ko o Yahudi ma nyawaua. De gea mata-mata idadi angamoi ma dodihirainohi de Ma Jou wihideeoka wato kiani ahao idadi hokogea o Yesusika. 24De ngaro hokogea Ma Jou ai hidee ai Ngofakika masara ipahaino de wihihupu o hone-honenge ma kangelaino abe ma oraha wihimomiki ai honengino. Angamoi tanu o hone-honenge ma kuaha ko apoaua iwitumungu o Yesusu. 25De gea hohioriki abe ko wohihonongaua wohonenge angamoi naga ma demo abe ma dodihiraka atulihukuoka. Abeika hotoihene nanga koano ma dihiraino o Dautu ai demoino abe una wohitulihuku ma titi o Yesusu. Abe o Dautu wato,
‘Ngohi duru tohioriki abe ahi Baluhu Ma Jou Una ka ihikaika naga Ngohioka.
Ho Ngohi duru ko idadiua tolage angamoi Una duru ahi datekoka wohigoa-goana.
26 De mangale ma titi gea ho Ngohi ahi hiningaka de duru togarago,
De ahi uruoka ka ihikaika tihigiriiri Unangika!
De ahi badanga ngaro ahao kiani ihonenge masara nagahi ahi nganganono.
27 Angamoi ahi jiwa gea ko nohidogunoaikaua o hone-honenge ma ngioka,
De Ngohi ani Debi-debini ma nyawa Ngona ko nohinoaikaua o lungunoka la o gorofu ihidaene.
28 De Ngona Ma Jou nohihimatokoka ani hininga ma dodagi abe nato ahao Ngona nohihimomikoli ahi honengino la ka towangoli,
De nohihimomiki ipaha de ahao Ngohi towango ka Ngonaka dika. Ho ahao gea de duru togarago, de ahi garago gea duru ingodumoka!’ #2:28 Higiriiri 16:8-11
Hokogea ma dodihiraka o Dautu wohitulihuku.”
29De ahao o Peturusu wahingahu onangika wato, “Masara ahi gogianongoru, abeika homafikirohi to Dautu ai demo gea! Angamoi duru tonganono abe o Dautu ai demoino de ko womafetongua una ma hirete. Angamoi una ma dihiraino de wohonenge de iwilungunu, de to una ai lungunu nagahi ngoneoka ka hiadono ma oraha naa! Ho genangino de hohioriki abe ai demo gea ma dumutu ko unangikaua masara womatengoikali ihidumutu. 30De o Dautu una wodadi Ma Jou ai uru ma dodofanga womatengo, de una wohioriki abe naga Ma Jou ai behehongo moi unangika. Abe ma dihiraino de Ma Jou womahibehehongo de o koboto o Dautika wato,
‘Ahao to ngona ani totoforaukuino naga womatengo abe ahao wokoano abe imaketero hoka ngonali nokoano ani nyawaika.’
31Ho gea o Dautu ai hiningaka de wamake gea abe ko idadiuahi ho wonahingahu ngoneino abe ma titi ahao o Kristusu ai momomiki ai honengino. Angamoi ai demoino de hamake abe o Dautu wonahingahu ma titi o Kristusu Ma Jou ko widogunoaikaua o hone-honenge ma ngioka de abe ai honenge ko ikorofua o lungunoka.”
32“Ho duru itararono abe o Dautu ai demo gea ihidumutu o Yesusika, ai tofora abe Ma Jou wihimomikoka ai honengino. De abe ma titi o Yesusu ai momomiki, ngomi naa mata-mata midadi o hakihii ma nyawa angamoi ngomi ma hirete wiwimake ai ngangoli abe ma oraha womomikino. 33De ma oraha naa Una naga daku o Horogaka wokoano de de Ma Jou abe to Una ai nirakoka wogogere. De imaketero abe hoka o Baba wohibehehongoka, Una wihidoaka Ma Jou o Womaha o Yesusika la Unangoli ka idadi womigopoa ngomiuku ai Womaha gea. De duru ena gea abe ngini niamake ngomioka o ngorumino naa, ho ngini niihenoka de niamakeoka Ma Jou o Womaha ai karajaanga to ngomi naa mia badangino hiadono nia demo homoi-homoi ka idadi niboriihene!”
34“De naa o Dautu ai demo moioli tohipuda abe ko womafetongua masara ai demo ma dumutu tanu o Yesusu Kristusika. Angamoi nako o Dautu una ma hirete ko wogorakua daku o Horogaiye abe imaketero hoka o Yesusoli wogoraka. Masara abeika o Dautu ai demo abe wotemo wato,
‘Ma Jou wotemo ahi Baluhu idodutuika wato, “Naino nogogere ahi nirakoka la Ngone hohikoano mata-mataika
35 ka hiadono ani musu gea duru yahitipokouku ani himangoka de abe duru manga hingounu naga Ngonaika.”’ #2:35 Higiriiri 110:1
Hokogea o Dautu wohitulihuku ma dodihiraino.
