Luk 11
11
Yesu ŵajiganyisye kupopela
(Mat 6:9-13; 7:7-11)
1Lisiku line Yesu* ŵaliji mkupopela pa malo gane. Piŵamasile, jwakulijiganya jwakwe jwine jwamŵendile jwalakwejo kuti, “Ambuje atujiganye uwe kupopela, mpela Yohane* M'batisi muŵajiganyicisye ŵakulijiganya* ŵakwe.”
2Yesu ŵatite, “Pamkupopela mjileje myi:
‘Atati, lina lyawo licimbicikwe,
Ucimwene wawo uyice.
3Atupe uwe lisiku ni lisiku
cakulya cetu ca masiku gosope
4Atukululucile yakulemwa yetu,
Pakuti uwe tukusitwakululucila ŵakutulemwecesya.
Akakunda kuti jwakusakalajo atulinje uwe.’ ”
5Yesu ŵasalile soni ŵakulijiganya ŵakwe kuti, “Tuwanicisye kuti jumo jwa jemanja akwawula ku nyumba ja mjakwe pakati cilo ni kumsalila kuti, ‘Mjangu mumbe yakulya, 6ligongo ku nyumba kuyice mjangu jwali pa ulendo wakupelenganya, mwakuti pa ndaŵi ajino kwangali cakulya cilicose cakuti nimpe jwalakwejo.’ 7Sambano mjenu jwali m'nyumbajo ni akwanga kuti, ‘Mkasimusawusya, mbugele kala litanga soni une ni ŵanace ŵangu tugonile katasi, apano ngaŵa mkwimuka kuti nimpe yakulyayo.’ 8Ngumsalila kuti jwalakwejo tacijimuka ni kumpa yakulya mjakwejo, ngaŵa ligongo lyakuti ali mjakwe nambo ligongo lya mtawu wa jwakuŵendajo. Myoyo tacimpa yosope yakusoŵa.”
9“Myoyo ngumsalila jemanja kuti, mŵende nipo Mlungu tacimpa yimkusaka, msosesoseje nipo timcisimana, poposyani nipo Mlungu tacimwugulila litanga. 10Pakuti jwalijose jwaŵendile ni jwakusapocela, jwakusosasosa ni jwakusasimana, soni jwakupoposya ni jwakusawugulilidwa litanga. 11Ana ŵani mwa jemanja ŵimli acatati, mpaka mumpe mwanace lijoka kutendaga jwalakwejo ali aŵendile somba? 12Kapena ali aŵendile lindanda ana mpaka ampe ciŵalaŵala? 13Naga jemanja ni ungalumbana wenuwo mkusim'manyilila kwapa ŵanace ŵenu yindu yambone, nambi uli Atati ŵenu wa kwinani, ana mpaka calepelekasye cici kupeleka Msimu Ŵaswela kwa ŵele ŵakumŵenda jwalakwejo.”
Yesu ni Msimu wakusakala
(Mat 12:22-30; Mak 3:20-27)
14Lisiku line Yesu ŵaliji mkukoposya msimu wakusakala uwamtendekasyaga kuti akaŵecetaga. Msimuwo piŵakopwece, mundu jula, jwatandite kuŵeceta mwakuti ŵandu ŵajinji ŵiŵaliji pelepo ŵasimonjile. 15Nambo ŵandu ŵane ŵatite, “Macili gakukopocesya misimu jakusakalaji gali gakutyocela kwa Belesebulu,* mcimwene jwa misimu jakusakala.”*#Mat 9:34; 10:25
16Ŵandu ŵane pakusaka kumlinga jwalakwejo macili gakwe, ŵamŵendile kuti ŵalosye cimanyisyo cakumasya lunda cakutyocela kwinani.#Mat 12:38; 16:1; Mak 8:11 17Nambo Yesu ŵasimanyi nganisyo sya jemanjajo ni ŵasalile kuti, “Ŵandu ŵa mu ucimwene uliwose naga akutanda kwimucilana, kumala kwa ucimwenewo kukusaŵa kukoko. Soni ŵandu ŵa m'musi kapena liŵasa lililyose akutanda kukangana, musi kapena liŵasa lyamti myoyo ngaŵa mkulimba kose. 18Naga ŵakumkuya Satana* akutanda kwimucilana acimsyene, ana ucimwene wakwe mpaka ulimbe camtuli? Pakuti mkusatiji kuti, une ngukoposya misimu jakusakala kupitila mu macili ga Belesebulu. 19Naga uneji ngusakoposya misimu jakusakala kupitila mu macili ga Belesebulu, ana ŵakumkuya ŵenu akusajikoposya kupitila mu macili ga ŵani? Myoyo ŵakulijiganya ŵenu pewo ni ŵitacimgomeka kuti jemanja mli ŵakulemwa. 20Nambo naga une ngusakamulisya masengo macili ga Mlungu pakujikoposya misimu jakusakala, ni kuti yikulosya kuti Mlungu atandite kala kuwutamilisya Ucimwene wakwe pasikati pa jemanja.”
