Hidingoto 3
3
Ma Jou ai Gareja ma nyawa yodogo-dogo yowoe o Yerusaleemoka
3:1—6:7
Womatengo wolugu-lugu abe o Peturusu wihitogumu
1De o wange moiuku de o Peturusu de o Yohanese ona yahinooto yoiki Ma Jou ai Tauika la ato yaniiki o niniata ma doomu abe o wange-wangeiye o bimaowaka de o nyawa yomatoomuino genangoka la yomaniata. 2De abe ma oraha yomahitigi Ma Jou ai Tauika de naga womatengo wolugu-lugu wogogere Ma Jou ai Tau ma ngoranoka abe ihiromanga ato ma ngorana ma hohailoa. Angamoi o wange-wangeiye ai dodiawo iwiao de iwikelenga ma ngoranoka gea la ka idadi o tiwi womagaho-gahoko o nyawaino ma oraha yowohama Ma Jou ai Tauika. De wolugu-lugu gea ai lou womahidoboainohi, ho duru ma dekanoka woluguku. 3Ho una wamake o Peturusu de o Yohanese ma oraha yoboaino la ato yowohamika, de womagahoko o tiwi onangino.
4De o Peturusu de o Yohanese iwidamaana wolugu-luguika gea de ahao o Peturusu witemo wato, “Nomalega ngomino naa!” 5De wolugu-lugu una duru womalega onangika angamoi ai hiningaka wonganono wato o tiwi ahao iwihidoaka unangika. 6Masara o Peturusu wato, “Ngohioka o tiwi ko iwa la tonihidoaka, masara abe naga ngohioka gea ka idadi tonihikodoku ngonaika. Ho naa de o Yesusu Kristusu o Nasaretoka ai romanga tonihuloko la nomaokoino de nomadagi!”
7De gea wotemo ipaha de o Peturusu wiso ai nirakika de witauru la widuhunu womaokoiye. De duru ma oraha gea dika de wolugu-lugu ai lou de ai pupuungu itogumoka de idadi iputurungu. 8De una wotogumoka ho ka dau de womahiburahiye womaoko de womadagi! De ipaha de ma oraha una womadagi-dagi de womapaa-paata de duru wihigiriiri Ma Jouiye. Ho una de o Peturusu de o Yohanese ona yomakiniiki yowohama Ma Jou ai Tau ma loa ma goronaika.
9De o nyawa mata-mata genangoka iwilega-lega ma oraha womadagi de yoihene ai higiriiri ma demo Ma Jouika. 10De gea ahao duru yatodokana angamoi iwihioriki abe una gea ma dihirainohi woluguku de womagaho-gahoko o tiwi doka ma ngorana ma hohailoaka, angamoi ona ma ngoe iwimake wogogere genangoka! Ho ona mata-mata duru yokokiheranga ma titi una gea. 11De ahao o nyawa mata-mata genangoka yoihene ma abari gea ho yomataiti yoiki Ma Jou ai Tau ma honongaika abe ihiromanga ato o Saloomo ai punga. De gea yomataiti yoboaino angamoi una naga genangoka de duru womahidutuku o Peturusu de o Yohanesika ma titi ai hininga ma garago duru ilamoko. Ho ka de yomahiadono de iwimake, de ona mata-mata manga hiningaka de duru yoherangaholi.
O Peturusu wahitararono ona yowoe-woeika abe wolugu-lugu wotogumoka ma titi o Yesusu ai kuahaino dika
12De o Peturusu wamake abe o nyawa yowoe-woe yahigilolitino genangoka ho wotemo ona mata-mataika wato, “Ahi gogianongoru o Isiraele ma nyawa, adodoa ho ngini niheranga ma titi abe idadioka naa unangika? De adodoa ho ka nimidamaana ngomino de nimatemo nia hiningaka niato bote to ngomi dika mia kuahaino eko mia totiaiino hiadono wolugu-lugu naa wotogumoka la ka idadi womadagi? 13Angamoi tanu ko ngominoua mia kuaha, masara to ngone nanga totofora manga Jou abe o Abarahaama de o Isaka de o Yakubu ona yomahuba-huba Unangika, nanga Jou gea to Una ai kuahaino. Abe Ma Jou Una duru wigoraka de wohilamoko ai Huhuloko o Yesusu ai romanga la wihitogumu wolugu-lugu naa ma titi o Yesusino. De o Yesusu Una gea abe ngini niwihidoaka o hohowonika de duru niwioluku o Pilatusu ai himangoka. Abe nako o Pilatusu ai hininga Unangika, una womaputuhoka wato wihihupu dika ma hohailoaika, masara ngini ko niwihigunoaua. 14De gea ngini niwioluku Unangika abe duru wotebi-tebini de duru wototiai. De niwiribuutu o Pilatusu la wihihupu nginika womatengoli abe o nyawa watomaka. 15Ho ngini niwihohonenge Una abe o wowango iboa Unangoka de aino, masara Ma Jou wihimomikoli la wowangokali. De ngomi naa duru miagoungu minihingahu angamoi ngomi ma hirete wiwimake abe womomikoka ai honengino!”
