Քո անհուսության բժշկությունըՕրինակ

Աստված անտարբեր չէ քո վշտի հանդեպ

Մենք շարունակում ենք ուղերձների նոր շարքը, որը կրում է «Քո անհուսության բժշկությունը» անվանումը։ Մի տարածված մոլորություն կա, որն ուզում եմ այսօր բացահայտել Աստծու Խոսքի սփռած լույսի շնորհիվ։ Հատկապես տառապանքով ու ցավով անցնող մարդիկ կարծում են, թե Աստված մոռացել է իրենց և անտարբեր է իրենց վշտի ու խնդիրների հանդեպ։

Սիրելի՛ բարեկամ, սակայն Աստվածաշունչը բացարձակապես այլ կերպ է ներկայացնում Արարիչ Աստծուն։ Աստված գթասիրտ է ու ողորմած, համբերատար ու քաղցրությամբ լեցուն։ Աստված ո՛չ միայն անտարբեր չէ մարդկանց տառապանքի ու ցավի հանդեպ, այլև փնտրում է հուսահատ ու փշրված մարդկանց, որպեսզի նրանց լցնի հույսով, խաղաղությամբ և ուրախությամբ։ Տերը առանձնահատուկ վերաբերմունք ունի տառապանքով ու դժվարություններով անցնող մարդկանց հանդեպ։

«Տերը մոտիկ է սիրտը կոտրվածներին և փրկում է վշտաբեկ հոգիներին» (Սաղմոս 34․18):

«Բայց դու, ո՜վ Տեր, գթած և ողորմած Աստված ես, երկայնամիտ ես և քաղցրությամբ ու ճշմարտությամբ հարուստ» (Սաղմոս 86․15):

Ո՞ւմ ես դու հավատում, երբ անցնում ես ցավի ու տառապանքի ընթացքով։ Քո ներսի զգացողությա՞նն ու անընդհատ գրոհող մտքերի՞ն, որոնք ասում են, թե Աստված քեզ լքել է ու մոռացել կամ անտարբեր է քո տառապանքի հանդեպ, այլապես դու չէիր անցնի այդ ամենով։ Թե՞ հավատում ես Աստվածաշնչին և Աստծու Խոսքի փոխանցած ճշմարտություններին, որ Աստված մոտ է սրտով կոտրվածներին և ողորմած է, գթած ու քաղցրությամբ լի։

Աստծու համար թանկ ու սիրելի՛ զավակ, եթե դու անցնում ես ցավի ու տառապանքի ընթացքով, երբե՛ք չկարծես, թե Աստված մոռացել է քեզ կամ անտարբեր է քո ցավի հանդեպ։ Տեր Հիսուսը Սուրբ Հոգուն Մխիթարիչ անվանեց հե՛նց այն պատճառով, որ Նա մխիթարելու էր դժվարության ու տառապանքների միջով անցնող մարդկանց։

«Եվ արդ, այսպես է ասում Բարձրը, Բարձրյալը, հավիտենության մեջ բնակվողը, որի անունը Սուրբ է. «Ես բնակվում եմ բարձունքում և սուրբ տեղում, բայց բեկված և խոնարհ հոգի ունեցող մարդու հետ եմ լինում, որպեսզի վերակենդանացնեմ խոնարհների հոգին, վերակենդանացնեմ բեկվածների սիրտը» (Եսայիա 57․15):

Ես որոշում եմ կայացրել հավատալ Աստծու Խոսքին և չվստահել իմ մտքերին ու զգացողություններին։ Իսկ դո՞ւ․․․

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։

Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։