21“Naga mundu jwamacili akulondela nyumba jakwe ali akwete yida yakuputila ngondo, katundu jwakwe akusasunjika cenene. 22Nambo naga akwisa mundu jwamacili jwine, ni kumpunda jwelejo, akusamsumula yida yakwe yakuputila ngondo yiŵaliji mkuyikulupilila yila, nipo akusamgaŵanya katundu jwasumwilejo.”
23“Mundu jwangakukamulana ni une ni kuti ali jwakusisyana ni une. Jwele jwakakungamusya kusonganya ni kuti jwelejo ali jwakumwasanya.”#Mak 9:40
Kuwujila kwa msimu wakusakala
(Mat 12:43-45)
24“Msimu wakusakala naga ukopwece mwa mundu ukusajaga kukwendajenda kumalo kukuli kwangali mesi, kukusosasosa malo gakupumulila. Naga msimuwo ulepele kugasimana malogo ukasatiji kuti, ‘Timbujile soni ku nyumba jangu kunaliji kula.’ 25Myoyo naga uli uwusile, ukusasimana m'nyumba mula muli mwekolosye cenene. 26Pelepo ukusajaga kujijigala misimu jine msano ni jiŵili jakusakala kuwupunda winewo, josopejo jikusajinjila ni kutamilicika m'momo. Myoyo ndamo syakuyicisya sya mundu jula sikusaŵaga syakusakala kupunda ndamo syakwe sya pandanda sila.”
Ya upile usyesyene
27Yesu piŵamasile kuŵeceta yeleyi, jwamkongwe jwine juŵaliji mwikuga pemo ŵaŵecete mwakwesya maloŵe kumsalila Yesu acitiji kuti, “Ŵana upile ŵakongwe ŵiŵaŵelece ni kwajonjesya ŵalakwe.”
28Nambo Yesu ŵajanjile kuti, “Ŵana upile usyesyene ali ŵandu ŵakugapikana maloŵe ga Mlungu ni kugakamulisya masengo.”
Ŵandu ŵasakaga cimanyisyo cakumasya lunda
(Mat 12:38-42)
29Ŵandu piŵatandite kutupa, Yesu ŵasalile jemanjajo kuti, “Ŵandu ŵa mpago awuno ali ŵangalumbana, akusaka kulola cimanyisyo cakumasya lunda cakutyocela kwa Mlungu. Pangali jutaciciwona cimanyisyo cakumasya lundaco, akaŵe cilacila ca jwakulocesya* Yona.#Mat 16:4; Mak 8:12 30Pakuti mpela Yona jula ŵaliji cimanyisyo kwa ŵandu ŵa ku Ninefe, myoyo soni Mwanace jwa Mundu* taciŵa cimanyisyo kwa ŵandu ŵa mpago awuno.#Yon 3:4 31Pa lisiku lyakulamula, mwenye jwamkongwe jwa ku cilambo ca Sheba tacijima pampepe ni ŵandu ŵa mpago awuno ni taciŵaga mkwasisya, ligongo ŵajesile kutyocela kumbesi kwa cilambo kuja kupikanila yakuŵeceta ya lunda ya Mwenye Solomoni. Mlole sambano, apanotu pana jwakumpunda Solomoni.#1 Ayi 10:1-10; 2 Mbi 9:1-12 32Pa lisiku lyakulamula, ŵandu ŵa ku cilambo ca Ninefe tacijima ni kumsisya jemanja ligongo lyakuti jemanjajo ŵapitikwice mitima ni kuleka ulemwa* wawo pa ndaŵi jiŵapikene kulalicila kwa Yona, ni mlole jwakumpunda Yona ali apano.”#Yon 3:5
