Genese 27
27
1KE hingat ut Isaaka me hadedak li emakan, me me ca khana he ka wâ, me e ame hao Esau a nokon a atö, me ha kâu, ka habe, Nökuk lö: me haingen kâu, ka habe, Inya ang. 2Ke haingen, ka habe, Wâ bi, iny hingat ut, ke ca khanö nya bong oge me he ka mokcu hnyin. 3Anyin a wale he thö walang ang ka hom ânyâm ta je ûnyi hnân hlingâ meno, a ânyâm thi fana me cafana, ke he thö ka hnyi hnyot ka uö ök meno; 4ke ânyâ thö hobi könya utiö ae bo so helâ me wek, me hom but könya, me oge me he ka han; me me he hanuk ka hahnahici u inye tiga ca mok. 5Ke Rebeka ame löng hna ha hnö Isaaka kö Esau a nokon. Ke Esau ame he but ka hnyi hnyot ka uö meno, me he ka hom. 6Ke Rebeka ame ha kö Jekob a nokon, ka habe, Wâ bi, oge löng ut hna, ha hnen kâmâm kö Esau a tuhâm, ka habe, 7Ho jem meno könya, ke ânyâ thö hobi könya utiö ae bo so, mʼ inye he ka han me hahnahici u hnyi hnyimakö Iehova, kʼ inye tiga ca mok. 8Anyin a wale nokuk lö, löng ju hoton hok hofuc, helâ me hnök hna he ka hûna köu. 9He thö ka hnyi hnahat meno, me hom but jem lo li lakon got ae so; ke oge me he ka ânyâ e hnân utiö ae bo so hobi kâu kâmâm helâ me hnen hna weny: 10ke u ma he ka hom e ka kâmâm, me me he ka han, me me he but ka hahnahici u e me tiga ca mokcu. 11Ke Jekob ame ha kö Rebeka a hinyen, ka: habe, Wâ bi, at ae kû leûnen Esau, kʼ inya at khabalaû unyik. 12Ame ne he la cica! ka abö nya, me iny at ae thoi kâu; waleling mʼ oge me he ka oâ hnaûhangö könya, ke ba bi bnahicik. 13Ke haingen hinyen kâu, ka habe, e so ame takû nya bi hna hangö u nökuk: ke löng ju hoton hok hofuc, ke he thö ka hom könya. 14Ke e ame he but ka hom, me hom ka hinyen: ke hinyen ame ânyâ utiö ao bo so, helâ me weny kamen. 15Ke Rebeka ame hom je ûkhaû ae so anyi Esau nokon a atö, eiö hnyin uma, me okhaûö Jekob nokon a wakeiat: 16ke e ame lan li hnyamen, me hon nyin ae khabalaû hnen ke hnyiban unen li lakon got: 17ke e ame ham utiö ae bo so, me areto e ame penapena ka hnyi li hnyamö Jekob a nokon. 18Me e ame o ka kamen, me ha, ka habe, Cica lö: me haingen, ka habe, Iny ang nökuk, u ia? 19Me haingö Jekob ka kamen, ka habe, Inya Esau nokom a atö; oge hia but ânyâ helâ me hnâm hna hûna könya: höhöi thö, me laba thö he ka han hanik, mʼ u ma he ka hahnahici nya. 20Ke haingö Isaaka ka nokon, ka habe, Nökuk a hawa u je ie wâ? Me haingen, ka habe, Anyin a hnö Iehova Khongom hna ohwegi nya. 21Me haingö Isaaka kö Jekob, ka habe, Nökuk lö me hok ju jem mʼ inye he ka abö u, ame ne Esau u nökuk, ame ne ia. 22Ke Jekob ame hakekeny dö kö Isaaka a kamen, ke e ame aba ju e, me ha, ka habe, Haba hwan me ho Jekob, ke haba li hnyam, a li hnyamö Esau bi. 23Ke ca manen e kâu, anyin ae kû leûnen li hnyamen, helâ me li hnyamö Esau a tuhan: me e ame hahnahicâ e. 24Ke e ame ha, ka habe, E hnathu u Esau a nökuk? Me haingen, ka habe, E. 25Ke haingen, ka habe, Hö jem könya, mʼ inye he ka han hanem nökuk, mʼ inye he ka hahnahici u. Me e ame hom kâu, me e ame han: ke e ame hom waina, me e ame ic. 26Ke Isaaka a kamen ame ha kâu, ka habe, Nökuk lö, hok ju jem könya, me ûcimhnyimak mönya. 27Me e ame hakekeny, me ûcimhnyimak më: me e ame hnulâ bunen ûkhaûen, me hahnahicâ e, me ha, ka habe,
Wâ bi, haba bunen nökuk,
Me helâ me bunen utkânâ hnö Iehova hna hahnahicâ:
28Ke ame he Khong ka ham köu hau ûnyi hnyi drany,
Me pipikhenyainy hmeledrany,
Me hwit me waina ae gan hmâ:
29E so ame he tavat ka hulwa köu,
Me ta je hnyei he ka nom ju köu: U me he ka thaniny je liamekeiny möu, Ke ame he je lakon hinyâm ka nom ju köu: Ame he ka hangâ but at ame hangö u, Kʼ ame he ka hnahic ut at ame hahna hici u.
