Genese 25
25
1KE haba Aberahama ame hok âiân hmetu Ketura ien. 2Ke e ame hnokoâ nokon jia Zimeran, me Jokesana, me Medana, me Midiana, me Isebak, me Sua. 3Ke Jokesana ame hnöku Sheba, me Dedana. Ke walang je laku Dedana, jia Asurim, me Letusim, me Leumim. 4Ke haba je laku Midiana, me Efa, me Efera, me Enoka, me Abida, me Eledaa. Je laku Ketura ödrin hia. 5Ke Aberahama ame ham kö Isaaka anyin ta je ûnyi hia. 6Ke Aberahama ame ham ta je bwihlany ka lakon li momo anyi Aberahama; me kunʼ ödrin ka hnyi hnyei e deiö, me me ûsâkâûö me Isaaka a nokon, ke e tiga möt. 7Ke walang je bongon ta je hunainy möt anyi Aberahama, khaca haded ke sevente faiv ta je huna. 8Ke Aberahama ame khûö homenâ, me mokcu ke ti hingat ut, me se hia hunainy; kʼ adre öûkhacaköuâ me lahanen. 9Ke haba Isaaka me Isamaela ödru me konâm e hnyi op e Makepela, hnyi utkânâ anyi Eferona nöku Zohara at Heth, cicö Mamere; 10waleji utkânâ a ûco Aberahama unyin lakon Heth: adre könim Aberahama eling ûnyi Sara a âiân. 11Ke hwaban dö mok a Aberahama Khong ame ohnahici Isaaka a nokon; ke Isaaka ame laba e Bere-lahai-roi.
12Ke walang ta je dö anyi Isamaela nöku Aberahama, waleji ame hnokoâ nöku Aberahama hnö Hagara momo Aigupito, hlu anyi Sara: 13ke walang ien je laku Isamaela, a je iödrin hoton anyidrin je dö: jia Nebaioth, nöku Isamaela a bân; me Kedara, me Adebeela, me Mibesam, 14me Misema, me Duma, me Masa; 15me Hadara, me Tema, me Jetura, me Nafiso, me Kedema: 16wale je laku Isamaela, ke wale je iödrin hoton anyidrin je ong taun, me anyidrin je hnabâ; ödrin je than a twelv hoton idrin je hnyei. 17Ke walang ta je hunainy möt anyi Isamaela, khaca haded ke thöte seven ta je hunainy; ke e ame khûö homenâ me mokcu, kʼ adre öûkhacaköuâ me lahanen. 18Ke ödrin e laba hwân hnyi Havila ke ne o but hnyi Sura, cicö Aigupito, gethen ka he Suria ai: e ame laba hnyi hnyimakan je liamekeiny më hia thithö. 19Ke walang je dö anyi Isaaka a nöku Aberahama: Aberahama ame hnöku Isa-aka: 20ke fâte ta je hunai Isaaka e ame hum Rebeka nöku Bethuel at Suria, a at Padana-rama, hani Labana at Suria, me me âiân bi. 21Ke Isaaka ame khaweâ âiân kö Iehova, anyin ae toûnyi e: ke Iehova ame löng kâu, me ame erkin dut Rebeka a âiân. 22Ke ame ve hwiö lihûnye eû hnyi hnyekon; ke haingen, ka habe, Ieû ang a oge me helâng? Me e ame he but ka hnei Iehova. 23Me Iehova ame ha kâû, ka habe, Lo li dökhu eû hnyi hnyekom, Ke u me he ka hnokoâ lo li hnyei: Kʼ ame he ke hnyei ka hwege hon ke hnyei; Kʼ ame he atö ka bi athnyabainy wakeiat. 24Ke ame o but ûen he ka hnokoâ, me wâ bi lihûnye eû hnyi hnyekon. 25Ke haba at ame bân ka o ame dra, helâ me ûkhaû ae tot dinen hia thithö; ke ödrin e hwenyi ien, me, Esau. 26Ke hwaban dö e ame o but minya keiny, ke hnyamen ame kât ohmâiny ca Esau; ke adre me hwenyi ien Jekob: ke sikste hunai Isaaka hnyi ioi ʼdru. 27Ke ame hûhûö thö li da: ke ti metâ but Esau he ka hnu meno, e aten hnyot; ke haba Jekob, me, at ae menyik kʼ ame laba hnyi je uma mano. 28Ke Isaaka ame betenge ga Esau, anyin a e ame han utiö gan: ke Rebeka ame betenge ga Jekob. 29Ke Jekob ame öt an: ke Esau ame o but ûheny hnyot, kʼ a sënyin dut: 30me haingö Esau kö Jekob, ka habe, Haök ge tap ûnyi e ae dra; anyin a oge sënyin dut: waleling mʼ adre me hwenyi ien Edoma. 31Me haingö Jekob, ka habe, Awe, ûcothö könya hanymen atö hnyi bong ang. 32Me haingö Esau, ka habe, Wâ bi, oge me he but ang ka mok, ke hnân eû könya hanymen atö î 33Ke haingö Jekob, ka habe, Khemanyin thö könya hnyi bong ang; me e ame khemanyin kâu: me e ame ûco kö Jekob hanymen a atö. 34Ke Jekob ame ham kö Esau areto me je lentil adre ölâ; me e ame han me ic, me tot ka he but: ke waleling Esau ame hûkötiâ hanymen atö.
Pilihan Saat Ini:
Genese 25: IAAI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
maintained by the British and Foreign Bible Society