Ya nyali ja cilu
(Mat 5:15; 6:22-23)
33Pangali mundu jwakusapamba nyali ni kujiŵika pakusisika kapena kujiwunicila ni ciŵiga. M'malo mwakwe akusajiŵika pa malo gakuwonecela kuti ŵandu ŵakwinjila m'nyumbamo aliwone lilanguka lyakwe.#Mat 5:15; Mak 4:21; Luk 8:16 34Meso genu gali mpela nyali jakumulicila cilu cenu. Naga meso genu gali cenene, cilu cenu mosope cikusaŵa mwilanguka. Nambo naga meso genu nganigaŵa cenene, cilu cenu cosope cikusaŵa mu cipi. 35Sambano mganicisye mwakalamuka kuti lilanguka lyalili mcilu mwenu likasanduka kuŵa cipi. 36Naga cilu cenu cosope cili mwilanguka, pangali mbali jenu jine jitijiŵe mcipi, pakuti lilangukalyo tilimlangucisye mosope mpela nyali mujikusamlangucila m'mwejo ni lilanguka lyakwe.
Yesu akwajamuka Afalisi ni Aciŵalimu ŵa Malamusi
(Mat 23:1-36; Mak 12:38-40)
37Yesu piŵamasile kuŵeceta jumo jwa Afalisi* ŵamŵilasile jwalakwejo kuti akalye najo, myoyo Yesujo jwapite nipo ŵajinjile m'nyumba ni kutama pasi kuti alye. 38Mfalisi* jwine ŵasimonjile piŵam'weni Yesu ali mkulya jwanganaŵa myala pakukuya msyungu wa Ayuda wakunaŵa myala. 39Ambuje ŵajanjile kuti, “Jemanja Afalisi mkusacapaga kusa kwa mgawo ni mbale, nambo m'mitima mwa jemanja mugumbele ni nganisyo syakusakala. 40Jemanja mli ŵandu ŵakuloŵela! Ana juŵapanganyisye kusa nganapanganya soni ni mkati mwakwe? 41Pimkupeleka mituka jenu mwa kusosa kwenu kwa ŵandu ŵakulaga mpeleceje yayili mkatimo, nipo yida yenu yakulila tiyiciŵa yeswela.”
42“Mkwete likungu jemanja Afalisi! Mkusapeleka calikumi* kwa Mlungu ca tumbeju twakununjila, ni tumbeju twakunonyesya yakulya, soni mbeju sya ku matimbe sya mtundu uliwose. Nambo jemanja mkusimnyosya cilungamo ni cinonyelo ca Mlungu. Mkaŵajilene kutenda yeleyi, nambo soni ngaleka yineyi.”#Lef 27:30
43“Ŵana likungu jemanja Afalisi, ligongo mkusanonyela kutamila pa yitengu ya ucimbicimbi ku nyumba sya mapopelo* soni akusanonyela kuti ŵakomasyeje mwakumcimbicisya m'misika. 44Mkwete likungu jemanja, ligongo mkulandana ni malembe gangali yimanyisyo, ŵandu ŵakuliŵata pelepo ngakusamanyilila kuti akuliŵata pa malembe.”
45Jumo jwa aciŵalimu ŵa Malamusi* ŵamwusisye Yesu kuti, “Cemwalimu, ŵalakwe pakuŵeceta yeleyi, ana akutujamuka ni uwe ŵakwe?”