30Ke a hia but Isaaka hahnahici Jekob, ke Jekob ame hap didrut ûnyi Isaaka a kamen, me waleling ame ie o but Esau a tuhan ûheny hnyi hna uö meno. 31Ke a hia but ânyâ utiö ae bo so minya, me hom e ka kamen; me e ame ha ka kamen, ka habe, Cica lö, höhöi thö, me han hanik, me u ma he ka hahnahici nya. 32Ke haingö Isaaka a kamen, ka habe, U ia? Me e ame ha, ka habe, Inya Esau nokom a bân. 33Ke Isaaka ame öbubuny gan hmâ but, me ha, ka habe, Ie at wale a hia but uö meno me oâ könya, ke oge hia but han ke tiga hiö u, me oge hia but hahnahicâ e? eke, kʼ ame he balua but e ka hnahic. 34Ke a löng ut Esau hofuc hwan kamen, me e ame tenge gan hmâ hmönyin, me haingen ka kamen, ka habe, Cica lö, hahnahici nya minya thö walö nya eang. 35Ke haingen, ka habe, A mwi ang kem ka iyawö, me a hia but hom ânyâm hnahic. 36Ke haingen, ka habe, Hawa, e ca ûcû hnödra hna hwenyi ien me Jekob? anyin a olo but obö nya: e ame bân ka hûgûnâ anyik atö; ke wâ bi, walang ang a hia but hûgûnâ hnahicik. Me e ame ha, ka habe, Hawa, e ba ke hnahic u je ip hobi könya minya? 37Ke Isaaka ame thu me ha kö Esau, ka habe, Wâ bi, oge hia but otilâ me hnân tuhâm, me oge hia but ham kâu je liamekeiny hia më me lanyin; ke oge hat e ge hwit me waina: ke ie ûnyi oge ma ânyâ köu nökuk? 38Ke haingö Esau ka kamen, ka habe, Cica lö, hawa khaca thibi hnahic unyâm? Hahnahici nya minya thö, walö nya ang. Ke Esau ame tenge hwege göranyai. 39Me Isaaka a kamen ame thu kâu, me ha, ka habe,
Wâ bi, ame he ka e hnyabam hnyi kânâ ae pipikhenya,
Me hau ûnyi hnyi drany ethö;
40Ke u me he ka möt hnen ânyâm hele vat, ke u ma he ka bi athnyabainy kem;
Ke haba hnyi ûen u ka he ka hon,
Me u ma he ka hota degecâ ûnyi hon nyem hnen hna ohmâ.
41Ke Esau ame hûkötö ga Jekob, can hnahic a ham kâu kamen: ke haingö Esau eû hnyi hnyekon, ka habe, E hakekeny jut ûen ka hnyamoki Cica, me oge me he ka hlingö Jekob a keik. 42Ke adre me thumetu Rebeka ge hofuc ho Esau nokon a bân; me e ame ûkhûnöng ka hao Jekob nokon a wakeiat, me haingen kâu, ka habe, Wâ bi, Esau a tuhâm ame ip hnâm he ka hlingö u. 43Anyin a wale nökuk lö, löng ju hoton hok hofuc, me todrö, kec dö Karan ai kö Labana a hanik; 44me tha laba më hnyi ke je bong, ke ne o but ame aû but hmönyin anyin tuham; 45ke ne o but ame hwiö but hna hmönyini u hnen tuhâm, me ame hnying ut hnâm hna ânyâ kâu: ke hamök he ka ûkhûnöng ka hao u ûheny e: hnân eû ka tha hiʼ öbu gak hnyi bong a khaca?
46Ke haingö Rebeka kö Isaaka, ka habe, E hmak ut hnyekuk can li momo Heth: a ne he Jekob ka hok âiân ûnyi hnyi je lakon Heth a je hlu, helâ mödru li momoiny hnyei, hnân eû hmetu möt könya?
Pilihan Saat Ini:
Genese 27: IAAI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
maintained by the British and Foreign Bible Society