Ինչպե՞ս արժանանալ Աստծու խոստումների իրագործմանըՕրինակ

Թագավորների Թագավորը քեզ հետ է

«Ահա կույսը կհղիանա և որդի կծնի, և նրան կկոչեն Էմմանուել» (Ես. 7.14), որ նշանակում է «Աստված մեզ հետ» (‭‭Մատթեոս‬ ‭1.23):

Սիրելի՛ բարեկամ, արքաների Արքան և տերերի Տերը Իր Խոսքի ուժով ոչնչից արարեց այս տիեզերքը։ Երկնքի Արարիչը դրեց նաև ֆիզիկական աշխարհի հիմքերը։

Հազարամյակներ անց Աստված նաև կամեցավ մարդանալ՝ Երկիր գալ մարդկային արարածի տեսքով, որպեսզի փրկի մեզ ու բոլոր Իրեն հավատացողներին դարձնի Իր զավակները։

«Սակայն նրանց, ովքեր ընդունեցին Նրան և հավատացին Նրա անվանը, իշխանություն տվեց Աստծու որդիները լինելու» (‭‭Հովհաննես‬ ‭1.12‬):

Աստծո նախանձավոր սերը քո հանդեպ չունի սահմաններ։ Քեզ հետ անձնական հարաբերություն ունենալու և քեզ հետ ավելի մտերմանալու Նրա փափագը նույնպես չունի որևէ սահման։

Աստծո համար թանկ ու սիրելի՛ զավակ, Տերը ցանկանում է քաջալերել քեզ և քեզ զորացնել ու իմաստություն տալ, որպեսզի քո կյանքի համար Նրա ունեցած տեսիլքը իրականություն դարձնես։

• Նա սիրում է քեզ (Ա Հովհաննես‬ ‭4.9‬)։
• Նա պայքարում է քեզ համար (‭‭Սաղմոս ‭35.1)։
• Նա առանձնացրել է քեզ՝ Իրեն մոտեցնելու համար (Թվոց ‭16.9)։
• Նրա աջը հաստատուն ու կայուն է քեզ պահում (‭‭Սաղմոս‬ ‭63.8)։

Եթե դու ընդունել ես Նրան և հավատում ես Նրա անվանը, ապա կարող ես համոզված լինել, որ այս նեղ ճանապարհին դու մենակ չես։ Էմմանուելը քեզ հետ է։

Ե՛կ աղոթենք միասին այս աղոթքով. «Էմմանուել՝ իմ Տե՛ր և իմ Աստվա՛ծ, շնորհակալ եմ, որ ինձ հետ ես ամեն ժամանակ և ցանկացած իրավիճակում։ Շնորհակալ եմ, իմ Տե՛ր, որ քաջալերում և ուղեկցում ես ինձ իմ այս ժամանակավոր կյանքի ճանապարհներին։ Շնորհակալ եմ, որ գործում ես իմ մեջ և իմ միջոցով՝ նպատակ ունենալով իրականացած տեսնել իմ կյանքի համար Քո տեսիլքն ու նպատակները։ Շնորհակալ եմ, որ ես մենակ չեմ․․․, որ Դու ինձ չես լքում։ Աղոթում եմ Քո սուրբ ու պատվական անունով։ Ամե՛ն»։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։

Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։