46Yesu ŵamjanjile jwalakwejo kuti, “Ŵana likungu jemanja aciŵalimu ŵa Malamusi, ligongo mkwatwika ŵandu misigo ja usito, jimkujilepela mwacisyene atamose kumkwaya ni cala cenu. 47Ŵana likungu jemanja, ŵimkuŵaka malembe ga ŵakulocesya ŵiŵawulajidwe ni acinangolo ŵenu ŵakala. 48Sambano jemanja mkwiticisya kuti yitendo ya acinangolo ŵenu ŵakalawo yaliji yambone, pakuti jemanjajo ŵawuleje ŵakulocesyawo, nipo jemanja ni mkuŵaka malembe gawo. 49Kwa lyele ligongoli, Mlungu kupitila mu lunda lwakwe ŵatite, ‘Tinjatumicisya jemanjajo ŵakulocesya ni ŵandumetume, nambo ŵane taciwulajidwa ni ŵandu soni ŵane mwa jemanjajo tacilagasidwa.’ 50Myoyo ŵandu ŵa mpago awuno tacipocela cilango ligongo lya ŵakulocesya wosope ŵiŵawulajidwe kutyocela ndaŵi jicapanganyidwe cilambo capasi. 51Kutandilila pa kuwulajidwa kwa Abele mpaka kuwulajidwa kwa Sakaliya ŵele ŵaŵawulajidwe m'nyumba ja Mlungu sikati ja malo gakupelecela mbopesi ni malo gamaswela mnope. Ngumsalila kuti ŵandu ŵa mpago awuno tacilagasidwa ligongo lya ŵakuwulajidwawo.”#Gen 4:8; 2 Mbi 24:20-21
52“Mkwete likungu jemanja aciŵalimu ŵa Malamusi, ligongo mwasumwile kiyi jwakuwugulila m'nyumba ja umanyilisi. Jemanja mwacimsyene ngasimjinjilamo, nipo mkusimwasiŵilicisya ŵele ŵakulinjilila kuti ajinjilemo.”
53Yesu piŵatyosile gele malogo, aciŵalimu ŵa Malamusi ni Afalisi ŵala ŵatandite kumsonda ni kumpanika ni yiwusyo yejinji yakusawusya. 54Cakulinga ca jemanjajo caliji cakuti ampale Yesu mkamwa.
Pilihan Saat Ini:
Luk 11: YAWO
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Chiyawo Bible: Buku Jeswela © Bible Society of Malawi, 2014
Luk 11
11
Yesu ŵajiganyisye kupopela
(Mat 6:9-13; 7:7-11)
1Lisiku line Yesu* ŵaliji mkupopela pa malo gane. Piŵamasile, jwakulijiganya jwakwe jwine jwamŵendile jwalakwejo kuti, “Ambuje atujiganye uwe kupopela, mpela Yohane* M'batisi muŵajiganyicisye ŵakulijiganya* ŵakwe.”
2Yesu ŵatite, “Pamkupopela mjileje myi:
‘Atati, lina lyawo licimbicikwe,
Ucimwene wawo uyice.
3Atupe uwe lisiku ni lisiku
cakulya cetu ca masiku gosope
4Atukululucile yakulemwa yetu,
Pakuti uwe tukusitwakululucila ŵakutulemwecesya.
Akakunda kuti jwakusakalajo atulinje uwe.’ ”
5Yesu ŵasalile soni ŵakulijiganya ŵakwe kuti, “Tuwanicisye kuti jumo jwa jemanja akwawula ku nyumba ja mjakwe pakati cilo ni kumsalila kuti, ‘Mjangu mumbe yakulya, 6ligongo ku nyumba kuyice mjangu jwali pa ulendo wakupelenganya, mwakuti pa ndaŵi ajino kwangali cakulya cilicose cakuti nimpe jwalakwejo.’ 7Sambano mjenu jwali m'nyumbajo ni akwanga kuti, ‘Mkasimusawusya, mbugele kala litanga soni une ni ŵanace ŵangu tugonile katasi, apano ngaŵa mkwimuka kuti nimpe yakulyayo.’ 8Ngumsalila kuti jwalakwejo tacijimuka ni kumpa yakulya mjakwejo, ngaŵa ligongo lyakuti ali mjakwe nambo ligongo lya mtawu wa jwakuŵendajo. Myoyo tacimpa yosope yakusoŵa.”