16“De naa ngomi minihingahuoo abe nanga gianongoru naa abe kangano ka woluguohi masara naa wotogumoka, gea o Yesusu ai romanga ma kuaha abe iwihiputurungu unangika. De gea mata-mata idadi duru ti ngini nia hima-himangoka, ho nginioo tanu nihioriki abe wotogumoka ma titi ai ngongaku o Yesusika.”
17“De naa, ahi gogianongoru, ngohi duru tohioriki abe ngini nia datoro gea nidiai o Yesusika de tanu ko niwihiorikuahi abe Una gea onaguna. De ngaro nia hihira onangoo ma ko iwihiorikua abe o Yesusu Una Ma Jou ai Behehongo abe ma dodihirainohi de Una wonahibehehongoka. 18De gea tanu Ma Jou wapake ti ngini nia datorino la ai demo mata-mata wohingodumoka. Abe ma dihiraino de wonahingahuoka ai uru ma dodofangino abe wato gea ma kokangela ahao kiani idadi Ma Jou ai Behehongika, abe ma titi ai Mesiaika. De gea Ma Jou ai demo mata-mata wohingodumoka ma titi ti ngini nia datorino.”
19“Ho naa ngini kiani nitoba nia howo-howonino de nimangali Ma Jouika, la Una ahao wohiofi nia howono nginioka de aino. 20De gea nitoba ipahaino de ahao Ma Jou ka idadi ai hininga ma miriidi wohidingoto nginika la niamake ma hohailoa Unangino. De ahao nako ma oraha adonoka de Ma Jou wihidingotoli o Yesusu Kristusu nginika abe hoka ma dihiraino de wonahibehehongoka la wato woboa de wonahikoano. 21Abe Una kiani womagoo-gogerohi o Horogaka ka hiadono ma oraha adonoka la mata-mata Ma Jou wohihungioli, abe gea imakiniiki de ai hingahu ma demo abe ma deka-dekanuku wonahingahuoka ai uru ma dodofangino. 22Abe ma dodihiraino de o Musa wonahingahu wato,
‘Nia Baluhu Ma Jou Una ahao wigoraka womatengoli ai uru ma dodofanga ti ngini nia hidogoronaino. De una gea ai hiningaka de womaketero abe hoka ngohioli. Ho abe ma oraha Una woboaka nginika de kiani ngini nihidodiai niatotoihene abe ai demo mata-mata nginika.’” #3:22 Higalioli 18:15
23“De ahao o Musa naga moioli wotemo wato,
‘Onagona dika ko iwihigihenua Ma Jou ai uru ma dodofangika gea ahao Ma Jou wahikatingaka ai nyawaino la ahao yamake o bobinaaha kohadubuho.’” #3:23 Higalioli 18:19
24De o Peturusu wogila-gila wotemo wato, “Ma dodihirainohi abe ngaro ma oraha nanga tofora o Samuele nagahi de wonahingahuohi abe hokokia ahao idadi o Yesusika ma oraha naa. De hongoli Ma Jou ai uru ma dodofanga homoi-homoi inaborihingahuoka manga demoino abe ma titi o kia idadi ma oraha naa ngone naga. 25De abe Ma Jou ai behehongo ma owa to ngone nanga totoforaika, ma behehongo gea inidaene nginika, ho nginioo ka idadi niamake ma owa Unangino. Abe ma dihiraino Ma Jou wihibehehongo o Abarahaamika wato,
‘De to ngona ani totoforaukuino o nyawa mata-mataika o dunia ma amokika, yakokimake ma owa ngaro o kiaka dika yogogere.’ #3:25 Dodadi 22:18
Hokogea itemo Ma Jou ai behehongo ma owa nia totoforaika, ho nginioo niamake ai owa gea ma titi nia totoforaino. 26De gea duru igoungu angamoi ma oraha Ma Jou wigoraka ai Huhuloko o Yesusu, gea wihidingoto ihira ngini o Isiraele ma nyawaika. De abe ma owa ngini niamake, gea winihiowa abe winihigilio la ufa nigila-gila nianiiki nia howo-howonika masara la nimangali Ma Jouika.” Hokogea o Peturusu wahitararono Ma Jou ai Demo-demo ona yowoe-woeika.
Արդեն Ընտրված.
Hidingoto 3: MJDD
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Gereja Firman Allah, Yayasan Misi Masyarakat di Pedalaman