Genese 26
26
1HE hmiâ thö hnyei, ke ke hmiâ ehac hnyi bong bongu Aberahama. Ke Isaaka ame he Gerara ai kö Abimeleke thaniny at Filisiti. 2Ke Iehova ame manen dut kâu, me ha, ka habe, Ca he Aigupito ai; laba ju hnyi hnyei oge me he ka ha köu: 3u ma laba kanyua hnyi hnyei eling, ke oge me he ka tha e möu, me ohnahici u; anyin oge me he ka ham köu me ta je mâtrânâm ta je hnyei hia eang, me oge me he ka ohwâdâ hnök hna ûhihinyköu kö Aberahama a kâmâm; 4ke oge me he ka osiâ ta je mâtrânâm helâ me ta je okhûiny drany, me ham ta je hnyei hia thithö ang ka ta je mâtrânâm; ke adre me he ka ohnahicâ ta je hnyei hia eang hmelen ûnyi ge ta je mâtrânâm; 5anyin a löng hoton hok hofuc Aberahama, me tuö hnök hna otilâ, me hna hûna, me hna owisa, me anyik ta je hnanyibu. 6Ke Isaaka ame laba hnyi Gerara: 7ke haba aten hnyei adre me hnö e ge âiân; ke haingen, ka habe, Hanik at ang: anyin a e ot ka ha, ka habe, Öiök ang; haingen wâ e nye he aten hnyei ka hlingö nya but ca Rebeka, anyin ae so hmainy at ka wâ. 8Ke e ame laba beû eling, me ame bwele ûnyi hnyi mamalama hnö Abimeleke thaniny at Filisiti me wâ, ke wâ bi, Isaaka ame walak me Rebeka a âiân. 9Me Abimeleke ame haö Isaaka, me ha, ka habe, Wâ bi, e hnathu a âiâm at ang: ke ieû gam a u me ha, ka habe, Hanik at ang? Me Isaaka ame ha kâu, ka habe, Anyin a haingök, Wâ inye mokcu can e. 10Ke Abimeleke ame ha, ka habe, Ieû e u je ânyâ köhmun? A ne tha laba thö ke at me âiâm, me u je bi jönihmun. 11Me Abimeleke ame hûna ka tavat hia, ka habe, Haba at ame he ka kâlâ at eang me âiân, adre me he ka hlingâ e. 12Ke Isaaka ame belök hnyi hnyei e, me meno a khaca haded troban hnyi huna e: ke Iehova ame ohnahicâ e. 13Me ame lung tot at eling, me labö gan tot ke ne o but ame ti gan hmâ hmönyin: 14ke e hu gan ta je hnahat mamoe, me ta je kâu, me je lanyin a ödrin se hia: ke at Filisiti adre me hmönyidra kâu. 15Ke haba at Filisiti adre hia but hlöng me öunöngötâ ge kânâ ta je an hia a koû hnen lanyin kamen, hnyi ûö Aberahama a kamen. 16Ke Abimeleke ame ha kö Isaaka, ka habe, He thö gahmun, anyin a u gan hmâ hmönyin huhmun. 17Me Isaaka ame he but ûheny e, me laba hnyi hnyigöulen bucen Gerara, me laba e. 18Ke Isaaka ame âc hmeto ta je an adre koû hnyi ûö Aberahama a kamen; anyin a hia but hlöng e hnen at Filisiti hwaban mok a Aberahama: ke e ame ve hwenyi ien hoton je ien hnen kamen hna hwenyi ien. 19Ke haba je lanyi Isaaka adre me koû hnyi hnyigöulen bucen, me wâ eling köiö ame pupua. 20Ke haba je hnyat tuö meno e Gerara ödrin e iwatretra me hnyat tuö meno hale Isaaka, me ha, ka habe, Anihmun an eû: me e ame hwenyi ien an e Esek; anyin a ödrin e iwatretra më. 21Ke ödrin e koû hmetu ke an, me ödrin e iwatretra hmetu e: me e ame hwenyi ien e Sitena. 22Ke e ame hna but dok e, me koû ke an; ke ödrin e ca iwatretra e: me e ame hwenyi ien e Rehoboth; anyin a haingen, ka habe, A hia but Iehova bi hnötin walang ang, kʼ ötin e he ka si but hnyi hnyei. 23Ke e ame he thö ûheny e Bere-seba ai. 24Ke Iehova ame manen dut kâu hnyi hnyinghet eling, me ha, ka habe, Inya Khongu Aberahama a kâmâm: ca ot, anyin a tha inya möu, ke oge me he ka ohnahici u, me osehia ta je mâtrânâm can athnyabaik a Aberahama. 25Ke e ame otilâ eling ke taben hut, me hawâ iö Iehova, me otilâ eling umen uma mano: me je lanyi Isaaka ödrin e khû an hnyi dok eling. 26Ke ame he but kâu ûheny Gerara Abimeleke, me Ahuzatha a hanen, me Fikolo taben anyin je deö vat. 27Ke Isaaka ame ha ködrin ka habe, Ieû can öbun e he but könya, anyin öbun e hûkötiö nya, kʼ öbun e hia but obö nya? 28Ke haingödrin, ka habe, Öhmun e wâ wia thö a tha Iehova möu; me haingöhmun, ka habe, ötin e he ka ve khemanyin, a öhmun möu, ke öhmun e he ka ûhihinyköu möu; 29ka habe, U ma ca he ka okongu öhmun, helâji me hnöhmun hna ca kalö u, ke so bi öhmun e hia but ânyâ thibi so köu, me kunö u hnyi ûsoköu: waleling mʼ u hnahic walang ang hnö Iehova. 30Ke e ame ânyâ bijeû hobi ködrin, me ödrin e tha han meic. 31Ke ödrin e vesâkong me ûkhemanyidrinköu: ke Isaaka ame kunʼ ödrin, me ödrin e he but ûhedrin unyin hnyi ûsoköu. 32Ke hnyi bong eling ame o thö lanyi Isaaka, me thumeto e ge an ödrin e koû, me ha kâu, ka habe, Öhmun e wâ ju köiö. 33Me e ame hwenyi ien e Seba: waleling me me ien taun eling Bere-seba ke ne o but hnyi bong ang.
34Ke fâte hunai Esau, me e ame hum Juditha nöku Beeri at Heth, me Basemathi nöku Elona at Heth me li âiân: 35me ame vec hnyeku Isaaka me Rebeka gadru.
Pilihan Saat Ini:
Genese 26: IAAI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
maintained by the British and Foreign Bible Society