9“Myoyo ngumsalila jemanja kuti, mŵende nipo Mlungu tacimpa yimkusaka, msosesoseje nipo timcisimana, poposyani nipo Mlungu tacimwugulila litanga. 10Pakuti jwalijose jwaŵendile ni jwakusapocela, jwakusosasosa ni jwakusasimana, soni jwakupoposya ni jwakusawugulilidwa litanga. 11Ana ŵani mwa jemanja ŵimli acatati, mpaka mumpe mwanace lijoka kutendaga jwalakwejo ali aŵendile somba? 12Kapena ali aŵendile lindanda ana mpaka ampe ciŵalaŵala? 13Naga jemanja ni ungalumbana wenuwo mkusim'manyilila kwapa ŵanace ŵenu yindu yambone, nambi uli Atati ŵenu wa kwinani, ana mpaka calepelekasye cici kupeleka Msimu Ŵaswela kwa ŵele ŵakumŵenda jwalakwejo.”
Yesu ni Msimu wakusakala
(Mat 12:22-30; Mak 3:20-27)
14Lisiku line Yesu ŵaliji mkukoposya msimu wakusakala uwamtendekasyaga kuti akaŵecetaga. Msimuwo piŵakopwece, mundu jula, jwatandite kuŵeceta mwakuti ŵandu ŵajinji ŵiŵaliji pelepo ŵasimonjile. 15Nambo ŵandu ŵane ŵatite, “Macili gakukopocesya misimu jakusakalaji gali gakutyocela kwa Belesebulu,* mcimwene jwa misimu jakusakala.”*#Mat 9:34; 10:25
16Ŵandu ŵane pakusaka kumlinga jwalakwejo macili gakwe, ŵamŵendile kuti ŵalosye cimanyisyo cakumasya lunda cakutyocela kwinani.#Mat 12:38; 16:1; Mak 8:11 17Nambo Yesu ŵasimanyi nganisyo sya jemanjajo ni ŵasalile kuti, “Ŵandu ŵa mu ucimwene uliwose naga akutanda kwimucilana, kumala kwa ucimwenewo kukusaŵa kukoko. Soni ŵandu ŵa m'musi kapena liŵasa lililyose akutanda kukangana, musi kapena liŵasa lyamti myoyo ngaŵa mkulimba kose. 18Naga ŵakumkuya Satana* akutanda kwimucilana acimsyene, ana ucimwene wakwe mpaka ulimbe camtuli? Pakuti mkusatiji kuti, une ngukoposya misimu jakusakala kupitila mu macili ga Belesebulu. 19Naga uneji ngusakoposya misimu jakusakala kupitila mu macili ga Belesebulu, ana ŵakumkuya ŵenu akusajikoposya kupitila mu macili ga ŵani? Myoyo ŵakulijiganya ŵenu pewo ni ŵitacimgomeka kuti jemanja mli ŵakulemwa. 20Nambo naga une ngusakamulisya masengo macili ga Mlungu pakujikoposya misimu jakusakala, ni kuti yikulosya kuti Mlungu atandite kala kuwutamilisya Ucimwene wakwe pasikati pa jemanja.”
21“Naga mundu jwamacili akulondela nyumba jakwe ali akwete yida yakuputila ngondo, katundu jwakwe akusasunjika cenene. 22Nambo naga akwisa mundu jwamacili jwine, ni kumpunda jwelejo, akusamsumula yida yakwe yakuputila ngondo yiŵaliji mkuyikulupilila yila, nipo akusamgaŵanya katundu jwasumwilejo.”
23“Mundu jwangakukamulana ni une ni kuti ali jwakusisyana ni une. Jwele jwakakungamusya kusonganya ni kuti jwelejo ali jwakumwasanya.”#Mak 9:40
Kuwujila kwa msimu wakusakala
(Mat 12:43-45)
24“Msimu wakusakala naga ukopwece mwa mundu ukusajaga kukwendajenda kumalo kukuli kwangali mesi, kukusosasosa malo gakupumulila. Naga msimuwo ulepele kugasimana malogo ukasatiji kuti, ‘Timbujile soni ku nyumba jangu kunaliji kula.’ 25Myoyo naga uli uwusile, ukusasimana m'nyumba mula muli mwekolosye cenene. 26Pelepo ukusajaga kujijigala misimu jine msano ni jiŵili jakusakala kuwupunda winewo, josopejo jikusajinjila ni kutamilicika m'momo. Myoyo ndamo syakuyicisya sya mundu jula sikusaŵaga syakusakala kupunda ndamo syakwe sya pandanda sila.”