36De o Dautu ai demoino gea de duru itararono abe ma dumutu duru o Yesusika dika. Ho tanu ngone o Isiraele ma nyawa mata-mata ka idadi hohioriki de itararono abe o Yesusu, Una gea abe Ma Jou wihidadi to ngone nanga Baluhu idodutu de nanga Mesiaoo abe ma dihirainohi de wonahibehehongoka! Masara nanga Mesia gea abe naa ma duru de ngini niwihohonenge o gota isosalioaka!”
37De o Peturusu ai demo ona mata-mata yoihene de duru manga hininga ikokihuhaka, ho yotemo unangika de ai dodiawo o hidingoto ma nyawa utuikaoo ato, “Ho ngomi naa koaho o kia midiai?”
38De o Peturusu wopaluhu wato, “Ngini homoi-homoi kiani nitoba ho nia howono nioporete de nimangali Ma Jouika. De kiani nimaohiki mangale ma titi nia ngongaku o Yesusu Kristusu ai romangika. De nako ahi demo nianiiki gea ahao Ma Jou waofi ti ngini nia howo-howono de niamake ai hidoaka nginika abe Ma Jou o Womaha winihidoaka. 39Angamoi ma dihirainohi de nanga Baluhu Ma Jou o Baba wohibehehongoka wato abe onagona dika Una wahokino la ona ahao yodadi to Una ai ngofa-ngofaka, ona mata-mata ahao yamake Ma Jou o Womaha Unangino. Ho ngaro ngini naangoka de ngaro nia ngofa-ngofaka, eko ngaro o nyawa abe duru kohagurutika manga gogere, masara ngone mata-mata ka idadi hamake Ma Jou o Womaha Unangino.” 40De o Peturusu nagahi ai demo ma ngoe abe wahikodoku onangika ho ai dekana wotemo-temo onangika, de duru wahigaro-garo onangika. Abe una wahigaro wato, “Ngini naa kiani nimahigunoa la Ma Jou winiduhunu nia hohowonino. Angamoi ngini niwoe-woe abe ma oraha naa niwango duru nirehenoka Ma Jouoka de aino ma gurutika!”
O ngongaku ma nyawa yomakao duru irahai
41De ma nyawa genangoka abe yodafongo to Peturusu ai demo ma titi o Yesusu, ona gea ahao yomaohiki ho yomahidogo manga doomuika. De o wange gea naga ngade-ngade yasana hange abe iwingaku de yomahidogo manga doomuika. 42De ona gea mata-mata ka ihikaika yaniiki o hidingoto ma nyawa gea manga dodotoko de manga doomu. De abe ma oraha yomatoomuino la yomahohininga ma titi o Yesusu ai badanga womahidoaka ho yomakutuono yolomo, ona mata-mata ka ihikaika naga yaniiki. De nagali abe ona mata-mata yomatoo-toomuino la yomakutuono yomaniata.
43De ma oraha gea o hidingoto ma nyawa yodiai o heheranga de Ma Jou ai kuaha ma dodunguu duru ma ngoe ho hiadono o nyawa mata-mataika duru yokokiheranga manga hiningaka. 44De abe ona iwingaku-ngakuoka, ona ka ihikaika yomatoo-toomuino de yomahikokodoku manga kiahonanga de manga inomo abe manga gogianongoru mata-mataika. 45De manga kiahonanga yofukunu la ma tiwi abe yamake genangino ahao yahikodoku onangika abe naga de manga kurangoka. 46De o wange-wangeiye yomatoomuino Ma Jou ai Tau ma loaka la yomakutuono iwihigiriiri Ma Jouiye. De abe manga tau-tauoka ona ka ihikaika yomahohininga ma titi o Yesusu womahidoaka ai badanga. De nagali yomakutuono yolomo abe de manga hininga ma garago de manga hininga ma rorahaiino. 47De ona ka ihikaika iwihigiriiri Ma Jouiye, de o nyawa utu mata-mata duru yasanangi onangika. De o wange-wangeiye naga utuohi yowoe abe nanga Baluhu idodutu wahidogo manga doomuika ho waduhunu manga howo-howonino.
Արդեն Ընտրված.
Hidingoto 2: MJDD
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Gereja Firman Allah, Yayasan Misi Masyarakat di Pedalaman