Ya upile usyesyene
27Yesu piŵamasile kuŵeceta yeleyi, jwamkongwe jwine juŵaliji mwikuga pemo ŵaŵecete mwakwesya maloŵe kumsalila Yesu acitiji kuti, “Ŵana upile ŵakongwe ŵiŵaŵelece ni kwajonjesya ŵalakwe.”
28Nambo Yesu ŵajanjile kuti, “Ŵana upile usyesyene ali ŵandu ŵakugapikana maloŵe ga Mlungu ni kugakamulisya masengo.”
Ŵandu ŵasakaga cimanyisyo cakumasya lunda
(Mat 12:38-42)
29Ŵandu piŵatandite kutupa, Yesu ŵasalile jemanjajo kuti, “Ŵandu ŵa mpago awuno ali ŵangalumbana, akusaka kulola cimanyisyo cakumasya lunda cakutyocela kwa Mlungu. Pangali jutaciciwona cimanyisyo cakumasya lundaco, akaŵe cilacila ca jwakulocesya* Yona.#Mat 16:4; Mak 8:12 30Pakuti mpela Yona jula ŵaliji cimanyisyo kwa ŵandu ŵa ku Ninefe, myoyo soni Mwanace jwa Mundu* taciŵa cimanyisyo kwa ŵandu ŵa mpago awuno.#Yon 3:4 31Pa lisiku lyakulamula, mwenye jwamkongwe jwa ku cilambo ca Sheba tacijima pampepe ni ŵandu ŵa mpago awuno ni taciŵaga mkwasisya, ligongo ŵajesile kutyocela kumbesi kwa cilambo kuja kupikanila yakuŵeceta ya lunda ya Mwenye Solomoni. Mlole sambano, apanotu pana jwakumpunda Solomoni.#1 Ayi 10:1-10; 2 Mbi 9:1-12 32Pa lisiku lyakulamula, ŵandu ŵa ku cilambo ca Ninefe tacijima ni kumsisya jemanja ligongo lyakuti jemanjajo ŵapitikwice mitima ni kuleka ulemwa* wawo pa ndaŵi jiŵapikene kulalicila kwa Yona, ni mlole jwakumpunda Yona ali apano.”#Yon 3:5
Ya nyali ja cilu
(Mat 5:15; 6:22-23)
33Pangali mundu jwakusapamba nyali ni kujiŵika pakusisika kapena kujiwunicila ni ciŵiga. M'malo mwakwe akusajiŵika pa malo gakuwonecela kuti ŵandu ŵakwinjila m'nyumbamo aliwone lilanguka lyakwe.#Mat 5:15; Mak 4:21; Luk 8:16 34Meso genu gali mpela nyali jakumulicila cilu cenu. Naga meso genu gali cenene, cilu cenu mosope cikusaŵa mwilanguka. Nambo naga meso genu nganigaŵa cenene, cilu cenu cosope cikusaŵa mu cipi. 35Sambano mganicisye mwakalamuka kuti lilanguka lyalili mcilu mwenu likasanduka kuŵa cipi. 36Naga cilu cenu cosope cili mwilanguka, pangali mbali jenu jine jitijiŵe mcipi, pakuti lilangukalyo tilimlangucisye mosope mpela nyali mujikusamlangucila m'mwejo ni lilanguka lyakwe.
Yesu akwajamuka Afalisi ni Aciŵalimu ŵa Malamusi
(Mat 23:1-36; Mak 12:38-40)
37Yesu piŵamasile kuŵeceta jumo jwa Afalisi* ŵamŵilasile jwalakwejo kuti akalye najo, myoyo Yesujo jwapite nipo ŵajinjile m'nyumba ni kutama pasi kuti alye. 38Mfalisi* jwine ŵasimonjile piŵam'weni Yesu ali mkulya jwanganaŵa myala pakukuya msyungu wa Ayuda wakunaŵa myala. 39Ambuje ŵajanjile kuti, “Jemanja Afalisi mkusacapaga kusa kwa mgawo ni mbale, nambo m'mitima mwa jemanja mugumbele ni nganisyo syakusakala. 40Jemanja mli ŵandu ŵakuloŵela! Ana juŵapanganyisye kusa nganapanganya soni ni mkati mwakwe? 41Pimkupeleka mituka jenu mwa kusosa kwenu kwa ŵandu ŵakulaga mpeleceje yayili mkatimo, nipo yida yenu yakulila tiyiciŵa yeswela.”
42“Mkwete likungu jemanja Afalisi! Mkusapeleka calikumi* kwa Mlungu ca tumbeju twakununjila, ni tumbeju twakunonyesya yakulya, soni mbeju sya ku matimbe sya mtundu uliwose. Nambo jemanja mkusimnyosya cilungamo ni cinonyelo ca Mlungu. Mkaŵajilene kutenda yeleyi, nambo soni ngaleka yineyi.”#Lef 27:30
43“Ŵana likungu jemanja Afalisi, ligongo mkusanonyela kutamila pa yitengu ya ucimbicimbi ku nyumba sya mapopelo* soni akusanonyela kuti ŵakomasyeje mwakumcimbicisya m'misika. 44Mkwete likungu jemanja, ligongo mkulandana ni malembe gangali yimanyisyo, ŵandu ŵakuliŵata pelepo ngakusamanyilila kuti akuliŵata pa malembe.”
45Jumo jwa aciŵalimu ŵa Malamusi* ŵamwusisye Yesu kuti, “Cemwalimu, ŵalakwe pakuŵeceta yeleyi, ana akutujamuka ni uwe ŵakwe?”
46Yesu ŵamjanjile jwalakwejo kuti, “Ŵana likungu jemanja aciŵalimu ŵa Malamusi, ligongo mkwatwika ŵandu misigo ja usito, jimkujilepela mwacisyene atamose kumkwaya ni cala cenu. 47Ŵana likungu jemanja, ŵimkuŵaka malembe ga ŵakulocesya ŵiŵawulajidwe ni acinangolo ŵenu ŵakala. 48Sambano jemanja mkwiticisya kuti yitendo ya acinangolo ŵenu ŵakalawo yaliji yambone, pakuti jemanjajo ŵawuleje ŵakulocesyawo, nipo jemanja ni mkuŵaka malembe gawo. 49Kwa lyele ligongoli, Mlungu kupitila mu lunda lwakwe ŵatite, ‘Tinjatumicisya jemanjajo ŵakulocesya ni ŵandumetume, nambo ŵane taciwulajidwa ni ŵandu soni ŵane mwa jemanjajo tacilagasidwa.’ 50Myoyo ŵandu ŵa mpago awuno tacipocela cilango ligongo lya ŵakulocesya wosope ŵiŵawulajidwe kutyocela ndaŵi jicapanganyidwe cilambo capasi. 51Kutandilila pa kuwulajidwa kwa Abele mpaka kuwulajidwa kwa Sakaliya ŵele ŵaŵawulajidwe m'nyumba ja Mlungu sikati ja malo gakupelecela mbopesi ni malo gamaswela mnope. Ngumsalila kuti ŵandu ŵa mpago awuno tacilagasidwa ligongo lya ŵakuwulajidwawo.”#Gen 4:8; 2 Mbi 24:20-21
52“Mkwete likungu jemanja aciŵalimu ŵa Malamusi, ligongo mwasumwile kiyi jwakuwugulila m'nyumba ja umanyilisi. Jemanja mwacimsyene ngasimjinjilamo, nipo mkusimwasiŵilicisya ŵele ŵakulinjilila kuti ajinjilemo.”
53Yesu piŵatyosile gele malogo, aciŵalimu ŵa Malamusi ni Afalisi ŵala ŵatandite kumsonda ni kumpanika ni yiwusyo yejinji yakusawusya. 54Cakulinga ca jemanjajo caliji cakuti ampale Yesu mkamwa.
Pilihan Saat Ini:
:
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Chiyawo Bible: Buku Jeswela © Bible Society of Malawi, 2014